Search Results For: ဖိလစ်ပိုင်

ဖိလစ်ပိုင်တွင် ကိုဗစ်-၁၉ ကူးစက်ခံရမှု ၁ သန်းကျော်လာ

ဖိလစ်ပိုင်နိုင်ငံမှာ ကိုဗစ်-၁၉ ရောဂါကူးစက်ခံရသူ ၁ သန်းကျော်လာခဲ့ပြီးနောက် အာဆီယံဒေသတွင်း နိုင်ငံတွေထဲ သန်းချီကူးစက်ခံရတဲ့ နိုင်ငံ၂ နိုင်ငံထိ ရှိလာပါတယ်။

တကမ္ဘာလုံးအတိုင်းအတာနဲ့ ရောဂါကူးစက်ခံရသူ ၁၅၂ သန်းကျော်၊ သေဆုံးသူ ၃၂ သိန်းကျော်နဲ့ ရောဂါပြန်လည်ပျောက်ကင်းလာသူအရေအတွက်ကတော့ သန်း ၁၃၀ ကျော် ရှိနေတာပါ။

ရောဂါဖြစ်ပွားမှု အမြင့်ဆုံးနိုင်ငံတွေထဲမှာတော့ အမေရိကန်နိုင်ငံက ကူးစက်ခံရသူ ၃၃ ဒသမ ၁ သန်းကျော်၊ သေဆုံးသူ ၅ သိန်း ၉ သောင်းကျော် ရှိနေပြီး သူ့နောက်မှာတော့ အိန္ဒိယနိုင်ငံက ကူးစက်ခံရသူ ၁၉ ဒသမ ၅ သန်းကျော်၊ သေဆုံးသူ ၂ သိန်း ၁ သောင်း ကျော်နဲ့ ရှိနေတာ ဖြစ်ပါတယ်။

တတိယနေရာမှာတော့ ဘရာဇီးနိုင်ငံက ကိုဗစ်-၁၉ ရောဂါကူးစက်ခံရသူ ၁၄ ဒသမ ၇ သန်း ကျော်၊ သေဆုံးသူ ၄ သိန်းကျော်နဲ့ ထိပ်ဆုံး ၃ နိုင်ငံအနေနဲ့ အသီးသီး ရပ်တည် နေပါတယ်။

အဲဒီ ၃ နိုင်ငံနောက်မှာတော့ ပြင်သစ်နိုင်ငံက ကူးစက်ခံရသူ ၅ သန်းကျော်၊ တူရကီ၊ ရုရှား၊ ယူကေနဲ့ အီတလီနိုင်ငံတွေက ကူးစက်ခံရသူ ၄ သန်းကျော်စီ၊ စပိန်နဲ့ ဂျာမနီ နိုင်ငံတွေက ကူးစက်ခံရသူ ၃ သန်းကျော်စီ၊ အာဂျင်တီးနား၊ ကိုလံဘီယာ၊ ပိုလန်၊ အီရန်၊ မက္ကဆီကိုနဲ့ ယူကရိန်းနိုင်ငံတွေက ကူးစက်ခံရသူ ၂ သန်းကျော်စီ ရှိနေတာ ဖြစ်ပါတယ်။

အဲဒီနောက်မှာတော့ ပီရူး၊ အင်ဒိုနီးရှား၊ ချက်သမ္မတနိုင်ငံ၊ တောင်အာဖရိက၊ နယ် သာလန်၊ ကနေဒါ၊ ချီလီ၊ အီရတ်၊ ရိုမေးနီးယားနိုင်ငံတွေနဲ့အတူ ဖိလစ်ပိုင်နိုင်ငံမှာလည်း ကိုဗစ်-၁၉ ရောဂါ ကူး စက်ခံရသူ အရေအတွက် ၁ သန်းကျော်လာခဲ့ပြီ ဖြစ်တာမို့ ခုချိန်ထိ ကမ္ဘာတဝန်း ကိုဗစ်-၁၉ ရောဂါကူးစက်ခံရသူ ဦးရေ ၁ သန်းကျော်လာခဲ့တဲ့ နိုင်ငံပေါင်း ၂၆ နိုင်ငံထိ ရှိလာ ခဲ့ပြီလို့ Worldometers ဝက်ဘ်ဆိုက်ဒ်မှာ ဖော်ပြထားပါတယ်။

ရောဂါဖြစ်ပွားမှုစတင်ရာ တရုတ်နိုင်ငံမှာတော့ ကိုဗစ်-၁၉ ရောဂါကူးစက်ခံရသူ အ ရေအတွက် ၉ သောင်းကျော်၊ စုစုပေါင်း သေဆုံးသူ ၄,၆၃၆ ယောက်နဲ့ နိုင်ငံအလိုက် အမှတ်စဉ် ၉၆ နေရာထိ ကျဆင်းသွားခဲ့ပါတယ်။

အာရှဒေသတွင်း နိုင်ငံတွေထဲမှာတော့ ကိုဗစ်-၁၉ ရောဂါကူးစက်ပြန့်ပွားမှု အမြင့် ဆုံး အိန္ဒိယ၊ တူရကီ၊ အီရန်၊ အင်ဒိုနီးရှား၊ အီရတ်နဲ့ ဖိလစ်ပိုင်နိုင်ငံတွေပြီးရင် အစ္စရေးနဲ့ ပါကစ္စတန်နိုင်ငံတွေက ရောဂါကူးစက်ခံရသူ ၈ သိန်းကျော်၊ ဘင်္ဂလားဒေ့ရှ်နဲ့ ဂျော်ဒန်နိုင်ငံ တွေက ၇ သိန်းကျော်စီနဲ့ အသီးသီး ကူးစက်ခံထားရတာ ဖြစ်ပါတယ်။

မြန်မာနိုင်ငံမှာတော့ လက်ရှိအချိန်ထိ ကိုဗစ်-၁၉ အတည်ပြု လူနာစုစုပေါင်း ၁၄၂,၈၃၁ ယောက်၊ သေဆုံးသူ ၃,၂၀၉ ယောက်နဲ့ ဆေးရုံက ဆင်းခွင့်ရသူပေါင်း ၁၃၁,၉၇၂ ယောက်ရှိနေပြီး အာဆီယံနိုင်ငံ တွေထဲမှာ ကိုဗစ်-၁၉ ရောဂါကူးစက်ခံရပြီး သေဆုံးမှုအများဆုံး ၃ နိုင်ငံထဲမှာ ပါဝင်နေပါတယ်။

မလေးရှားနိုင်ငံမှာတော့ ကိုဗစ်-၁၉ ရောဂါကူးစက်ခံရသူ အရေအတွက် ၄ သိန်း ကျော်နဲ့ သေဆုံးသူ ၁,၅၂၁ ယောက် ရှိပါတယ်။

မြန်မာနဲ့ အိမ်နီးချင်းနိုင်ငံတနိုင်ငံဖြစ်တဲ့ ထိုင်းနိုင်ငံမှာတော့ ကိုဗစ်-၁၉ ရောဂါကူး စက်ခံရသူ အရေအတွက် ၆ သောင်း ၇ ထောင်ကျော်နဲ့ သေဆုံးသူ ၂၂၄ ယောက် ရှိနေပါ တယ်။

စင်ကာပူနိုင်ငံကတော့ ရောဂါကူးစက်ခံရသူအရေအတွက် ၆ သောင်း ၁ ထောင် ကျော်နဲ့ သေဆုံးသူအရေအတွက် ၃၁ ယောက်ရှိနေတာ ဖြစ်ပါတယ်။

ကမ္ဘောဒီးယားနိုင်ငံမှာတော့ ကိုဗစ်-၁၉ ရောဂါကူးစက်ခံရသူ အရေအတွက် ၁၃,၇၉၀ ယောက်နဲ့ သေဆုံးသူ ၉၆ ယောက်ရှိလာခဲ့ပြီ ဖြစ်ပါတယ်။

ဗီယက်နမ်နိုင်ငံမှာတော့ ကိုဗစ်-၁၉ ရောဂါကူးစက်ခံရသူ အရေအတွက် ၂,၉၄၂ ယောက်နဲ့ သေဆုံးသူအရေအတွက် ခုရက်ပိုင်းမှာ တိုးမလာဘဲ ၃၅ ယောက် ရှိနေပြီး ဘရူ နိုင်းနိုင်ငံမှာတော့ ကိုဗစ်-၁၉ ရောဂါကူးစက်ခံရသူ အရေအတွက် ၂၂၇ ယောက်နဲ့ သေ ဆုံးသူ ၃ ယောက် ရှိနေတာပါ။

လာအိုနိုင်ငံမှာတော့ ရောဂါ ကူးစက်ခံရသူ ၈၂၁ ယောက် ရှိနေပေမယ့် သေဆုံး လူနာ ခုချိန်ထိ မရှိသေးပါဘူး။

3 days Ago

ဖိလစ်ပိုင်သမ္မတနှင့် ထိုင်းဝန်ကြီးချုပ်တို့ အာဆီယံထိပ်သီးအစည်းအဝေး မတက်

ဖိလစ်ပိုင်နိုင်ငံသမ္မတ ဒူတာတေးဟာ နိုင်ငံအတွင်း ကိုဗစ်-၁၉ ရောဂါ ကူးစက်မှု  အခြေအနေကို အာရုံစိုက်နိုင်ဖို့ အာဆီယံထိပ်သီး အစည်းအဝေးကို တက်ရောက်ဖြစ်မှာ မဟုတ်ဘူးလို့ နိုင်ငံခြားရေးဌာနက အတည်ပြုထုတ်ပြန်ပါတယ်။

ဧပြီ ၂၄ ရက်နေ့ အင်ဒိုနီးရှားနိုင်ငံ ဂျာကာတာမှာ ကျင်းပမယ့်  အာဆီယံထိပ်သီး အစည်းအဝေးပွဲဟာ နိုင်ငံခေါင်းဆောင်အားလုံး စုံညီမတက်ရောက်နိုင်ပေမယ့် ဒီအစည်းအဝေးကို အခိုင်အမာထောက်ခံတယ်လို့ ဆိုပါတယ်။

ဖိလစ်ပိုင်သမ္မတရဲ့ကိုယ်စား အစည်းအဝေးတက်ရောက်မယ့် နိုင်ငံခြားရေး ဝန်ကြီး လော့ဆင်ကတဆင့် ဒေသတွင်းတည်ငြိမ်အေးချမ်းရေးကို စိန်ခေါ်ခြောက်လှန့်နေတဲ့ ပြဿနာတွေကို ဖြေရှင်းဖို့ စုပေါင်းအားထုတ်မှုအပေါ် ဖိလစ်ပိုင်နိုင်ငံရဲ့ စိတ်ပိုင်းဖြတ်မှုကို ဖေါ်ပြလိုက်ပါတယ်လို့လည်း ဖိလစ်ပိုင် နိုင်ငံခြားရေး ဝန်ကြီးဌာနထုတ်ပြန်ချက်မှာ ဖော်ပြပါတယ်။

အလားတူ ထိုင်းနိုင်ငံဝန်ကြီးချုပ် ပရာယွတ်ချန်အိုချာကလည် အာဆီယံထိပ်သီး အစည်းအဝေးကို တက်ရောက်မှာ မဟုတ်ဘဲ ကိုဗစ်-၁၉ ကူးစက်မူအခြေအနေက စိုးရိမ်ရတဲ့အတွက် သူ့ကိုယ်စား ဒုတိယဝန်ကြီးချုပ်လည်းဖြစ်  နိုင်ငံခြားရေးဝန်ကြီးလည်းဖြစ်တဲ့ ပရာမွတ်ဝီနိုင်ကို စေလွှတ်မယ်လို့ အတည်ပြုပြောဆိုခဲ့ပါတယ်။  

ထိုင်းဝန်ကြီးချုပ် ပရာယွတ်ဟာ မြန်မာနိုင်ငံအရေးကို စိုးရိမ်ပူပန်နေတဲ့အကြောင်းနဲ့ ဒီပြဿနာဟာ ဒေသတွင်း ငြိမ်းချမ်းတည်ငြိမ်ရေးအတွက် စိန်ခေါ်မှုတခုဖြစ်လာနေတယ်ဆိုတာကို အသိအမှတ်ပြုတဲ့အကြောင်း ကြာသပတေးနေ့မနက်မှာ အင်ဒိုနီးရှား သမ္မတကဂျိုကို ဝီဒိုဒိုနဲ့ ဖုန်းဆက်ပြောဆိုခဲ့တယ်လို့ ထိုင်းအစိုးရက ထုတ်ပြန်ပါတယ်။

ထိုင်းနိုင်ငံခြားရေး ဝန်ကြီးဌာန ပြောခွင့်ရ တန်နီး ဆန်ဂရတ်ကလည်း အာဆီယံထိပ်သီးအစည်းအဝေးဟာမြန်မာကိစ္စအပါအဝင် ဒေသတွင်းနဲ့ နိုင်ငံတကာပြဿနာတွေကို ဆွေးနွေးဖို့ အခွင့်အလမ်းတခုဖြစ်လာနိုင်ကြောင်းနဲ့ မြန်မာနိုင်ငံ အရေးနဲ့ပတ်သက်လို့ လက်ဆုပ်လက်ကိုင်အဖြေတခုပေါ်ထွက်လာဖို့ မျှော်လင့်နေကြတာကို အာဆီယံအဖွဲ့က သိနားလည်ထားတဲ့အကြောင်း ပြောဆိုခဲ့ပါတယ်။

ဗီယက်နမ်နိုင်ငံ ဝန်ကြီးချုပ် ဖမ်မင်ချင်းကတော့ လာမယ့်စနေနေ့ကျင်းပမယ့် အာဆီယံထိပ်သီးအစည်းအဝေး တက်ရောက်မယ်လို့ ဗီယက်နမ်နိုင်ငံခြားရေးဌာနက ကြေညာပါတယ်။

ဧပြီလဆန်းပိုင်းက အမျိုးသားညီလာခံကတဆင့် ဝန်ကြီးချုပ်အဖြစ်တင်မြှောက်ခံခဲ့ရတဲ့ ဗီယက်နမ်ဝန်ကြီးချုပ် ဖမ်မင်ချင်းအတွက် ပထမဆုံးနိုင်ငံတကာ သံတမန်ရေး ခရီးစဉ်ဖြစ်ပါတယ်။ 

ပြီးခဲ့တဲ့ ဧပြီလ ကုလသမဂ္ဂလုံခြုံရေးကောင်စီရဲ့ အလှည့်ကျ ဥက္ကဋ္ဌ အဖြစ်တာဝန်ယူထားတဲ့ ဗီယက်နမ်နိုင်ငံဟာ မြန်မာနိုင်ငံတွင်းက အကြမ်းဖက်မှု သေဆုံးမှုတွေအတွက် စိုးရိမ်နေကြောင်းနဲ့ အာဆီယံနိုင်ငံတွေနဲ့ ပူးပေါင်းညှိနိုင်းဖြေရှင်းပေးဖို့ အဆင်သင့်ရှိကြောင်း ထုတ်ဖေါ်ပြောဆိုခဲ့ဖူးပါတယ်။

အင်ဒိုနီးရှားနိုင်ငံ ဂျကာတာမြို့ရှိ  အာဆီယံ အထွေထွေအတွင်းရေးမှူးချုပ်ရုံးမှာ ကျင်းပမယ့် အစည်းအဝေးမှာ မြန်မာနိုင်ငံပြဿနာကို အဓိကထား ဆွေးနွေးဖို့ ရှိပြီး မြန်မာအာဏာသိမ်းစစ်ခေါင်းဆောင် ဗိုလ်ချုပ်မှူးကြီး မင်းအောင်လှိုင်လည်း တက်ရောက်မယ်လို့ စစ်ကောင်စီ ပြောရေးဆိုခွင့်ရှိသူ ဗိုလ်မှူးချုပ် ဇော်မင်းထွန်းက ပြောထားပါတယ်။

Photo Credit - http://asean.dla.go.th

2 weeks Ago

အာဏာရှင်ကို ဖြုတ်ချခဲ့တဲ့ ဖိလစ်ပိုင်က ပြည်သူ့အာဏာလှုပ်ရှားမှုကြီး

၁၉၈၃ ခုနှစ် သြဂုတ်လ ၂၁ ရက်နေ့မှာ ဖိလစ်ပိုင်နိုင်ငံရဲ့ မြို့တော် မနီလာရဲ့လမ်းမတန်းများ တစ်လျှောက် ဖဲကြိုးဝါတွေ တလွင့်လွင့်ဖြစ်နေတယ်။

“ငါ့ကို အလိုရှိနေဦးမယ်ဆိုရင် ဖဲကြိုးဝါတစ်စကို သစ်ပင်မှာ ချည်နှောင်ပြထားပါ” ဆိုတဲ့ သီချင်းသံလည်း လေထဲမှာလွင့်ပျံနေတယ်။

အမေရိကန်ပြည်ထောင်စုကနေ ပြန်လာမယ့် အတိုက်အခံနိုင်ငံရေးခေါင်းဆောင် ဘင်နီဒစ်အကွီနို ( Benedict Aquino) ကို ကြိုဆိုတဲ့ အထိမ်းအမှတ်အဖြစ် ဖဲကြိုးဝါတွေ ချည်နှောင်ထားကြတာပါ။

