Search Results For: ဂျပန်

တိုကျိုဘူတာတွင် ဂျပန်ရောက်မြန်မာများ လက်ကမ်းစာစောင်ဖြန့်ဝေကမ်ပိန်း ပြုလုပ်

မြန်မာနိုင်ငံရဲ့အခြေအနေကို ဂျပန်ပြည်သူတွေ ပိုသိလာစေဖို့ရည်ရွယ်ပြီး  ဂျပန်ရောက် မြန်မာအဖွဲ့နှစ်ဖွဲ့ဖြစ်တဲ့ Try Together at Japan (TTAJ) နဲ့ Revolution Tokyo Myanmar (R.T.M) အဖွဲ့တို့ဟာ ဇွန်လ ၁၂ ရက်က  တိုကျို၊ ရှင်းကိုအိဝ ဘူတာမှာ လက်ကမ်းစာစောင်နဲ့ တစ်ရှူးတွေ ဝေငှခဲ့ကြတာပါ။

မြန်မာနိုင်ငံအတွက် လိုအပ်တဲ့နေရာတွေမှာသုံးနိုင်ဖို့ အလှူငွေလည်း ကောက်ခံခဲ့ကြတယ်လို့ လည်း ပါဝင်ခဲ့သူတယောက်က ပြောပါတယ်။

ဂျပန်နိုင်ငံမှာ ကိုဗစ်ကူးစက်နှုန်းမြင့်နေတာကြောင့် သတ်မှတ်ထားတဲ့ စည်းကမ်းတွေနဲ့အညီ စစ်အာဏာရှင်ဆန့်ကျင်ရေးကို လုပ်ခဲ့ကြတာဖြစ်ပြီး လက်ကမ်းစာစောင်ကိုယူတဲ့ ဂျပန်ပြည်သူပြည်သားတွေ စိတ်ချစေဖို့အတွက်လည်း ပါဝင်လှုပ်ရှားသူတွေကို အပူချိန်တိုင်းတာ၊ စနစ်တကျ လက်ဆေးတာနဲ့ လက်အိတ်တွေ ဝတ်ဆင်တာ စတာတွေ လုပ်ခဲ့တယ်လို့ဆိုပါတယ်။

မနေ့ညနေ ၃ နာရီကနေ ၅ နာရီအတွင်း လက်ကမ်းစာစောင်နဲ့ တစ်ရှူး အခုရေ ၁၂၀၀ ကို ဝေငှနိုင်ခဲ့တယ်လို့သိရပါတယ်။

1 day Ago

အင်ဒိုနီးရှားနှင့် ဂျပန် နိုင်ငံခြားရေးဝန်ကြီးတို့ မြန်မာအရေးဆွေးနွေး

အင်ဒိုနီးရှားနိုင်ငံခြားရေး၀န်ကြီး ရတ်နိုမာဆုဒီဟာဟာ ဇွန် ၁၀ ရက်က မြန်မာနိုင်ငံရဲ့ အခြေအနေတွေကို ဆွေးနွေးဖို့ ဂျပန်နိုင်ငံခြားရေးဝန်ကြီး တိုရှီမိဆုမိုတဲဂီကို တယ်လီဖုန်း ခေါ်ဆို ဆက်သွယ်ခဲ့ပါတယ်။ 

မိနစ် ၄၀ ကြာ ဆွေးနွေးမှုအတွင်း ၀န်ကြီး မိုတဲဂီက အာဆီယံအလှည့်ကျဥက္ကဋ္ဌ ရဲ့အမည်စာရင်း တင်သွင်းခံရတဲ့ အထူးသံတမန်ရဲ့ ဆောင်ရွက်ချက်တွေနဲ့ လူသားချင်း စာနာထောက်ထားမှု အကူအညီတွေအပါအဝင် အာဆီယံရဲ့ ကြိုးပမ်းမှုတွေကို ဂျပန်က ဆက်လက်ထောက်ခံ အားပေးနေတယ်လို့ ပြောကြားခဲ့ပါတယ်။ 

မြန်မာနိုင်ငံရဲ့ အခြေအနေတွေကို ဖြေရှင်းဖို့ အနီးကပ် ညှိနှိုင်းဆောင်ရွက်မှုတွေ ဆက်လက်လုပ်ဆောင်ကြဖို့လည်း ဂျပန်နဲ့အင်ဒိုနီးရှား နိုင်ငံခြားရေးဝန်ကြီးတို့ သဘောတူ ခဲ့ကြပါတယ်။

ဂျပန်နိုင်ငံခြားရေး၀န်ကြီးဌာနရဲ့ တရားဝင်၀က်ဘ်ဆိုက်မှာ ဖော်ပြထားတဲ့အတိုင်း ဖမ်းဆီးထိန်းသိမ်းထားသူတွေကို လွှတ်ပေးဖို့ အရေးကြီးပုံကို ဂျပန်၀န်ကြီးက အလေးပေး ပြောဆိုပါတယ်။ 

၀န်ကြီး မိုတဲဂီကအာဆီယံခေါင်းဆောင်များ အစည်းအဝေးမှာ သဘောတူခဲ့တဲ့ အချက် ၅ ချက်ကို အကောင်အထည်ဖော်ဖို့ အရေးကြီးကြောင်းလည်း အလေးထား ပြောပါတယ်။ 

နှစ်နိုင်ငံ နိုင်ငံခြားရေးဝန်ကြီးတွေဟာ မြန်မာ့အရေး ဆွေးနွေးတာအပြင် အရှေ့တရုတ်ပင်လယ်နဲ့ တောင်တရုတ်ပင်လယ်တွင်းအရေးတွေ အပါအဝင် ဒေသတွင်း အခြေအနေတွေနဲ့ ကိုဗစ်-၁၉ တိုက်ဖျက်ရေးတွေကိုလည်း ဆွေးနွေးခဲ့ကြပါတယ်။ 

