Search Results For: ဗြိတိန်

ဗြိတိန် လျှို့ဝှက်ကုဒ်ဖော်သင်္ချာပညာရှင် အလန်တူရင်၏ ရုပ်ပုံ ဂုဏ်ပြုသရုပ်ဖော်

ဗြိတိန်ရဲ့ အကြီးဆုံးသူလျှိုအေဂျင်စီ ဖြစ်တဲ့ ဗြိတိန်ဆက်သွယ်ရေးဌာနချုပ် GCHQ က လျှို့ဝှက်ကုဒ် ဖော်ထုတ်သူနဲ့ သင်္ချာပညာရှင် အလန်တူရင်ကို ဂုဏ်ပြုတဲ့အနေနဲ့ ကြီးမားတဲ့ ရောင်စုံ အနုပညာလက်ရာတစ်ခု ဖန်တီးပြုလုပ်ထားပါတယ်။

ဌာနချုပ်အလယ်က မြေပြင်မှာ ၃၃ ပေ ပတ်လည်ရှိတဲ့ ရုပ်ပုံအတွင်း တူရင် ပုံစံထုတ်ခဲ့တဲ့ ကုဒ်ဖော်ထုတ်တဲ့စက်ရဲ့ ဘီးတွေထဲမှာ တူရင်ရဲ့ ပုံကို သရုပ်ဖော်ထားပါတယ်။

အလန်တူရင်ဟာ ဒုတိယကမ္ဘာစစ်အတွင်း နာဇီဂျာမန်တွေကို ရင်ဆိုင်ရာမှာ ကူညီခဲ့သူဖြစ်ပြီး ခေတ်သစ်ကွန်ပျူတာပညာရပ်ရဲ့ ဖခင်လို့ မှတ်ယူလို့ရသူပါ။

သူဟာ ဗြိတိန် သူလျှိုတွေအတွက် နာဇီဂျာမန်တွေရဲ့ ရေတပ်လျှို့ဝှက်ကုဒ်ကို ဖော်ထုတ်တဲ့အဖွဲ့ကို ဦးဆောင်ပါတယ်။ ဒါပေမဲ့ ၁၉၅၂ ခုနှစ်မှာ တခြား အမျိုးသားတယောက်နဲ့ လိင်ဆက်ဆံမှုအတွက် အပြစ်ရှိကြောင်း ဝန်ခံခဲ့ရပြီး ဟော်မုန်းဆေးတွေ အတင်းအကျပ် ထိုးပေးတာ ခံခဲ့ရပါတယ်။

နောက် ၂ နှစ်အကြာ အသက် ၄၁ နှစ်အရွယ်မှာ တူရင်ဟာ ဆိုင်ယာနိုက်အဆိပ် သုတ်လိမ်းထားတဲ့ ပန်းသီးကို စားပြီး သူ့ကိုယ်သူ သတ်သေခဲ့ပါတယ်။

သူ့မွေးနေ့မှာ တူရင်ကို ဂုဏ်ပြုတဲ့အနေနဲ့ သူ့ပုံကို ရိုက်နှိပ်ထားတဲ့ စတာလင်ပေါင် ၅၀ တန် ငွေစက္ကူကို ထုတ်ဝေခဲ့ပါတယ်။ 

သူ သေဆုံးပြီး နှစ်ချီကြာလာတဲ့အခါမှာ တူရင်ဟာ ဘဝတလျှောက် ထင်ရာမြင်ရာ ဘက်လိုက် ဆုံးဖြတ်ခံ မုန်းထားခံရတဲ့ လိင်တူစုံမက်သူတွေရဲ့ သင်္ကေတ ဖြစ်လာခဲ့ပါတယ်။

ဓာတ်ပုံ- ရိုက်တာ

6 hours Ago

ဗြိတိန်နိုင်ငံသားများ အားလပ်ရက်အိမ်မှာသာနေထိုင်ကြရန် တရားရေးဝန်ကြီး တိုက်တွန်း

ဗြိတိန်အစိုးရဟာ နိုင်ငံသားတွေ နိုင်ငံခြားခရီးသွားဖို့ ခွင့်ပြုရေးနဲ့ ကိုရိုနာဗိုင်းရပ်စ် ဗီဇမျိုးကွဲသစ်တွေရဲ့ ခြိမ်းခြောက်မှုကို ဟန်ချက်ညီအောင် ချိန်ညှိ ထိန်းသိမ်းရမယ်လို့ တရားရေးဝန်ကြီး ရောဘတ် ဘတ်ခ်လန်းက ဘီဘီစီ သတင်းဌာနကို ဇွန် ၂၀ ရက်မှာ ပြောပါတယ်။

“ကျနော်တို့ အားလုံးဟာ ဖြစ်နိုင်တဲ့ နေရာတိုင်းမှာ နေရောင်အောက်မှာ အားလပ်ရက်ကို ခံစားချင်ကြတယ်။ ဒါပေမဲ့ ကျနော်တို့  အခွင့်အရေးနဲ့အတူ ကပ်ရောဂါ ဗီဇမျိုးကွဲတွေကို ထိန်းချုပ်ဖို့ လိုအပ်ချက်ကို ထိန်းညှိ ရမယ်”လို့ ဗြိတိန်တရားရေးဝန်ကြီးက ပြောပါတယ်။

ပြည်သူတွေ အားလုံး ကာကွယ်ဆေးထိုးပြီးချိန်ထိအောင် အားလပ်ရက်တွေကို အိမ်မှာ ကုန်ဆုံးဖို့ ဆုံးဖြတ်သင့်တယ်လို့ ပြည်သူ့ကျန်းမာရေးအရာရှိ ဆူဇန် ဟော့ပ်ကင်းစ်က ပြောပါတယ်။

ဗြိတိန်လေကြောင်းလိုင်းတွေနဲ့ ခရီးသွားလုပ်ငန်းကုမ္ပဏီတွေက နွေရာသီမစခင် ခရီးသွား ကန့်သတ်ချက် ဖြေလျှော့ပေးဖို့ အစိုးရကို ဖိအားတိုးပေးနိုင်ရေး ဇွန် ၂၃ ရက်ကို အရေးယူရေးနေ့အဖြစ် သတ်မှတ်ဖို့ စီစဉ်နေပါတယ်။

ဗြိတိန်မှာ အရွယ်ရောက်ပြီးသား ပြည်သူ ၈၁ ရာခိုင်နှုန်းကို ကာကွယ်ဆေး ပထမအကြိမ်ထိုးဆေး ထိုးနှံပြီးစီးပြီ ဖြစ်ပြီး ၅၉ ရာခိုင်နှုန်းကတော့ ကာကွယ်ဆေး ထိုးဆေး ၂ လုံးစလုံး အပတ်လည်အောင် ထိုးနှံ ပြီးစီးပြီလို့ တရားဝင် သတင်းအချက်အလက်တွေက ပြထားပါတယ်။

2 days Ago

မြန်မာစစ်တပ်က ကြောက်မက်ဖွယ်ရာဇဝတ်မှုများဆက်ကျူးလွန်နေဟု ဗြိတိန်သံအမတ်ပြော

မြန်မာစစ်တပ်ဟာ ကြောက်မက်ဖွယ်ရာဇဝတ်မှုတွေကို ဆက်ပြီး ကျူးလွန်နေတယ်လို့ မြန်မာနိုင်ငံဆိုင်ရာ ဗြိတိန်သံအမတ်ကြီးက  ပြောကြားလိုက်ပါတယ်။

ဇွန်လ ၁၅ ရက်က မကွေးတိုင်း၊  ပေါက်မြို့နယ်၊ ကင်းမရွာ တစ်ရွာလုံးကို   အကြမ်းဖက်စစ်တပ်က မီးရှို့လိုက်တာနဲ့ပတ်သက်ပြီး ဗြိတိန်သံအမတ်ဒန်ချက်က ပြောဆိုတာပါ။

မကွေးမြို့က ကျေးရွာတရွာလုံးကို စစ်တပ်က မီးရှို့ပြီး သက်ကြီးရွယ်အိုတချို့ မီးလောင်သေဆုံးခဲ့ရတယ်ဆိုတဲ့ သတင်းတွေအရ စစ်တပ်ဟာ ကြောက်မက်ဖွယ်ကောင်းတဲ့ ရာဇ၀တ်မှုတွေကို ဆက်လက်ကျူးလွန်နေကြောင်းနဲ့  မြန်မာပြည်သူတွေအပေါ် အလေးထားမှုမရှိကြောင်း ထပ်လောင်းဖော်ပြနေတာပဲ ဖြစ်တယ်လို့ သံရုံး ထုတ်ပြန်ချက်မှာ ဖော်ပြပါတယ်။

မကွေးတိုင်း၊  ပေါက်မြို့နယ်၊ ကင်းမရွာကို ဇွန် ၁၅ ရက် ညနေပိုင်းက အကြမ်းဖက်စစ်တပ်က  မီးရှို့ဖျက်ဆီးခဲ့ရာမှာ အသက် ၉၀ ဝန်းကျင် သက်ကြီးရွယ်အို အဘိုး၊ အဘွား လင်မယားနှစ်ယောက်မီးလောင်ကျွမ်း သေဆုံးခဲ့တာဖြစ်ပါတယ်။

ဒါ့ပြင် ကင်းမရွာကို စစ်တပ်က ဝင်ရောက်မီးရှို့တာကြောင့် အိမ်ခြေ ၂၄၀ လောက်ရှိတဲ့အနက် ၁၅ အိမ်လောက်သာကျန်ပြီး တစ်ရွာလုံးမီးလောင်ကျွမ်းပျက်ဆီးသွားခဲ့တာဖြစ်ပါတယ်။

7 days Ago

ဗြိတိန်ဝန်ကြီးချုပ် ဘောရစ်ဂျွန်ဆင်မင်္ဂလာဆောင်

ဗြိတိန်ဝန်ကြီးချုပ် ဘောရစ်ဂျွန်ဆင်ဟာ သူနဲ့ စေ့စပ်ထားတဲ့ ကယ်ရီစီမွန်နဲ့ ဝက်စ်မင်စတာ ဘုရားကျောင်းမှာ မေလ ၂၉ ရက်က တိုးတိုးတိတ်တိတ် မင်္ဂလာအခမ်းအနားကျင်းပခဲ့တယ်လို့ သဆန်းနဲ့ မေးလ်သတင်းစာတွေက မေလ ၃၀ ရက်မှာ ဖော်ပြထားပါတယ်။

ဒီသတင်းတွေနဲ့ ပတ်သက်ပြီး မှတ်ချက်ပေးဖို့ ဝန်ကြီးချုပ်ရုံး ပြောခွင့်ရက ယဉ်ယဉ်ကျေးကျေး ငြင်းပါတယ်။ ဧည့်သည်တွေဟာ အခမ်းအနားကို အချိန်ကပ်ပြီးမှ ဖိတ်ကြားခံခဲ့ရတာ ဖြစ်ပြီး ဝန်ကြီးချုပ်ရုံးက အကြီးတန်း အဖွဲ့ဝင်တွေတောင် မင်္ဂလာပွဲ အစီအစဉ် တွေကို သတိမထားမိခဲ့ဘူးလို့ သတင်းစာတွေက ဆိုပါတယ်။

အင်္ဂလန်မှာ ကိုဗစ်-၁၉  ကပ်ရောဂါ ထိန်းချုပ်ရေး ကန့်သတ်ချက်တွေကြောင့် မင်္ဂလာပွဲတွေကို လူအယောက် ၃၀ ပဲ တက်ဖို့ ကန့်သတ်ထားပါတယ်။

အသက် ၅၆နှစ် အရွယ် ဂျွန်ဆင်နဲ့ အသက် ၃၃ နှစ်အရွယ် စီမွန်စ် တို့ဟာ ဂျွန်ဆင် ဝန်ကြီးချုပ် ဖြစ်လာတဲ့ ၂၀၁၉ ခုနှစ်တည်းက ဒေါင်းနင်းလမ်းက ဝန်ကြီးချုပ် နေအိမ်မှာ အတူနေလာခဲ့ကြတာပါ။

မနှစ်က သူတို့ စေ့စပ်ကြောင်းလမ်းခဲ့ပြီး ကလေးရဖို့ မျှော်လင့်ထားတယ်လို့ ကြေညာခဲ့ပါတယ်။ အဲဒီနောက် ၂၀၂၀ ဧပြီမှာ သားယောက်ျားလေးတယောက် မွေးခဲ့ပါတယ်။

ဂျွန်ဆင်ဟာ မာရီနာဝှီလာနဲ့ အရင်က လက်ထပ်ပြီး ကလေး လေးယောက် မွေးခဲ့ ပါတယ်။ ၂၀၁၈ စက်တင်ဘာမှာတော့ အိမ်ထောင်သက် ၂၅ နှစ်ကို အဆုံးသတ်ပြီး ကွာရှင်းမယ်လို့ ကြေညာခဲ့ပါတယ်။ ဝှီလာနဲ့ လက်မထပ်ခင်က ဂျွန်ဆင်ဟာ အော်လေဂရာ မို့စ်တင် အိုဝမ်နဲ့ လက်ထပ်ခဲ့ပြီး အခု လက်ထပ်တဲ့ စီမွန်စ် ကတော့ တတိယမြောက်ဇနီး ဖြစ်လာပါတယ်။