ဘင်နီဒစ်အကွီနိုဟာ အာဏာရှင်ဖာဒီနန်မားကို့စ် (Ferdinand Marcos) ရဲ့ သေဒဏ်ပေးမှုကို ၁၉၉၇ ခုနှစ်မှာ ခံခဲ့ရသူဖြစ်ပေမယ့် ၁၉၈၀ ပြည့်နှစ်မှာတော့ အမေရိကန်ပြည်ထောင်စုကို ဆေး ကုသဖို့ သွားရောက်ခွင့် ရခဲ့ပါတယ်။ မားကို့စ်က  ပြိုင်ဘက်မရှိတဲ့ ရွေးကောက်ပွဲကို လုပ်ချင်တဲ့အတွက် အကွီနိုကို တစ်ဖက်လှည့်နဲ့ သွားခွင့်ပေးလိုက်တာပါ။ ဘင်နီဒစ်အကွီနို မပါဝင်နိုင်တဲ့ ၁၉၈၁ ရွေးကောက်ပွဲမှာ မားကို့စ်က မဲဆန္ဒ ၉၀ ရာခိုင်နှုန်းကျော်ကို အရယူခဲ့ပြီး သက်တော်ရှည်သမ္မတကြီး ဖြစ်ခဲ့ပါတယ်။

အတိုက်အခံခေါင်းဆောင် ဘင်နီဒစ် အကွီနိုဟာ သူ့ကို ကြိုဆိုတဲ့ ဖဲကြိုးဝါတွေကို မမြင်သွားရ ပါဘူး။ လေယာဉ်ပေါ်က အဆင်းမှာ အသင့်စောင့်နေတဲ့ လူသတ်သမားက သေနတ်နဲ့ပစ်ခတ် လုပ်ကြံတာကြောင့် အသက်ဆုံးသွားခဲ့ရပါတယ်။

ဒီအချိန်ကစပြီး အာဏာရှင်မားကို့စ်ကို ဆန့်ကျင်တဲ့ လူထုလှုပ်ရှားမှုတွေ အကြီးအကျယ် ပေါ်ပေါက် လာပါတော့တယ်။ သမ္မတမားကို့စ်ဟာ အုံကြွလာတော့မယ့် လူထုကို ထိန်းသိမ်းတဲ့အနေနဲ့ ၁၉၈၆ ခုနှစ်မှာ ရွေးကောက်ပွဲလုပ်ပါတယ်။ ဒီရွေးကောက်ပွဲမှာ သူ့ကို ယှဉ်ပြိုင်မယ့်သူကတော့ လုပ်ကြံသတ်ဖြတ်ခံလိုက်ရတဲ့ အတိုက်အခံခေါင်းဆောင် ဘင်နီဒစ်အကွီနိုရဲ့ ဇနီး ကိုရာဇန်အကွီနို ( Corazon Aquino ) ဖြစ်ပါတယ်။ သူ့ခင်ပွန်းသည်ကို ပစ်ခတ်လိုက်တဲ့ သေနတ်သံဟာ ဖိလစ်ပိုင်ပြည်သူလူထုကို လှုပ်နှိုးပေးလိုက်တယ်လို့ အကွီနိုက ပြောပါတယ်။

ကိုရာဇန်အကွီနိုဟာ သာမန်အိမ်ထောင်ရှင်မတယောက်အဖြစ် ဘဝကို ဖြတ်သန်းနေခဲ့ပေမဲ့ အထက်လွှတ်တော်အမတ်ဖြစ်တဲ့ခင်ပွန်းသည်ရဲ့ နိုင်ငံရေးလှုပ်ရှားမှုတွေကို နောက်ကွယ်ကနေ အားပေးကူညီနေခဲ့ပါတယ်။ ခင်ပွန်းဖြစ်သူရဲ့ ဘေးမှာအမြဲလိုက်ပါရင်း အတိုက်အခံနိုင်ငံရေးသမားရဲ့ ပင်ပန်းဆင်းရဲမှုနဲ့ အသားကျနေသူလည်းဖြစ်ပါတယ်။

အမေရိကန်ပြည်ထောင်စုမှာ ဆေးကုသပြီးအပြန် မနီလာလေဆိပ်မှာ ခင်ပွန်းသည် လုပ်ကြံ သတ်ဖြတ်ခြင်းခံရတဲ့နောက်မှာ အကွီနိုဟာ နိုင်ငံရေးအတွင်းကို ခြေစုံပစ်ပြီး ပါဝင်လာပါတော့တယ်။ လူထုဆန္ဒပြပွဲတွေမှာ တက်တက်ကြွကြွပါဝင်တဲ့ အကွီနိုဟာ ဖိလစ်ပိုင်ပြည်သူလူထုရဲ့ ဒီမိုကရေစီ မျှော်လင့်ချက် ဖြစ်လာတယ်။

အာဏာရှင်မားကို့စ်က လူထုဆန္ဒပြပွဲတွေကို ထိန်းချုပ်ဖို့အတွက် သမ္မတရွေးကောက်ပွဲကို အချိန်စောပြီး ကျင်းပမယ်လို့ ၁၉၈၅ ခုနှစ် ဒီဇင်ဘာလမှာ ထုတ်ပြန်လိုက်တယ်။ ကျင်းပမယ့်ရက်က ၁၉၈၆ ခုနှစ် ဖေဖော်ဝါရီ ၇ ရက်။ ကြားထဲမှာ ၂ လတာကာလပဲ ရှိပါတယ်။ ပြိုင်ဘက်ဖြစ်သူတွေ ရွေးကောက်ပွဲအတွက် ပြင်ဆင်ချိန်မရအောင် ဆုံးဖြတ်လိုက်ခြင်းပါပဲ။

ပြင်ဆင်ချိန်မပေးတဲ့ရွေးကောက်ပွဲကို ဝင်ဖို့အတွက် ကိုရာဇန်အကွီနိုဟာ မဆုံးဖြတ်နိုင်ဘဲ ဖြစ်နေပါတယ်။ ရွေးကောက်ပွဲနဲ့ပတ်သက်ပြီး အတွေ့အကြုံမရှိတာလည်း အကြောင်းတစ်ခုပါ။ ဒါပေမဲ့ ဖိလစ်ပိုင်ပြည်သူလူထုကလည်း သူတို့ရဲ့မျှော်လင့်ချက်ကို အပျောက်မခံနိုင်ပါဘူး။ ဖိလစ်ပိုင် ပြည်သူ တစ်သန်းရဲ့လက်မှတ်ရေးထိုးထားတဲ့ ပန်ကြားစာတစ်စောင် သူ့ရှေ့ကို ရောက်လာတဲ့ အချိန်မှာတော့ အကွီနိုဟာ အာဏာရှင်မားကို့စ်ကို စိန်ခေါ်ပြီး နိုင်ငံရေးကြိုးဝိုင်းထဲကို ဝင်ရောက် လာပါတော့တယ်။

အာဏာရှင်မားကို့စ်ဟာ ၁၉၆၅ ခုနှစ်က စပြီး သမ္မတရာထူးကို အပိုင်စီးထားခဲ့တယ်။ ပထမ လေးနှစ် သက်တမ်းအတွင်းမှာ အကျင့်ပျက်ခြစားမှုတွေနဲ့ နာမည်ပျက်ခဲ့ပေမယ့် ၁၉၆၉ ခုနှစ် ရွေးကောက်ပွဲမှာလည်း သူပဲအနိုင်ရခဲ့ပြန်ပါတယ်။ ၁၉၇၀ ပြည့်နှစ်မှာ မားကို့စ်အစိုးရရဲ့ အကျင့်ပျက် ခြစားမှုကိုဆန့်ကျင်တဲ့ ကျောင်းသား ဆန္ဒပြပွဲတွေ အကြီးအကျယ်ပေါ်ပေါက်ခဲ့ပါတယ်။

လူထုဆန္ဒပြပွဲကြီးတစ်ခုမှာ ဗုံးပေါက်ကွဲမှုကြောင့် လူ ၈ ယောက်သေဆုံးပြီး လူ ၁၀၀ကျော် ဒဏ်ရာ ရခဲ့တယ်။ မားကို့စ်ဟာ ဒါကို အကြမ်းဖက်မှုအဖြစ်အကြောင်း ပြပြီး ၁၉၇၂ မှာ စစ်အုပ်ချုပ်ရေး ကြေညာလိုက်ပါတယ်။ အခြေခံဥပဒေကို ပြင်ပြီး သမ္မတရာထူးကိုရော ဝန်ကြီးချုပ်ရာထူးကို ယူလိုက်တယ်။ ၁၉၈၃ ခုနှစ်အထိ စစ်အုပ်ချုပ်ရေးကို ဆုပ်ကိုင်ထားခဲ့ရာမှာ စစ်တပ်ကို တပ်သားအင်အား သုံးသိန်းအထိ တိုးချဲ့ပြီး အာဏာကို အခိုင်အမာတည်ဆောက်ပါတယ်။

အာဏာရှင်မားကို့စ်က သမ္မတရွေးကောက်ပွဲကို ဝင်ရောက်လာတဲ့ အကွီနိုကို အပြင်းအထန် ပုတ်ခတ် ပြောဆိုပါတယ်။

“ အိပ်ခန်းထဲမှာပဲ ရှိနေသင့်တဲ့ မိန်းမတစ်ယောက်ပါ။ နိုင်ငံရေးအတွေ့ အကြုံလည်းဘာမှမရှိ ပါဘူး။ ဒီလို မိန်းမတစ်ယောက်က သမ္မတဖြစ်လာမယ်ဆိုရင် ဖိလစ်ပိုင်နိုင်ငံဟာ ကပ်ဆိုက်ပြီး ပျက်သွားလိမ့်မယ်”။

အကွီနိုကလည်း ပြန်လည်တုံ့ပြန်ပြောဆိုပါတယ်။ 

“ ကျွန်မမှာ အကျင့်ပျက်ခြစားတဲ့ အတွေ့အကြုံမရှိပါဘူး၊ ပြည်သူ့ဘဏ္ဍာငွေကို ခိုးယူတဲ့ အတွေ့အကြုံမရှိပါဘူး၊ အတိုက်အခံ နိုင်ငံရေးသမားတွေကို သတ်ဖြတ်တဲ့အတွေ့အကြုံ မရှိပါဘူး၊ ပြည်သူလူထုကို လိမ်ညာလှည့်ပတ်တဲ့ အတွေ့အကြုံမရှိပါဘူး၊ ဒါကြောင့် အမျိုးကောင်းသမီးဘက်က အနိုင်ရပါစေသား” ။ 

ဖိလစ်ပိုင်ပြည်သူလူထုဟာ ၁၉၈၆ ခုနှစ် ဖေဖော်ဝါရီ ၇ ရက် ရွေးကောက်ပွဲမှာ တက်တက်ကြွကြွ မဲပေးကြတယ်။ ဒီမိုကရေစီအပြောင်းအလဲအတွက်အင်တိုက် အားတိုက် မဲပေးကြတယ်။

မားကို့စ် ဘက်ကလည်း ရွေးကောက်ပွဲကို အနိုင်ယူဖို့အတွက် နည်းမျိုးစုံ သုံးခဲ့ပါတယ်။ မဲစာရင်းမှာ မပါအောင် ချန်လှပ်ထားသူအရေအတွက်က သုံးသန်းကျော်ရှိပါတယ်။ မဲလိမ် မဲခိုး မဲဝယ် ရောင်းတွေလည်း မနည်းလှပါဘူး။ အကွီနိုကို ထောက်ခံတဲ့ အုပ်ချုပ်ရေးမှူးတစ်ယောက် အသတ်ခံရ ပါတယ်။ ရွေးကောက်ပွဲကော်မရှင်ရုံးမှာ မဲရလဒ်ကို ပြုစုရတဲ့ အဖွဲ့ထဲက ကွန်ပျူတာ ပညာရှင် သုံးဆယ်က မဲရလဒ်လိမ်လည်မှုကို မလုပ်နိုင်ဘူးဆိုပြီး အလုပ်ထွက်ကြပါတယ်။

ရွေးကောက်ပွဲရလဒ်ကို ထုတ်ပြန်တဲ့အခါ မားကို့စ်က မဲပေါင်း ဆယ်သန်းရှစ်သိန်းကျော် ရရှိပြီး အကွီနိုက မဲကိုးသန်းသုံးသိန်းရတယ်လို့ ရွေးကောက်ပွဲကော်မရှင်က ကြေညာပါတယ်။ လွတ်လပ်တဲ့ ရွေးကောက်ပွဲလှုပ်ရှားမှုအဖွဲ့ ( NAMFREL ) ကတော့ အကွီနိုက မဲ ခုနစ်သန်း ရှစ်သိန်းကျော် ရပြီး မားကို့စ်က ခုနစ်သန်း ငါးသောင်းကျော်ပဲ ရတယ်လို့ထုတ်ပြန်ပါတယ်။

ဖေဖော်ဝါရီ ၁၅ ရက်နေ့မှာ ကျင်းပတဲ့ လွှတ်တော်အစည်းအဝေးမှာ ရွေးကောက်ပွဲ ကော်မရှင်က မားကို့စ်သာလျှင် အနိုင်ရသူဖြစ်တယ်လို့ တရားဝင်ကြေညာတဲ့အခါ  အတိုက်အခံလွှတ်တော်အမတ် ငါးဆယ်က ကန့်ကွက်ပြီး လွှတ်တော်ထဲက ထွက်သွားကြပါတယ်။ နောက်ရက်မှာတော့ အကွီနိုက လူထုစည်းဝေးပွဲကြီး ခေါ်ပြီး ရွေးကောက်ပွဲလိမ်လည်မှုကို အာခံတဲ့အနေနဲ့ သပိတ်မှောက်ကြဖို့ တိုက်တွန်းလိုက်ပါတယ်။ ဒီလိုနဲ့ ကမ္ဘာကျော်ခဲ့တဲ့ ပြည်သူ့အာဏာ လှုပ်ရှားမှုကြီး ( Philippines People Power Movement) ပေါ်ပေါက်လာခဲ့ပါတယ်။

ပြည်သူလူထု ၂သန်းကျော်ဟာ မြို့တော်မနီလာကို ဖြတ်သန်းသွားတဲ့ အက်ဒဆာ အဝေးပြေး လမ်းမကြီးပေါ်မှာ စုရုံးပြီး အာဏာရှင်မားကို့စ်ရဲ့ မတရားအာဏာရယူမှုကို လက်သင့်မခံ ငြင်း ဆန်ကြပါတယ်။ ဒီလူထုရဲ့ အကြမ်းမဖက်အာခံမှုကြီးမှာ ဘာသာရေးခေါင်းဆောင်တွေ၊ အနုပညာ သမားတွေလည်း အလုံးအရင်းနဲ့ ပါဝင်ခဲ့ကြပါတယ်။

လူထုကြီးဟာ ဂီတအနုပညာသမားများရဲ့ သီချင်းသံတွေကို သံပြိုင်လိုက်သီဆိုရင်း  ငြိမ်းချမ်းရေးကို သရုပ်ဖော်ခဲ့ကြတယ်။ လူထုစုဝေးမှုကြီးကို ဖြိုခွဲဖို့ ရောက်လာတဲ့ စစ်သားတွေဟာ လူထုရဲ့ လှိုက်လှဲတဲ့ ကြိုဆိုမှုအောက်မှာ လူထုနဲ့ တသားတည်း ဖြစ်သွားကြပါတယ်။ စစ်ဦးစီးချုပ် ဗိုလ်ချုပ် ကြီး ဖီဒယ်လ်ရာမော့စ် (Fidel Ramos)နဲ့ ကာကွယ်ရေးဝန်ကြီး ဗိုလ်ချုပ်ကြီး အင်န်ရိုင်း ( Enrile) တို့က မားကို့စ်အစိုးရထဲက နုတ်ထွက်ပြီး ပြည်သူလူထုနဲ့ ပူးပေါင်းလိုက်ကြတယ်။

ကက်သလစ်ခရစ်ယာန်သီလရင်များက လက်နက်ကိုင်စစ်သားများကို တည်တည်ငြိမ်ငြိမ် ရင်ဆိုင် နေကြပုံ၊ ပြည်သူလူထုက တင့်ကားပေါ်က စစ်သားများကို  ရေပုလင်းနဲ့ ပေါင်မုန့်ပေးနေကြတဲ့ပုံတွေဟာ ဖိလစ်ပိုင်ပြည်သူလူထုရဲ့ အကြမ်းမဖက်လှုပ်ရှားမှုအောင်ပွဲကို သရုပ်ဖော်တဲ့ပုံများအဖြစ် ကမ္ဘာကျော်ခဲ့ပါ တယ်။

ဖေဖော်ဝါရီ ၂၂ ရက်ကနေ ၂၅ ရက်အထိ သန်းနဲ့ချီတဲ့ပြည်သူလူထုက  ဆန္ဒပြခဲ့တာကြောင့် အာဏာရှင် မားကို့စ်နဲ့မိသားစုဟာ  တိုင်းပြည်ကနေ ထွက်ခွါသွားခဲ့ပါတယ်။  အကွီနိုက  ၁၁ယောက် မြောက် ဖိလစ်ပိုင်သမ္မတအဖြစ် ကျမ်းကျိန်ပါတယ်။ ကမ္ဘာကျော် TIME  မဂ္ဂဇင်းကြီးက အကွီနိုကို ဖိလစ်ပိုင်နိုင်ငံရဲ့ ဒီမိုကရေစီသူရဲကောင်းလို့ အမည်ပေးပါတယ်။