ပြီးခဲ့တဲ့ ဗုဒ္ဓဟူးနေ့က အင်ဒိုနီးရှား နိုင်ငံခြားရေးဝန်ကြီး မာဆုဒီဟာ ဘရူနိုင်း နိုင်ငံခြားရေး၀န်ကြီး အာဝန်ယူဆော့ဖ်နဲ့လည်း တယ်လီဖုန်းဆက်သွယ်ခဲ့ပြီး မြန်မာနိုင်ငံကို သွားရောက်ခဲ့တဲ့အရေးကိစ္စရဲ့ အကျိုးရလဒ်တွေကို ဆွေးနွေးခဲ့ပါတယ်။ 

2 days Ago

စစ်ကောင်စီကိုရှုတ်ချပြီး မြန်မာပြည်ဒီမိုကရေစီပြန်ရရေး ဂျပန်အထက်လွှတ်တော် ဆုံးဖြတ်

ဂျပန်နိုင်ငံ တိုကျိုမြို့ ချီအိုဒရှိ ဂျပန်အထက်လွှတ်တော်မှာ ဇွန်လ ၁၁ ရက် ဒီနေ့ကျင်းပတဲ့ အစည်းအဝေးမှာ မြန်မာစစ်ကောင်စီရဲ့ အာဏာသိမ်းမှုကို ပြစ်တင်ရှုတ်ချလိုက်ပြီး ဒီမိုကရေစီ အုပ်ချုပ်ရေးစနစ်အမြန်ဆုံး ပြန်လည်ပေါ်ပေါက်ဖို့အတွက် တောင်းဆိုတဲ့ဆုံးဖြတ်ချက်အဆိုကို လွှတ်တော်အမတ်တွေက တညီတညွတ်တည်းထောက်ခံ အတည်ပြုလိုက်ပါတယ်။

အာဏာသိမ်းအကြမ်းဖက်စစ်အုပ်စုကို အပြစ်တင်ဆုံးဖြတ်ချက်ကို မြန်မာ့ ဒီမိုကရေစီရေး ထောက်ခံအားပေးတဲ့ ဂျပန်လွှတ်တော်အမတ်များအဖွဲ့ အတွင်းရေးမှူး မစ္စတာ မီချီဟီရိုအီရှီဘရှီက  တင်သွင်းခဲ့တာဖြစ်ပါတယ်။

ဇွန်လ ၈ ရက်နေ့ကလည်း ဂျပန်အောက်လွှတ်တော်မျက်နှာစုံညီအစည်းအဝေးမှာ မြန်မာနိုင်ငံက စစ်တပ်အာဏာသိမ်းမှုကို ပြစ်တင်ရှုတ်ချတဲ့အဆိုကို တညီတညွတ်တည်းထောက်ခံ အတည်ပြုခဲ့ပြီး ဖြစ်ပါတယ်။

ခုလို ဂျပန်လွှတ်တော် နှစ်ရပ်လုံးက အတည်ပြုခဲ့တာက ဂျပန်ပြည်သူတွေကလည်း မြန်မာပြည်သူတွေနဲ့ အတူတူ တထပ်တည်းရှိကိုပြသနိုင်တာဖြစ်ပြီးမြန်မာစစ်အုပ်စုကို ဆန့်ကျင်တယ်ဆိုတာကို ဗြိတိန်မှာ ဒီကနေ့စကျင်းပမယ့် G 7 ထိပ်သီးအစည်းအဝေး မတိုင်မီ ဂျပန်နိုင်ငံကပြသဖို့ ရည်ရွယ်တယ်ဆိုတာလို့ မြန်မာနိုင်ငံဒီမိုကရေစီရေးထောက်ခံအားပေးတဲ့ ဂျပန်လွှတ်တော် အမတ်များအဖွဲ့ ဥက္ကဋ္ဌ မစ္စတာ မာဆာဟာရူနာကာဂါဝက ဒီဗွီဘီကို ပြောပါတယ်။

အထက်လွှတ်တော်ကော အောက်လွှတ်တော်က အခုလိုအတည်ပြုနိုင်ပြီဖြစ်လို့ ဂျပန်အစိုးရအနေနဲ့ မဖြစ်မနေလုပ်ရမယ့် ကိစ္စတွေရှိလာပြီမို့ မြန်မာပြည်သူတွေအနေနဲ့ အားတက်မိတယ်လို့လည်း တိုကျိုမြို့နေ မြန်မာအရေးဆောင်ရွတ်နေသူ ဒေါ်မရစ်ဆိုင်းဘူက ပြောပါတယ်။

3 days Ago

ဂျပန်ရောက် မြန်မာဘောလုံးအသင်း၏ ဝတ်စုံမန်နေဂျာ ရုတ်တရက်ကွယ်လွန်

ကမ္ဘာ့ဖလားခြေစစ်ပွဲတွေ ကစားဖို့ ဂျပန်နိုင်ငံမှာ ရောက်ရှိနေတဲ့ မြန်မာဘောလုံးအသင်းရဲ့ ဝတ်စုံ မန်နေဂျာ ဦးပြည့်စုံနိုင်ဟာ နှလုံးရောဂါနဲ့ ဇွန်လ ၉ ရက်က ရုတ်တရက် ကွယ်လွန်သွားပါတယ်။

အသက်၂၉ နှစ်ရှိ ဦးပြည့်စုံနိုင်ကွယ်လွန်သွားတဲ့အပေါ် မြန်မာဘောလုံးအဖွဲ့ချုပ်က ဝမ်းနည်းကြောင်း စာထုတ်ပြန်ပြီးနောက် အာရှဘောလုံးအဖွဲ့ချုပ်ဥက္ကဋ္ဌ  ရှိတ်ဆယ်လ်မန်က ဝမ်းနည်းကြောင်း စာထုတ်ပြန်ခဲ့ပါတယ်။