3 weeks Ago

ဗြိတိန်ခရီးသွားများအတွက် ကိုဗစ်ကန့်သတ်ချက် စပိန်ဖြေလျှော့

ဗြိတိန်နိုင်ငံအတွင်း ကိုရိုနာဗိုင်းရပ်စ် ကူးစက်နှုန်းကျဆင်းလာနေလို့ မေ၂၀ရက်က စပြီး စပိန်နိုင်ငံကိုလာတဲ့ ဗြိတိန်နိုင်ငံသားတိုင်း ကိုရိုနာဗိုင်းရပ်စ် ကူးစက်ခံ မဟုတ်ကြောင်း သက်သေခံ PCR ကို ပြရမယ့် စည်းကမ်းချက်ကို ဖယ်ရှားပေးလိုက်ပြီလို့ စပိန်ခရီးသွားလုပ်ငန်းဝန်ကြီးက ပြောပါတယ်။

ဗြိတိန်ဈေးကွက်ကို ဖွင့်ခွင့်ပြုလိုက်ပြီဖြစ်လို့ သူတို့ စပိန်ကို လာနိုင်ပြီလို့ ဝန်ကြီးက သတင်းထောက်တွေကို အပတ်စဉ် အစိုးရအဖွဲ့အစည်းအဝေးအပြီးမှာ ပြောလိုက်ပါတယ်။

ဥရောပသမဂ္ဂ EU ရဲ့ ပြင်ပကနေ လာမယ့် မဖြစ်မနေ မဟုတ်တဲ့ ခရီးသွားတွေကို ခွင့်ပြုရေး EU စည်းမျဉ်းတွေကို ပြန်ပြီး ကျယ်ကျယ်ပြန့်ပြန့် သုံးသပ်မှု အစိတ်အပိုင်းအနေနဲ့ PCR လိုအပ်ချက် ပယ်ဖျက်ဖို့ စီစဉ်ခဲ့တာလို့ ရိုက်တာသတင်းဌာနက ရေးပါတယ်။

 အခုဗြိတိန်မှာ လူ ၁ သိန်းမှာ အယောက် ၅၀ နှုန်းသာ ကူးစက်မှု ရှိတော့တဲ့အတွက် ပြန်လှန်သုံးသပ်ချက်အရ ဒီနှုန်းအောက်မှာ ဆက်ရှိနေမယ်ဆိုရင် PCR လိုအပ်ချက် မပါဘဲ မေ၂၀ က စပြီး ဗြိတိန်နိုင်ငံသားတွေ လာနိုင်တယ်လို့ မာရိုတိုက ပြောပါတယ်။

 ခရီးသည်တွေ ပြန်လာရေး ကန့်သတ်ချက်ကို ပယ်ဖျက်ဖို့ ဗြိတိန်အစိုးရကို အားပေးတဲ့ အနေနဲ့ စပိန် ကိုယ်တိုင်ကလည်း ကိုယ့်နိုင်ငံအတွင်း ကူးစက်နှုန်းကို ကျအောင် လုပ်ရလိမ့်မယ်လို့ သူက ဖိအားပေး ပြောဆိုပါတယ်။

 ဗြိတိန်ဟာ နိုင်ငံခြားခရီးစဉ် အားလုံးနီးပါးကို လချီပြီး တားမြစ်ပိတ်ပင် ထားပြီးတဲ့နောက် မေ ၁၇ ရက်ကစလို့ နိုင်ငံခြားခရီးသွားခွင့်ကို ပြန်ပြီး ခွင့်ပြုပေးတော့မှာပါ။ 

ဒါပေမဲ့ စပိန်ကို သွားတဲ့ ဗြိတိန်နိုင်ငံသားတွေ ဗြိတိန်ကို ပြန်လာရင် ရောဂါခြေချုပ်နဲ့ ၁၀ ရက်နေရမယ့်အပြင် ကိုဗစ်-၁၉ ကပ်ရောဂါ ကူးစက်ခံ ဟုတ်၊ မဟုတ် ၂ကြိမ် စစ်ဆေးခံရမှာ ဖြစ်ပါတယ်။

ဗြိတိန်ခရီးသည် ၁၈ သန်းကျော်ဟာ စပိန်ကို ၂၀၁၉ ခုနှစ်ကို သွားရောက်လည်ပတ်ခဲ့ပြီး နိုင်ငံခြားခရီးသည် အများဆုံး အုပ်စုလည်း ဖြစ်ပါတယ်။

1 month Ago

ဗြိတိန်ဝန်ကြီးနှင့် ဒေါက်တာဆာဆာ ဆွေးနွေး၊ မြန်မာပြည်သူများ၏ ရဲစွမ်းသတ္တိကိုချီးကျူး

ဗြိတိန်ဓနသဟာယနှင့် ဖွံ့ဖြိုးမှုရုံး၊ နိုင်ငံခြားရေးဌာန အစိုးရအဖွဲ့ဝင် အာရှဒေသဆိုင်ရာ ဝန်ကြီး နိုင်ဂျယ်အဒမ်စ်ဟာ  အမျိုးသားညီညွတ်ရေးအစိုး (NUG) အပြည်ပြည်ဆိုင်ရာပူးပေါင်းဆောင်ရွက်ရေး ပြည်ထောင်စုဝန်ကြီး  ဒေါက်တာဆာဆာနဲ့ ဧပြီလ ၂၀ ရက်နေ့က မြန်မာနိုင်ငံအရေး ဆွေးနွေးခဲ့ကြပါတယ်။ 

ပြည်ထောင်စုလွှတ်တော်ကိုယ်စားပြုကော်မတီရဲ့ အရေးကြီးတဲ့လုပ်ဆောင်မှုတွေနဲ့ ကြားကာလအမျိုးသားညီညွတ်ရေးအစိုးရရဲ့  ဒီမိုကရေစီအတွက် ရပ်တည်ချက်ကို ကြိုဆိုတယ်လို့ ယူကေ ဝန်ကြီးက ပြောဆိုခဲ့ပါတယ်။ 

အကြမ်းဖက်အာဏာသိမ်းမှုအပေါ် ငြိမ်းချမ်းစွာဆန္ဒပြနေသူတွေရဲ့ ရဲစွမ်းသတ္တိကို ဝန်ကြီး အဒမ်စ်က  ချီးကျူးခဲ့ပြီး  ဒီမိုကရေစီလမ်းကြောင်း ပြန်လည်ဖော်ဆောင်ဖို့ စစ်အာဏာရှင်တွေ ကို ယူကေအစိုးရ အနေနဲ့   ဆက်လက်တိုက်တွန်းသွားမယ်လို့လည်း ပြောဆိုခဲ့ပါတယ်။

အဲဒီအပြင် အမျိုးသားညီညွတ်ရေးအစိုးရမှာ မတူကွဲပြားတဲ့ တိုင်းရင်းသားပေါင်းစုံ ပါဝင်မှု အတွက်လည်း ဝန်ကြီးအဒမ်စ်က  ချီးကျူးခဲ့ပြီး ရာဇဝတ်မှုကျူး လွန်သူတွေကို အရေးယူနိုင်ဖို့ လူ့အခွင့်ရေးချိုးဖောက်မှု သက်သေအထောက်ထားတွေ စုဆောင်းထိန်းသိမ်းဖို့လည်း ပြောဆိုခဲ့ ပါတယ်။ 

ဒီတွေ့ဆုံမှုနဲ့ ပတ်သက်ပြီး ဒေါက်တာဆာဆာကတော့ မြန်မာနိုင်ငံမှာ စစ်တပ်ရဲ့ အကြမ်းဖက်လုပ်ရပ်တွေ၊ သွေးချောင်းစီးမှုကို ရပ်တန့်ဖို့နဲ့ လူမျိုးတုံးသတ်ဖြတ်မှုဖြစ်လာနိုင်တဲ့ ပြည်တွင်းစစ်ကြီးကို တားဆီးနိုင်ဖို့အတွက် ဒီမိုကရေစီ ပြန်လည်ရယူဖို့ ကြိုးပမ်းမှုတွေကို ဆက်လက် ပံ့ပိုးကူညီနေတဲ့ ဗြိတန်အစိုးရကို လေးစားကျေးဇူးတင်တယ်လို့ သူ့ရဲ့ လူမှုကွန်ရက်မှာ ပြောထားပါတယ်။

2 months Ago

ဗြိတိန်ဘုရင်မကြီး၏ ကြင်ယာတော် ဖိလစ်ပ်မင်းသားကြီး ကွယ်လွန်

ဗြိတိန်နိုင်ငံ ဘုရင်မကြီး အယ်လစ်ဇဘက်သ်ရဲ့ ကြင်ယာတော် ဖိလစ်ပ်မင်းသားကြီးဟာ ဧပြီ ၉ ရက် ဒီကနေ့မှာ ကွယ်လွန်သွားခဲ့ပြီ ဖြစ်ပါတယ်။

ဒီအကြောင်းနဲ့ ပတ်သက်ပြီး ဘက်ကင်ဟမ်နန်းတော်က အတည်ပြု ထုတ်ပြန်ထားခဲ့ပြီး “ဘုရင်မကြီးအနေနဲ့ သူ့ရဲ့ ကြင်ယာတော်ခင်ပွန်းဖြစ်သူ အီဒင်ဘာရာမြို့စား မင်းသားကြီးဖိလစ်ပ် ကွယ်လွန်အနိစ္စရောက်တဲ့အကြောင်း ပူဆွေးဝမ်းနည်းစွာနဲ့ ကြေညာ လိုက်ပါတယ်” လို့ ဖော်ပြထားတာပါ။

“မင်းသားကြီးဟာ ဒီနေ့မနက်ပိုင်းမှာပဲ ဝင်ဒ်ဆာရဲတိုက်မှာ အေးချမ်းငြိမ်သက်စွာနဲ့ ကွယ်လွန်သွားခဲ့ပါတယ်”

ဖိလစ်ပ်မင်းသားကြီးဟာ အယ်လစ်ဇဘက်သ်ဘုရင်မကြီးနဲ့ လက်ထပ်ပြီး နှစ်ပေါင်း ၇၀ ကျော် နေထိုင်ခဲ့ပြီး မင်းသားကြီးဟာ ဗြိတိန်တော်ဝင်မင်းဆက်သမိုင်းမှာတော့ သက် တမ်းအရှည်ကြာဆုံး ကြင်ယာတော်မင်းသားကြီးလည်း ဖြစ်ပါတယ်။

ကွယ်လွန်ချိန်မှာ အသက် ၉၉ နှစ်အရွယ် ရှိနေပြီဖြစ်တဲ့ မင်းသားကြီးဟာ သူ့ရဲ့ သက်တမ်းတလျှောက် ဘုရင်မကြီး အယ်လစ်ဇဘက်သ်နဲ့အတူ တော်ဝင်ခရီးစဉ်ပေါင်း များစွာမှာ လိုက်ပါခဲ့သူဖြစ်ကာ ပရဟိတအကျိုးပြုလုပ်ငန်းတွေကြောင့်လည်း ထင်ရှားပါ တယ်။

2 months Ago

စစ်တပ်ပိုင်ကုမ္ပဏီ ၂ ခုကို အမေရိကန်နှင့် ဗြိတိန်က ပိတ်ဆို့အရေးယူ

မြန်မာ့စီးပွားရေးဦးပိုင်လီမိတက် (MEHL) နဲ့  မြန်မာ့စီးပွားရေးကော်ပိုရေးရှင်း (MEC) တို့ကို အမေရိကန်နဲ့ ဗြိတိန်နိုင်ငံတို့က  မတ်လ ၂၅  ရက်နေ့မှာ  ပို့ဆို့ဒဏ်ခတ် အရေးယူ မှုတွေပြုလုပ်ခဲ့ပါတယ်။

အခုလို စီးပွားရေးပိတ်ဆို့ရတာဟာ ပြီးခဲ့တဲ့ ဖေဖော်ဝါရီလ ၁ ရက်နေ့က အာဏာသိမ်းခဲ့တဲ့ စစ်တပ်ရဲ့ ပြည်သူလူထုအပေါ် ရက်ရက်စက်စက် သတ်ဖြတ်မှုတွေနဲ့ လူ့အခွင့် အရေးချိုးဖောက်မှုတွေ ကြောင့် ဖြစ်တယ်လို့ ဖော်ပြထားပါတယ်။

အမေရိကန်ဘဏ္ဍာရေးဝန်းကြီးဌာနရဲ့ ထုတ်ပြန်ချက်မှာ ဆိုရင်တော့ အခုလို ပြုလုပ်ရတာဟာ တိုင်းပြည်ရဲ့ များပြားတဲ့ ဓနဥစ္စာတွေကို  စစ်တပ်ကျောထောက်နောက်ခံပြုတဲ့ ဒီစီးပွားရေးလုပ်ငန်းကြီးတွေက တဆင့်ရယူထားတာ ဖြစ်တဲ့အတွက်ကြောင့်လို့ဆိုပါတယ်။