“အမေရိကန်နိုင်ငံသားတွေက သူတို့ဟာ ဖိလစ်ပိုင်နိုင်ငံသားတွေကို ဒီမိုကရေစီဝါဒအကြောင်း သင်ပေးနေရတယ်လို့ ထင်နေကြတယ်။ အခု ဖိလစ်ပိုင်နိုင်ငံသားတွေက ဒီမိုကရေစီဝါဒအကြောင်းကို ကမ္ဘာကြီးကို သင်ပြပေးနေပါပြီ” လို့အမေရိကန်ရုပ်မြင်သံကြားဌာန CBS က ပြော ဆိုခဲ့ပါတယ်။

ဖိလစ်ပိုင်ရဲ့ ပြည်သူ့အာဏာလှုပ်ရှားမှုအတွင်းမှာ လူထုလူတန်းစားပေါင်းစုံပါဝင်ပါတယ်။ အကြမ်းမဖက်အာခံမှုသာ ဖြစ်တဲ့အတွက် ပြည်သူအများပါဝင်ခဲ့တာလို့ သုံးသပ်ကြပါတယ်။

အထူးခြားဆုံးကတော့ ဘာသာရေးဝန်ထမ်းတွေပါပဲ။ ကက်သလစ်ဘုန်းတော်ကြီး ကာဒီနယ်ဆင်း ( Cardinal Sin) ရဲ့ ပါဝင်မှုဟာ အောင်မြင်မှုအတွက် ကြီးမားတဲ့အကြောင်းတစ်ခုပဲလို့ သုံးသပ်ကြ ပါတယ်။ ကာဒီနယ်ဆင်းက ပြည်သူ့အာဏာလှုပ်ရှားမှုကြီးအတွင်းမှာ စစ်ခေါင်းဆောင်တွေပါဝင် လာအောင် စည်းရုံးနိုင်ခဲ့တဲ့သူပါ။ ခရစ်ယန်သီလရင်များက အကြမ်းမဖက်အာခံခြင်းကို သရုပ်ပြခဲ့ တာဟာ လူထုလှုပ်ရှားမှုကို ဖြိုခွဲဖို့ လာခဲ့တဲ့ စစ်သားတွေရဲ့ နှလုံးသားကို အရည်ပျော်သွားစေခဲ့တယ်။

ကျောင်းသူကျောင်းသားနဲ့ အခြေခံပြည်သူလူထုကစပြီး ဘာသာရေးဝန်ထမ်းတွေအဆုံး ပါဝင်တဲ့ ပြည်သူ့အာဏာလှုပ်ရှားမှုကြီးမှာအတွင်းမှာ လုယက်မှု ၊ သတ်ဖြတ်မှု ၊ ရုန်းရင်းဆန်ခတ်မှုတွေ မဖြစ်ပွားခဲ့ပါဘူး။ လူမျိုးရေးပဋိပက္ခတွေ မဖြစ်ခဲ့သလို ဘာသာရေးအဓိကရုန်းတွေလည်း မဖြစ်ခဲ့ ပါဘူး။ ဒါကြောင့်လည်း မူလက သမ္မတမားကို့စ်ကို သစ္စာခဲ့တဲ့ စစ်ခေါင်းဆောင်တွေပင် ပြည်သူ့ အာဏာ လှုပ်ရှားမှုနဲ့ ပူးပေါင်းလာကြတာပါ။

လူထုရဲ့ အကြမ်းမဖက်လှုပ်ရှားမှုကြီးက စစ်ခေါင်းဆောင်တွေကို စွဲဆောင်နိုင်တဲ့အပြင် နိုင်ငံ တကာရဲ့ ထောက်ခံမှုကိုလည်း အကြီးအကျယ်ရရှိခဲ့ပါတယ်။ အမေရိကန်အစိုးရက  ပြည်သူ့အာဏာ လှုပ်ရှားမှုဘက်မှာ ရပ်တည်နေတဲ့ အကွီနိုကို ထောက်ခံခဲ့ပြီး မားကို့စ်ကို အာဏာစွန့်ဖို့ ပြောခဲ့ပါတယ်။ မားကို့စ်ကို ဖိလစ်ပိုင်နိုင်ငံက ထွက်ခွါသွားအောင် စီစဉ်ပေးခဲ့ပါတယ်။ဖိလစ်ပိုင်ရဲ့ ပြည်သူ့အာဏာလှုပ်ရှားမှုဟာ အကြမ်းမဖက်အာခံနည်းရဲ့ အောင်မြင်မှုအတွက် ပြီးပြည့်စုံတဲ့စံနမူနာတစ်ခုဖြစ်တယ်လို့ ပညာရှင်များက ဆိုကြပါတယ်။     ။

3 months Ago

မြန်မာရောက် ဖိလစ်ပိုင်နိုင်ငံသားများ စင်းလုံးငှားလေယာဉ်ဖြင့် နေရပ်ပြန်

မြန်မာနိုင်ငံမှာ ရောက်ရှိနေတဲ့ ဖိလစ်ပိုင်နိုင်ငံသားတွေထဲက ၁၃၉ ယောက်ဟာ ဖေဖော်ဝါရီ ၁၅ ရက်က စင်းလုံးငှားလေယာဉ်နဲ့ နေရပ်ပြန်သွားခဲ့ကြပြီလို့ မနီလာတိုင်းမ်သတင်းမှာ ဖော်ပြပါတယ်။

လတ်တလော မြန်မာနိုင်ငံမှာ ဖြစ်နေတဲ့ နိုင်ငံရေးမတည်ငြိမ်မှုနဲ့ ကိုဗစ်-၁၉ ရောဂါ ကူးစက်ပျံ့နှံ့မှု အခြေအနေကြောင့် ဖိလစ်ပိုင် နိုင်ငံခြားရေးဝန်ကြီးဌာနရဲ့ စီစဉ်မှုနဲ့ နိုင်ငံသားတွေကို ပြန်လည်ခေါ်ယူခဲ့တာ ဖြစ်ပါတယ်။

ဒါဟာ မြန်မာနိုင်ငံမှာ ရောက်ရှိနေတဲ့ ဖိလစ်ပိုင်နိုင်ငံသားတွေကို ဒုတိယအကြိမ် ပြန်လည်ခေါ်ယူမှုဖြစ်ကာ ပြီးခဲ့တဲ့နှစ် မတ်လကတည်းကစတင်ကာ နေရပ်ပြန်လည်ပို့ ဆောင်ခဲ့တဲ့ နိုင်ငံသားပေါင်း ၅၀၉ ယောက်ရှိခဲ့ပြီးဖြစ်တယ်လို့ ဆိုပါတယ်။       ဖိလစ်ပိုင် နိုင်ငံခြားရေးဝန်ကြီးဌာနရဲ့ စာရင်းဇယားတွေအရ ပြီးခဲ့တဲ့ ၂၀၂၀ ပြည့်နှစ်၊ ဇွန်လအထိ မြန်မာနိုင်ငံမှာ ရောက်ရှိနေတဲ့ ဖိလစ်ပိုင်နိုင်ငံသား ၁,၂၇၃ ယောက်ရှိပြီး ကုလသမဂ္ဂနဲ့ နိုင်ငံတကာအဖွဲ့အစည်းတချို့မှာ အလုပ်လုပ်ကိုင်နေကြသူတွေပါဝင်သလို ကုန်ထုတ်လုပ်မှုလုပ်ငန်းတွေမှာ ကြီးကြပ်သူတွေအနေနဲ့ အလုပ်လုပ်ကိုင်နေကြသူတွေလည်း ပါဝင်တယ်လို့ ဆိုပါတယ်။

3 months Ago

မြန်မာတွင် စစ်အာဏာမသိမ်းခင်အခြေအနေထက် ပိုလျော့မည့် အခြေအနေ ဖိလစ်ပိုင် လက်မခံ

မြန်မာနိုင်ငံမှာ စစ်အာဏာမသိမ်းခင် အခြေအနေထက် ပိုလျော့သွားမယ့် ဘယ်အခြေအနေကိုမှ လက်မခံဘူးလို့ ဖိလစ်ပိုင်နိုင်ငံက ကြေညာပါတယ်။

မြန်မာနိုင်ငံမှာ ဖြစ်နေတဲ့ လူ့အခွင့်အရေးဆိုင်ရာ သက်ရောက်မှုတွေနဲ့ပတ်သက်လို့ ကုလသမဂ္ဂ လူ့အခွင့်အရေးကောင်စီရဲ့ ၂၀၂၁ ခုနှစ်၊ ဖေဖော်ဝါရီလ ၁၂ ရက်မှာ ကျင်းပတဲ့ အထူးအစည်းအဝေးနဲ့ ပတ်သက်ပြီး ဖိလစ်ပိုင်က ထုတ်ပြန်လိုက်တာပါ။

“ဖိလစ်ပိုင်အနေနဲ့ မြန်မာနိုင်ငံရဲ့ တိုးတက်မှုအများကြီးရှိခဲ့တဲ့ status quo ante (နိုင်ငံတော်အရေးပေါ်အခြေအနေ ကြေညာချက်မတိုင်မီ နိုင်ငံရေးအခြေအနေ) ကို အပြည့်အဝ ပြန်လည်ဖော်ဆောင်တာထက် ပိုမိုလျော့နည်းတဲ့ ဒါမှမဟုတ် တခြား ဘယ်အခြေအနေကိုမျှ လက်ခံနိုင်မှာ မဟုတ်ဘူး” လို့ မြန်မာနိုင်ငံဆိုင်ရာ ဖိလစ်ပိုင် သံရုံးက ထုတ်ပြန်ထားပါတယ်။

ပြီးတော့ အခု ဒီမိုကရေစီအပြောင်းအလဲဟာ လူ့အခွင့်အရေးကောင်စီမှာဖြစ်ဖြစ်၊ နိုင်ငံခြား ဖြေရှင်းချက်တွေအားဖြင့်မဟုတ်ဘဲ ပြည်တွင်းအားထုတ်မှုတွေကြောင့် အဓိက ဖြစ်လာရမယ်လို့လည်း ဆိုပါတယ်။

ဒေါ်အောင်ဆန်းစုကြည် အပါအဝင် ဖမ်းဆီးခံထားရသူတွေ အားလုံး ပြန်လွှတ်ပေးဖို့ တောင်းဆိုထားတဲ့ ကုလသမဂ္ဂလူ့အခွင့်အရေးကောင်စီရဲ့ ဆုံးဖြတ်ချက်မှာတော့  ဖိလစ်ပိုင်နိုင်ငံက  မပါဝင်ခဲ့ပါဘူး။

3 months Ago

ကပ်ရောဂါနှောင်းပိုင်း ပြန်နာလန်ထူရေး ဦးစားပေးဆောင်ရွက်ရန် တရုတ်နှင့် ဖိလစ်ပိုင် သဘောတူ

ကိုဗစ်-၁၉ ကပ်ရောဂါနှောင်းပိုင်းကာလ ပြန်လည်နာလန်ထူရေးအတွက် ထိပ်တန်းဦးစားပေး ပူးပေါင်းဆောင်ရွက်ကြဖို့ တရုတ်နဲ့ ဖိလစ်ပိုင် နိုင်ငံခြားရေးဝန်ကြီးတွေ ဇန်နဝါရီ ၁၆ ရက်က သဘောတူ ကတိပြုလိုက်ကြပါတယ်။ တရုတ်နိုင်ငံခြားရေးဝန်ကြီး ဝမ်ယိက အရှေ့တောင်အာရှ ၄ နိုင်ငံဆီ သီတင်းပတ်တပတ်ကြာ အလည်အပတ်ခရီး နောက်ဆုံးနိုင်ငံကို ရောက်ချိန် ခုလို ကတိပြုလိုက်တာပါ။ တရုတ်နဲ့ ဖိလစ်ပိုင်အစိုးရတွေဟာ ကိုဗစ်-၁၉ ကပ်ရောဂါ တုံ့ပြန်ရေးနဲ့ အပြန်အလှန် အကျိုးရှိမယ့် ပူးပေါင်းဆောင်ရွက်ရေးကို အာရုံစိုက်သင့်တယ်လို့လည်း ဝမ်ယိက ပြောပါတယ်။ ဖိလစ်ပိုင်အစိုးရဟာ တရုတ်ကုမ္ပဏီ စီနိုဗက်ဘိုင်အိုတက်ခ်က စမ်းသပ်ထုတ်လုပ်ထားတဲ့ ကိုဗစ်-၁၉ ကာကွယ်ဆေး ထိုးဆေး ၂၅ သန်းကို ဝယ်နေပြီး ပထမဆုံးအသုတ် ထိုးဆေး ၅ သောင်းဟာ ဖေဖော်ဝါရီလမှာ ဖိလစ်ပိုင်ကို ရောက်ဖို့ မျှော်လင့်ထားပါတယ်။ ဖိလစ်ပိုင်မှာ ကပ်ရောဂါကူးစက်ခံ စုစုပေါင်းဦးရေ ၅ သိန်းနီးပါးရှိနေပြီး ကူးစက်ခံ သေဆုံးသူ ၉,၉၀၀ နီးပါး ရှိလို့ အရှေ့တောင်အာရှဒေသမှာ အင်ဒိုနီးရှား ပြီးရင် ဒုတိယအဆိုးဆုံး ကူးစက်ခံနိုင်ငံ ဖြစ်နေပါတယ်။ ကိုဗစ်-၁၉ တိုက်ဖျက်ရေး နီးကပ်တဲ့ ပူးပေါင်းဆောင်ရွက်မှု၊ အဆင့်စုံ ကဏ္ဍစုံ ဆက်ဆံရေး တိုးမြှင့်မှုနဲ့ နှစ်နိုင်ငံကြား ချစ်ကြည်ရေး နက်ရှိုင်းမှုတို့နဲ့အတူ စီးပွားရေးနဲ့ အခြေခံအဆောက်အဦ စီမံကိန်းတွေ ထိပ်တန်းဦးစားပေး ပူးပေါင်းဆောင်ရွက်မှုတွေ စတင်မယ်လို့ ဖိလစ်ပိုင် နိုင်ငံခြားရေးဝန်ကြီး တေဒရိုလော့ခ်ဆင်က သူ့မိန့်ခွန်းထဲမှာ ပြောပါတယ်။ နှစ်နိုင်ငံ အရာရှိတွေဟာ ဖိလစ်ပိုင်နိုင်ငံအတွင်း လူနေမှုဘဝ တိုးတက်ရေး၊ အခြေခံအဆောက်အအုံနဲ့ တခြားစီမံကိန်းတွေအတွက် အမေရိကန် ဒေါ်လာ ၇၇ သန်းဖိုး သဘောတူညီချက်ကို လက်မှတ်ရေးထိုးခဲ့ကြပါတယ်။ တရုတ်နိုင်ငံခြားရေးဝန်ကြီးဟာ ဖိလစ်ပိုင်ကို လာမလည်ခင် ဒီအပတ် အစောပိုင်းက မြန်မာ၊ အင်ဒိုနီးရှားနဲ့ ဘရူနိုင်းနိုင်ငံတို့ဆီ သွားရောက်လည်ပတ်ခဲ့ပါတယ်။
4 months Ago