"ကိုပြည့်စုံနိုင် ကွယ်လွန်ခဲ့မှုအပေါ် အားလုံးနဲ့ထပ်တူခံစားရတယ်လို့ အာရှဘောလုံး အဖွဲ့ချုပ်မိသားစုဝင်တွေကိုယ်စား ပြောချင်ပါတယ်။ ဘောလုံးက လူတွေ အစုအဖွဲ့နဲ့ ပူးပေါင်း လုပ်ဆောင်ရတာဖြစ်ပြီး အသင်းတာဝန်ရှိသူတွေ၊ အသင်းအဝတ်လဲခန်းက ဝန်ထမ်းတွေနဲ့ တခြား စေတနာ့ ဝန်ထမ်းတွေဟာ အသင်းအတွက်အကောင်းဆုံးဖြစ်ဖို့ မမောနိုင်မပန်းနိုင် လုပ်ဆောင်ပေး ကြသူတွေ ဖြစ်ပါတယ်။ ကိုပြည့်စုံနိုင်ရဲ့ ဘောလုံးအပေါ် ချစ်မြတ်နိုးမူတွေ၊ အကောင်းဆုံး တာဝန်ထမ်းဆောင်ခဲ့မူတွေအတွက်လဲ အမြဲတမ်း သတိရနေမှာပါ" လို့ အာရှဘောလုံး အဖွဲ့ချုပ်ဥက္ကဋ္ဌ ရှိတ်ဆယ်လ်မန်က တရားဝင်ဝက်ဘ်ဆိုက်ကနေ  ပြောပါတယ်။

ဇွန်လ ၁၁ ရက် သောကြာနေ့မှာကစားမယ့် မြန်မာနဲ့ ကာဂျစ္စတန်ပွဲစဉ်မတိုင်ခင်မှာ ကိုပြည့်စုံနိုင်အတွက် တစ်မိနစ် ငြိမ်သက်ကာ ဆုတောင်းပေးမယ်လို့လည်း အာရှဘောလုံး အဖွဲ့ချုပ်က သတင်းထုတ်ပြန်ပါတယ်။

မြန်မာဘောလုံး အသင်းဟာ ဇွန်လ ၁၅ ရက်နေ့မှာ တာဂျစ်ကစ္စတန်နဲ့ ခြေစစ်ပွဲ နောက်ဆုံးပွဲစဉ်အနေနဲ့ ဆက်ကစားရမှာဖြစ်ပြီး လက်ကျန် ၂ ပွဲစလုံး အနိုင်ရမယ်ဆိုရင် ကမ္ဘာ့ဖလား ခြေစစ်ပွဲ တတိယအဆင့်အထိ မျှော်လင့်ခွင့်ရှိနေဆဲဖြစ်ပါတယ်။

5 days Ago

အကြမ်းဖက်စစ်ကောင်စီအား လုံးဝလက်မခံကြောင်း ဂျပန်အောက်လွှတ်တော် အတည်ပြုဆုံးဖြတ်

အာဏာသိမ်းစစ်ကောင်စီက မြန်မာပြည်သူတွေအပေါ် အကြမ်းဖက်သတ်ဖြတ်နေတာကို ပြင်းပြင်းထန်ထန် ရှုတ်ချကြောင်းနဲ့  အကြမ်းဖက်စစ်ကောင်စီကို လက်မခံကြောင်း  ဇွန်လ ၈ ရက် ဒီနေ့ မွန်းလွဲပိုင်းက ကျင်းပတဲ့ ဂျပန်အောက်လွှတ်တော် မျက်နှာစုံညီအစည်းအဝေးက အတည်ပြု ဆုံးဖြတ်လိုက်ပါတယ်။

ဒါ့အပြင် မြန်မာနိုင်ငံမှာ ဒီမိုကရေစီနိုင်ငံရေးစနစ်အမြန်ဆုံး ပြန်လည်ထူထောင်ရန်တောင်းဆိုချက် အဆိုသွင်းမှုကိုလည်း လွှတ်တော်တွင်း ကိုယ်စားလှယ်အများစုက လက်ခံခဲ့ကြပြီး တညီတညွတ်တည်း ဆုံးဖြတ်ချက်ချ အတည်ပြုနိုင်ခဲ့ပါတယ်။

စစ်ကောင်စီရဲ့ အာဏာသိမ်းမှုဟာ  ဒီမိုကရေစီပြုပြင်ပြောင်းလဲရေးအတွက် ကြိုးပမ်းမှုတွေနဲ့ မျှော်လင့်ချက်တွေအပေါ် ကင်းမဲ့စေတဲ့အတွက် စစ်ကောင်စီကို အသိအမှတ်လုံးဝမပြုကြောင်း ဂျပန်-မြန်မာပါလီမန်အမတ်များချစ်ကြည်ရေးဥက္ကဋ္ဌ လစ်ဘရယ် ဒီမိုကရက်တစ်ပါတီဝင် အောက်လွှတ်တော် အမတ်မစ္စတာ အိချီရိုအီဆာဝါက ပြောပါတယ်။

စစ်ကောင်စီအနေနဲ့ အရပ်သားတွေအပေါ် ရက်စက်စွာ အကြမ်းဖက်နေမှုကို ချက်ချင်းရပ်ဆိုင်းပြီး နိုင်ငံတော်အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်အပါအဝင် မတရား ဖမ်းဆီးထိန်းသိမ်းခံထားရတဲ့ ပြည်သူအားလုံးကို ချက်ချင်းလွှတ်ပေးဖို့နဲ့  လူ့အခွင့်အရေးနဲ့ လူ့လုံခြုံရေးတို့အတွက် ဒီမိုကရေစီစနစ်ကို ပြန်လည်ထူထောင်ဖို့လည်း  ဂျပန်အောက်လွှတ်တော်က တိုက်တွန်းပါတယ်။