ဒီစစ်တပ်ကျောထောက်နောက်ခံပြု စီးပွားရေးလုပ်ငန်းကြီးတွေဟာ  တိုင်းပြည်စီးပွားရေးကို ကြီးမားတဲ့ အတိုင်းအတာ တစ်ခုထိ လွှမ်းမိုးခြယ်လှယ် ထားတာလည်းတွေ့ရပါတယ်။

မြန်မာစီးပွားရေးကိုခြယ်လှယ်လုပ်ကိုင်တဲ့အခါမှာ  ဆောက်လုပ်ရေး၊  သယ်ယူပို့ဆောင်ရေးလုပ်ငန်း၊ ဆက်သွယ်ရေးလုပ်ငန်း၊ သတ္တုတူးဖော်ရေးလုပ်ငန်း၊ ဟိုတယ်နဲ့ ခရီးသွားလုပ်ငန်း၊ စိုက်ပျိုးရေးလုပ်ငန်း၊ အစားအစာနဲ့ အဖျော်ယမကာလုပ်ငန်းတွေ အထိ လည်ပတ်လုပ်ကိုင်နေတာ တွေ့ရတဲ့အကြောင်းလည်းဖော်ပြထားပါတယ်။

အခုလို အရေးယူပိတ်ဆို့လိုက်တာနဲ့ ပတ်သတ်ပြီး ပြည်ထောင်စုလွတ်တော် ကိုယ်စားပြု ကော်မတီ (CRPH) ရဲ့ ကုလသမဂ္ဂဆိုင်ရာ အထူးသံတမန် ဒေါက်တာဆာဆာကလည်း အမေရိကန်နဲ့ ဗြိတိန်တို့ရဲ့  လုပ်ဆောင်ချက်အပေါ်ကျေနပ်ဝမ်းမြောက်ကြောင်းနဲ့  တခြားနိုင်ငံက ခေါင်းဆောင်တွေလည်း အချင်းချင်းပူးပေါင်းပြီး ပိုမိုပြင်းထန်ထိရောက်တဲ့   (Targeted Sanction) ပစ်မှတ်ထား ပိတ်ဆို့ဒဏ်ခတ်အရေးယူမှုတွေကိုချမှတ်စေလိုကြောင်းပြောကြားထားပါတယ်။

အလားတူ   မြန်မာ စစ်အာဏာသိမ်းမှုနဲ့ပတ်သက်ပြီး ပြီးခဲ့တဲ့ မတ်လ ၂၅ ရက်နေ့က အမေရိကန်အထက်လွှတ်တော် နိုင်ငံခြားဆက်ဆံရေး ကော်မတီမှာပြုလုပ်ခဲ့တဲ့  ကြားနာပွဲမှာလည်း လက်ရှိ အာဏာမတရားရယူထားတဲ့ စစ်ကောင်စီကို တရားဝင် အသိအမှတ် မပြုဖို့၊ ပိတ်ဆို့ အရေးယူမှုတွေလုပ်တဲ့အခါ စစ်အုပ်စုကိုပိုပြီး အထိနာစေမယ့်  Collective Sanctions တွေကို နိုင်ငံတကာအဖွဲ့အစည်းတိုင်းက ပူးပေါင်းလုပ်ဆောင်သွားဖို့ ၊ အဓိကဝင်ငွေရလမ်းဖြစ်တဲ့ ရေနံနဲ့ သဘာဝဓာတ်ငွေ့လုပ်ငန်းကိုလည်း ပိတ်ဆို့အရေးယူမှုတွေဆောင်ရွက်ဖို့၊ အစိုးရရဲ့ လက်ရှိကျူးလွန်နေတဲ့ ရက်စက်မှုတွေ အမြန်ဆုံးရပ်တန့်သွားဖို့အတွက် အရေးယူဆောင်ရွက်မှုတွေ ပြုလုပ်ဖို့   စတဲ့ အချက်တွေကိုတောင်းဆို ဆွေးနွေးခဲ့ကြပါတယ်။

ဒီဆွေးနွေးပွဲမှာ ဆွေးနွေးခဲ့ကြတဲ့ သူတွေကတော့ အမေရိကန်နိုင်ငံခြားရေး ဝန်ကြီးဌာန အရှေ့အာရှနဲ့ ပစိဖိတ်ရေးရာ ဌာနရဲ့ ဒုတိယ လက်ထောက် နိုင်ငံခြားရေးဝန်ကြီး Atul Keshap၊ ဒီမိုကရေစီ၊ လူ့အခွင့်အရေး၊ အလုပ်သမားရေးရာ ယာယီ ဒု လက်ထောက်ဝန်ကြီး Scott Busby တို့နဲ့အတူ မြန်မာနိုင်ငံ လူ့အခွင့်အရေးဆိုင်ရာ ကုလသမဂ္ဂ အထူးကိုယ်စားလှယ် Tom Andrews နဲ့ အမေရိကန်ပြည်ထောင်စု အမျိုးသမီးရေးရာ သံအမတ်ကြီးဟောင်း Kelley Currie တို့ဖြစ်ပါတယ်။

3 months Ago

မြန်မာနိုင်ငံ ဒီမိုကရေစီပြန်သွားသည့်လမ်း ရှာဖွေရမည်ဟု ဗြိတိန်နိုင်ငံခြားရေးဝန်ကြီးပြော

မြန်မာနိုင်ငံမှာ ဒီမိုကရေစီပြန်သွားတဲ့လမ်းကို ရှာဖွေရမယ်လို့ ဗြိတိန်နိုင်ငံခြားရေးဝန်ကြီး ဒေါ်မစ်နစ်ရပ်ဘ်က ဖေဖော်ဝါရီ ၁၈ ရက်မှာ ပြောဆိုပါတယ်။ 

အရပ်သားအစိုးရကို ဖြုတ်ချတဲ့အတွက်  ဗြိတိန်အစိုးရက မြန်မာဗိုလ်ချုပ်ကြိးတွေကို ဒဏ်ခတ်အရေးယူပြီးနောက် မြန်မာနိုင်ငံမှာ လူ့အခွင့်အရေးချိုးဖောက်သူတွေကို တာဝန်ခံခိုင်းရမယ်လို့ ဗြိတိန် နိုင်ငံခြားရေးဝန်ကြိး ရပ်ဘ်က ဆိုပါတယ်။ 

ဖေဖော်ဝါရီ ၁ ရက် အာဏာသိမ်းမှုကို အနောက်နိုင်ငံတွေကလည်း ပြစ်တင်ရှုတ်ချထားပါတယ်။ 

ပြီးခဲ့တဲ့ သီတင်းပတ်မှာ အမေရိကန်အစိုးရက မြန်မာစစ်ခေါင်ဆောင်တွေအပေါ် အရေးယူဒဏ်ခတ်တာတွေ ချမှတ်ပြိးနောက် ဗြိတိန်နဲ့  ကနေဒါ နှစ်နိုင်ငံစလုံးက ဒဏ်ခတ်မှုတွေကို ကြေညာခဲ့ပါတယ်။ 

မြန်မာစစ်ဗိုလ်ချုပ် ၃ ဦးကို ပိုင်ဆိုင်မှု သိမ်းဆည်းတာနဲ့ ခရီးသွားလာခွင့် ပိတ်ပင်တာတွေ ချမှတ်မယ်လို့ ဗြိတိန်က ကြေညာပြီး စစ်ဘက်အရာရှိ ၉ ဦးကို အရေးယူသွားမယ်လို့ ကနေဒါက ကြေညာပါတယ်။ 

မွတ်စလင်တွေနဲ့ တခြားလူနည်းစုတွေအပေါ် လူ့အခွင့်အရေး ချိုးဖောက်တယ်လို့ စွပ်စွဲပြီး ဗြိတိန်အစိုးရက  အာဏာသိမ်းခေါင်းဆောင် မင်းအောင်လှိုင်ကို  အရေးယူဒဏ်ခတ်တာတွေ လုပ်ထားတယ်လို့ ရိုက်တာသတင်းမှာ ဖော်ပြထားပါတယ်။

4 months Ago

မြန်မာ့အရေး ကုလသမဂ္ဂလူ့အခွင့်ရေးကောင်စီ အထူးအစည်းအဝေးခေါ်ယူရန် ဗြိတိန်ကြိုးပမ်း

ပြီးခဲ့တဲ့ သီတင်းပတ်က စစ်အာဏာသိမ်းခဲ့တဲ့ မြန်မာနိုင်ငံတွင်းက အကျပ်အတည်းတွေနဲ့ ပတ်သက်ပြီး အထူးအစည်းအဝေးခေါ်ယူကျင်းပဖို့ ကုလသမဂ္ဂ လူ့အခွင့်အရေးကောင်စီ UNHRC ကို ဗြိတိန်သံတမန်က ဖေဖော်ဝါရီ ၈ ရက်မှာ အဆိုတင်ခဲ့ပါတယ်။

သံအမတ်ကြီး ဂျူလီယန်ဘရိတ်ဝိတ်သ်က ဒါဟာ ဥရောပသမဂ္ဂနဲ့အတူ တောင်းဆိုချက်ပါလို့ ဂျီနီဗာဖိုရမ်က UNHRC ရဲ့ အစည်းအဝေးမှာ ပြောပါတယ်။

ဒါဟာ စစ်တပ်က အရပ်ဘက် လူ့အဖွဲ့အစည်းတွေနဲ့ ဒီမိုကရေစီနည်းလမ်းတကျ ရွေးကောက်ထားတဲ့ နိုင်ငံရေးသမားတွေကို မတရား ဖမ်းဆီးမှုနဲ့ မြန်မာနိုင်ငံအတွင်း အရေးပေါ် အခြေအနေ ကြေညာချက်ကို တုံ့ပြန်တာ ဖြစ်တယ်။

နိုင်ငံအတွင်း လူ့အခွင့်အရေးအတွက် စိုးရိမ်စရာ ဂယက်ရိုက်ခတ်မှုတွေ ရှိနေခဲ့ ပြီးပြီလို့ သူက ဆက်ပြောပါတယ်။

စစ်အာဏာသိမ်းထားမှုနဲ့ အရပ်သားအစိုးရခေါင်းဆောင်  နိုင်ငံတော်အတိုင်ပင်ခံပုဂ္ဂိုလ်  ဒေါ်အောင်ဆန်းစုကြည်ကို ဖမ်းဆီးထားမှုနဲ့ပတ်သက်လို့  မြန်မာနိုင်ငံတဝန်းမှာ ပြည်သူလူထုတွေ၊ ကျောင်းသူကျောင်းသားတွေ၊ ဆရာဆရာမတွေ၊ ကျန်းမာရေးဝန်ထမ်းတွေ  ဝန်ထမ်းတွေပူးပေါင်းပြီး  စစ်အစိုးရကို ဆန့်ကျင် ဆန္ဒပြနေကြပါတယ်။

စစ်အစိုးရကတော့ သူတို့ အာဏာသိမ်းရတာဟာ မဲမသမာမှုကြောင့်လို့ အကာအကွယ်ယူ ပြောဆိုရင်း ရွေးကောက်ပွဲ အသစ် ပြန်ကျင်းပပေးမယ်လို့ ကတိပြုထားပါတယ်။

4 months Ago

လူမျိုးရေးခွဲခြားမှုအတွက် လူမှုကွန်ရက်ကုမ္ပဏီများကို ပြင်းပြင်းထန်ထန်အရေးယူရန် ဗြိတိန် ပြင်ဆင်

လူမျိုးရေးခွဲခြားမှုတွေ နဲ့ ပတ်သက်လို့ လူမှုကွန်ရက်ကုမ္ပဏီတွေအပေါ် တင်းကြပ်သွားဖို့ ပြင်ဆင်ထားတယ်လို့ ဗြိတိန်အစိုးရက ပြောပါတယ်။ 

ဒီကိစ္စအတွက်ဒဏ်ငွေဟာ ပေါင်ဘီလီယံချီ ဖြစ်နိုင်တယ်လို့လည်း သတိပေးခဲ့ပါတယ်။

မကြာသေးခင်က ယူနိုက်တက်နဲ့ချဲလ်ဆီးအသင်းတို့က ကစားသမားတချို့ ခွဲခြား တိုက်ခိုက်မှုတွေနဲ့ ကြုံတွေ့ခဲ့ရပြီးနောက် အွန်လိုင်းကနေ လူမျိုးရေးခွဲခြားမှုဟာ အာရုံစိုက်စရာ ဖြစ်လာခဲ့ပါတယ်။ 

ခွဲခြားတိုက်ခိုက်ခံရသူတွေထဲမှာ ယူနိုက်တက်တိုက်စစ်မှူး မားကပ်ရက်ဖို့ဒ်လည်း ပါဝင်နေခဲ့ပြီး သူခွဲခြားခံခဲ့ရတာဟာ လူသားဆန်မှု နဲ့ လူမှုကွန်ရက်တို့ရဲ့ အဆိုးရွားဆုံးအခြေအနေ ဖြစ်တယ်လို့ပြောပါတယ်။ 