ဖိလစ်ပိုင်တွင် ရဲအရာရှိတဦး၏ ပစ်ခတ်မှုကြောင့် လူ ၂ ဦး သေဆုံး

ဖိလစ်ပိုင်နိုင်ငံ မြို့တော် မြောက်ဘက် တာလက်ပြည်နယ်မှာ တာဝန်ချိန်ပြင်ပ ရဲအရာရှိ တယောက်ရဲ့ ပစ်ခတ်မှုကြောင့် လူ ၂ ယောက် သေဆုံးခဲ့တယ်လို့ သိရပါတယ်။ သေဆုံးသွားတဲ့ သားအမိ ၂ ယောက်ရဲ့ အလောင်းတွေကို ဒီဇင်ဘာ ၂၇ ရက်က သင်္ဂြိုဟ်လိုက်ပြီး ဆွေမျိုး မိတ်ဆွေတွေနဲ့ စာနာသူ ရာချီပြီး ဈာပနပွဲကို တက်ရောက်ခဲ့ပါတယ်။  အသက် ၅၂ နှစ်အရွယ် ဆိုညာဂရီဂေါ်ရီယိုနဲ့ သားဖြစ်သူ ဖရန့်ခ်တို့ဟာ ဒီဇင်ဘာ ၂၀ ရက်မှာ ခေါင်းကို သေနတ်နဲ့ ပစ်သတ်တာ ခံခဲ့ရပါတယ်။ တက်ကြွလှုပ်ရှားသူတွေကတော့ သမ္မတ ရိုဒရီဂိုဒူဒါတေရဲ့ မူးယစ်စစ်ပွဲဟာ ရဲတွေ ဒဏ်ခတ်မခံရတဲ့ ယဉ်ကျေးမှုတရပ် ထွန်းကားလာအောင် ဖန်တီးနေတယ်လို့ ပြောပါတယ်။ နှစ်သစ်ကူးပွဲတော်မှာ သုံးတဲ့ အိမ်လုပ် အသံမြည်ပစ္စည်းကို သုံးတဲ့ကိစ္စနဲ့ပတ်သက်ပြီး ပစ်သတ်ခံရတဲ့ သားအမိနဲ့ ရဲတို့ ငြင်းခုံ ရန်ဖြစ်နေပုံကို မိသားစုဝင်တယောက်က ဖုန်းနဲ့ ရုပ်သံ မှတ်တမ်းတင်ထားခဲ့တာကို တွေ့ရပါတယ်။ ရန်ပွဲပြင်းထန်လာချိန်မှာ မိခင်က သားကို ဖက်ထားတုန်း ရဲက မိခင်ရဲ့ ခေါင်းကို သေနတ်နဲ့ ပစ်အပြီး သားဖြစ်သူရဲ့ ခေါင်းကိုပါ ပစ်ခဲ့တာလို့ ရုပ်သံက ပြထားပါတယ်။ ထွက်မပြေးခင်မှာ ရဲက မိခင်ဖြစ်သူကို သေနတ်နဲ့ ထပ်ပစ်ခဲ့ပါသေးတယ်။ အဲဒီညမှာပဲ ရဲအရာရှိဟာ ရဲတပ်ဖွဲ့ဆီမှာ အဖမ်းခံခဲ့ပြီး လူသတ်မှု ၂ မှုကို ရင်ဆိုင်နေရပါတယ်။
4 months Ago

ဆိုက်ဘာအသရေဖျက်မှုဖြင့် စွပ်စွဲခံရသူ ဖိလစ်ပိုင် သတင်းထောက် လျှောက်လဲချက်တင်ရန် ငြင်းဆန်

ဖိလစ်ပိုင်အင်တာနက် သတင်းဌာနတခုကို ဦးစီးနေတဲ့ သတင်းထောက် မာရီယာရက်ဇာက သူရင်ဆိုင်နေရတဲ့ ဒုတိယအဆင့် ဆိုင်ဘာအသရေဖျက်မှုဟာ ရီစရာကောင်းတယ်လို့ ပြောရင်း လျှောက်လဲချက်တင်ဖို့ ငြင်းလိုက် ပါတယ်။ တချိန်က စာနယ်ဇင်း လွတ်လပ်ခွင့် ရှိတယ်လို့သိကြတဲ့ ဖိလစ်ပိုင်နိုင်ငံမှာ သူနဲ့တခြား သတင်းထောက်တွေကို ခြိမ်းခြောက်နေတယ်လို့ သူက ပြောတဲ့ တရားစွဲမှု တသီတသန်းကြီးကို ရင်ဆိုင်နေရပါတယ်။  စွဲချက်တွေကို ပယ်ဖျက်ဖို့ ဆုံးဖြတ်ချက်အတွက် စောင့်နေချိန်မှာ အခြေအနေအရ စွပ်စွဲပြီး ရုံးတင်စစ်ဆေးခံယူဖို့ သူတို့ သဘောတူခဲ့တယ်လို့ ရက်ဇာရဲ့ အကြံပေး သီအိုဒိုရေတေ က ပြောပါတယ်။  စီးပွားရေးသမား ဝီလ်ဖရက်ဒိုကန်ကလည်း သူနဲ့ ရာဇဝတ်မှုဆိုင်ရာ သတင်းတရပ်ကို ချိတ်ဆက်ပြီး ၂၀၀၂ ခုနှစ်မှာ ဆောင်းပါးရေးထားတဲ့ ပုံကို ဖန်သားပြင် ဓာတ်ပုံရိုက်ပြီး မျှဝေမှုနဲ့ ရက်ဇာကို စွပ်စွဲပြီး ဆိုင်ဘာ အသရေဖျက်မှု အသစ်နဲ့ တရားစွဲ ထား ပါတယ်။  ကြားနာပွဲအပြီးမှာ သူ့ရှေ့နေက သတင်းထောက်တွေနဲ့ စကားမပြောခဲ့ပါဘူး။ ၂၀၁၂ တုန်းက ကန်နဲ့ တရားမဝင် လှုပ်ရှားမှုတွေကို ချိတ်ဆက် ရေးသားထားတဲ့ သတင်းဆောင်းပါးအတွက် ရက်ဇာဟာ အသရေ ဖျက်မှုနဲ့ ဇွန်လက ပြစ်ဒဏ် စီရင်ခံခဲ့ရ ပါသေးတယ်။  သူဟာ ထောင်ဒဏ် ၆ နှစ်ပြစ်ဒဏ်ကို ရင်ဆိုင်ရပေမယ့် ဆုံးဖြတ်ချက်အတွက် အသနားခံစာ တင်ထားပါတယ်။  ရက်ဇာဟာ အခွန်ကိစ္စနဲ့ မီဒီယာကို နိုင်ငံခြားသား ပိုင်ဆိုင်မှု ဆိုင်ရာ စည်းမျဉ်း ချိုးဖောက်မှု တွေ အပါအဝင် တခြားအမှု အတော်များများကိုလည်း ရင်ဆိုင်နေရ ပါတယ်။  ရက်ဇာကတော့ လူ ၆,၀၀၀ နီးပါး သေဆုံးခဲ့ရတဲ့ သမ္မတ ဒူဒါတေရဲ့ မူးယစ်စစ်ပွဲနဲ့ ပတ်သက်ပြီး သူ့ရဲ့ ဝေဖန်ရေးသားတဲ့ သတင်းတွေကြောင့် ဒီအမှုနဲ့ ရင်ဆိုင်ရတာလို့ ပြောပါတယ်။
5 months Ago

ဖိလစ်ပိုင်ကို ပဲ့ထိန်းဒုံးကျည်စနစ် အမေရိကန် လှူဒါန်း၊ မဟာမိတ်အဖြစ် ကာကွယ်ရန် ကတိပြု

အမေရိကန် အစိုးရဟာ ဖိလစ်ပိုင်နိုင်ငံကို အမေရိကန် ဒေါ်လာ ၁၈ သန်းတန် အတိအကျ ချိန်ရွယ်ပစ်ခတ်နိုင်တဲ့ ပဲ့ထိန်းဒုံးကျည်စနစ်တွေ လှူဒါန်းခဲ့တယ်လို့ မနီလာမြို့တော် အခြေစိုက် နိုင်ငံခြားရေးဝန်ကြီး တီယိုဒိုရိုလော့ဆင်ဂျူနီယာက နိုဝင်ဘာ ၂၃ ရက်မှာ ပြောလိုက်ပါတယ်။ ဒီစနစ်ကို မင်ဒါနာအိုကျွန်းပေါ်က အစ္စလာမစ်စစ်သွေးကြွတွေကို နှိမ်နင်းရာမှာ သုံးမယ်လို့လည်း သူက ပြောလိုက်ပါတယ်။ မနီလာမြို့တော်က နိုင်ငံခြားရေးဌာန ဗဟိုဌာနချုပ်မှာ လွှဲပြောင်းပေးရေး အခမ်းအနားအတွင်း ဖိလစ်ပိုင် နိုင်ငံခြားရေးဝန်ကြီးက အမေရိကန် အမျိုးသားလုံခြုံရေး အကြံပေး ရောဘတ်အိုဘရိုင်ယန်ဆီကနေ ပဲ့ထိန်းဒုံးကျည်တွေနဲ့ စမတ်ဗုံးတွေကို လက်ခံ ရယူခဲ့ပါတယ်။ အငြင်းပွား တောင်တရုတ်ပင်လယ်အတွင်း တိုက်ခိုက်မှုတွေရှိလာရင် မဟာမိတ် ဖိလစ်ပိုင်ကို ကာကွယ်သွားမယ်လို့လည်း အမေရိကန်က ထပ်ပြီး ကတိပြုပါတယ်။ အမေရိကန်သမ္မတ ဒေါ်နယ်ထရမ့်နဲ့ ဖိလစ်ပိုင်သမ္မတ ရိုဒရီဂိုဒူဒါတေတို့ ဧပြီလက ဖုန်းနဲ့ စကားပြောချိန်မှာ အမေရိကန် ဒေါ်လာ ၁၈ သန်းတန် ဒုံးကျည်တွေ ပေးမယ်လို့ ထရမ့်က ကတိပြုခဲ့တာပါ။ ဖိလစ်ပိုင်မှာ တိုင်ဖွန်းမုန်တိုင်းတွေ ရှေ့ဆင့်နောက်ဆင့် ဝင်ခဲ့ကြလို့ သေဆုံး ပျက်စီးတာတွေ ရှိခဲ့အပြီး အိုဘရိုင်ယန်က ဖိလစ်ပိုင်ကို စာနာကြောင်း ပြောပါတယ်။ ကိုရိုနာဗိုင်းရပ်စ် ကပ်ဘေးကို တိုက်ပွဲဝင်နေရတဲ့ ဖိလစ်ပိုင်အပေါ် အမေရိကန်ရဲ့ အကူအညီတွေကိုလည်း အနှစ်ချုပ် ပြောပါတယ်။
5 months Ago

ဖိလစ်ပိုင်ကျန်းမာ‌ရေးလုပ်သားများ နိုင်ငံခြားခရီးသွားခွင့် ပြန်ခွင့်ပြု

ဖိလစ်ပိုင်သမ္မတ ရိုဒရီဂိုဒူဒါတေက ဖိလစ်ပိုင် ကျန်းမာရေးလုပ်သားတွေ နိုင်ငံခြားခရီးသွားခွင့် တားမြစ်ပိတ်ပင်ချက်ကို အဆုံးသတ်ပေးလိုက်ပြီလို့ အလုပ်သမားဝန်ကြီးက နိုဝင်ဘာ ၂၁ ရက်မှာ ပြောလိုက်ပါတယ်။ ဒါကြောင့် ကျန်းမာရေးစောင့်ရှောက်မှု နယ်ပယ်ထဲက ထောင်ချီတဲ့ လုပ်သားတွေအတွက် မျှော်လင့်ချက်တွေ ပြန်ဆန်းသစ်လာခဲ့ပါတယ်။ ဒါပေမဲ့ တနှစ်ကို ကျန်းမာရေးဝန်ထမ်း အယောက် ၅,၀၀၀ သာ နိုင်ငံခြားကို ထွက်ခွင့်ပြုထားတာပါ။ မနှစ်က ကျန်းမာရေးလုပ်သား ၁၉,၀၀၀ ကို နိုင်ငံခြားထွက် အလုပ်လုပ်ခွင့်ပေးခဲ့တယ်။ အဲဒါနဲ့နှိုင်းစာရင် ကန့်သတ်ချက်ရှိနေသေးပေမယ့် ခရီးသွားပိတ်ပင်ချက် ဖယ်ပေးတာ ဝမ်းသာတယ်လို့ အသက် ၂၆ နှစ်အရွယ် ကျန်းမာရေးလုပ်သား ဗင့်စ်အူမာလီက ပြောပါတယ်။ “သူနာပြုတွေဟာ ဖိလစ်ပိုင်နိုင်ငံကနေ လစာပိုများပြီး လုပ်ငန်းခွင်အခြေအနေ ပိုကောင်းတဲ့ အမေရိကန်၊ ကနေဒါနဲ့ အရှေ့အလယ်ပိုင်းဒေသတွေဆီ သွားပြီး အလုပ်လုပ်နေကြတာ ဆယ်စုနှစ်တွေ ချီနေပါပြီ။ မိခင်နိုင်ငံမှာ အလုပ်ချိန် တရက် ၈ နာရီကနေ ၉ နာရီထိ လုပ်ရပြီး တလကို လစာ ၄၁၄ ဒေါ်လာသာ ရပေမယ့် ကနေဒါမှာတော့ တနာရီ လုပ်အားခ ၄၅ ဒေါ်လာ ရတယ်။ တရက်ကို ၆ နာရီကနေ ၇ နာရီထိပဲ အလုပ်လုပ်ရတယ်။” ဖစ်ဇာ ဆေးဝါးထုတ်လုပ်ရေးလုပ်ငန်းက သူ့ကာကွယ်ဆေးတွေကို ဖြန့်ချိဖို့ အတည်ပြုချက် ရတဲ့ နိုင်ငံဆီ သေချာပေါက် ဖြန့်ဖြူးမှာဖြစ်ပြီး ဖိလစ်ပိုင်အာဏာပိုင်တွေဆီက အတည်ပြုချက်ကို လာမယ့်နှစ်အစောပိုင်း ရနိုင်တယ်လို့ အမေရိကန်နိုင်ငံဆိုင်ရာ ဖိလစ်ပိုင် သံအမတ်ကြီးက ထင်ကြေးပေးထားပါတယ်။
5 months Ago

ဖိလစ်ပိုင်တွင် ဗမ်ကိုမုန်တိုင်းကြောင့် ၆၇ ဦး သေဆုံး၊ ၁၂ ဦး ပျောက်ဆုံး

ဖိလစ်ပိုင်နိုင်ငံရဲ့ အဓိကကျွန်းမကြီး လူဇုန်ကျွန်းတလျှောက် တိုင်ဖွန်းမုန်တိုင်း ဗမ်ကို ဝင်ရောက်တိုက်ခတ်ခဲ့တာကြောင့် လူ ၆၇ ယောက်ထက်မနည်း သေဆုံးပြီး ၁၂ ယောက် ပျောက်နေတယ်လို့ ကပ်ဘေးဆိုင်ရာ အေဂျင်စီက နိုဝင်ဘာ ၁၅ ရက်မှာ ပြောပါတယ်။ ဒီနှစ်အတွင်း ဖိလစ်ပိုင်နိုင်ငံကို ဝင်ရောက်တိုက်ခတ်ခဲ့တဲ့ ၂၁ လုံးမြောက် မုန်တိုင်း ဗမ်ကိုဟာ မြို့တော်နဲ့ တခြားခရိုင်တွေ နေရာအတော်များများကို လေပြင်းတွေ သည်းကြီးမည်းကြီး ရွာချတဲ့ မိုးတွေနဲ့အတူ နိုဝင်ဘာ ၁၁ ရက်က ဝင်ရောက်တိုက်ခတ်ခဲ့တာပါ။ မနီလာမြို့တော်နဲ့ အနားက ခရိုင်တွေက နေရာအများအပြားမှာ ရေပြန်ကျသွားပြီ ဖြစ်ပေမဲ့ နိုင်ငံအရှေ့မြောက်ပိုင်း ကာဂါယန်တောင်ကြားက မြို့အတော်များများမှာ အကြီးအကျယ် ရေကြီးနေဆဲပါ။ လေတိုက်နှုန်း ၁ နာရီ ၁၀၃ မိုင်နဲ့ တိုက်ခတ်ခဲ့တဲ့ ဗမ်ကိုမုန်တိုင်းဟာ ဗီယက်နမ် ကမ်းရိုးတန်းကို ဟာထင်ကနေ ကွမ်ငိုင်ခရိုင်ကတဆင့် ဝင်ရောက်မယ်လို့ အစိုးရ မိုးလေဝသဌာနက နိုဝင်ဘာ ၁၄ ရက်မှာ ဟောကိန်းထုတ်ထားပါတယ်။
6 months Ago

တိုင်ဖွန်းဗန်ကိုကြောင့် ဖိလစ်ပိုင်တွင် ၄၂ ဦး သေဆုံး၊ ကာဂါယန်တောင်ကြားတွင် ရေကြီး

နိုဝင်ဘာ ၁၁ ရက်က ဖိလစ်ပိုင်နိုင်ငံ လူဇုန်ကျွန်းမကြီးကို ဝင်ရောက်တိုက်ခတ်ခဲ့တဲ့ တိုင်ဖွန်း ဗန်ကိုကြောင့် လူ ၄၂ ယောက်ထက်မနည်း သေဆုံးပြီး ဒီနှစ်အတွင်း အသေအပျောက် အများဆုံးလည်း ဖြစ်ပါတယ်။ တိုင်ဖွန်းဗန်ကိုကြောင့် ရေကြီးနေတဲ့ မြောက်ပိုင်းကာဂါယန်တောင်ကြားဒေသမှာ နိုဝင်ဘာ ၁၄ ရက်က ကမ်းခြေစောင့်တပ်တွေနဲ့ ဘေးအန္တရာယ်ကယ်ဆယ်ရေးတပ်တွေက ထောင်နဲ့ချီတဲ့ ပြည်သူတွေကို ကယ်ဆယ်ရေးလုပ်နေပါတယ်။  ယခင် ရာသီဥတု မကောင်းတာ၊ ဆည်ရေတွေ ထုတ်လွှတ်တာနဲ့ ကုန်းမြင့်ဒေသဆိုတဲ့ အချက်တွေ ပေါင်းစုပြီး ကာဂါယန်ပြည်နယ်မှာ ရေကြီးနေရတာလို့ ဘေးအန္တရာယ်ကယ်ဆယ်ရေး အေဂျင်စီက ဆိုပါတယ်။  နိုဝင်ဘာ ၁၃ ရက်က အနီးဝန်းကျင် မာဂတ်ဆည်က ထုတ်လွှတ်တဲ့ရေတွေဟာ ၁ စက္ကန့်ကို အိုလံပစ်ရေကူးကန် နှစ်ခု အရွယ်ပမာဏနဲ့ တူညီတယ်လို့ အစိုးရ အချက်အလက်တွေက ဖော်ပြပါတယ်။
6 months Ago