ဂျပန်အစိုးရအနေနဲ့လည်း နိုင်ငံတကာအသိုက်အဝန်းနဲ့ ပူးပေါင်းပြီး စစ်ကောင်စီရဲ့အ ကြမ်းဖက်လုပ်ရပ်တွေ ချုပ်ငြိမ်းသွားစေဖို့ သံတမန်အရင်းအမြစ်တွေကို အပြည့်အဝအသုံးချပြီး ဆောင်ရွက်ဖို့လည်း   ဂျပန်အောက်လွှတ်တော်က တောင်းဆိုခဲ့ပါတယ်။ 

6 days Ago

ရှမ်းလက်နက်ကိုင် ၂ဖွဲ့ ပူးပေါင်းပြီး စစ်အာဏာရှင်ကို တော်လှန်ရန် ဂျပန်ရောက်ရှမ်းလူငယ်များ တောင်းဆို

ရှမ်းလက်နက်ကိုင်အဖွဲ့တွေ ဖြစ်တဲ့ SSPP နဲ့ RCSS တို့အနေနဲ့ အချင်းချင်းတိုက်ပွဲတွေ ရပ်တန့်ပြီး စစ်ကောင်စီ အကြမ်းဖက်အဖွဲ့ကို ပူးပေါင်း တော်လှန်တိုက်ခိုက်ကြဖို့    ဂျပန်ရောက်ရှမ်းလူငယ်တွေက တောင်းဆိုတိုက်တွန်းလိုက်ပါတယ်။

ရှမ်းပြည်သူတွေရဲ့ အသက်အိုးအိမ်စည်းစိမ်ကို ကာကွယ်ပေးဖို့ ရှမ်းပြည်တိုးတက်ရေးပါတီ -ရှမ်းပြည်တပ်မတော် (SSPP/SSA) နဲ့ ရှမ်းပြည်ပြန်လည်ထူ ထောင်ရေးကောင်စီ-ရှမ်းပြည်တပ်မတော်   (RCSS/SSA) တို့ ပူးပေါင်းပြီး စစ်အာဏာရှင်ကို တော်လှန်တိုက်ခိုက်ပေးကြဖို့  ဂျပန်ရောက် ရှမ်းလူငယ်များကွန်ရက်က တိုကျိုမြို့ရဲ့  မီတခဲတောင်ပေါ်မှာ ဆန္ဒပြတောင်းဆိုခဲ့ကြတာပါ။

ရှမ်းလူငယ်များကွန်ရက်ကို  ဂျပန်ရောက်ရှမ်းလူငယ်တွေနဲ့ ဖွဲ့စည်းထားပြီး ရှမ်း၊ ကချင်နဲ့ ကယားပြည်နယ်အတွင်းက  စစ်ဘေးရှောင်ပြည်သူတွေကို လှူဒါန်းထောက်ပံ့တာနဲ့  ရှမ်းပြည်နယ်က CDM ဝန်ထမ်းတွေကို   ဂျပန်နိုင်ငံမှ နေပြီး  ထောက်ပံ့နေတဲ့ လူငယ်အသင်း တစ်ခုလည်း ဖြစ်ပါတယ်။

မြန်မာနိုင်ငံအတွင်း အာဏာသိမ်းစစ်ကောင်စီတပ်တွေကို ကချင်၊ ကရင်၊ ကရင်နီ၊ ချင်း ၊ ရှမ်းနီ စတဲ့ တိုင်းရင်းသား လက်နက်ကိုင်တွေက တိုက်ခိုက်နေချိန်မှာ ရှမ်းလက်နက်ကိုင် နှစ်ဖွဲ့ကတော့ အချင်းချင်းတိုက်ခိုက် နေတာဖြစ်ပါတယ်။ 

2 weeks Ago

ဂျပန်ရောက်မြန်မာများ လက်ကမ်းစာစောင်ဖြန့်ဝေလှုပ်ရှားမှုပြုလုပ်

မြန်မာနိုင်ငံရဲ့ အခြေအနေကို ဂျပန်ပြည်သူတွေပိုပြီး သိလာစေဖို့ ဂျပန်ရောက် မြန်မာအရေးလှုပ်ရှားတဲ့ TTAJ အဖွဲ့က  မေလ ၂၉ ရက်ညနေပိုင်း ချီးဘားခရိုင်၊ ခါရှီဝ ဘူတာမှာ လက်ကမ်းစာစောင်တွေနဲ့ တစ်ရှူးတွေ ဝေငှခဲ့ကြပါတယ်။

ညနေ ၃ နာရီကနေ ၆ နာရီအတွင်း လက်ကမ်းစာစောင်ပေါင်း ၁၂၀၀ နဲ့ တစ်ရှူး အခုရေ  ၁၂၀၀ ကို ဂျပန်ပြည်သူ ပြည်သားတွေ လက်ဝယ်အရောက် ဝေငှပေးနိုင်ခဲ့တယ်လို့  TTAJ  အဖွဲ့၀င်တွေက ဆိုပါတယ်။

ဒီလှုပ်ရှားမှု စတင်ခဲ့တဲ့ အချိန်ကနေ ဒီနေ့အထိ မြန်မာ့ဒီမိုကရေစီအရေးကို ဂျပန်ပြည်သူတွေက ထောက်ခံအားပေးကြောင်း ဆန္ဒထုတ်ဖော်ပြတဲ့စတစ်ကာ အခုရေ သောင်းကျော်ကိုလည်း စုစည်းနိုင်ခဲ့ပြီလို့ ဆိုပါတယ်။