ယူနိုက်တက်ကစားသမားတွေဖြစ်တဲ့ တွန်ဇမ်ဘီနဲ့ မာရှယ်တို့ဟာလည်း ဒီလိုခွဲခြားမှုတွေနဲ့ ရင်ဆိုင်ခဲ့ရပါသေးတယ်။ 

ချဲလ်ဆီးနောက်ခံလူ ရိစ်ဂျိမ်းဟာလည်း ပြီးခဲ့တဲ့သီတင်းပတ်အတွင်းမှာ ခွဲခြားမှုတွေနဲ့ ကြုံတွေ့ခဲ့ရပြီး တစ်ခုခု အပြောင်းအလဲလုပ်သင့်နေပြီလို့ပြောခဲ့ပါတယ်။

ဒါ့ကြောင့် ယူနိုက်တက်နဲ့ ချဲလ်ဆီးအသင်းတို့က လူမှုကွန်ရက်ကုမ္ပဏီတွေအပေါ် တင်းကြပ်တဲ့ ပြစ်ဒဏ်တွေချမှတ်ဖို့ တောင်းဆိုခဲ့ပြီး ဒီတောင်းဆိုမှုတွေအတိုင်း ဆောင်ရွက်ဖို့ အစိုးရက အဆင်သင့်ဖြစ်နေပုံရပါတယ်။ 

ဘီဘီစီနဲ့ အင်တာဗျူးတစ်ခုမှာ ဗြိတိန်ယဉ်ကျေးမှုဝန်ကြီး အိုလီဗီယန်ဒေါ်ဒန်က အစိုးရဟာ အွန်လိုင်းတိုက်ခိုက်မှုတွေ ဖယ်ရှားရေး စတင်ဆောင်ရွက်ဖို့ အဆင်သင့်ဖြစ်နေပြီလို့ ပြောပါတယ်။ 

“ပိုပြီးပြင်းထန်တဲ့တရားဥပဒေဆိုင်ရာ ဆောင်ရွက်ချက်တွေကို ချမှတ်ဖို့ဆန္ဒရှိနေပါတယ်။ ပိုပြီးတင်း ကြပ်သွားဖို့လည်း ပြင်ဆင်ထားပါတယ်။ ကုမ္ပဏီတွေအနေနဲ့ ဒါကို မတားဆီးနိုင်ဘူး ဆိုရင် အစိုးရအနေနဲ့ ဒဏ်ငွေကို တင်းတင်းကပ်ကြပ်ချမှတ်ဆောင်ရွက်သွားမှာဖြစ်ပါတယ်။ ဒဏ်ငွေ ပမာဏဟာ ကမ္ဘာလုံးဆိုင်ရာဝင်ငွေရဲ့ ၁၀ ရာခိုင်နှုန်းလောက်အထိ ရှိလာနိုင်ပါတယ်။ လူမှုကွန်ရက်ကုမ္ပဏီတချို့ဟာ ပေါင်ဘီလီယံချီပြီးလည်ပတ်နေကြ တာပါ” လို့ သူက ပြောပါတယ်။ 

ဒီအခြေအနေမှာ ထိပ်ဆုံးရောက်လူမှုကွန်ရက်ကုမ္ပဏီကြီးတွေကို ရာဇဝတ်မှုဆိုင်ရာ ကိစ္စတွေနဲ့ အရေးယူသွားဖို့ အထိရှိတယ်လို့လည်း ဒေါ်ဒန်ကပြောပါတယ်။

 “လုံးဝဒီလိုလုပ်ဖို့ ဆန္ဒမရှိပေမဲ့ အရမ်းကြီးဆိုးရွားတဲ့ ကိစ္စတွေမှာ ဆိုရင်ထိပ်တန်း ကုမ္ပဏီကြီးတွေကို ရာဇဝတ်မှုဆိုင်ရာ ပိတ်ဆို့အရေးယူမှုတွေအထိ လုပ်ဆောင် သွားဖို့ ပြင်ဆင်ထားပါတယ်” လို့ သူကဆက်ပြောခဲ့ပါတယ်။

5 months Ago

ဗြိတိန်နှင့် တောင်အာဖရိက မျိုးကွဲကိုရိုနာဗိုင်းရပ်စ်များကို ကာကွယ်နိုင်ဟု မိုဒါနာကုမ္ပဏီ ပြော

အမေရိကန်နိုင်ငံအခြေစိုက် မိုဒါနာ ကာကွယ်ဆေး ထုတ်လုပ်ရေးကုမ္ပဏီက သူ့ရဲ့ ကိုဗစ်-၁၉ ကပ်ရောဂါ ကာကွယ်ဆေးဟာ ဗြိတိန်နဲ့ တောင်အာဖရိကနိုင်ငံတွေမှာ တွေ့ထားတဲ့ ကိုရိုနာဗိုင်းရပ်စ် ဗီဇမျိုးကွဲတွေကနေပါ ကာကွယ်ပေးနိုင်တယ်လို့ ယုံကြည်တယ်လို့ ဇန်နဝါရီ ၂၅ ရက်မှာ ပြောလိုက်ပါတယ်။

မိုဒါနာက “ဗြိတိန်မှာ တွေ့ရတဲ့ ဗီဇမျိုးကွဲကို စမ်းသပ်ရာမှာတော့ ရောဂါပိုးကို တုံ့ပြန်တဲ့ ပဋိပစ္စည်းရဲ့ တုံ့ပြန်မှုတွေ လျော့ကျမသွားတာ တွေ့ရတယ်။ တောင်အာဖရိကမှာ တွေ့ရတဲ့ ဗီဇမျိုးကွဲသစ်ကို စမ်းသပ်ရာမှာ ပဋိပစ္စည်းတုံ့ပြန်မှု လျော့ကျလာတာကို တွေ့ခဲ့ပေမယ့် ထိုးဆေး ၂ ကြိမ် ထိုးပြီးရင်တော့ ကာကွယ်နိုင်မယ်လို့ ယုံကြည်နေဆဲပဲ။ တောင်အာဖရိက ဗီဇမျိုးကွဲကို ပစ်မှတ်ထားပြီး ကာကွယ်ဆေးအသစ်ကို စမ်းသပ်မယ်” လို့  သတင်းထုတ်ပြန်ပါတယ်။

ဗြိတိန်၊ တောင်အာဖရိကနဲ့ ဘရာဇီးတို့မှာ ကိုဗစ်-၁၉ ကပ်ရောဂါကို ဖြစ်စေတဲ့ ဗိုင်းရပ်စ်ရဲ့ ဗီဇမျိုးကွဲအသစ်တွေ ပေါ်လာလို့ ဒီမျိုးကွဲသစ်တွေဟာ ကာကွယ်ဆေးရဲ့ ထိရောက်မှုကို လျော့နည်းစေမှာကို စိုးရိမ်နေကြတာပါ။

ဘေးလာကောလိပ် အပူပိုင်းဒေသ ဆေးပညာအမျိုးသားဌာနရဲ့ ဌာနမှူး ဒေါက်တာ ပီတာဟိုတက်ဇ်က “ဗိုင်းရပ်စ်ကို သတ်တဲ့နေရာမှာ ကာကွယ်ဆေးရဲ့ စွမ်းအင် ခြောက်ပုံတပုံ လျော့ကျသွားတယ်လို့ ကျနော် ကြားထားတယ်။ ဒါပေမဲ့ ပဋိပစ္စည်းရဲ့ စွမ်းအင်အဆင့်က မြင့်နေဆဲမို့ ဒီလို လျော့ကျပေမယ့် ကာကွယ်ရေးနည်းနည်းကျဆင်းနိုင်ပေမယ့် အနှောင့်အယှက် မဖြစ်နိုင်ဘူး။ ကာကွယ်ဆေးက ထိထိရောက်ရောက် ကာကွယ်နိုင်တုန်းပဲ” လို့  ပြောပါတယ်။

ကာကွယ်နိုင်စွမ်းလျော့ကျတဲ့ သက်သေတွေ ပေါ်ထွက်လာခဲ့ရင် အနာဂတ်မှာ ကာကွယ်ဆေး ထိုးဆေးအသစ်ကို ထုတ်နိုင်တယ်လို့လည်း မိုဒါနာက ပြောပါတယ်။

ဖိုက်ဇာ နိုင်ငံတကာကော်ပိုရေးရှင်းနဲ့ ဘိုင်အိုအန်တက်ခ် ကုမ္ပဏီတို့ကလည်း သူတို့ရဲ့ ကာကွယ်ဆေးဟာ ဗြိတိန်မှာ တွေ့ရတဲ့ ဗီဇမျိုးကွဲကို ထိထိရောက်ရောက် ကာကွယ်နိုင်ကြောင်း စမ်းသပ်ချက်တွေက ပြထားပါတယ်။ ဒါပေမဲ့ တောင်အာဖရိကမှာ တွေ့ရတဲ့ ဗီဇမျိုးကွဲနဲ့ ပတ်သက်တဲ့ ရလဒ်တွေတော့ မသုံးသပ်ရသေးဘူးလို့ ပြောပါတယ်။

မိုဒါနာဟာ ကိုဗစ်-၁၉ ကပ်ရောဂါ ဖြစ်စေတဲ့ ဗိုင်းရပ်စ်ရဲ့ ဗီဇမျိုးကွဲတွေအပေါ် သူတို့ စမ်းသပ်ချက်က ရတဲ့ သတင်းအချက်အလက်တွေကို သူတို့ရဲ့ အင်တာနက်စာမျက်နှာ ဘိုင်အိုအာခိုက်ဗ်ပေါ်မှာ ဖြန့်ချိထားဖို့ စီစဉ်နေတယ်လို့လည်း ပြောပါတယ်။

5 months Ago

ကိုရိုနာဗိုင်းရပ်စ်မျိုးကွဲ အသေအပျောက်များနိုင်ဟု ဗြိတိန်ဝန်ကြီးချုပ် သတိပေး

ဗြိတိန်မှာတွေ့ရတဲ့ ကိုရိုနာဗိုင်းရပ်စ်မျိုးကွဲဟာ အသေအပျောက်များနိုင်တယ်ဆိုပြီး  ကနဦး အထောက်အထားတွေက ဖော်ပြတယ်လို့ ဝန်ကြီးချုပ် ဘောရစ်ဂျွန်ဆင်က ပြောပါတယ်။   ဒါပေမဲ့ ကိန်းဂဏန်းတွေနဲ့ပတ်သက်လို့ မရေရာမှုတွေ ကြီးကြီးမားမား ရှိနေဆဲဖြစ်ပြီး ကာကွယ်ဆေးတွေဟာ ဗိုင်းရပ်စ်မျိုးကွဲအပေါ် ကာကွယ်နိုင်စွမ်းရှိမယ် မျှော်လင့်ရပါတယ်။   ဒီကိန်းဂဏန်းဟာ ဗိုင်းရပ်စ်အဟောင်း ဒါမှမဟုတ် ဗိုင်းရပ်စ်အသစ် ကူးစက်ခံရသူတွေရဲ့  သေဆုံးနှုန်းတွေကို သင်္ချာပညာရှင်တွေ နှိုင်းယှဉ်ရာကနေ ထွက်ပေါ်လာတာပါ။  ပိုမိုကူးစက်တဲ့ ဗိုင်းရပ်စ်သစ်ဟာ ဗြိတိန်တလွှားမှာ ကျယ်ကျယ်ပြန့်ပြန့် ကူးစက်နေပြီ ဖြစ်ပါတယ်။  ဇန်နဝါရီ ၂၂ ရက်က ဒေါင်းနင်းလမ်းနေအိမ်မှာလုပ်တဲ့ သတင်းစာရှင်းလင်းပွဲအတွင်း ဝန်ကြီးချုပ် ဂျွန်ဆင်က "ဗိုင်းရပ်စ်မျိုးကွဲသစ်ဟာ ပိုမိုကူးစက်လွယ်တာအပြင် အခုဆိုရင် သေဆုံးနှုန်း မြင့်မားတာနဲ့ ဆက်နွယ်နိုင်တယ်ဆိုတဲ့ အထောက်အထားရှိနေတယ်" လို့ ပြောဆို ပါတယ်။  အဲဒီအထောက်အထားကို အသက်ရှူလမ်းကြောင်းဗိုင်းရပ်စ်သစ် ခြိမ်းခြောက်မှုဆိုင်ရာ အကြံပေးအဖွဲ့ (Nervtag) က သိပ္ပံပညာရှင်တွေ ဖော်ထုတ်ထားတာ ဖြစ်ပါတယ်။  ဒါပေမဲ့ ကံသေကံမ ပြောဆိုဖို့က လိုသေးတယ်လို့လည်း ဘီဘီစီက တင်ပြပါတယ်။
5 months Ago