တိုက်ဖွန်မုန်တိုင်း ဗန်ကိုကြောင့် ဖိလစ်ပိုင်တွင် လူ ၆ ဦးထက်မနည်းသေဆုံး

ဖိလစ်ပိုင်နိုင်ငံမှာ  နိုဝင်ဘာ ၁၁ ရက်ညက တိုက်ဖွန်း ဗန်ကို ဝင်ရောက်ခဲ့လို့ လူ ၆ ယောက်ထက် မနည်း သေဆုံးပြီး ၁၀ ယောက် ပျောက်ဆုံးနေတယ်လို့ နိုဝင်ဘာ ၁၂ ရက် စီအင်န်အင်န် သတင်းက ဖော်ပြပါတယ်။  တိုက်ဖွန်းဗန်ကိုကြောင့် မြို့တော်မနီလာ မြေနိမ့်ပိုင်းက  နေအိမ်သောင်းချီ  ရေမြုပ်နေ ပါတယ်။  ဒါကြောင့် ဒေသခံတွေဟာ နေအိမ်ခေါင်မိုးပေါ် တက်ပြီး ကယ်ဆယ်ရေးကို စောင့်မျှော်ခဲ့ရ ပါတယ်။  နိုဝင်ဘာလ ၁၂ ရက်မှာပဲ သမ္မတ ရိုဒရီဂိုဒူတာတေးက ရေကြီးနေတဲ့ မြို့တော် မနီလာကို ရဟတ်ယာဉ်နဲ့ လှည့်လည်ကြည့်ရှုခဲ့ပါတယ်။  နိုင်ငံကို ရုပ်သံကနေ မိန့်ခွန်းပြောရာမှာ သမ္မတ ဒူတာတေးက တိုက်ဖွန်း ဗန်ကိုကြောင့် ထိခိုက်ခဲ့သူတွေကို အကူအညီ အမြန်ဆုံးပေးဖို့ အစိုးရ အေဂျင်စီတွေကို ညွှန်ကြားခဲ့ပါတယ်။  ဗန်ကိုဟာ ဒီနှစ်အတွင်း ဖိလစ်ပိုင်ကို ၂၁ ခုမြောက် ဝင်ရောက်တဲ့ ဆိုင်ကလုန်း ဖြစ်တယ်လို့လည်း ရိုက်တာသတင်းအရ သိရပါတယ်။
6 months Ago

ဖိလစ်ပိုင်နိုင်ငံကို တိုင်ဖွန်းမုန်တိုင်း ဗမ်ကို ဝင်ရောက်တိုက်ခတ်မည် 

ဖိလစ်ပိုင်နိုင်ငံကို တိုင်ဖွန်းမုန်တိုင်း ဗမ်ကို ဝင်ရောက်တိုက်ခတ်တော့မှာဖြစ်လို့ နိုင်ငံအရှေ့ပိုင်းကမ်းရိုးတန်းက ထောင်နဲ့ချီတဲ့ ဒေသခံတွေကို အာဏာပိုင်တွေက နိုဝင်ဘာ ၁၁ ရက်မှာ ဘေးကင်းရာ ရွှေ့ပြောင်းပေးလိုက်ရပါတယ်။ ဒီနှစ်အတွင်း အားအပြင်းဆုံး ဆိုင်ကလုန်းမုန်တိုင်း ဝင်ရောက်တိုက်ခတ်သွားတာ သီတင်းပတ်ပဲ ကြာသေးချိန်မှာ နောက်ထပ် တိုင်ဖွန်းမုန်တိုင်း ထပ်ဝင်တာ ဖြစ်ပါတယ်။ လေတိုက်နှုန်း ၁ နာရီ ၇၈ မိုင်နဲ့ တိုက်ခတ်နေတဲ့ ဗမ်ကိုမုန်တိုင်းဟာ ဒီနှစ်အတွင်း ဖိလစ်ပိုင်ကို ဝင်တဲ့ ၂၁ လုံးမြောက် မုန်တိုင်းလည်း ဖြစ်ပါတယ်။ ကာတန်ဒွါနက်စ်ခရိုင် အုပ်ချုပ်ရေးမှူးက “ပြန်နာလန်ထူတာ ၁ ရာခိုင်နှုန်းပဲ ရှိသေးချိန်မှာ နောက်ထပ် မုန်တိုင်းတလုံး ထပ်လာပြန်ပြီ။ အခုတောင် လေပြင်းနဲ့ မိုးကြီးတာကို စပြီးခံစားနေရပြီ” လို့  DZMM ရေဒီယို သတင်းဌာနကို ပြောပါတယ်။ ကျွန်းပေါင်း ၇,၆၀၀ ကျော်နဲ့ ဖွဲ့စည်းထားတဲ့ ဖိလစ်ပိုင်မှာ နှစ်စဉ် ပျမ်းမျှမုန်တိုင်း အလုံး ၂၀ လောက် ဝင်လေ့ရှိပါတယ်။ ဗမ်ကိုမုန်တိုင်းဟာ နိုဝင်ဘာ ၁၁ ရက် ညနေမှာ ပိုလီလီယိုကျွန်းကနေ ကုန်းတွင်းကို ဝင်ရောက်မှာဖြစ်ပြီး လူဇုံကျွန်းမကြီးကိုတော့ နိုဝင်ဘာ ၁၂ ရက်နေ့မှာ ဝင်ရောက်မယ်လို့ အစိုးရ မိုးလေဝသ ခန့်မှန်းသူက ပြောပါတယ်။ မုန်တိုင်း ဒီရေက ၉ ပေထိ မြင့်တက်လာနိုင်လို့ ကမ်းရိုးတန်းက ဒေသခံတွေ အိမ်တွေကို စွန့်ခွာပြီး ဘေးလွတ်ရာပြောင်းဖို့ အမိန့်ထုတ်ထားတယ်လို့ ပိုလီလီယို မြို့တော်ဝန်က ပြောပါတယ်။ ဒါပေမဲ့ ကယ်ဆယ်ရေးစခန်းတွေမှာ ကိုဗစ်-၁၉ ကူးစက်မှု ဟန့်တားရေးက စိန်ခေါ်မှုတရပ် ဖြစ်နေဆဲပဲလို့ သူက ပြောပါတယ်။ ဖိလစ်ပိုင်မှာ တိုက်ခတ်ပြီးရင် ဗမ်ကိုမုန်တိုင်းဟာ ဗီယက်နမ်နိုင်ငံဆီ ဆက်သွားမှာပါ။ နိုဝင်ဘာ ၁၅ ရက်မှာ ဗီယက်နမ်အလယ်ပိုင်းဒေသကို မုန်တိုင်းဝင်မယ်လို့ ဗီယက်နမ် မိုးလေဝသဌာနက ခန့်မှန်းထားပါတယ်။
6 months Ago

စူပါတိုင်ဖွန်းဂိုနီကြောင့် ဖိလစ်ပိုင်တွင် ဆုံးရှုံးပျက်စီးမှုများပြား (ရုပ်သံ)

ဖိလစ်ပိုင်နိုင်ငံ မြို့တော် မနီလာတောင်ပိုင်းကို စူပါတိုင်ဖွန်း ဂိုနီ ဝင်ရောက် တိုက်ခတ်အပြီး နိုဝင်ဘာ ၂ ရက်မှာ ရေနစ်မြုပ်နေတဲ့ မြို့တွေနဲ့ စပါးခင်းတွေကို ဝေဟင်ကနေ ရုပ်သံရိုက်ကူးထားတာပါ။ ဒီနှစ်ထဲမှာ ဖိလစ်ပိုင်ကို ၁၈ လုံးမြောက် ဝင်ရောက်တဲ့ တိုင်ဖွန်းမုန်တိုင်းဟာ ကာတန်ဒွါနက်စ်ဒေသထဲက မြို့အတော်များများကို ၈၀ ရာခိုင်နှုန်းအထိ ဖျက်ဆီးခဲ့တယ်လို့ ဖိလစ်ပိုင် ကြက်ခြေနီအဖွဲ့ အကြီးအကဲ အထက်လွှတ်တော်အမတ် ရစ်ချတ်ဂေါ်ဒွန်က ပြောပါတယ်။ ၂၀၁၃ တုန်းက လူဦးရေ ၆၃၀၀ ကျော် သေဆုံးတဲ့အထိ တိုက်ခတ်ခဲ့တဲ့ ဟိုင်ယန် မုန်တိုင်း နောက်ပိုင်းမှာ အားအပြင်းဆုံး မုန်တိုင်းတွေထဲက တစ်ခု ဖြစ်ပါတယ်။ ဂိုနီမုန်တိုင်းမဝင်ခင် တလအလိုကလည်း မိုလာဗီ တိုင်ဖုန်းမုန်တိုင်း တိုက်ခတ်လို့ ဖိလစ်ပိုင်မှာ ရေနစ် သေဆုံးသူ အများစု အပါအဝင် လူ ၂၂ ဦး သေဆုံးခဲ့ပါသေးတယ်။ နောက်ထပ် မုန်တိုင်း အတ်စာနီကတော့ ပစိဖိတ်သမုဒ္ဒရာထဲမှာ အရှိန်ရလာနေပြီး ဖိလစ်ပိုင်နိုင်ငံဆီ ချဉ်းကပ်လာနေပါတယ်။  ဖိလစ်ပိုင်ဟာ နှစ်စဉ် မုန်တိုင်းတွေ ပျမ်းမျှ အလုံး ၂၀ လောက် တိုက်ခတ်တာကို ခံရတဲ့ ကျွန်းနိုင်ငံလည်း ဖြစ်ပါတယ်။
6 months Ago

ဖိလစ်ပိုင်ကို စူပါတိုက်ဖွန်း ဂိုနီ ဝင်ရောက်တိုက်ခတ်

ဖိလစ်ပိုင်နိုင်ငံရဲ့ အဓိက ကျွန်းမကြီးဖြစ်တဲ့ လူဇုန်ကျွန်းတောင်ပိုင်းက ခရိုင်တွေကို စူပါတိုင်ဖွန်းမုန်တိုင်း ဂိုနီက နိုဝင်ဘာ ၁ ရက်နေ့မှာ ဝင်ရောက် တိုက်ခတ်ခဲ့ပါတယ်။  ဒါကြောင့် လေကြီး မိုးကြီး ကျခဲ့တဲ့အတွက် ဘစ်ကိုး ဒေသထဲက ကာတန်ဒွါနက်စ်နဲ့ အယ်လ်ဘေး နေရာ ၂ ခုမှာ မြေပြိုခဲ့တယ်လို့ မိုးလေဝသဌနာက ပြောပါတယ်။  စူပါတိုင်ဖွန်းဂိုနီဟာ ဒီနှစ်ထဲမှာ ကမ္ဘာပေါ်မှာ တိုက်ခတ်တဲ့ အားအကောင်းဆုံး မုန်တိုင်းလည်း ဖြစ်ပြီး လေတိုက်နှုန်း ၁ နာရီ ကီလိုမီတာ ၃၁၀ ထိ ပြင်းထန်ခဲ့တာကြောင့် အိမ်ခေါင်မိုးတွေေ လွင့်ထွက်ကုန်ပြီး ဖိလစ်ပိုင်နိုင်ငံမှာ မိုးသည်းထန်စွာရွာသွန်းခဲ့တယ်လို့ သိရပါတယ်။ မုန်တိုင်းဂိုနီဟာ နိုင်ငံအရှေ့ပိုင်း ခရိုင်တွေကို မဝင်ခင် အာဏာပိုင်တွေက လူ ၁ သန်း လောက်ကို ဘေးလွတ်ရာ ရွှေ့ပြောင်းပေးထားပါတယ်။ မြို့တော်မနီလာဟာလည်း မုန်တိုင်း လမ်းကြောင်းပေါ်မှာ ရှိနေတာပါ။  အရင်လက တိုင်ဖွန်းမုန်တိုင်း မိုလေ့ ဖိလစ်ပိုင်ကို တိုက်ခတ်အပြီး မနီလာမြို့တော် တောင်ပိုင်းမှာ လူ ၂၂ ယောက် သေဆုံးခဲ့ပါတယ်။ အခုလမှာ မုန်တိုင်းဂိုနီက ၁၈ လုံးမြောက် မုန်တိုင်းအဖြစ် ဖိလစ်ပိုင်နိုင်ငံကို ဝင်လာတာလည်း ဖြစ်ပါတယ်။
6 months Ago

ဖိလစ်ပိုင်တွင် တိုင်ဖွန်းမုန်တိုင်း ဝင်ရောက်တိုက်ခတ်၊ ငါးဖမ်းသမား ၁၂ ဦး ပျောက်ဆုံး

အားကောင်းတဲ့ တိုင်ဖွန်းမုန်တိုင်း မိုလာဗီဟာ ဖိလစ်ပိုင်နိုင်ငံရဲ့ လူဇုံကျွန်းမကြီးတောင်ပိုင်းကို အောက်တိုဘာ ၂၆ ရက်က ဝင်ရောက်တိုက်ခတ်လို့ မိုးကြီးပြီး လျှပ်စစ်ဓာတ်တိုင်တွေ ပြိုလဲခဲ့တဲ့အပြင် ငါးဖမ်းသမား ၁၂ ယောက်ထက်မနည်း ပျောက်နေတယ်လို့ ကပ်ဘေးဆိုင်ရာ အရာရှိတွေက ပြောပါတယ်။ ဖိလစ်ပိုင်ကို ဒီနှစ်ထဲမှာဝင်တဲ့ ၁၇ လုံးမြောက် တိုင်ဖွန်းမုန်တိုင်းဟာ ၁ နာရီကို လေတိုက်နှုန်း ၁၅၀ ကီလိုမီတာနှုန်းအထိ ပြင်းထန်လို့ ထောင်သောင်းချီတဲ့လူတွေ ဘေးလွတ်ရာ ရွှေ့ပြောင်းကြဖို့ အမိန့်ထုတ်ခဲ့ရပါတယ်။ အသေအပျောက် အစီရင်ခံတာ မရှိသေးပေမဲ့ နိုင်ငံအရှေ့ဘက်ကမ်းရိုးတန်းက ကာတာဒွါနက်စ်ခရိုင်ကို ပြန်လာတဲ့ ငါးဖမ်းသမား ၁၂ ယောက် ပျောက်နေပါတယ်။ တိုင်ဖွန်းမုန်တိုင်းဟာ အောက်တိုဘာ ၂၇ ရက် မနက်ထိ ဖိလစ်ပိုင်မှာ ရှိနေမှာဖြစ်ပြီး ဗီယက်နမ်နိုင်ငံဆီ ဦးတည်ပြီး ဆက်လက်တိုက်ခတ်မှာ ဖြစ်ပါတယ်။ ဒါကြောင့် ဗီယက်နမ်သမ္မတက မုန်တိုင်းလမ်းကြောင်းရှိ မြို့တွေ ခရိုင်တွေ ပြင်ဆင်ထားကြဖို့ အရေးပေါ် သတိပေးချက် ထုတ်ပြန်ထားပါတယ်။ မုန်တိုင်းလမ်းကြောင်းပေါ်က လူ ၁ ဒသမ ၃ သန်းနီးပါးကို ဘေးလွတ်ရာ ရွှေ့ပြောင်းဖို့ အသင့်ပြင်ထားဖို့ လိုတယ်လို့ ဗီယက်နမ် အစိုးရက ပြောပါတယ်။
6 months Ago

ဖိလစ်ပိုင်ကိုယ်စားပြု မယ်စကြဝဠာသရဖူ ဖိလစ်ပိုင်-အိန္ဒိယကပြားအလှမယ် ဆွတ်ခူး (ရုပ်သံ)