မနေ့က လှုပ်ရှားမှုမှာ နွေဦးတော်လှန်ရေး၊ သွေးသစ္စာ၊ အလိုမရှိ ဆိုတဲ့သီချင်းတွေနဲ့ ဂစ်တာတီးပြီး သရုပ်ဖော်တင်ဆက်ခဲ့သလို ဂျပန်ပြည်သူတွေကလည်းလက် ၃ ချောင်းထောင်ပြီး အားပေးစကားတွေ ပြောခဲ့ကြပါတယ်။ 

2 weeks Ago

မြန်မာစစ်ဘေးသင့်ပြည်သူများအတွက် ဂျပန်ရောက်မြန်မာများ လက်ကမ်းစာစောင်ဝေ

စစ်အာဏာရှင်ရဲ့ အကြမ်းဖက်မှုကြောင့် စစ်ဘေးသင့်နေရတဲ့ ပြည်သူတွေကို အကူအညီပေးဖို့အတွက် မေ ၂၉ ရက်နေ့က တိုကျိုမြို့၊ ရှိဘူယဘူတာ၊ ဟချိကို ထွက်ပေါက်အနီးမှာ ဂျပန်ရောက်မြန်မာလူငယ်တွေက လက်ကမ်းစာစောင် ပေးဝေခဲ့ပါတယ်။ 

မနက်ပိုင်းနဲ့မွန်းလွဲပိုင်း နှစ်ကြိမ်ခွဲပြီး လက်ကမ်းစာစောင်ဝေတာနဲ့ အလှူ ငွေကောက်ခံတာကို လူငယ်တွေက ဆောင်ရွက်ခဲ့ပါတယ်။

လက်ကမ်းစာစောင်ဝေဖို့ လူစုတာကို သက်ဆိုင်ရာဂျပန်ရဲစခန်းဆီမှာ ခွင့်ပြုချက်တောင်းခံပြီး ဆောင်ရွက်ရတာဖြစ်ပါတယ်။ မြန်မာပြည်သူတွေရဲ့အခက်အခဲကို နိုင်ငံတကာကသိအောင် လူငယ်တွေက ကြိုးစားပေးနေတာလည်းဖြစ်ပါတယ်။

လက်ကမ်းစာစောင်ဝေတာနဲ့ အလှူငွေကောက်ခံတာတွေကို  အပတ်စဉ်စနေနေ့တိုင်း ဂျပန်ရောက်မြန်မာလူ ငယ်တွေကဆောင်ရွက်နေတာဖြစ်ပြီး စစ်ဘေးသင့်ပြည်သူတွေ၊ CDM ဝန်ထမ်းတွေနဲ့ အခက်အခဲကြုံနေရတဲ့ပြည်သူတွေကို လှူဒါန်းသွားမှာဖြစ်ပါတယ်။

2 weeks Ago

ဂျပန်ရောက်မြန်မာလူငယ်များ စစ်အာဏာရှင်ဆန့်ကျင်ရေး လှုပ်ရှားမှုပြုလုပ်

ဂျပန်ရောက် မြန်မာလူငယ်တွေဟာ မေလ ၂၉ ရက်နေ့က ဂျပန်နိုင်ငံ ယိုကိုဟားမားမြို့ရဲ့ ဆာကူရာဂိချော ဘူတာရှေ့မှာ စစ်အာဏာရှင်ဆန့်ကျင်ရေး လှုပ်ရှားမှုတစ်ခု ပြုလုပ်ခဲ့ကြပါတယ်။

ဒီကနေ့ လှုပ်ရှားမှုဟာ မြန်မာနိုင်ငံမှာ ဖြစ်ပေါ်နေတဲ့ အကြမ်းဖက် သတ်ဖြတ်၊ နှိပ်စက်မှုတွေနဲ့ မြန်မာနိုင်ငံသားတွေ ဒီမိုကရေစီရရှိရေး ကြိုးပမ်းမှုကို ဂျပန်ပြည်သူတွေ ပိုမိုသိရှိလာအောင် ဂျပန်ဘာသာနဲ့ လက်ကမ်းစာစောင်တွေ ဖြန့်ဝေခဲ့တာပါ။

‌ဒါ့အပြင် မြန်မာနိုင်ငံအတွက် အလှူငွေကောက်ခံခဲ့ကြပြီး ရရှိလာတဲ့ အလှူငွေတွေကို CDM ဝန်ထမ်းတွေနဲ့ စစ်ဘေးရှောင်ပြည်သူကို ပြန်လည်လှူဒါန်းပေးသွားမယ်လို့ ဂျပန်ရောက် မြန်မာလူငယ်တစ်ဦးက DVB ကို ပြောပါတယ်။

2 weeks Ago

ဂျပန်-မြန်မာ ချစ်ကြည်ရေးအသင်းဥက္ကဋ္ဌ အာဏာသိမ်းစစ်ခေါင်းဆောင်နှင့် ၂ ကြိမ်တွေ့ဆုံခဲ့

ဂျပန်-မြန်မာ ချစ်ကြည်ရေးအသင်း Japan Myanmar Association ဥက္ကဋ္ဌ မစ္စတာ ဝါတနဘဲ ဟီဒဲအိုဟာ အာဏာသိမ်းစစ်ကောင်စီခေါင်းဆောင် မင်းအောင်လှိုင်နဲ့ မြန်မာနိုင်ငံမှာ ရောက်နေချိန် ၂ ပတ်အတွင်း ၂ ကြိမ် တွေ့ဆုံခဲ့တယ်လို့ နီးစပ်ရာအသိုင်းအဝိုင်းက သိရပါတယ်။