ဗြိတိန်တွင် ကိုဗစ်ကြောင့် သေဆုံးသူ ၉၃,၀၀၀ ကျော်ရှိလာ 

ဗြိတိန်မှာ ကိုဗစ်-၁၉ကြောင့် စုစုပေါင်း သေဆုံးသူ  ၉၃,၀၀၀ ကျော် ရှိလာပြီး ဥရောပမှာ သေဆုံးသူ အများဆုံးနဲ့ ကမ္ဘာမှာ ပဉ္ဓမ မြောက် အများဆုံးဖြစ်ပါတယ်။   ဇန်နဝါရီ ၂၀ ရက်က သေဆုံးသူ ၁,၈၂၀ နဲ့ စံချိန်တင် မြင့်တက်ခဲ့ပြီး ဆေးရုံတက်ကုသနေသူ ၃၉,၀၀၀ ကျော်ရှိ ပါတယ်။   မစ်တန်ကီးဆေးရုံမှာ  လူနာတွေဟာ အသက်လုနေရပြီး  ကျန်းမာရေး ဆိုးရွားသူအဖို့ သေမင်းက အသာစီး ရနေပါတယ်။  လန်ဒန်အနောက်မြောက်ပိုင်းက ဆေးရုံမှာ  ကိုဗစ်ကူးစက်မှုတွေက ပထမတစ်ကြိမ်ထက် ပိုပြင်းထန်နေပါတယ်။  ဆေးရုံဆောင်တွေမှာ ငယ်ရွယ်တဲ့လူနာတွေနဲ့ ပြည့်နှက်နေပြိး  ရောဂါအဆိုးဆုံးတွေထဲက မဆိုစလောက်သာ ကုသမှုကြောင့် သက်သာကြပါတယ်။ အဲဒီဆေးရုံမှာ ဗန်တီလေတာပေါ် တင်ရတဲ့ အသက်အငယ်ဆုံးဟာ ၂၈ နှစ်သာ ရှိတယ်လို့လည်း သိရပါတယ်။  ဆရာဝန် ၊ သူနာပြုတွေဟာလည်း ခြေကုန်လက်ပန်းကျတဲ့ ဒဏ်နဲ့ ကြုံနေရပါတယ်။  "ကိုဗစ်ပထမလှိုင်းတုန်းက အိုင်စီယူရောက်လာတဲ့ လူနာတွေရဲ့သေဆုံးနှုန်းက ၄၀ရာခိုင်နှုန်း ဝန်းကျင်ဖြစ်ပေမဲ့ ဒီတစ်ကြိမ်မှာတော့ သေဆုံးနှုန်း ၈၀ ရာခိုင်နှုန်း ရှိတယ်"ဆိုပြီး  ဆေးရုံတာဝန်ရှိသူ တစ်ဦးက ပြောဆိုတယ်လို့ ရိုက်တာက ဖော်ပြပါတယ်။
5 months Ago

ဗြိတိန်၌ ကိုဗစ်-၁၉ ကြောင့် သေဆုံးသူ စံချိန်တင်မြင့်တက်၊ ဆေးရုံတွင် အောက်ဆီဂျင်ပြတ်လပ်

ဗြိတိန်မှာ ကိုဗစ်-၁၉ ကပ်ရောဂါကြောင့် သေဆုံးသူ စံချိန်တင်မြင့်တက်နေပြီး ဆေးရုံတွေမှာ အောက်ဆီဂျင် ပြတ်လပ်နေတာမို့ ကာကွယ်ဆေး ဖြန့်ချိရေးကို အချိန်လု လုပ်နေရတယ်လို့ ဝန်ကြီးချုပ် ဘောရစ်ဂျွန်ဆင်က ပြောပါတယ်။ ဝန်ကြီးချုပ်ရဲ့ ထိပ်တန်းဆေးဘက် အကြံပေးကလည်း ကပ်ရောဂါရဲ့ အဆိုးဆုံး သီတင်းပတ်တွေ ရောက်တော့မယ်လို့ ပြောဆိုထားပါတယ်။ ကိုရိုနာဗိုင်းရပ်စ်ရဲ့ ပိုကူးစက်လွယ်တဲ့ မျိုးကွဲသစ်ဟာ အခုအခါ ပြည်သူကြားမှာ တိုးမြှင့်ကူးစက်နေပြီး လူအယောက် ၂၀ မှာ တစ်ယောက်နှုန်းနဲ့ လန်ဒန်မှာ ကူးစက်နေပါတယ်။  ဆေးရုံတွေမှာ လူနာတွေနဲ့ ဝန်ပိပြီး ကျန်းမာရေးဝန်ဆောင်မှု မနိုင်မနင်းဖြစ်မယ့် အန္တရာယ် ရှိနေပါတယ်။ ဒါကြောင့် လာမယ့် လလယ်မှာ လူ ၁၅ သန်းကို ကာကွယ်ဆေးထိုးပေးမှာပါ။ ဗြိတိန်မှာ ကိုဗစ်-၁၉ ကြောင့် သေဆုံးသူ အယောက် ၈၁,၀၀၀ ရှိနေပြီး ကမ္ဘာမှာ သေဆုံးသူ ပဉ္စမ အများဆုံးဖြစ်နေတာပါ။ လူ ၃ သန်းကျော် ဗိုင်းရပ်စ်ကူးစက်ခံထားရပါတယ်။  အင်္ဂလန်အနောက်တောင်ပိုင်း ဘရစ္စတိုလ်မြို့က ကာကွယ်ဆေးစင်တာ တစ်ခုကို သွားရာမှာ ဝန်ကြီးချုပ် ဂျွန်ဆင်က အမျိုးသားကျန်မာရေးဝန်ဆောင်မှု ကြုံနေရတဲ့ ခြိမ်းခြောက်မှု၊ အထူးကြပ်မတ်ကုသဆောင် အိုင်စီယူတွေမှာ လိုအပ်ချက် မြင့်လာတဲ့ အနေအထား၊ အသက်ရှူ အားကူစက် ဗန်တီလေတာ တပ်ဆင်နိုင်တဲ့ ခုတင် နည်းနေတဲ့ အခြေအနေနဲ့  တချို့နေရာတွေမှာ အောက်ဆီဂျင် ပြတ်လပ်တာတွေ ရှိတာမို့ ကာကွယ်ဆေးထိုးဖို့ အချိန်လုလုပ်နေရတယ်လို့ ပြောပါတယ်။  လက်ရှိအချိန်အထိ  ဗြိတိန်မှာ လူပေါင်း ၂ ဒသမ ၄ သန်းကို ကာကွယ်ဆေး ထိုးနှံပြီး ဖြစ်တယ်လို့လည်း ဂျွန်ဆင်က ပြောပါတယ်။
5 months Ago

ဗြိတိန်တွင် ကိုဗစ်-၁၉ ကူးစက်ခံ သေဆုံးသူ ၈ သောင်းကျော်ရှိလာ

ဗြိတိန်နိုင်ငံမှာ ကိုဗစ်-၁၉ ကပ်ရောဂါ ကူးစက်ခံ သေဆုံးသူ ဦးရေဟာ ဇန်နဝါရီ ၉ ရက်က အယောက် ၈ သောင်းကျော်သွားပြီလို့ ရိုက်တာ သတင်းမှာ ဖော်ပြပါတယ်။  သောကြာနေ့က ၁ ရက်အတွင်း ကူးစက်ခံ သေဆုံးသူ အမြင့်ဆုံး စံချိန်သစ်တင်ခဲ့ပြီး စနေနေ့မှာတော့ တရက်တည်း သေဆုံးသူ ၁၀၃၅ ယောက် ရှိခဲ့တဲ့အတွက် စုစုပေါင်း ကူးစက်ခံ သေဆုံးသူဦးရေ ၈၀၈၆၈ ယောက်ထိ မြင့်တက်ခဲ့ပါတယ်။   မြို့တော် လန်ဒန် အပါအဝင် ဗြိတိန် နိုင်ငံအတွင်း နေရာအများစုမှာ အသွားအလာပိတ်ဆို့ ကန့်သတ်မှု အပြည့်ချမှတ်ထားပါတယ်။  မြို့တော်လန်ဒန်က ဆေးရုံတွေမှာ လူနာတွေ လျှံမယ့်ဘေး ရှိနေပြီလို့ မြို့တော်ဝန်က ကြေညာပါတယ်။  နေ့စဉ်တရက်ကို အရေးပေါ်ခေါ်ဆိုမှု အကြိမ်ရေ ၉ ထောင်ထိ ရှိနေတာကို လူနာတင်ယာဉ် ဌာနက လက်ခံဖြေရှင်းနေရလို့ ဖိအားများနေတယ်၊ မီးသတ်သမားတွေပါ ကားမောင်းဖို့ ကူညီ နေရပြီး ရဲအရာရှိတွေပါ ပါဝင် ကူညီနေရတယ်လို့ ဆိုပါတယ်။  လန်ဒန်မြို့သားတွေကတော့ အလုပ်၊ စားစရာ ဝယ်ဖို့နဲ့ ဆေးဘက်ဆိုင်ရာ အကူအညီ တောင်းဖို့နဲ့ တရက်တကြိမ် ကိုယ်လက်လေ့ကျင့်ခန်း လုပ်ဖို့သာ အပြင်ထွက်ဖို့ ခွင့်ပြုထားပါတယ်။  ဗြိတိန်ဟာ ကမ္ဘာ့ ပဉ္စမမြောက် ကူးစက်ခံ သေဆုံးသူ အများဆုံးနိုင်ငံ ဖြစ်နေပြီး ပြည်သူ ၆၇ သန်းထဲက ၃ သန်းကျော် ကိုဗစ်-၁၉ ကပ်ရောဂါ ကူးစက်ခံထားရပါတယ်။ 
5 months Ago

ဝီကီလိခ်ထူထောင်သူ၏အာမခံ ဗြိတိန်တရားရုံးက ပယ်ချ

ဝီကီလိခ်တည်ထောင်သူ  ဂျူလီယန်အက်ဆန်ရဲ့ အာမခံလျှောက်လဲချက်ကို ဗြိတိန် တရားရုံး က ဇန်နဝါရီ ၆ ရက်မှာ ပယ်ချလိုက်ပါတယ်။  အမေရိကန်အစိုးရက အက်ဆန်ကို လွှဲပြောင်းရယူဖို့ ကြိုးပမ်းရာမှာ  သူဟာ ထွက်ပြေးနိုင်တဲ့ အန္တရာယ်လို့ တရားသူကြီးက ဆိုပါတယ်။  ဇန်နဝါရီ ၄ ရက်က အက်ဆန်ဟာ သူ့ကို အမေရိကန်ဆီ လွှဲပြောင်း မပေးဖို့ ကြိုးပမ်းရာမှာ အနိုင်ရခဲ့ပါတယ်။  အဲဒီနောက် သူဟာ အာမခံ ရဖို့ လျှောက်လဲခဲ့တာပါ။  အမေရိကန် တရားရေးဌာနကတော့ အက်ဆန်ကို အမေရိကန်ဆီ လွှဲပေးဖို့ ဆက်ကြိုးပမ်း နေပြီး ဗြိတိန်တရားရုံး ဆုံးဖြတ်ချက်ကို အယူခံဝင်သွားမယ်လို့ ပြောပါတယ်။ ထောက်ခံသူတွေက သူ့ကို အမေရိကန်အစိုးရရဲ့ အာဏာအလွဲသုံးမှုတွေကို ဖော်ထုတ်တဲ့ သူရဲကောင်းအဖြစ် ဂုဏ်ပြုကြပါတယ်။  ရှုတ်ချသူတွေကတော့ သူ့ကို အနောက်နိုင်ငံတွေရဲ့ လုံခြုံရေးကို ထိခိုက်စေတဲ့ အန္တရာယ် ပေးသူအဖြစ် သတ်မှတ်သလို သူဟာ ဂျာနယ်လစ် တစ်ယောက်ဆိုတာကိုလည်း စောဒက တက်ကြတယ်လို့ ရိုက်တာက ဖော်ပြပါတယ်။
6 months Ago