အောက်တိုဘာလ ၂၅ ရက်နေ့က ကျင်းပပြုလုပ်ခဲ့တဲ့ ၂၀၂၀ ပြည့်နှစ် ဖိလစ်ပိုင်နိုင်ငံ ကိုယ်စားပြု မယ်စကြဝဠာအလှမယ်သရဖူကို ဖိလစ်ပိုင်-အိန္ဒိယကပြား အလှမယ် ရာဘီရာမက်တေရိုက ရရှိသွားခဲ့ပါတယ်။ အသက် ၂၄ နှစ်အရွယ် အလှမယ်ဟာ အီလိုအီလိုမြို့ ကိုယ်စားပြု အလှမယ်အနေနဲ့ ပြိုင်ပွဲမှာ ဝင်ရောက်ယှဉ်ပြိုင်ခဲ့တာဖြစ်ပြီး ၆၉ ကြိမ်မြောက် မယ်စကြဝဠာ အလှမယ်ပြိုင်ပွဲမှာ နိုင်ငံကိုယ်စားပြုအနေနဲ့ ဆက်လက်ယှဉ်ပြိုင်ရမှာ ဖြစ်ပါတယ်။ အခုနှစ်ရဲ့ ဖိလစ်ပိုင်နိုင်ငံ ကိုယ်စားပြု မယ်စကြဝဠာအလှမယ်ပြိုင်ပွဲကို ပြီးခဲ့တဲ့ မေလ ၃ ရက်နေ့ကတည်းက ကျင်းပဖို့ စီစဉ်ထားခဲ့ပေမယ့် လတ်တလောဖြစ်ပွားနေတဲ့ ကို ဗစ်-၁၉ ကပ်ရောဂါအခြေအနေကြောင့် ၂ ကြိမ်ထက်မနည်း ရွှေ့ဆိုင်းခဲ့ရတာ ဖြစ်ပါတယ်။ ဘက်ဂီအိုမြို့၊ Cordillera Convention Hall မှာ ကျင်းပခဲ့တဲ့ မယ်စကြဝဠာ အလှမယ်ပြိုင်ပွဲမှာတော့ နောက်ဆုံးအဆင့် ပြိုင်ပွဲဝင်အလှမယ် ၄၆ ယောက် ပါဝင်ခဲ့ကြတာ ဖြစ်ပါတယ်။ ပြိုင်ပွဲရဲ့ 1st Runner Up ဆုကိုတော့ ပရာနာ့ဂ် ကိုယ်စားပြုအလှမယ်နဲ့ 2nd Runner Up ဆုကိုတော့ ကွီဇွန်ကိုယ်စားပြုအလှမယ်တွေက ရရှိသွားခဲ့တာ ဖြစ်ပါတယ်။ အလှမယ်သရဖူ Winner ဆုရရှိခဲ့တဲ့ ရာဘီရာမက်တေရိုကိုတော့ မနှစ်က ၂၀၁၉ ခုနှစ် မယ်စကြဝဠာအလှမယ်ပြိုင်ပွဲမှာ Top 20 အဆင့်ထိ ပါဝင်ခဲ့တဲ့ နိုင်ငံကိုယ်စားပြုအလှမယ် ဂါဇီနီဂနာဒတ်စ်က သရဖူကို ဆောင်းပေးခဲ့တာ ဖြစ်ပါတယ်။ Photo : Rabiya Mateo
6 months Ago

အာဆီယံဒေသတွင်း အင်ဒိုနီးရှားက ဖိလစ်ပိုင်ကိုကျော်ပြီး ကိုဗစ်-၁၉ ကူးစက်ခံရသူ အများဆုံး ဖြစ်လာ

အာဆီယံနိုင်ငံတွေထဲမှာ အင်ဒိုနီးရှားနိုင်ငံက ဖိလစ်ပိုင်နိုင်ငံကို ကျော်လွန်ပြီး ဒေသတွင်း ကိုဗစ်-၁၉ ရောဂါကူးစက်မှု အမြင့်ဆုံးနိုင်ငံ ဖြစ်လာခဲ့ပါတယ်။ အင်ဒိုနီးရှားနိုင်ငံမှာ ဒီကနေ့အထိ ကိုဗစ်-၁၉ ရောဂါကြောင့် သေဆုံးသူ အရေအတွက် ၁၂,၃၄၁ ယောက်နဲ့ အများဆုံးဖြစ်နေခဲ့ပြီး ကူးစက်ခံရသူဦးရေ ၃၅၃,၄၆၁ ယောက်နဲ့ ဖိလစ်ပိုင်နိုင်ငံထက် ရောဂါကူးစက်ခံရသူ အရေအတွက် ကျော်လွန်လာခဲ့တာ ဖြစ်ပါတယ်။ ဖိလစ်ပိုင်နိုင်ငံမှာတော့ ကိုဗစ်-၁၉ ရောဂါကူးစက်ခံရသူဦးရေ ၃၅၁,၇၅၀ ယောက်နဲ့ သေဆုံးသူ ၆,၅၃၁ ယောက် ရှိပြီ ဖြစ်ပါတယ်။ စင်ကာပူနိုင်ငံကတော့ ရောဂါကူးစက်ခံရသူအရေအတွက် ၅၇,၉၀၁ ယောက်နဲ့ သေဆုံးသူ ၂၈ ယောက် ရှိနေတာပါ။ လတ်တလော ကူးစက်မှုတွေ မြင့်တက်နေတဲ့ မြန်မာနိုင်ငံကတော့ ကိုဗစ်-၁၉ ရောဂါကူးစက်ခံရသူဦးရေ ၃၂,၃၅၁ ယောက်၊ သေဆုံးသူ ၇၆၅ ယောက်နဲ့ အာဆီယံနိုင်ငံတွေ ထဲမှာ ကိုဗစ်-၁၉ ကြောင့် သေဆုံးမှုအများဆုံး ၃ နိုင်ငံထဲမှာ ပါဝင်နေခဲ့ပြီ ဖြစ်ပါတယ်။ မလေးရှားနိုင်ငံမှာတော့ ကိုဗစ်-၁၉ ရောဂါ ကူးစက်ခံရသူ အရေအတွက် ၁၈,၁၂၉ ယောက်နဲ့ သေဆုံးသူ ၁၇၀ ယောက်ရှိနေခဲ့တာ ဖြစ်ပါတယ်။ မြန်မာနဲ့ အိမ်နီးချင်းနိုင်ငံတနိုင်ငံဖြစ်တဲ့ ထိုင်းနိုင်ငံမှာတော့ ကိုဗစ်-၁၉ ရောဂါ ကူးစက်ခံရသူ အရေအတွက် ၃,၆၆၉ ယောက်နဲ့ ခုရက်ပိုင်းအတွင်း သေဆုံးသူ ထပ်တိုးမလာဘဲ ၅၉ ယောက်ရှိနေခဲ့တာ ဖြစ်ပါတယ်။ ဗီယက်နမ်နိုင်ငံမှာတော့ ကိုဗစ်-၁၉ ရောဂါကူးစက်ခံရသူ အရေအတွက် ၁,၁၂၄ ယောက်နဲ့ သေဆုံးသူ ၃၅ ယောက် ရှိနေပြီး ဘရူနိုင်းနိုင်ငံမှာတော့ ကိုဗစ်-၁၉ ရောဂါကူး စက်ခံရသူ အရေအတွက် ၁၄၇ ယောက်နဲ့ သေဆုံးသူ ၃ ယောက် ရှိနေတာပါ။ ကမ္ဘောဒီးယားနဲ့ လာအိုနိုင်ငံတွေမှာတော့ ကိုဗစ်-၁၉ ရောဂါကူးစက်ခံရသူအရေ အတွက် ထပ်တိုးလာတာမျိုးမရှိပဲ ရောဂါကူးစက်ခံရသူအရေအတွက် ၂၈၃ ယောက်နဲ့ ၂၃ ယောက် အသီးသီးရှိနေပေမယ့် သေဆုံးလူနာ ခုချိန်ထိ မရှိသေးပါဘူး။ ပြီးခဲ့တဲ့ ၂၀၁၉ ခုနှစ်ကုန်ပိုင်းမှာ တရုတ်နိုင်ငံအလယ်ပိုင်း ဝူဟန်မြို့က စတင်ခဲ့တဲ့ ကိုဗစ်-၁၉ ရောဂါကူးစက်ပျံ့နှံ့မှုဟာ ကမ္ဘာ့နိုင်ငံတွေအနှံ့ ကပ်ရောဂါတခုအသွင် လျင်လျင်မြန်မြန်ပဲ ကူးစက်ပျံ့နှံ့နေခဲ့တာပါ။ မြန်မာနိုင်ငံမှာတော့ ပထမဆုံးသော ကိုဗစ်-၁၉ အတည်ပြုလူနာကို ပြီးခဲ့တဲ့ မတ်လ ၂၃ ရက်နေ့မှာ စတင်တွေ့ရှိခဲ့ပြီး ပြီးခဲ့တဲ့လက ရခိုင်ပြည်နယ်က တကျော့ပြန်ကူး စက်မှုတွေ ရှိလာခဲ့အပြီးမှာတော့ ရောဂါကူးစက်ခံရသူအရေအတွက်ဟာ သိသိသာသာ မြင့်တက်လာခဲ့ပြီး သေဆုံးသူအရေအတွက်လည်း မြင့်တက်နေပါတယ်။ တကမ္ဘာလုံးမှာတော့ ကိုဗစ်-၁၉ ရောဂါကူးစက်ခံရသူအရေအတွက်ဟာ လက်ရှိ အချိန်ထိ ၃၉ သန်းကျော်ရှိလာခဲ့ပြီး သေဆုံးသူအရေအတွက်ဟာလည်း ၁ ဒသမ ၁ သန်း ကျော်ရှိပြီလို့ Worldometers ဝက်ဆိုက်မှာ ဖော်ပြပါတယ်။ ရောဂါဖြစ်ပွားမှု အမြင့်ဆုံးနိုင်ငံတွေထဲမှာတော့ အမေရိကန်နိုင်ငံက ကူးစက်ခံရသူ ၈ သန်းကျော်နဲ့ သေဆုံးသူ ၂၂၂,၇၂၇ ယောက်၊ အိန္ဒိယနိုင်ငံက ကူးစက်ခံရသူ ၇ ဒသမ ၃ သန်းကျော်နဲ့ သေဆုံးသူ ၁၁၂,၂၁၄ ယောက်၊ ဘရာဇီးနိုင်ငံက ကူးစက်ခံရသူ ၅ ဒသမ ၁ သန်းကျော်နဲ့ သေဆုံးသူ ၁၅၂,၅၁၃ ယောက်နဲ့ ထိပ်ဆုံး ၃ နိုင်ငံအနေနဲ့ ရှိနေတာပါ။ ရောဂါဖြစ်ပွားမှုစတင်ရာ တရုတ်နိုင်ငံမှာတော့ ကိုဗစ်-၁၉ ရောဂါကူးစက်ခံရသူ အရေအတွက် ၈၅,၆၄၆ ယောက်၊  စုစုပေါင်း သေဆုံးသူ ၄,၆၃၄ ယောက်နဲ့ နိုင်ငံအလိုက် အမှတ်စဉ် ၅၂ နေရာထိ ကျဆင်းသွားခဲ့ပြီ ဖြစ်ပါတယ်။
7 months Ago

အမေရိကန် ဒုတပ်ကြပ် ၁ ဦးကို ဖိလစ်ပိုင်သမ္မတ လွတ်ငြိမ်းခွင့်ဖြင့် ပြန်လွှတ်

လိင်ပြောင်းထားတဲ့ အမျိုးသမီးအား သတ်ဖြတ်မှုနဲ့ စီရင်ချက်ချခံရတဲ့ အမေရိကန်  အမေရိကန်ကမ်းတက် ဒုတပ်ကြပ် ၁ ဦးကို ဖိလစ်ပိုင်သမ္မတက လွတ်ငြိမ်းခွင့်ပေးပြီး စက်တင်ဘာ ၁၃ ရက်နေ့မှာ မိခင်နိုင်ငံကို ပြန်ပို့လိုက်တယ်လို့ သိရပါတယ်။  သူဟာ ၂၀၁၄ ခုနှစ်က ဖိလစ်ပိုင်နိုင်ငံအတွင်း လိင်ပြောင်းထားသူ အမျိုးသမီးကို သတ်ဖြတ်မှုနဲ့စီရင်ချက်ချခံရအပြီး ဖိလစ်ပိုင်သမ္မတ ရိုဒရီဂိုဒူဒါတေရဲ့ လုံးဝလွတ်ငြိမ်းချမ်းသာခွင့်နဲ့ ပြန်လွတ်သွားခဲ့တာပါ။ ဖိလစ်ပိုင် လူဝင်မှုကြီးကြပ်ရေးဗျူရိုပြောခွင့်ရက “ဒုတပ်ကြပ် ဂျိုးဇက်စကော့တ်လမ်ဘာတွန်ဟာ မနီလာနိုင်ငံတကာလေဆိပ်ကနေ စက်တင်ဘာ ၁၃ ရက်မနက်က အမေရိကန်စစ်လေယာဉ်နဲ့ အမေရိကန်နိုင်ငံဆီ ပြန်သွားခဲ့တယ်။ သူ့ကို အမေရိကန်သံရုံးကိုယ်စားလှယ်တွေက လေဆိပ်ကို လိုက်ပို့ခဲ့ကြတယ်” လို့ PTV-4 ရုပ်သံကို ပြောပါတယ်။  မြို့တော် မနီလာရဲ့အနောက်မြောက်ဘက်က အမေရိကန်ရေတပ်စခန်းဌာနချုပ်ဟောင်း အပြင်မှာရှိတဲ့ အိုလွန်ဂါပိုမြို့ ဟိုတယ်မှာ လိင်ပြောင်းထားသူ အမျိုးသမီး ဂျနီဖာလောင်ဒီကို လမ်ဘာတွန်က သတ်ခဲ့လို့ အပြစ်ရှိတယ်ဆိုပြီး လွန်ခဲ့တဲ့ ၆ နှစ်က တရားရုံးက ဆုံးဖြတ်ခဲ့တာပါ။  သူ့ကို လွှတ်ပေးတာဟာ တရားဥပဒေကို မထေမဲ့မြင် ပြုတာပဲလို့ တက်ကြွလှုပ်ရှားသူ တွေက သမ္မတ ဒူဒါတေကို ပြစ်တင်ရှုံ့ချပါတယ်။ သမ္မတ ဒူဒါတေဟာ အမေရိကန်လုပ်ငန်းတွေက ထုတ်လုပ်တဲ့ ကိုရိုနာဗိုင်းရပ်စ် ကာကွယ်ဆေးကို ရချင်တဲ့ ဆန္ဒရှိနေပြီး ပြန်လွှတ်ပေးဖို့ ဆုံးဖြတ်ချက်က အထောက်ပံ့ ပေးကောင်း ပေးနိုင်လိမ့်မယ်လို့ သမ္မတ ပြောခွင့်ရ ဟယ်ရီရိုကေးက ပြောပါတယ်။  ဒါပေမယ့် အမေရိကန်ကာကွယ်ဆေး ထုတ်လုပ်သူ တယောက်နဲ့မှ ဖိလစ်ပိုင်အစိုးရက ဆွေးနွေးထားတာ မရှိသေးဘူးလို့ ကျန်းမာရေးဝန်ကြီးဌာနက ပြောပါတယ်။  
8 months Ago

ပြစ်ဒဏ်ကျခံနေရသည့် အမေရိကန် မရိန်းတပ်သားကို ဖိလစ်ပိုင်သမ္မတ လွတ်ငြိမ်းခွင့်ပေး

ဖိလစ်ပိုင်နိုင်ငံမှာ လွန်ခဲ့တဲ့ ၆ နှစ်က လူသတ်မှုနဲ့ ပြစ်ဒဏ်ကျခံနေရတဲ့ အမေရိကန် မရိန်းတပ်သားတယောက်ကို ဖိလစ်ပိုင်သမ္မတ ရိုဒရီဂိုဒူဒါတေက စက်တင်ဘာ ၇ ရက်မှာ လွတ်ငြိမ်းချမ်းသာခွင့်ပေးလိုက်ပါတယ်။ လိင်ပြောင်းထားသူတစ်ဦးဖြစ်တဲ့ ဂျက်နီဖှာလောင်ဒေကို  အမေရိကန် ရေတပ်စခန်းဌာနချုပ်ဟောင်းနားက အိုလွန်ဂါပိုရပ် ဟိုတယ်တခုထဲမှာ သတ်ဖြတ်ခဲ့မှုအတွက် အမေရိကန် ဒုတပ်ကြပ် ဂျိုးဆက်စကော့တ် ပန်ဘာတွန်မ်ဟာ  ၂၀၁၅ မှာ ထောင်ချခံခဲ့ရတာပါ။ သူဟာ ထောင်ထဲမှာ ကောင်းကောင်းနေခဲ့လို့ စောလွှတ်ပေးဖို့ တရားရုံးက အရင်အပတ်က လက်မှတ်ထိုးခွင့်ပြုခဲ့ပါတယ်။ ဒါပေမဲ့ အသတ်ခံရသူရဲ့ရှေ့နေက မေတ္တာရပ်ခံစာ ပေးပို့ ကန့်ကွက်ခဲ့လို့ တရားရုံး ဆုံးဖြတ်ချက်က လမ်းပိတ်ခဲ့တာပါ။ ဒါကြောင့် အမေရိကန် ကိုလိုနီဟောင်း ဖိလစ်ပိုင်နဲ့ အမေရိကန်စစ်တပ်ကြား တင်းမာမှု တကျော့ပြန် ပေါ်ပေါက်ခဲ့ပါတယ်။ အစိုးရအဖွဲ့ အစည်းအဝေးအတွင်း ဒူဒါတေက ပမ်ဘာတွန်ဟာ မတရား ဆက်ဆံခံခဲ့ရတာမို့ ပြန်လွှတ်ပေးသင့်တယ်လို့ ပြောပါတယ်။ ဒူဒါတေရဲ့ လွတ်ငြိမ်းခွင့်ဟာ တရားဥပဒေကို မထီလေးစား လုပ်တာဖြစ်တယ်ဆိုပြီး ပြစ်တင်ရှုတ်ချထားတဲ့ ကြေညာချက်ကို လူ့အခွင့်အရေးအုပ်စု ကာရာပါတန်က ထုတ်ပြန်ခဲ့သလို ဒူဒါတေရဲ့ နိုင်ငံခြားရေးမူဝါဒကိုလည်း မေးခွန်းထုတ်ခဲ့ကြပါတယ်။ ဒူဒါတေဟာ အမေရိကန် အစိုးရအပေါ် တဖျစ်တောက်တောက် အပြစ်ပြောမှုနဲ့ ခြိမ်းခြောက်မှုတွေ မကြာခဏလုပ်လို့ နာမည်ကြီးပါတယ်။ ဒါပေမဲ့ နှစ်နိုင်ငံ ဆက်ဆံရေးကိုတော့ ဒူဒါတေက အဆင့်မချခဲ့ပါဘူး။ ကာကွယ်ရေး မိတ်ဖက်ဖြစ်မှုမှာ အဓိကကျတဲ့ အပြန်အလှန် တပ်ချထားရေး သဘောတူညီချက်ကိုတော့ ဖျက်သိမ်းဖို့  ဇွန်လက ဆုံးဖြတ်ခဲ့ပါတယ်။
8 months Ago