မစ္စတာ ဟီဒဲအိုရဲ့ သားဖြစ်သူ Japan-Myanmar Association ရဲ့ အထွေထွေ အတွင်းရေးမှူး ယုဆုကဲ ဝါတာနာဘဲကလည်း “ဂျပန်ဟာ အနောက်နိုင်ငံတွေရဲ့ အစိုးရပြောင်းလဲရေး လမ်းစဉ်ကို မျက်စိစုံမှိတ်ပြီး လိုက်လုပ်မယ့်အစား မြန်မာ့တပ်မတော်နဲ့ အမေရိကန်နဲ့ တခြားဒီမိုကရေစီနိုင်ငံတွေအကြား ပေါင်းကူးတံတားသဖွယ် ရပ်တည်သင့်ကြောင်း အကြံပြုလိုတယ်” လို့ Diplomat မဂ္ဂဇင်းရဲ့ အတွေးအမြင်ကဏ္ဍတစ်ခုမှာ မေ ၂၅ ရက်က ရေးသားဖော်ပြခဲ့ပါတယ်။

ပုဂ္ဂလိက အဖွဲ့အစည်းတစ်ခုဖြစ်တဲ့. Japan-Myanmar Association မှာ အကြံပေးနာယကအဖြစ် လက်ရှိဒုတိယဝန်ကြီးချုပ် မစ္စတာအာတိုတာရို၊ အငြိမ်းစား ဂျပန်အစိုးရအရာရှိကြီးတွေ၊ ဂျပန်ထိပ်တန်းကုမ္ပဏီကြီးတွေရဲ့ အမှုဆောင်အရာရှိတွေနဲ့ ဖွဲ့စည်းထားတာ ဖြစ်ပါတယ်။

ဂျပန်အစိုးရအဖွဲ့ဝင် ဝန်ကြီးဟောင်းတစ်ဦးဖြစ်တဲ့ ဟီဒဲအိုဟာ မြန်မာစစ်တပ်နဲ့ ကာလကြာမြင့်စွာ ရင်းနှီးမှုတွေရှိပြီး လက်ရှိအာဏာသိမ်းစစ်ခေါင်းဆောင်နဲ့ သားအဖသဖွယ် ဆက်ဆံရေး ရှိခဲ့တယ်လို့ ဂျပန်-မြန်မာစီးပွားရေးလုပ်ငန်းရှင်များအကြား ထင်ရှားသူတဦးလည်း ဖြစ်ပါတယ်။

မစ္စတာ ဟီဒဲအိုဟာ မြန်မာနိုင်ငံမှာ သီလဝါ အထူးစီးပွားရေးဇုန်စီမံကိန်း ဖော်ဆောင်မှုကို အားပေးခဲ့သူတဦးဖြစ်ပြီး အာဏာမသိမ်းခင် သီတင်းပတ်က မြန်မာနိုင်ငံ ရောက်ရှိခဲ့ကာ လက်ရှိလည်း မေလ ၁၄ရက်နေ့ကစကာ မြန်မာနိုင်ငံကို ရောက်ရှိနေပြီး မွန်ပြည်နယ်အတွင်း ဖော်ထုတ်မယ့် အထူးစီးပွားရေးဇုန် လျာထားရာ ဒေသကို ရက်ပိုင်းအတွင်း သွားရောက်မယ်လို့ ကြားသိရပါတယ်။

ဂျပန်-မြန်မာ ချစ်ကြည်ရေးအသင်းဟာ ၁၉၈၈ ခုနောက်ပိုင်း မြန်မာစစ်တပ်ကို ဂျပန်ကာကွယ်ရေးတက္ကသိုလ်မှာ အဆင့်မြင့်စစ်ပညာတွေ သင်ကြားစေတာတွေေ ပြုလုပ်ခဲ့တဲ့ အဖွဲ့အစည်းတခုလည်း ဖြစ်ပါတယ်။

2 weeks Ago

ဂျပန်က မြန်မာကို ၁၀ ဂိုးပြတ်အနိုင်ရ

ကမ္ဘာ့ဖလား ခြေစစ်ပွဲအဖြစ် ဂျပန်နဲ့မြန်မာလက်ရွေးစင်အသင်းတို့ ဒီနေ့ညနေ ယှဉ်ပြိုင်ကစားကြရာမှာ ဂျပန်အသင်းက မြန်မာအသင်းကို ၁၀ ဂိုး ပြတ် အနိုင်ရသွားပါတယ်။

ဂျပန်အသင်းက ပထမပိုင်းမှာ ပင်နယ်တီ ၁ ဂိုးအပါအဝင် ၄ ဂိုးသွင်းယူပြီး ဒုတိယပိုင်းမှာတော့  ၆ ဂိုးထပ်သွင်းယူပြီး စုစုပေါင်း ၁၀ ဂိုး ဂိုးမရှိနဲ့ အနိုင်ရရှိသွားတာပါ။

ပွဲမစတင်မီ မြန်မာဘောလုံးအသင်းသား တစ်ဦးက လက်သုံးချောင်း သင်္ကတနဲ့ ဆန္ဒထုတ်ဖော်ခဲ့ပါတယ်။ ဂျပန်ရောက် မြန်မာပရိသတ်တွေကတော့ ပွဲမစတင်ကတည်းက ကွင်းပြင်မှာ  မြန်မာ့လက်ရွေးစင်ဘောလုံးအသင်းကို လာရောက် ကန့်ကွက်ဆန္ဒပြခဲ့ကြပါတယ်။

2 weeks Ago

ဂျပန်နှင့် မြန်မာအသင်း ပွဲမစတင်မီ ဂျပန်ရောက်မြန်မာပရိသတ်များ ဆန္ဒပြ

ကမ္ဘာ့ဖလား ခြေစစ်ပွဲအဖြစ် ဂျပန်နဲ့မြန်မာလက်ရွေးစင်အသင်းတို့ ဒီနေ့ညနေ စတင်ယှဉ်ပြိုင်ကစားနေကြပြီဖြစ်ပြီး ပွဲမစတင်မီ မြန်မာ့လက်ရွေးစင်ဘောလုံးအသင်းကို ဂျပန်ရောက် မြန်မာပရိသတ်တွေက ကန့်ကွက်ဆန္ဒပြခဲ့ကြပါတယ်။