ဗြိတိန်တွင် ကိုရိုနာကပ်ဘေးကြောင့် စာမေးပွဲ မစစ်ဘဲ ဆရာအကဲဖြတ်စနစ် ကျင့်သုံးမည်

ဗြိတိန်နိုင်ငံမှာ ကိုရိုနာဗိုင်းရပ်စ် ကူးစက်ကပ်ဘေးကြောင့် ဒီနှစ် တရားဝင်စာမေးပွဲတွေကို ကျောင်းသားတွေ ဖြေရမှာ မဟုတ်ဘူးလို့ ပညာရေးဝန်ကြီး ဂါဗင်ဝီလျံဆန်က ဇန်နဝါရီ ၆ ရက်မှာ ပြောလိုက်ပါတယ်။ ကျောင်းသား တယောက် ဘာသိလဲဆိုတာ ဆုံးဖြတ်ဖို့ အမျှတဆုံးနည်းလမ်းက စာမေးပွဲ ဆိုပေမဲ့ ကပ်ဘေးသက်ရောက်မှုကြောင့် ဒီနှစ်မှာ စာမေးပွဲကျင်းပဖို့ မဖြစ်နိုင်တော့ဘူးဆိုတဲ့ အဓိပ္ပါယ်ရနေတယ်လို့ ဝန်ကြီးက လွှတ်တော်မှာ ပြောပါတယ်။ အဲဒီအစား ဆရာတွေက ကျောင်းသားတွေကို စစ်ဆေးပြီး သူတို့ ဘယ်အဆင့် ဘယ်အမှတ်ကို ရသင့်တယ်ဆိုတာ ဆုံးဖြတ်မယ်လို့လည်း သူက ဆက်ပြောပါတယ်။  ကောလိပ်နဲ့ တက္ကသိုလ်ဝင်တန်း ကျောင်းသားတွေအတွက် စာမေးပွဲတွေကို ဆရာတွေက အကဲဖြတ် အမှတ်ပေးတဲ့ စနစ်နဲ့ အစားထိုးမယ်လို့ ဝန်ကြီးက ပြောပါတယ်။ အင်္ဂလန်နယ်ဟာ ဇန်နဝါရီ ၅ ရက်မှာ တတိယအကြိမ် နိုင်ငံလုံးဆိုင်ရာ အသွားအလာ ထိန်းချုပ်ကန့်သတ်ချက် လော့ဒေါင်းကို ချမှတ်ကျင့်သုံးခဲ့ရလို့ ကျောင်းတွေနဲ့ ဆိုင်တွေကို ပိတ်ထားရပြီး  ပြည်သူတွေ အိမ်ထဲမှာပဲ နေဖို့ကိုလည်း အမိန့်ထုတ် ထားရပါတယ်။ ကိုရိုနာဗိုင်းရပ်စ် မျိုးကွဲသစ်ကြောင့် ကူးစက်မှု တိုးလာတဲ့အတွက် နိုင်ငံရဲ့ ကျန်းမာရေး စောင့်ရှောက်မှုစနစ်ကို ခြိမ်းခြောက်နေပါတယ်။ ဒီနှစ်မတိုင်ခင်က ကျောင်းသားတွေရဲ့အမှတ်ကို ဆုံးဖြတ်ရာမှာ ပြဿနာ ဖြေရှင်းနည်း ဖော်ထုတ်တဲ့စနစ်ကို မှီခိုခဲ့လို့ ပညာရေးဝန်ကြီးဟာ ကျယ်ကျယ်ပြန့်ပြန့် ဝေဖန်ခံခဲ့ရပါတယ်။ တချို့ ကျောင်းသားတွေ တက္ကသိုလ်ဝင်ခွင့် ထိခိုက်ခဲ့တဲ့အထိ မမျှတတဲ့ အမှားအယွင်းတွေ တွေ့အပြီးမှာ ဒီစနစ်ကို စွန့်ပစ်ဖို့ ဝန်ကြီးဟာ ဖိအားပေး ခံခဲ့ရပါတယ်။ အဲဒီအစား ဆရာတွေက ကျောင်းသားတွေရဲ့အမှတ်ကို စဉ်ဆက်မပြတ် အကဲခတ် အမှတ်ပေး စနစ်နဲ့ အစားထိုးခဲ့ပေမဲ့ ကျောင်းသားတွေကတော့ သူတို့ အမှတ်က နိမ့်လွန်းတယ်လို့ ခံစားခဲ့ကြရပါတယ်။ 
6 months Ago

ဗြိတိန်တွင် တရက်အတွင်း ကိုဗစ်-၁၉ ကူးစက်မှု ၆၀,၀၀၀ ကျော် စံချိန်တင်

ဗြိတိန်နိုင်ငံမှာ ပထမဆုံးအနေနဲ့ တရက်အတွင်း ကိုဗစ်-၁၉ ကပ်ရောဂါ ကူးစက်ခံ ဦးရေ ၆၀,၀၀၀ ကျော်နဲ့ ဇန်နဝါရီ ၅ ရက်မှာ စံချိန်တင်ခဲ့ပါတယ်။ အစိုးရကတော့ ပိုပြီး ကူးစက်နိုင်စွမ်းရှိတဲ့ ဗိုင်းရပ်စ်မူကွဲသစ်ကို ကိုင်တွယ်ဖြေရှင်းနိုင်ဖို့ ရုန်းကန်ကြိုးစားနေရဆဲပါ။ အင်္ဂလန်နယ်နဲ့ စကော့တလန်နယ်တွေကလည်း ရောဂါခြေချုပ် ကန့်သတ်ချက် လော့ဒေါင်းအသစ်ကို စတင်ကျင့်သုံးနေပြီး ပြည်သူတွေ အိမ်ထဲမှာပဲ နေကြဖို့ အမိန့်ထုတ်ထားလို့ အကျပ်အတည်းရဲ့ ပြင်းထန်မှုကို သတိပေးသလို ဖြစ်နေတာပါ။ ကျန်ခဲ့တဲ့ ၈ ရက် ဆက်တိုက်မှာတော့ တရက်တည်းအတွင်း အသစ်ကူးစက်ခံ ဦးရေ ၅၀,၀၀၀ ကျော်ခဲ့ပါတယ်။ မနှစ်က ကူးစက်မှု ပထမလှိုင်း အထွတ်အထိပ်ရောက်ခဲ့ပြီး ဗြိတိန်ဟာ နေ့စဉ် ကူးစက်မှု စစ်ဆေးနိုင်စွမ်း တိုးလာခဲ့လို့ အသစ်ကူးစက်ခံဦးရေ တွေ့ရှိမှုလည်း တိုးနေပါတယ်။  ဗြိတိန်မှာ ပြည်သူ ၁ ဒသမ ၃သန်းကျော်ကို ကိုဗစ်-၁၉ ကပ်ရောဂါ ကာကွယ်ဆေး ထိုးပေးပြီးပြီလို့ ဝန်ကြီးချုပ် ဘောရစ်ဂျွန်ဆင်က ဇန်နဝါရီ ၅ ရက်မှာ ပြောခဲ့ပါတယ်။ လောလောဆယ် နိုင်ငံလူဦးရေရဲ့ ၂ ရာခိုင်နှုန်း ကိုရိုနာဗိုင်းရပ်စ် ကူးစက်ခံထားရပြီး အင်္ဂလန်နယ်မှာ လူ ၁ သန်းကျော် ကူးစက်ခံထားရတယ်လို့လည်း ဂျွန်ဆင်က သတင်းစာ ရှင်းလင်းပွဲမှာ ပြောပါတယ်။  ဗြိတိန်မှာ ကိုရိုနာဗိုင်းရပ်စ် ကူးစက်ခံထားရမှု ရှိ၊ မရှိ စမ်းသပ်ထားတဲ့ ၂၈ ရက်အတွင်း လူ ၂၅,၀၀၀ ကျော် သေဆုံးခဲ့တယ်လို့ တရားဝင် ကိန်းဂဏန်းတွေအရ သိရပါတယ်။ ဗိုင်းရပ်စ်ကူးစက်မှု ထိန်းချုပ်ရေးအတွက် နိုင်ငံခြားက ရောက်လာတဲ့ ခရီးသည်တွေကို ကိုဗစ်-၁၉ စစ်ဆေးခံဖို့ အစိုးရက မကြာခင် တောင်းဆိုမယ်လို့လည်း ဂျွန်ဆင်က ပြောပါတယ်။ ကမ္ဘာ့ကျန်းမာရေးအဖွဲ့ကြီး WHO ရဲ့ အကြံပေးအုပ်စုကလည်း လူနာတွေဟာ ၂၁ ရက်ကနေ ၂၈ ရက်ကြားမှာ ဖှိုက်ဇာ၊ ဘိုင်အိုအန်တက်လုပ်ငန်းကြီး ၂ ခုက ပူးပေါင်းထုတ်လုပ်တဲ့ ကာကွယ်ဆေး ထိုးဆေး ၂ လုံးကို အပြီးထိုးထားသင့်တယ်လို့ အင်္ဂါနေ့က အကြံပြုပါတယ်။
6 months Ago

ဗြိတိန်တွင် လော့ဒေါင်း ဆန့်ကျင်ဆန္ဒပြသူ ၁၇ ဦးကို ဖမ်းဆီး

ဗြိတိန်နိုင်ငံ လန်ဒန်မြို့တော်က ဟိုက်ဒ်ပါ့ခ်ပန်းခြံမှာ အသွားအလာ ထိန်းချုပ်ကန့်သတ်ချက် လော့ဒေါင်းကို ဆန့်ကျင်တဲ့ ဆန္ဒပြသူ ၁၇ ယောက်ကို ရဲတွေက ဇန်နဝါရီ ၂ ရက်မှာ ဖမ်းဆီးခဲ့ပါတယ်။ ကိုဗစ်-၁၉ ကပ်ရောဂါ ကန့်သတ်ချက် ချိုးဖောက်မှုနဲ့ ဖမ်းခဲ့တာပါ။ ဆန္ဒပြသူတွေကို ခြေကျင်ရဲတွေရော မြင်းစီးရဲတွေကပါ လူစုခွဲနေပုံ ရုပ်ပုံတွေကို မျက်မြင်သက်သေတယောက်က ရိုက်ကူးခဲ့ပါတယ်။ ဒီဇင်ဘာ ၁၉ ရက်ကစပြီး လန်ဒန်နဲ့ ပတ်ဝန်းကျင်ဒေသတွေမှာ အသစ်သတ်မှတ် အဆင့်မြှင့်ထားတဲ့ အဆင့်မြင့်ဆုံး အဆင့် ၄ ကန့်သတ်ချက် ထုတ်ပြန်ပြီး လူမှုရေး ကန့်သတ်ချက်ကို တင်းကျပ်ထားပါတယ်။ အဆင့် ၄ ကန့်သတ်ချက်အရ အများပြည်သူဆိုင်ရာ လေဟာပြင်မှာ လူ ၂ ယောက်ထက် ပိုမစုရပါဘူး။ ဗြိတိန်မှာ စနေ တရက်တည်းမှာ ကိုဗစ်-၁၉ ကပ်ရောဂါအသစ် ကူးစက်ခံ ၅၇,၀၀၀ ကျော်ရှိပြီး ကူးစက်ခံ ၅၀,၀၀၀ ကျော်တာ ၅ ရက်မြောက်လည်း ဖြစ်ပါတယ်။ ကူးစက်ခံ ၄၄၅ ယောက် သေဆုံးခဲ့တယ်လို့ တရားဝင် ကိန်းဂဏန်းတွေက ပြထားပါတယ်။
6 months Ago

ဗြိတိန်နိုင်ငံက ကိုရိုနာဗိုင်းရပ်စ်မူကွဲသစ် ထိုင်းနိုင်ငံတွင် တွေ့ရှိ

ဗြိတိန်နိုင်ငံထဲမှာ ကူးစက်နေတဲ့ ကိုရိုနာဗိုင်းရပ်စ်မူကွဲသစ်ကို ထိုင်းနိုင်ငံထဲမှာ တွေ့ထားပြီလို့ ထိုင်းနိုင်ငံ ချူလာလောင်ကောင်တက္ကသိုလ်က ဗိုင်းရပ်စ်ပိုးမွှားဗေဒပညာရှင် ဒေါက်တာယောင်ပူးဗွိုရာဝမ်က ဇန်နဝါရီ ၃ ရက်မှာ ပြောလိုက်ပါတယ်။  ချူလာလောင်ကောင်တက္ကသိုလ် ဆေးပညာဌာန လက်တွေ့ အသုံးချ ဗိုင်းရပ်စ်ပိုးမွှား ဌာနဟာ ဗိုင်းရပ်စ်ရဲ့ မျိုးဗီဇကို စစ်ဆေး လေ့လာခဲ့အပြီး B.1.1.7 မူကွဲလို့ သိကြတဲ့ ဗြိတိန်နိုင်ငံမှာ တွေ့ရှိတဲ့ ဗိုင်းရပ်စ် ဖြစ်နေခဲ့တယ်လို့ ဒေါက်တာယောင်က ဇန်နဝါရီ ၃ ရက်မှာ ဖေ့စ်ဘွတ် လူမှုကွန်ရက်ပေါ်ကနေ ဒီသတင်းကို တင်ပြခဲ့ပါတယ်။ ဗြိတိန်နိုင်ငံ အင်္ဂလန်နယ် ကန့်ဖြို့က လာတဲ့ လူ ၄ ယောက်ပါတဲ့ မိသားစုကနေ ကူးစက်ခဲ့တာပါ။ သူတို့ဆီကနေ ဗိုင်းရပ်စ် မကူးစက်ရအောင် အစိုးရရောဂါခြေချုပ် ဟိုတယ်ကွာရန်တင်းနဲ့ သီးခြားခွဲထားပါတယ်။  ဒီဗိုင်းရပ်စ် မူကွဲဟာ ပိုလွယ်လွယ်ကူးစက်နိုင်ပြီး ဒီမိသားစုထဲမှာ ချက်ချင်း ကူးစက်ခဲ့တယ်။ မိသားစုဝင်အားလုံး ကူးစက်ခံထားရတယ်လို့ ထိုင်းအခြေစိုက် သနေးရှင်းသတင်းဌာနက ဖော်ပြပါတယ်။ ဆေးဘက်ဝန်ဆောင်မှုဌာနကတော့ ပြည်လုံးကျွတ် ကိုဗစ်-၁၉ လူနာတွေကို ကုသပေးဖို့ ဆေးရုံခုတင် ၂၂,၆၉၀ ကျော်ကို အသင့်ပြင်ထားပြီလို့ ဇန်နဝါရီ ၂ ရက်က ပြောပါတယ်။ ကိုဗစ်-၁၉ ကပ်ရောဂါ ကူးစက်ခံ လူနာ ၅၀ ကျော်စီရှိတဲ့ ဘန်ကောက်၊ စမွတ်စာခွန်နဲ့ ကျန်တဲ့ အနီရောင်ဇုန်ထဲက ပြည်နယ်တွေအတွက် ခုတင် ၂၇၇၈ ခု အဆင်သင့် ထားထားတယ်လို့ ဒုညွှန်ချုပ်က ပြောပါတယ်။ ထိုင်းနိုင်ငံမှာ ဇန်နဝါရီ ၃ ရက် မွန်းလွဲ ၁ နာရီထိ အတည်ပြုချက်အရ ကူးစက်ခံ ၇,၆၉၄ ယောက် ရှိပြီး ကူးစက်ခံ ၆၄ ယောက် သေဆုံးထားပါတယ်။
6 months Ago