ဂျပန်ကမ်းလွန်တွင် မှောက်ခဲ့သည့်သင်္ဘောမှ ဖိလစ်ပိုင် ၁ ဦးကို တွေ့ရှိ၊ သင်္ဘောသား ၄၀ ကို ဆက်ရှာ

ဂျပန်ကမ်းလွန်မှာ ဒီသီတင်းပတ်အတွင်း တိမ်းမှောက်ခဲ့တဲ့ တိရစ္ဆာန်တင်သင်္ဘောပေါ်က  တတိယမြောက် သင်္ဘောသားကို စက်တင်ဘာ ၄ ရက်က အသက်ရှင်လျက်တွေ့ရှိခဲ့ပါတယ်။ သက်ကယ်လှေပေါ်ကနေ  လက်လှမ်းပြနေတဲ့ အသက် ၃၀ အရွယ် ဖိလစ်ပိုင် သင်္ဘောသားကို ကိုဒါကာရာဂျီးမားကျွန်းငယ် အလွန်မှာ တွေ့ရှိခဲ့တယ်လို့  ဂျပန်ကမ်းခြေစောင့်တပ်ဖွဲ့က ပြော ပါတယ်။   ကယ်ဆယ်ခဲ့တဲ့ ဖိလစ်ပိုင်သင်္ဘောသား ဂျေနဲရိုဆယ်ဟာ  သတိကောင်းပြီး  အကူအညီ မပါဘဲ လမ်းလျှောက်နိုင်ပါတယ်။  ကိုဒါကာရာဂျီးမားကျွန်းငယ်အလွန် နှစ်မိုင်ခွဲအကွာမှာ  နောက်ထပ် မှောက်နေတဲ့   သက်ကယ်လှေတစ်စင်းကို ကယ်ဆယ်ရေးဝန်ထမ်းတွေက  တွေ့ခဲ့ပေမဲ့  လှေပေါ်မှာ တစ်ယောက်မှ မရှိပါဘူး။   စက်တင်ဘာ ၂ ရက်က အရှေ့တရုတ်ပင်လယ်အတွင်း Gulf Livestock 1 ဆိုတဲ့ တိရစ္ဆာန်တွေ တင်ဆောင်လာတဲ့ ကုန်သင်္ဘောတိမ်းမှောက်ခဲ့ပြီး နောက်ပိုင်း  ရိုဆယ်ဟာ တတိယ မြောက် ကယ်ဆယ်ခံရတဲ့ သင်္ဘောသားပဲ ဖြစ်ပါတယ်။  Gulf Livestock 1 ပေါ်မှာ သင်္ဘောသား ၄၃ ယောက်နဲ့  တိရစ္ဆာန်ကောင်ရေ  ၆,၀၀၀ လိုက်ပါလာပြီး  တိုက်ဖွန်းမေဆက်ကြောင့် ပင်လယ်မှာ လှိုင်းထန်လို့ တိမ်းမှောက်သွားခဲ့တာပါ။   အခုအခါ ကျန်ရှိ သင်္ဘောသား အယောက်  ၄၀ ကို ဆက်လက်ရှာဖွေနေတယ်လို့ ရိုက်တာက ဖော်ပြပါတယ်။   
8 months Ago

ဖိလစ်ပိုင်တွင် ဗုံးပေါက်ကွဲမှုကြောင့် လူ ၁၃ ဦး သေဆုံး၊ လူ ၇၀ ကျော် ဒဏ်ရာရ

ဖိလစ်ပိုင်နိုင်ငံတောင်ပိုင်းက လုံခြုံရေး မငြိမ်သက်တဲ့ စူလူပြည်နယ် ဂျိုလိုကျွန်းမှာ သြဂုတ် ၂၄ ရက်က ဗုံးပေါက်ကွဲလို့ လူ ၁၃ ယောက် သေဆုံးပြီး လူ ၇၀ ကျော် ဒဏ်ရာရတယ်လို့ ဖိလစ်ပိုင် စစ်တပ်က ပြောပါတယ်။ အစ္စလာမစ် စစ်သွေးကြွတွေ ဒီတိုက်ခိုက်မှုနောက်ကွယ်မှာ ရှိတယ်လို့လည်း သံသယဖြစ်နေကြပါတယ်။ အိုင်အက်စ် စစ်သွေးကြွတွေကို သစ္စာခံတဲ့ အဘူဆေးယပ် စစ်သွေးကြွအုပ်စု ခြေကုပ်ယူရာ ဂျိုလိုကျွန်းရဲ့ အဓိကမြို့ပေါ် မှာ တနာရီခြားတဲ့ ပေါက်ကွဲမှု ၂ ရပ်ဟာ အိမ်လုပ်ဗုံး ဖြစ်ပုံရတယ်လို့ တွက်ဆနေကြပါတယ်။ စစ်တပ်သုံး ကုန်ကား ၂ စီး ရပ်ထားရာ စားသောက်ဆိုင်ရှေ့မှာ ပထမ ပေါက်ကွဲမှု ဖြစ်ခဲ့ပြီး နောက်မှ ဒုတိယတကြိမ် ပေါက်ကွဲခဲ့တာလို့ စစ်တပ်က ပြောပါတယ်။ တိုက်ခိုက်ခံရတဲ့နေရာက စစ်သည်အလောင်း ၂ လောင်းနားမှာ လုံခြုံရေးအရာရှိတွေ စုရုံးနေပုံ ရုပ်သံကိုတော့ ဒေသခံ မီဒီယာက ပြသခဲ့ပါတယ်။ စစ်သည် ၇ ယောက်နဲ့ အရပ်သား ၆ ယောက် သေဆုံးတယ်လို့ အနောက်မင်းဒါနာအို စစ်တိုင်းရဲ့ အကြီးအကဲ ဒုဗိုလ်ချုပ် ကော်လေတိုဗင်လူအန်က ဒေသခံ မီဒီယာကို ပြောပါတယ်။ ဘယ်အဖွဲ့ကမှ သူတို့လက်ချက်လို့ မပြောသေးပါဘူး။ ရဲတွေက စုံစမ်းစစ်ဆေးနေဆဲပါ။ အဘူဆေးယတ် သူပုန်အဖွဲ့ကို ၁၉၉၀ ပြည့်လွန်နှစ်တွေမှာ ဖွဲ့စည်း တည်ထောင်ထားပြီး မင်ဒါနာအို ကျွန်းစု စူလူကျွန်းမှာ တက်တက်ကြွကြွ လှုပ်ရှားပါတယ်။ အိုင်အက်စ်နဲ့ အယ်လ်ကေဒါ အကြမ်းဖက် စစ်သွေးကြွတွေကို သစ္စာခံထားတဲ့ အဘူဆေးယတ် အုပ်စုကို ချေမှုန်းဖို့ အစိုးရက ရာချီတဲ့ စစ်တပ်ကို တပ်ချထားပါတယ်။
8 months Ago

DHLမှတဆင့် ဖိလစ်ပိုင်သို့ မူးယစ်ဆေးဝါးပို့ရန် ကြိုးပမ်းသူများ ရန်ကုန်တွင်ဖမ်းမိ 

မြန်မာပြည်ကနေ ဖိလစ်ပိုင်ကို DHLအမြန်ချောနဲ့ မူးယစ်ဆေး ကျပ်သိန်း ၇၀၀ ဖိုးလောက်ပို့ဖို့ ကြိုးစားတဲ့ နိုင်ဂျီးရီးယားနိုင်ငံသား ၁ ဦးနဲ့  မြန်မာ ၃ ဦးတို့ကို ဖမ်းဆီးရမိတယ်လို့ မူးယစ်ဆေးအလွဲသုံးမှု ထိန်းချုပ်ရေး ဗဟိုကော်မတီက ထုတ်ပြန်ပါတယ်။ သြဂုတ် ၁၉ ရက် နေ့လယ်ပိုင်းက ရန်ကုန်တိုင်း၊ လှိုင်မြို့နယ်၊ ၁၃ ရပ်ကွက်၊ အင်းစိန်လမ်းမကြီးပေါ်က DHL ရုံးကို ပါဆယ်ပစ္စည်း လာပို့တာမှာ မသင်္ကာဖွယ်ရာ ပါဆယ်ထုပ်တွေ့ရတယ်လို့ သတင်းပေးတာကြောင့် ရဲတပ်ဖွဲ့က သွားရောက် စစ်ဆေးခဲ့ပါတယ်။ ပါဆယ်ကို စစ်ဆေးရာမှာတေ့ ကလေးစီးတဲ့ ကားနဲ့ ကားရဲ့ဘီးတွေထဲမှာ အိုက်စ် (မက်အက်ဖက်တမင်း) ၀ ဒသမ ၉၅၇ ကီလို (ငွေကျပ် ၇၆၅.၅ သိန်းတန်ဖိုး) သိမ်းဆည်းရမိ ခဲ့တယ်လို့ ဆိုပါတယ်။ ပါဆယ်ထုပ်လာရောက်ပို့ဆောင်သူ  တွေကတော့ မမြင့်မြင့်ငြိမ်း(ခ)မိုးမိုး၊ ဒေါ်မြင့်မြင့်ငြိမ်းနဲ့ သိန်းထွန်းတို့ ဖြစ်တယ်လို့ ဆိုပါတယ်။ ကွင်းဆက်ဖော်ထုတ်ချက်အရ မူးယစ်ဆေးဝါးတွေ ပို့ဆောင်ခိုင်းသူ နိုင်ဂျီးရီးယားနိုင်ငံသား Mr. OBUMKAEMERE KELECHI THANKGOD ကို ဒဂုံမြို့သစ်(ဆိပ်ကမ်း)မြို့နယ်၊ ရွှေနှင်းဆီအိမ်ရာ၊ အမှတ်(၆၁)ရပ်ကွက်၊ တိုက်(B-3)၊ အခန်း(၁၅၀၇)တွင် ဖမ်းဆီးရမိခဲ့ပါတယ်။ သူ့ကို စစ်ဆေးရာမှာတော့ ၂၀၁၉ နိုဝင်ဘာ ၂၂ ရက်နေ့မှာ မြန်မာနိုင်ငံကနေ နိုင်ဂျီးရီးယားနိုင်ငံကို ပြန်လည်ထွက်ခွာသွားခဲ့တဲ့ Mr. Agu Chukwunonso Peter ကနေ ဖိလစ်ပိုင်နိုင်ငံမှာရှိတဲ့ သူ့ရဲ့ ဇနီးဖြစ်သူဆီကို ပေးပို့ခိုင်းတာလို့ ဆိုတာကြောင့် မူးယစ်ဆေးဝါးနဲ့ စိတ်ကိုပြောင်းလဲစေသောဆေးဝါးများဆိုင်ရာဥပဒေအရ အရေးယူထားပါတယ်။ Mr. OBUMKAEMERE KELECHI THANKGOD ငှားရမ်းနေထိုင်တဲ့အိမ်မှာ နောက်ထပ် နိုင်ဂျီးရီယားနိုင်ငံသား ၃ ယောက်ကိုလည်းတွေ့ရပြီး ဗီဇာသက်တမ်းကျော်လွန်နေထိုင်တာကို တွေ့ရလို့ သူတို့ကိုလည်း မြန်မာနိုင်ငံလူဝင်မှု ကြီးကြပ်ရေးအက်ဥပဒေအရ ဆက်လက်အရေးယူ မယ်လို့ ဆိုပါတယ်။
9 months Ago

အိန္ဒိယနှင့် ဖိလစ်ပိုင်ပြန် ကိုဗစ်-၁၉ လူနာသစ် ၁၅ ဦး ထပ်မံတွေ့ရှိ 

ကိုဗစ်-၁၉ လူနာသစ် ၁၅ ဦး ထပ်မံစစ်ဆေးတွေ့ရှိရပြီး မြန်မာနိုင်ငံမှာ အတည်ပြုလူနာပေါင်း ၃၉၄ ဦးရှိသွားပြီလို့  ကျန်းမာရေးနဲ့ အားကစားဝန်ကြီးဌာနက ဒီကနေ့ ဩဂုတ် ၁၉ ရက်ည ထုတ်ပြန်ချက်အရ သိရပါတယ်။ လူနာသစ်တွေကတော့ အိန္ဒိယနိုင်ငံက ပြန်လာတဲ့ အမျိုးသား ၁၄ ဦးနဲ့ ဖိလစ်ပိုင်က ပြန်လာတဲ့ အသက် ၂၁ နှစ်အရွယ် အမျိုးသမီး ၁ ဦးတို့ဖြစ်ကြပြီး ရန်ကုန်မှာ အသွားအလာကန့်သတ်စောင့်ကြပ်ခံထားရသူတွေ ဖြစ်ကြပါတယ်။  အမျိုးသားကျန်းမာရေးဓာတ်ခွဲမှုဆိုင်ရာဌာန (ရန်ကုန်) (NHL) မှ (ပထမအသုတ်) ဓာတ်ခွဲနမူနာ ၅၆၀ ခု၊ ဆေးသုတေသနဦးစီးဌာန (DMR)မှ ဓာတ်ခွဲနမူနာ ၂၃၇ ခု၊ ပြည်သူ့ကျန်းမာရေးဓာတ်ခွဲမှုဆိုင်ရာဌာန (မော်လမြိုင်) (PHL, Mawlamyine) မှ ဓာတ်ခွဲနမူနာ ၂၀၈ ခု စုစုပေါင်း ၁,၀၀၅ ကို ဒီကနေ့ ညနေ  စစ်ဆေးပြီးစီးခဲ့ရာ လူနာသစ် ၁၅ ဦးတွေ့ရှိရတာပါ။ ဩဂုတ် ၁၉ ရက်ည ၈ နာရီအထိ မြန်မာနိုင်ငံမှာ ကိုဗစ်-၁၉  အတည်ပြုလူနာ ၃၉၄ ဦး၊ သေဆုံးသူ ၆ ဦး၊ ရောဂါပိုးကင်းစင်လာသူ စုစုပေါင်း ၃၃၃ ဦး၊ ဆေးရုံမှဆင်းခွင့်ပြုခဲ့သူ   ၃၂၉ ဦး စောင့်ကြည့်လူနာအသစ် ၂၆ ဦးရှိပါတယ်။
9 months Ago

ဖိလစ်ပိုင် အားကစားကွင်းတွင် ကိုရိုနာကန့်သတ်ချက် ချိုးဖောက်ပြီး လူထောင်ချီ  စုပြုံတိုးဝှေ့

ဖိလစ်ပိုင်နိုင်ငံ မနီလာမြို့က ကိုရိုနာဗိုင်းရပ်စ် စစ်ဆေးနေရာ သတ်မှတ်ထားတဲ့ ဘေ့စ်ဘော အားကစားကွင်းထဲမှာ ဇူလိုင် ၂၅ ရက်က ကိုရိုနာဗိုင်းရပ်စ် စည်းမျဉ်းတွေကို ချိုးဖောက်ပြီး လူပေါင်း ထောင်ချီ  စုပြုံတိုးဝှေ့နေပါတယ်။  တကယ်က အဲဒီကစားကွင်းဟာ မနီလာမြို့မှာ အလုပ်ပြုတ်သွားတဲ့ နယ်ကလူတွေကို ဗိုင်းရပ်စ် ရှိ၊ မရှိ စစ်ဆေးပြီး သူတို့ကို သက်ဆိုင်ရာနယ်တွေဆီ အစိုးရက ပြန်ပို့ဖို့ စီစဉ်ထားတာပါ။    ဒါပေမဲ့  အဲဒီလူတွေက အစိုးရက ပြန်ပို့ပေးနိုင်တဲ့ အစီအစဉ်ထက် များပြားနေတာမို့ ဗိုင်းရပ်စ် ကူးစက်နိုင်တဲ့အန္တရာယ် ရှိပေမယ့်လည်း ကစားကွင်းထဲမှာ လူပေါင်းထောင်ချီ သောင်တင်နေတာ ဖြစ်ပါတယ်။  တစ်ဦးနဲ့ တစ်ဦး ခပ်ခွာခွာ‌နေဖို့ ရဲတွေကို တာဝန်ချ တိုက်တွန်းပေမယ့်လည်း   သက်ကြီးရွယ်အို၊ ကလေးငယ်နဲ့ ကိုယ်ဝန်ဆောင်တွေ အပါအဝင် လူတွေဟာ  အချင်းချင်း နီးနီးကပ်ကပ်  ရှိနေပါတယ်။ တချို့ဆိုရင် နှာခေါင်းစည်းတောင် တပ်မထားတာကို တွေ့ရပါတယ်။ ဘေ့စ်ဘော ကစားကွင်းထဲက လူအများစုဟာ မတ်လလယ်က လုပ်ခဲ့တဲ့  အတင်းကျပ်ဆုံးနဲ့ အရှည်ကြာဆုံး လော့ဒေါင်းကြောင့်  မြို့တော်မှာ သောင်တင်နေသူတွေ ဖြစ်ပါတယ်။   ဖိလစ်ပိုင်နိုင်ငံမှာ ကိုရိုနာဗိုင်းရပ်စ် ကူးစက်သူ ၇၈,၀၀၀ ကျော်ရှိပြီး ထက်ဝက်ကျော်ဟာ မြို့တော် မနီလာနဲ့ အနီးဝန်းကျင်ဒေသတွေက ဖြစ်တယ်လို့  ရိုက်တာသတင်းအရ သိရပါတယ်။
10 months Ago