2 weeks Ago

ကမ္ဘာ့ဖလားခြေစစ်ပွဲကို ဂျပန်ရောက်မြန်မာများ ဆန္ဒပြမည်

ဂျပန်မှာကျင်းပမယ့် ကမ္ဘာ့ဖလားခြေစစ်ပွဲကို ဂျပန်ရောက်မြန်မာတွေ ဆန္ဒပြကြမှာဖြစ်ကြပြီး မြန်မာပြည်သူတွေကို ကိုယ်စားပြုလာကစားမယ့် မြန်မာအသင်းဟာ အကြမ်းဖက်စစ်ကောင်စီရဲ့ အတင်းအကြပ်ဖိအားပေးခံရပြီး ကစားနေရတယ်ဆိုတာ ဂျပန်အစိုးရနဲ့ ကမ္ဘာပြည်သူတွေသိအောင်လုပ်သင့်တယ်လို့ ဦးဆောင်သူတဦးဖြစ်တဲ့ မဆွေဆက်အေးက ဒီဗွီဘီကို ပြောပြပါတယ်။

“ကစားမယ့်ကွင်းရှေ့မှာ ညီမတို့ဆန္ဒဖော်ထုတ်ကြမှာပါ။ အခုလာကစားတဲ့သူတွေတချို့က စစ်ကောင်စီရဲ့ ဖိအားပေးခံထားရသူတွေဖြစ်တယ်လို့ ကြားသိရပါတယ်။ သူတို့က မြန်မာပြည်သူတွေဘက်က ရပ်တည်ချင်တယ်၊ ရုန်းထွက်ချင်တယ်ဆိုရင် သူတို့အနေနဲ့ မြန်မာပြည်တွေရဲ့ ဆန္ဒကို ဖော်ထုတ်စေချင်တယ် မျှော်လင့်နေကြတယ်။ နိုင်ငံရေးနဲ့ အားကစားနဲ့ မပတ်သက်ရဘူးဆိုပေမယ့် အခုဟာက နိုင်ငံရေးအဆင့်မဟုတ်ဘဲ တိုင်းပြည်တွင်းက ပြည်သူတွေကို အကြမ်းဖက်စစ်အုပ်စုက နေ့စဉ် အကြမ်းဖက်သတ်ဖြတ်နေတာပါ။ ပြီးခဲ့တဲ့ မတ်လက ဂျာမန်အသင်းက ကွင်းထဲမှာ အိမ်ရှင်ကာတာအသင်းကို လူအခွင့်အရေး စာတမ်းပါတဲ့ ဝတ်စုံဝတ်ဆန္ဒပြတာ ကမ္ဘာ့ဘောလုံးအဖွဲ့ချုပ်ကလည်း အရေးမယူခဲ့ဘူး ဒါကြောင့် ဂျာမန်နည်းပြ အပါအဝင် မြန်မာဘောလုံးသမားများအနေနဲ့ မြန်မာပြည်သူတွေရဲ့ ဆန္ဒကို ကမ္ဘာကို ဖော်ထုတ်သင့်တယ်။”

တကယ်လို့ ဂျပန်မှာ လာကစားတဲ့ ဘောလုံးသမားတွေထဲက မြန်မာပြည်သူတွေနဲ့အတူ ရပ်တည်မှုကြောင့် အကြမ်းဖက်စစ်ကောင်စီရဲ့ အရေးယူခံရမှာကို စိုးရိမ်ပါက မိမိတို့ပြည်ထောင်စုမြန်မာနိုင်ငံသားအသင်းကို ဆက်သွယ်နိုင်ပြီး ကူညီဆောင်ရွက်ပေးမယ်လို့ အသင်းတာဝန်ရှိသူတဦးဖြစ်တဲ့ ဦးသန်းဆွေက ပြောပါတယ်။

လက်ရွေးစင်အသင်းအုပ်ချုပ်သူ ဦးသန်းတိုးအောင်က စစ်အုပ်ချုပ်မှုအောက်တာဝန်မထမ်းဆောင်လိုကြောင်း အတိအလင်းကြေညာက CDM ဝင်ရောက်ခဲ့သလို ကျော်ကိုကို၊ အောင်သူ၊ ဇော်မင်းထွန်း၊ ကျော်ဇင်ထက်၊ ကျော်ဇင်ဖြိုး တို့အပါအဝင် အခြားနာမည်ကျော်ကစားသမားတွေလည်း ပါဝင်မကစားကြတာကို တွေ့ရပါတယ်။

မြန်မာအသင်းဟာ မေလ ၂၈ ရက်မှာ ဂျပန်အသင်းနဲ့ ချီးဘာခရို င်Fukuda Denshi Arena မှာ စတင်ကစားမှာဖြစ်ပြီး ဇွန် ၁၁ ရက်နဲ့ ၁၅ ရက်မှာ အိုဆာကာ Yanmar Stadium မှာ ပြိုင်ပွဲဝင်ကစားရမှာလည်းဖြစ်ပါတယ်။

2 weeks Ago

ဂျပန်နှင့်ကစားမည့်ပွဲတွင် မြန်မာကစားသမားများ အတွေ့ကြုံကောင်းရနိုင်ဟု နည်းပြပြော

ကမ္ဘာ့ဖလားခြေစစ်ပွဲအဖြစ် မေလ ၂၈ ရက်မှာ ကစားရမယ့်ဂျပန်အသင်းနဲ့ပွဲစဉ်ဟာ မြန်မာကစားသမားတွေအတွက် အတွေ့အကြုံကောင်းတွေရရှိမှာဖြစ်တယ်လို့ မြန်မာနည်းပြ အန်တွန်နီဟေးက ပြောပါတယ်။