ဗြိတိန်နှင့် မြောက်အိုင်ယာလန်က လာသူများကို မြန်မာနိုင်ငံဝင်ခွင့် တားမြစ်

ဗြိတိန်နဲ့ မြောက်အိုင်ယာလန်မှာ နေထိုင်သူတွေနဲ့ အဲဒီကိုသွားထားတဲ့ ခရီးသွားတွေကို မြန်မာနိုင်ငံကို လာရောက်ခွင့်မပြုဘူးလို့ ကျန်းမာရေးနဲ့ အားကစားဝန်ကြီးဌာနက တားမြစ်မိန့် ထုတ်ပြန်ပါတယ်။ SARs-CoV-2 ဗိုင်းရပ်စ် မျိုးကွဲအသစ်ကို ဗြိတိန်နဲ့ မြောက်အိုင်ယာလန် ကျန်းမာရေးတာဝန်ရှိသူတွေ တွေ့ထားတယ်လို့ ကမ္ဘာ့ကျန်းမာရေးအဖွဲ့ (WHO) က ဒီဇင်ဘာ ၂၁ ရက်မှာ ကြေညာခဲ့တယ်လို့ ဆိုပါတယ်။ ဒီဗိုင်းရပ်စ်သစ်က လူအများအပြားကို ကူးစက်နိုင်ပြီး မြန်မာအစိုးရအနေနဲ့ ဒီအန္တရာယ်ကနေ ကာကွယ်ဖို့၊ ဗိုင်းရပ်စ်မျိုးကွဲသစ် ပျံ့နှံ့လာနိုင်တာကို ထိန်းချုပ်ကန့်သတ်ဖို့ တာဝန်ရှိတယ်လို့ ထုတ်ပြန်ဖော်ပြထားပါတယ်။ ဒါကြောင့် ဗြိတိန်နဲ့ မြောက်အိုင်ယာလန်မှာ နေထိုင်သူတွေ၊ လွန်ခဲ့တဲ့ ၁၄ ရက်အတွင်း အဲဒီကို သွားရောက်ခဲ့သူတွေကို မြန်မာနိုင်ငံကို လာရောက်ခွင့် တားမြစ်လိုက်တယ်လို့ ဆိုပါတယ်။ ဒီ ယာယီတားမြစ်ချက်ဟာ ဒီဇင်ဘာ ၃၁ ရက်က စတင်တယ်လို့လည်း ဆိုပါတယ်။ ကျန်းမာရေးနဲ့ အားကစားဝန်ကြီးဌာနအနေနဲ့ ကိုဗစ်-၁၉ ကမ္ဘာ့ကပ်ရောဂါရဲ့ အခြေအနေနဲ့ အထူးသဖြင့် ဗီဇကွဲ ဗိုင်းရပ်စ်သစ်ရဲ့ ကူးစက်ပျံ့နှံ့ပုံကို အမြဲစောင့်ကြည့်နေပြီး လိုအပ်ရင် နောက်ထပ် ကြေညာချက်တွေ ထုတ်ပြန်ကန့်သတ်ဦးမယ်လို့ ဆိုပါတယ်။ မြန်မာနိုင်ငံဆီကို နိုင်ငံတကာ လေကြောင်းလိုင်းတွေ ဆင်းသက်ခွင့်ကို ဇန်နဝါရီ ၃၁ ရက်အထိ ပိတ်ပင်ထားတယ်လို့လည်း ကိုဗစ်-၁၉ ကာကွယ်၊ ထိန်းချုပ်၊ ကုသရေး အမျိုးသားအဆင့် ဗဟိုကော်မတီက ကြေညာထားပါတယ်။
6 months Ago

အီးယူမှ ဗြိတိန် တရားဝင်နုတ်ထွက်၊ သီးခြားနိုင်ငံအဖြစ် စတင်ရပ်တည်

ဗြိတိန်ဟာ ဥရောပသမဂ္ဂ (အီးယူ)ကနေ တရားဝင်နုတ်ထွက်ပြီး သီးခြားနိုင်ငံအနေနဲ့ ရပ်တည်တော့မှာပါ။ ဂင်းနစ်စံတော်ချိန် ည ၁၁  နာရီမှာပဲ ဗြိတိန်ဟာ အီးယူစည်းမျဉ်းစည်းကမ်းတွေ လိုက်နာတာကို ရပ်လိုက်ပြီးတဲ့နောက် ဇန်နဝါရီ ၁ ရက်ဟာ ဗြိတိန်အတွက် ခေတ်သစ် တစ်ခု စတင်လိုက်တာပါ။  ဒါကြောင့် ခရီးသွားလာရေး၊ ကုန်သွယ်ရေး၊ လူဝင်မှုကြီးကြပ်ရေးနဲ့ လုံခြုံရေး ပူးပေါင်း ဆောင်ရွက်ရေး အစားထိုးအစီအစဉ်တွေ စတင်အသက်ဝင်လာပါတော့တယ်။   ကာလရှည် ဘရက်ဆစ် လုပ်ငန်းစဉ်ကြီး ပြီးဆုံးသွားပြီမို့ ဗြိတိန်ဟာ ကိုယ်ပိုင်လွတ်လပ်မှုနဲ့ အရာရာကို ကွဲပြားစွာနဲ့ ပိုမိုကောင်းမွန်စွာ လုပ်နိုင်စွမ်း ရရှိပြီဆိုပြီး ဝန်ကြီးချုပ် ဘောရစ် ဂျွန်ဆင်က ဆိုပါတယ်။  ဒါပေမဲ့ အီးယူက နုတ်ထွက်တာကို ဆန့်ကျင်တဲ့ အတိုက်အခံတွေကတော့ နိုင်ငံကို ထိန်းသိမ်းရတာ ပိုမိုဆိုးလိမ့်မယ်လို့ ပြောပါတယ်။  စကော့တလန်ဝန်ကြီး နီကိုလာ စတာဂျင်ကလည်း စကော့တလန်ဟာ မကြာခင် အီးယူထဲ  ပြန်လာလိမ့်မယ်လို့ တွစ်တာကနေ ရေးခဲ့ပါတယ်။  စည်းမျဉ်းသစ်တွေ အသက်ဝင်လာပြီး ဗြိတိန်ကုမ္ပဏီတွေဟာ အပြောင်းအလဲတွေနဲ့ လုပ်ကိုင်ရမှာမို့ လာမယ့်သီတင်းပတ်တွေမှာ အနှောင့်အယှက်တချို့ ရှိလာနိုင်တယ်ဆိုပြီး ဗြိတိန် ဝန်ကြီးတွေက သတိပေးထားတယ်လို့ ရိုက်တာ သတင်းမှာ ရေးပါတယ်။    
6 months Ago

၂၀၂၁ ခုနှစ်သစ်တွင် မျှော်လင့်ချက်အလင်းရောင်ကို ထွန်းညှိလိုက်ပြီဟု ဗြိတိန်ဝန်ကြီးချုပ်ပြော

ဗြိတိန်ဝန်ကြီးချုပ် ဘောရစ်ဂျွန်ဆင်ရဲ့ နှစ်သစ်ကူးမိန့်ခွန်းမှာ ၂၀၂၀ အတွင်း ရုန်းကန်ရမှုတွေကို ပြန်ပြောင်းပြောဆိုခဲ့ပြီး  မျှော်လင့်ချက်အလင်းရောင်ကို ထွန်းညှိလိုက်ပြီလို့ ပြောကြားပါတယ်။  အစိုးရက တင်းကျပ်တဲ့ ကန့်သတ်ချက်တွေ ထုတ်ပြန်ပြီး  စွန့်လွှတ်မှု အများအပြားလုပ်ခဲ့တဲ့ နှစ်မှာ  ပရမ်းပတာ အခြေအနေ ပြည့်နှက်နေတဲ့ကြားက   ခိုင်မာစည်းလုံးခဲ့တဲ့ နိုင်ငံအကြောင်းကို ဝန်ကြီးချုပ် ဂျွန်ဆင်က ပြောပြခဲ့ပါတယ်။ ၂၀၂၁ နှစ်သစ်ဟာ အတိတ်မှာလမ်းပျောက်ခဲ့တဲ့အရာတွေကို လုပ်လာနိုင်တဲ့ နှစ် ဖြစ်လာမယ် ယုံကြည်တယ်လို့ ဂျွန်ဆင်က ဒီဇင်ဘာ ၃၁ ရက်နေ့ မိန့်ခွန်းမှာ ပြောဆိုခဲ့ပါတယ်။ ဇန်နဝါရီလ ၁ ရက်ကစလို့ ဗြိတိန်ဟာ ဥရောပသမဂ္ဂအဖွဲ့ဝင်နိုင်ငံ မဟုတ်တော့ဘဲ သီးခြားရပ်တည်တဲ့နိုင်ငံဖြစ်လာပါတယ်။
6 months Ago

အောက်စဖို့နှင့်အက်စ်ထရာဇန်နီကာထုတ် ကိုဗစ်-၁၉ ကာကွယ်ဆေး ဗြိတိန်အသုံးပြုခွင့်ရ

အောက်စဖို့တက္ကသိုလ်နဲ့ အက်စ်ထရာ-ဇန်နက်ကာ ကုမ္ပဏီတို့ ပူးတွဲ ထုတ်ဖော်တဲ့ ကိုဗစ်-၁၉ ကာကွယ်ဆေး ထောက်ခံချက်ကို ဗြိတိန်အစိုးရက ဒီဇင်ဘာ ၃၀ ရက်မှာ  ရရှိသွားပါပြီ။ "ဆေးဝါးနဲ့ ကျန်းမာရေးစောင့်ရှောက်မှု ထုတ်ကုန်စည်းကမ်းသတ်မှတ်ရေးအဖွဲ့ (MHRA) ဆီကနေ အက်စ်ထရာဇန်နက်ကာ ကိုဗစ်ကာကွယ်ဆေးအသုံးပြုခွင့် ထောက်ခံချက်ကို ဗြိတိန်အစိုးရက ဒီကနေ့ပဲ ရရှိပြီ "လို့  ကျန်းမာရေးဝန်ကြီးဌာနက ထုတ်ပြန်ပါတယ်။   အက်စ်ထရာ ဇန်နက်ကာဟာလည်း နှစ်ကြိမ်ထိုး ကိုဗစ်ကာကွယ်ဆေးဖြစ်ပြီး ဗြိတိန်အစိုးရ က ကာကွယ်ဆေးလုံးရေ သန်း ၁၀၀ မှာယူထားပါတယ်။   ဗြိတိန်မှာ ကူးစက်မြန် ကိုရိုနာဗိုင်းရပ်စ် မျိုးကွဲသစ်ကြောင့်  ဆောင်းရာသီဗိုင်းရပ်စ် ကူးစက်မှု ထိုးတက်လာချိန်မှာပဲ အက်စ်ထရာဇန်နက်ကာ ကာကွယ်ဆေးကို အရေးပေါ် သုံးခွင့်ပြုလိုက်တာပါ။  အက်စ်ထရာဇန်နက်ကာနဲ့ တခြားကာကွယ်ဆေးထုတ်ကုမ္ပဏီတွေက သူတို့ဟာ ကိုရိုနာဗိုင်းရပ်စ် မျိုးကွဲသစ်ရဲ့ သက်ရောက်မှုကို လေ့လာနေပြီး သူတို့ ကာကွယ်ဆေးတွေက  ဗိုင်းရပ်စ်မျိုးကွဲသစ်ပေါ်မှာ ထိရောက်မယ် မျှော်လင့်တယ်လို့ ပြောဆိုထားပါတယ်။ 
6 months Ago