ဖိလစ်ပိုင်မှပြန်လာသည့် ကိုဗစ်-၁၉ လူနာသစ် ၂ ဦးထပ်တွေ့

ဖိလစ်ပိုင်နိုင်ငံက ပြန်လာသူ ၂ ဦးမှာ ကိုဗစ်-၁၉ ရောဂါ စစ်ဆေးတွေ့ရှိရပြီး မြန်မာနိုင်ငံတဝန်း အတည်ပြုလူနာ စုစုပေါင်း ၃၄၃ ဦးရှိသွားပြီလို့ ကျန်းမာရေးနဲ့ အားကစားဝန်ကြီးဌာနရဲ့ ဇူလိုင် ၂၂ ရက်ည ထုတ်ပြန်ချက်အရ သိရပါတယ်။ လူနာသစ် ၂ ဦးကတော့ ရန်ကုန်တိုင်း သန်လျင်မြို့နယ်နေ အသက် ၂၅ နှစ်အရွယ် အမျိုးသား တစ်ဦးနဲ့ ပဲခူးတိုင်း ထန်းတပင်မြို့နယ်နေ အသက် ၂၂ နှစ်အရွယ်အမျိုးသား တစ်ဦးတို့ဖြစ်ကြပြီး အင်းစိန်မြို့နယ်မှာ အသွားအလာ ကန့်သတ်စောင့်ကြပ်ခံထားရသူတွေဖြစ်ပါတယ်။  ဇူလိုင် ၂၂  ရက် အတွက် ကိုဗစ်-၁၉ ရောဂါ ဓာတ်ခွဲစစ်ဆေးမှုတွေအနေနဲ့  အမျိုးသားကျန်းမာရေးဓာတ်ခွဲမှုဆိုင်ရာဌာန (ရန်ကုန်) (NHL) မှ (ပထမ + ဒုတိယအသုတ်) ဓာတ်ခွဲနမူနာ ၅၃၉ ခု၊  ဆေးသုတေသနဦးစီးဌာန (DMR)မှ ဓာတ်ခွဲနမူနာ ၂၄၂ ခု၊ ပြည်သူ့ကျန်းမာရေးဓာတ်ခွဲမှုဆိုင်ရာဌာန (မန္တလေး) (PHL, Mandalay) မှ ဓာတ်ခွဲနမူနာ ၁၁၀ ခုနဲ့  ပြည်သူ့ကျန်းမာရေးဓာတ်ခွဲမှုဆိုင်ရာဌာန (မော်လမြိုင်) (PHL, Mawlamyine) မှ ဓာတ်ခွဲနမူနာ ၂၅၆ ခု၊ စုစုပေါင်း ၁,၁၄၇ ခု အား စစ်ဆေးပြီးစီးခဲ့ လူနာသစ် ၂  ဦး တွေ့ရှိရတာပါ။ ဇူလိုင် ၂၃ ရက် မနက် ၈ နာရီအထိ မြန်မာနိုင်ငံမှာ ကိုဗစ်-၁၉  ရောဂါဓာတ်ခွဲ အတည်ပြုလူနာ ၃၄၃ ဦး၊ သေဆုံးသူ ၆ ဦး၊ နှစ်ကြိမ် ဆက်တိုက် ပိုးမတွေ့ရှိသူ စုစုပေါင်း ၂၈၀ ဦးရှိပြီး ဒီအထဲက ၂၆၉  ဦးအား ဆေးရုံမှဆင်းခွင့်ပြုခဲ့ပြီးဖြစ်ပါတယ်။
10 months Ago

ဖိလစ်ပိုင်နိုင်ငံသား ၁၀ သန်းကို ကိုဗစ်-၁၉ ရောဂါပိုး စစ်ဆေးမည်

၂၀၂၁ ခုနှစ်ထက် နောက်မကျဘဲ ဖိလစ်ပိုင်နိုင်ငံသား ၁၀ သန်းကို ကိုဗစ်-၁၉ ရောဂါရှိ၊ မရှိ  စစ်ဆေးဖို့ ရည်မှန်းထားတယ်လို့ ဖိလစ်ပိုင် ကျန်းမာရေးဝန်ကြီးက ဇူလိုင် ၂၀ ရက်မှာ ပြောဆိုလိုက်ပါတယ်။ အခုအချိန်ထိ လူဦးရေ ၁၀၉ သန်းရှိတဲ့ ဖိလစ်ပိုင်နိုင်ငံမှာ ၁ ဒသမ ၁ သန်းကို ကိုရိုနာဗိုင်းရပ်စ် ရှိ၊ မရှိ စစ်ဆေးထားပါတယ်။ အဲဒီရည်မှန်းချက်ကို ပြည့်မီဖို့ နေ့စဉ် စစ်ဆေးတာကို လူအယောက် ၂၀၀၀၀ ကနေတဖြည်းဖြည်းထပ်တိုးပြီး နောင်မှာ  ၄၀၀၀၀ အထိ တိုးမြှင့်စစ်ဆေးသွားဖို့ ရည်ရွယ်တယ်လို့ သမ္မတဒူတာတေးနဲ့ တွေ့ဆုံရာမှာ ကျန်းမာရေးဝန်ကြီးက ပြောပါတယ်။   သမ္မတဒူတာတေးကလည်း ဗိုင်းရပ်စ်ထိန်းချုပ်ရေး စည်းကမ်းတွေကို ချိုးဖောက်တဲ့ နိုင်ငံသားတွေကို ဖမ်းဆီးမယ်ဆိုပြိး ခြိမ်းခြောက်ထားပါတယ်။ ရောဂါလက္ခဏာ မပြင်းထန်သူတွေနဲ့ လက္ခဏာမပြသူတွေကို ကျန်းမာရေးဝန်ထမ်းနဲ့ ရဲတွေက အိမ်တိုင်ရာရောက်ခေါ်ယူပြီး သီးခြားခွဲထားတဲ့နေရာတွေကို ပို့ဆောင်မယ်လို့ ပြီးခဲ့တဲ့ သီတင်းပတ်ကပဲ အာဏာပိုင်တွေက ပြောဆိုပါတယ်။ ဒါနဲ့ပတ်သက်ပြီး အာဏာပိုင်တွေ လူ့အခွင့်အရေး ချိုးဖောက်နိုင်တယ်ဆိုတဲ့ စိုးရိမ်ပူပန်စိတ်တွေ ဖြစ်ပေါ်နေပါတယ်။  ဖိလစ်ပိုင်နိုင်ငံဟာ ကျန်းမာရေးစင်တာနဲ့ ရပ်ရွာအတွင်း ဗိုင်းရပ်စ်ကူးစက်တာတွေနဲ့ မနိုင်ဝန်ထမ်းနေရပါတယ်။ ဇွန်လမှာ အစိုးရ စည်းကမ်းချက်တွေ ဖြေလျှော့ပြီးနောက်ပိုင်း ကူးစက်နှုန်းဟာ နဂိုထက် ၄ ဆနီးပါး မြင့်တက်ပြီး ကူးစက်သူ ၆၈,၀၀၀ ကျော် ရှိလာသလို သေဆုံးနှုန်းဟာလည်း နှစ်ဆနီးပါး မြင့်တက်ပြီး ၁,၈၀၀ ကျော်ရှိလာတယ်လို့ ရိုက်တာက ဖော်ပြပါတယ်။
10 months Ago

ဖိလစ်ပိုင်ကပြန်လာသည့်  အမျိုးသမီး ၂ ဦးတွင် ကိုဗစ်-၁၉ ရောဂါပိုး တွေ့ရှိ

ဇူလိုင် ၉ ရက်နေ့အတွက် ဒုတယိသုတ်အဖြစ် ဓာတ်ခွဲနမူနာ ၅၅၃ ခုအား စစ်ဆေးချက်အရ ဖိလစ်ပိုင်နိုင်ငံက ပြန်လာတဲ့ အမျိုးသမီးနှစ်ဦးမှာ ကိုဗစ်-၁၉ ရောဂါပိုး တွေ့ရှိခဲ့တယ်လို့ ကျန်းမာရေးနဲ့ အားကစားဝန်ကြီးဌာနက ဒီနေ့မနက် ထုတ်ပြန်ပါတယ်၊ အမျိုးသားကျန်းမာရေးဓာတ်ခွဲမှုဆိုင်ရာဌာန (ရန်ကုန်) က ဓာတ်ခွဲနမူနာ ၅၅၃ ခုအား စစ်ဆေးပြီးစီးခဲ့တာဖြစ်ပြီး ဖိလစ်ပိုင်က ပြန်လာတဲ့ ချမ်းအေးသာဇံမြို့နယ်နဲ့ မြောက်ဥက္ကလာပမြို့နယ်နေ အမျိုးသမီး ၂ ဦးမှာ ရောဂါပိုး တွေ့ရှိခဲ့တာပါ။ အသက် ၂၆ နှစ်အရွယ် လူနာအမှတ် ၃၂၀ နဲ့ ၃၂၁ တို့ဟာ ဖိလစ်ပိုင်က ပြန်လာပြီးနောက် မင်္ဂလာဒုံနဲ့ အင်းစိန်မြို့နယ်တွေမှာ အသွားအလာ ကန့်သတ်စောင့်ကြည့်နေတာ ဖြစ်ပြီး အတည်ပြုလူနာတွေနဲ့ ထိတွေ့မှုမရှိဘူးလို့ ဆိုပါတယ်။ သူတို့ နှစ်ဦးကို တောင်ဥက္ကလာပ အထူးကုဆေးရုံကြီးမှာ ကုသမှု ခံယူစေမယ်လို့ ကျန်းမာရေးဝန်ကြီးဌာနက ထုတ်ပြန်ထားပါတယ်။ မနေ့ညက ပထမသုတ်အဖြစ် ဓာတ်ခွဲနမူနာ ၁,၂၇၆ ခု စစ်ဆေးရာမှာလည်း ဖိလစ်ပိုင်နိုင်ငံက ပြန်လာတဲ့ စစ်ကိုင်းတိုင်း တန့်ဆည်မြို့နယ်နေ အသက် ၂၇ နှစ်အရွယ် အမျိုးသားတဦးမှာ ကိုဗစ်-၁၉ ရောဂါပိုး  တွေ့ရှိခဲ့ပါတယ်။ မြန်မာနိုင်ငံမှာ ဒီနေ့မနက် ၈ နာရီအထိ ကိုဗစ်-၁၉ အတည်ပြုလူနာ ၃၂၁ ဦး၊ သေဆုံးသူ ၆ ဦး၊ စောင့်ကြည့်လူနာအသစ် ၄၁ ဦး၊ လူနာဟောင်းတွေထဲက လူနာအမှတ် ၂၁၀၊ ၂၂၄၊ ၂၇၇ နဲ့ ၂၇၈ တို့မှာ နှစ်ကြိမ်ဆက် ရောဂါပိုး မတွေ့ရတာကြောင့် ရောဂါပိုးကင်းစင်လာသူစုစုပေါင်း ၂၅၄ ဦးရှိပြီ ဖြစ်ပါတယ်။ အဲဒီထဲက ဆေးရုံမှ ဆင်းခွင့်ပြုခဲ့ပြီးသူ ၂၃၇ ဦးကို သတ်မှတ်နေရာတွေမှာ အသွားအလာ ကန့်သတ်စောင့်ကြပ်ကြည့်ရှုနေတယ်လို့ ဆိုပါတယ်။ ကမ္ဘာတဝန်းမှာတော့ ဒီနေ့မနက်အထိ ကိုဗစ်-၁၉ အတည်ပြုလူနာ ၁၂ ဒသမ ၃ သန်းကျော်၊ သေဆုံးသူ ၅၅၇,၀၀၀ ကျော်နဲ့ ရောဂါသက်သာပျောက်ကင်းလာသူ ၇ ဒသမ ၁၈ သန်းကျော်ရှိပြီလို့ သိရပါတယ်။
10 months Ago

ဖိလစ်ပိုင်ကပြန်လာသည့် တန့်ဆည်မြို့နယ်နေ အမျိုးသား ၁ ဦးတွင် ကိုဗစ်-၁၉ ရောဂါပိုး တွေ့ရှိ

ဖိလစ်ပိုင်နိုင်ငံက ပြန်လာတဲ့ စစ်ကိုင်းတိုင်း တန့်ဆည်မြို့နယ်နေ အသက် ၂၇ နှစ်အရွယ် အမျိုးသားတဦးမှာ ကိုဗစ်-၁၉ ရောဂါပိုး တွေ့ရှိတယ်လို့ ကျန်းမာရေးနှင့်အားကစားဝန်ကြီးဌာနက ဒီည ထုတ်ပြန်ပါတယ်။ ဇူလိုင် ၉ ရက်နေ့အတွက် ပထမသုတ်အဖြစ် အမျိုးသားကျန်းမာရေးဓာတ်ခွဲမှုဆိုင်ရာဌာန (ရန်ကုန်) က ဓာတ်ခွဲ နမူနာ ၅၆၃ ခု၊ ဆေးသုတေသနဦးစီးဌာနက ၁၈၃  ခု၊ ပြည်သူ့ကျန်းမာရေးဓာတ်ခွဲမှုဆိုင်ရာဌာန (မန္တလေး) က ၂၆၇ ခုနဲ့ ပြည်သူ့ကျန်းမာရေးဓာတ်ခွဲမှုဆိုင်ရာဌာန (မော်လမြိုင်) က  ၂၆၃ ခု၊ စုစုပေါင်း ဓာတ်ခွဲနမူ ၁,၂၇၆ ခု အား စစ်ဆေးခဲ့တာပါ။ အသစ်တွေ့ရှိတဲ့ လူနာအမှတ် ၃၁၉ ဟာ ဖိလစ်ပိုင်က ပြန်လာပြီးနောက် မင်္ဂလာဒုံမြို့နယ်မှာ အသွားအလာကန့်သတ်ထားတာဖြစ်ပြီး ကိုဗစ်-၁၉ အတည်ပြုလူနာတွေနဲ့ ထိတွေ့မှုမရှိခဲ့ဘူးလို့ ဆိုပါတယ်။ သူ့ကို တောင်ဥက္ကလာပအထူးကုဆေးရုံကြီးမှာ ဆေးကုသမှု ခံယူစေမယ်လို့ ဆိုပါတယ်။ မြန်မာနိုင်ငံမှာ ဒီနေ့ည ၈ နာရီအထိ ကိုဗစ်-၁၉ အတည်ပြုလူနာ ၃၁၉ ဦး၊ သေဆုံးသူ ၆ ဦး၊ စောင့်ကြည့်လူနာအသစ် ၄၁ ဦး၊ လူနာဟောင်းတွေထဲက လူနာအမှတ် ၂၁၀၊ ၂၂၄၊ ၂၇၇ နဲ့ ၂၇၈ တို့မှာ နှစ်ကြိမ်ဆက် ရောဂါပိုး မတွေ့ရတာကြောင့် ရောဂါပိုးကင်းစင်လာသူစုစုပေါင်း ၂၅၄ ဦးရှိပြီ ဖြစ်ပါတယ်။ အဲဒီထဲက ဆေးရုံမှ ဆင်းခွင့်ပြုခဲ့ပြီးသူ ၂၃၇ ဦးကို သတ်မှတ်နေရာတွေမှာ အသွားအလာ ကန့်သတ်စောင့်ကြပ်ကြည့်ရှုနေတယ်လို့ ဆိုပါတယ်။ ကမ္ဘာတဝန်းမှာတော့ ဒီနေ့ညအထိ ကိုဗစ်-၁၉ အတည်ပြုလူနာ ၁၂ ဒသမ ၂ သန်းကျော်၊ သေဆုံးသူ ၅၅၃,၀၀၀ ကျော်နဲ့ ရောဂါသက်သာပျောက်ကင်းလာသူ ၇ ဒသမ ၁ သန်းကျော်ရှိပြီလို့ သိရပါတယ်။
10 months Ago
More News
Up