ဗြိတိန်နှင့်တူရကီ လွတ်လပ်သည့်ကုန်သွယ်ရေးစာချုပ် ချုပ်

ဥရောပသမဂ္ဂ(အီးယူ)ကနေ ဗြိတိန် တရားဝင် နုတ်မထွက်ခင် ရက်ပိုင်းအလိုမှာပဲ ဒီဇင်ဘာ ၂၉ ရက်က တူရကီနဲ့ ဗြိတိန်တို့ဟာ  လွတ်လပ်သောကုန်သွယ်ရေးစာချုပ်ကို လက်မှတ်ထိုးခဲ့ ပါတယ်။ ဗွီဒီယိုကွန့်ဖရင့် ဖုန်းခေါ်ဆိုမှုအတွင်း နှစ်နိုင်ငံ ကုန်သွယ်ရေးဝန်ကြီးတွေ သဘောတူညီချက် လက်မှတ်ထိုးခဲ့တာပါ။ နှစ်ကုန်လို့ လက်ရှိသဘောတူညီချက် သက်တမ်းကုန်ဆုံးတာနဲ့ ၂၀၂၁ ခုနှစ် ဇန်နဝါရီ ၁ ရက်ကစလို့ အဲဒီ သဘောတူညီချက် စတင် အသက်ဝင်မယ်လို့ တူရကီ ကုန်သွယ်ရေးဝန်ကြီး ရူဆာပစ်ကျန်က ပြောပါတယ်။  တူရကီနဲ့ ဗြိတိန်အကြား  ၂၀၁၉ ခုနှစ်က နှစ်နိုင်ငံ ကုန်သွယ်မှု တန်ဖိုးဟာ ၁၈ ဒသမ ၆  ဘီလီယံပေါင် ရှိတယ်လို့လည်း ရိုက်တာသတင်းအရ သိရပါတယ်။ 
6 months Ago

နာမည်ကျော် ဗြိတိန်သူလျှိုဟောင်း ဂျော့ချ်ဘလိတ်ခ် ကွယ်လွန်

နာမည်ကျော် ဗြိတိန်သူလျှိုဟောင်းနဲ့ ဆိုဗီယက်ပြည်ထောင်စုရဲ့ တန်ပြန်ထောက်လှမ်းရေး သူလျှို ဂျော့ချ်ဘလိတ်ခ်ဟာ အသက် ၉၈အရွယ်မှာ ဒီဇင်ဘာ ၂၆ ရက်က ကွယ်လွန်သွားတယ်လို့ ရုရှား နိုင်ငံခြား ထောက်လှမ်းရေးအေဂျင်စီ SVR ကို ကိုးကားပြီး ရုရှားအစိုးရမီဒီယာ ရီယာက ဖော်ပြပါတယ်။ ဘလိတ်ခ်ဟာ ၁၉၅၀ ပြည့်လွန်နှစ်တွေက အရှေ့ဥရောပတလွှားမှာ အနောက်ဥရောပ သူလျှိုရာချီရဲ့ အထောက်အထားတွေကို ဖော်ထုတ်ခဲ့လို့ သူ့ရဲ့သစ္စာဖောက်မှုကြောင့် တချို့ သေဒဏ်ပေးခံရတယ်လို့ ဗြိတိန်အစိုးရက ပြောပါတယ်။ ဘလိတ်ခ်ရဲ့ အမှုဟာ ကိန်းဘရစ်ချ်ငါးဖော်လို့ သိကြတဲ့ ဗြိတိန် တန်ပြန်ထောက်လှမ်းရေး ကွန်ရက်နဲ့အတူ စစ်အေးခေတ်ရဲ့ အဆိုးဆုံးနာမည်တွေထဲမှာ ပါခဲ့တာပါ။ ၁၉၆၁ မှာ ဆိုဗီယက်သူလျှို ဖြစ်ကြောင်း ပေါ်သွားအပြီး ဘလိတ်ခ်ဟာ လန်ဒန်က လန်ဒန်က ဝါမ်းဝုဒ် စခရပ်ဘ် ထောင်ထဲမှာ ၄၂ နှစ်ကြာ ပြစ်ဒဏ်ကျခံဖို့ စီရင်ခံရပါတယ်။ ဒါပေမဲ့ ၁၉၆၆ မှာ တခြားထောင်သားတွေနဲ့ ငြိမ်းချမ်းရေး တက်ကြွလှုပ်ရှားသူ ၂ ယောက်တို့ရဲ့ အကူအညီနဲ့ ထွက်ပြေး လွတ်မြောက်ခဲ့ပြီး ဗြိတိန်နိုင်ငံထဲကနေ သူ့ကို ခိုးထုတ်ခဲ့ကြပါတယ်။ ဘလိတ်ခ်ဟာ အနောက်ဥရောပနဲ့ အရှေ့ဘာလင်ကို အောင်အောင်မြင်မြင် ခိုးထွက်နိုင်ခဲ့ပြီး သူ့ဘဝတလျှောက်လုံး ရုရှားမှာ နေထိုင်ခဲ့ပါတယ်။ သူ့ကို ရုရှားမှာ သူရဲကောင်းအဖြစ် ကြိုဆိုခဲ့ကြတယ်လို့ ရိုက်တာသတင်းမှာ ဖော်ပြထားပါတယ်။
6 months Ago

ဗြိတိန်ကိုရိုနာဗိုင်းရပ်စ်မူကွဲသစ် စပိန်နိုင်ငံတွင် တွေ့ရှိ

ဗြိတိန်နိုင်ငံ အင်္ဂလန်နယ်တောင်ပိုင်းတလွှား အမြန်ကူးစက်နေတဲ့ ကိုရိုနာဗိုင်းရပ်စ် မူကွဲသစ် ကူးစက်ခံထားရတဲ့ လူနာလေးယောက်ကို စပိန်နိုင်ငံထဲမှာ တွေ့ထားပြီလို့ စပိန်နိုင်ငံ ပြည်သူ့ကျန်းမာရေး တာဝန်ရှိသူတွေက ဒီဇင်ဘာ ၂၆ ရက်မှာ ပြောပါတယ်။ စပိန်မြို့တော် မက်ဒရစ်လေဆိပ်ကနေ ဖြတ်ပြီး ဗြိတိန်ကနေ ပြန်လာတဲ့လူတွေက သယ်လာတဲ့ မူကွဲဖြစ်မယ်လို့ စပိန်အာဏာပိုင်တွေက ယူဆထားတယ်လို့ ဒေသန္တရ ကျန်းမာရေး အရာရှိ အန်တိုနီယို ဇာပါတေရိုက သတင်းစာရှင်းလင်းပွဲမှာ ပြောပါတယ်။ နောက်ထပ် မူကွဲ ဗိုင်းရပ်စ်ကူးစက်ခံ သံသယရှိသူ ၃ယောက်ကိုလည်း ဖော်ထုတ်ထားတယ်လို့ သူက ဆက်ပြောပါတယ်။ စပိန်မှာ ဖိုက်ဇာနဲ့ ဘိုင်အိုအန်တက် ကုမ္ပဏီတွေ ပူးပေါင်းထုတ်လုပ်တဲ့ ကာကွယ်ဆေး ပထမဆုံး အသုတ်ကို စနေနေ့က လက်ခံ ရရှိထားပါတယ်။ တပတ်ကို ကာကွယ်ဆေး ထိုးဆေး ၃ သိန်းခွဲနှုန်း လက်ခံရရှိဖို့နဲ့ မတ်လလယ်မှာ ကာကွယ်ဆေး စုစုပေါင်း ၄.၆ သန်းထိရဖို့ မျှော်လင့်ထားပါတယ်။ စပိန်နိုင်ငံတလွှား ကူးစက်ခံ ၁.၈ သန်းကျော်နဲ့ သေဆုံးသူ ၅ သောင်းနီးပါး ရှိတယ်လို့ သိရပါတယ်။   
6 months Ago

ကိုယ်ကျိုးမကြည့်သည့်စိတ်ဓာတ်မွေးကြရန် ဗြိတိန်ဘုရင်မကြီးပြော

ဗြိတိန်ဘုရင်မကြီး အဲလိဇဘက်က ကိုယ်ကျိုးမကြည့်တဲ့စိတ်ဓာတ်မွေးကြဖို့ ဒီဇင်ဘာလ ၂၅ ရက်မှာ ခရစ္စမတ်သတင်းစကားပါးလိုက်ပါတယ်။  ကြိုတင်သွင်းယူထားတဲ့ ခရစ္စမတ်မိန့်ခွန်းမှာ ဘုရင်မကြီး အဲလိဇဘက်က သန်းချီတဲ့ ဗြိတိန်နိုင်ငံသားတွေဟာ  ဒီနှစ်မှာ  ခါတိုင်းလို မိသားစုစုံညီ အခမ်းအနားတွေ  မလုပ်နိုင်တာကို အသိအမှတ်ပြု ပြောဆိုခဲ့ပေမယ့် အနာဂတ်မှာ ဆုံတွေ့နိုင်မယ့် မျှော်လင့်ချက်တွေ ရှိတယ်လို့ ထပ်တလဲလဲ ပြောကြားခဲ့ပါတယ်။  "ကောင်းကင်မှာ ထွန်းလင်းနေတဲ့ ကြယ်အလင်းရောင်ဟာ သိုးထိန်းတွေနဲ့ ပညာရှိတွေကို ယေရှုမွေးဖွားရာ နေရာဆီလမ်းညွှန်ပေးတယ်လို့ သမ္မာကျမ်းစာက ဆိုတယ်။ ကိုယ်ကျိုးမကြည့်တဲ့ စိတ်ဓာတ်၊ ချစ်ခြင်းမေတ္တာနဲ့ မျှော်လင့်ချက်ဆိုတဲ့ ခရစ္စမတ်အလင်းရောင်ကို မိမိအနာဂတ်မှာ လမ်းညွှန်ခွင့်ပြုကြပါ" လို့  ဘုရင်မကြီး အဲလိဇဘက်က တိုက်တွန်းပြောဆိုခဲ့ပါတယ်။  ဘုရင်မကြီးကိုယ်တိုင်လည်း အစဉ်အလာ ခရစ္စမတ်အခမ်းအနားတွေကို ရှောင်ရှားပြီး ဝင်ဆာရဲတိုက်မှာ ကြင်ရာတော် ဖိလစ်မင်းသားကြီးနဲ့အတူ ခရစ္စမတ်ကာလကို တိတ်တဆိတ် ကုန်ဆုံးနေတယ်လို့ ရိုက်တာသတင်းမှာ ဖော်ပြထားပါတယ်။
6 months Ago

ဗြိတိန်တွင် ကိုဗစ်-၁၉ စစ်ဆေးမှုကြောင့် ကုန်ကားထောင်ချီ ပိတ်မိ

အင်္ဂလန်မှာ ကူးစက်မြန် ကိုရိုနာဗိုင်းရပ်စ်တွေ့ရှိတာကြောင့် နိုင်ငံအတော်များများက ဗြိတိန်ကလာတဲ့လူတွေကို သူတို့နယ်စပ် မဝင်အောင် ပိတ်ရာကနေ နိုင်ငံရဲ့ အရေးပါဆုံး ကုန်သွယ်ရေးလမ်းကြောင်းတစ်ခုမှာ ကုန်ကားတွေ မိုင်ချီပြီး တန်းစီနေရပါတယ်။  ဒီဇင်ဘာ ၂၄ ရက်က ဥရောပရဲ့ အစည်ကားဆုံးကုန်ကားဝင်းထဲမှာ  ကုန်ကားပေါင်း ထောင်ချီ ပိတ်မိနေဆဲ ဖြစ်ပါတယ်။  ဗြိတိန်နဲ့ ပြင်သစ်အကြား ရေလက်ကြားကို ယာဉ်တွေ စဖြတ်သန်းနေပေမဲ့လည်း အင်္ဂလန် ဒိုဗာမြို့ကနေ မိုင် ၂၀ ဝေးတဲ့ မန်စတန်လေဆိပ်ဟောင်းမှာ တန်းစီနေတဲ့ ကုန်ကားအများအပြား ရပ်ထားရပါတယ်။  ကုန်ကားယာဉ်မောင်းအားလုံးဟာ ကိုဗစ်-၁၉ ကင်းစင်မှ ရှေ့ဆက်သွားခွင့်ပြုမှာမို့  ကုန်ကားထောင်ချီပြီး ရေလက်ကြားဖြတ်ဖို့ စောင့်ဆိုင်းနေပါတယ်။  ယာဉ်မောင်း ၂၃၀၀ ကျော်ကို စစ်ဆေးရာမှာ ၃ ယောက်သာ ကိုဗစ်-၁၉ တွေ့ရတယ်လို့ ဗြိတိန်က ဆိုပါတယ်။  ရေလက်ကြားဖြတ်ပြီး ပြင်သစ်ဆီသွားဖို့စောင့်နေတဲ့ ကုန်ကားတွေကို ရှင်းဖို့ဆိုရင် ရက်ချီ ကြာနိုင်တယ်လို့ ဗြိတိန်ပို့ဆောင်ရေးဝန်ကြီး ဂရန့် ရှပ်စ်က သတိပေးထားပါတယ်။  ကုန်ကားပုံတွေ ရှင်းသွားဖို့ ခရစ္စမတ်ကာလမှာ ဗြိတိန်-ပြင်သစ်နယ်စပ်ကို ဆက်ဖွင့်ထား မယ်လို့လည်း ရှပ်စ်က ပြောဆိုခဲ့ပါတယ်။ 
6 months Ago
More News
Up