ဂျပန်နဲ့မြန်မာအသင်းတို့ဟာ ကမ္ဘာ့ဖလား ခြေစစ်ပွဲအုပ်စု (F) ပွဲစဉ်အနေနဲ့ မေလ ၂၈ ရက် မနက်ဖန် ညနေ ၄ နာရီ ၅၀မိနစ်မှာ ယှဉ်ပြိုင်ကစားကြမှာပါ။

မြန်မာအသင်းရဲ့ နည်းပြ ဂျာမန်လူမျိုးနည်းပြ အန်တွန်နီဟေး "ကျနော်တို့က အာရှရဲ့အကောင်းဆုံးအသင်းဖြစ်တဲ့ ဂျပန်နဲ့ကစားရမှာပါ။ ကစားသမားတွေ အတွက် အံ့အားသင့်စရာ အတွေ့အကြုံတွေ ရရှိမှာဖြစ်ပြီး အကောင်းဆုံးပြင်ဆင်ထားရမှာဖြစ်ပါတယ်" လို့ ပြောပါတယ်။

မြန်မာအသင်းဟာ မေလ ၂၇ ရက်က ဂျပန်နဲ့ပွဲအကြို နောက်ဆုံး လေ့ကျင့်ခန်းအစီအစဉ်တွေ ပြုလုပ်ခဲ့ပါတယ်။

မြန်မာလက်ရွေးစင်အသင်းမှာ ကျော်ကိုကို၊ အောင်သူနဲ့ ဇော်မင်းထွန်းတို့လို အဓိက ကစားသမားအများစုမပါဝင်ဘဲ မောင်မောင်လွင် ၊ လှိုင်းဘိုဘို၊ ဒေးဗစ်ထန်အစရှိတဲ့က စားသမားတွေနဲ့အတူ လူငယ်ကစားသမားတွေနဲ့ ပွဲထွက်အသုံးပြုရမှာ ဖြစ်ပါတယ်။

အာရှထိပ်သီးဂျပန်အသင်းမှာတော့ ပရီးမီးယားလိဂ်ကလပ် လစ်ဗာပူးက မီနာမီနိုအပါအဝင် ဂျာမန်ကလပ်ဝါဒါဘရီမင်တိုက်စစ်မှူး အိုဆာကာ၊ ဖရန့်ဖတ်က ကာမာဒါ တို့လို ဥရောပအခြေ စိုက်ကစားသမားတွေနဲ့ မြန်မာအသင်းကို ယှဉ်ပြိုင်သွားဖို့ရှိပါတယ်။

3 weeks Ago

ဗီဇာသက်တမ်းကုန် ဂျပန်ရောက်မြန်မာနိုင်ငံသားများကို ဆက်လက်နေထိုင်ခွင့်ပေးမည်

မြန်မာနိုင်ငံမှာ စစ်တပ်အာဏာသိမ်းမှုအပြီး နိုင်ငံရေးအခြေအနေတွေ ဆိုးရွားမှုကြောင့် ဂျပန်နိုင်ငံရောက် မြန်မာနိုင်ငံသားတွေကို ဗီဇာသက်တမ်း ကုန်ဆုံးသွားရင်တောင် ဂျပန်မှာ တရားဝင်နေထိုင်ခွင့် ပေးသွားမယ်လို့ Nikkei Asia သတင်းမှာ ဖော်ပြထားပါတယ်။

ဒီကင်းလွတ်ခွင့်ဟာ မြန်မာနိုင်ငံကို ပြန်ဖို့ အခက်အခဲရှိနေတဲ့ ကျောင်းသားတွေနဲ့ နည်းပညာဆိုင်ရာ အလုပ်သင်တွေ လျှောက်ထားလို့ရပါတယ်။ 

မေလ ၂၅ ရက်က ဂျပန်လူဝင်မှုကြီးကြပ်ရေးဌာနကနေ ဥပဒေပြုအမတ်တွေဆီ တင်ပြပေးပို့ ထားတဲ့ အစီအစဉ်အရ သူတို့ဟာ ဂျပန်နိုင်ငံမှာ နောက်ထပ် ၆ လ သို့မဟုတ် ၁၂ လကြာ ကျောင်းတက်ဖို့ ဒါမှမဟုတ် အလုပ်လုပ်ဖို့ ရွေးချယ်နိုင်ပါတယ်။

တကယ်လို့ မြန်မာနိုင်ငံရဲ့ နိုင်ငံရေးအခြေအနေမှာ တိုးတက်မှုမရှိရင် သူတို့တွေဟာ နောက်ထပ် သက်တမ်းတိုးဖို့ လျှောက်ထားနိုင်တယ်လို့လည်း ဆိုပါတယ်။ 

ဂျပန်နိုင်ငံဟာ ဒုက္ခသည်တွေအတွက် စိစစ်ရေးလုပ်ငန်းစဉ်ကို အရှိန်မြှင့်တင်သွားမှာဖြစ်ပြီး မြန်မာနိုင်ငံမှ လျှောက်ထားသူတွေကတော့ အဲ့ဒီအခြေအနေတွေ မလိုပဲ ဂျပန်မှာ နေထိုင်၊ အလုပ်လုပ်ခွင့် ပေးသွားမှာဖြစ်တယ် လို့ Nikkei Asia မှာ ရေးပါတယ်။ 

ဒါ့အပြင် မြန်မာစစ်ကောင်စီဟာ ဒီမိုကရေစီ လိုလားတဲ့ ဆန္ဒပြသူတွေကို စစ်တပ်ရဲ့နှိမ်နင်းမှုအပေါ် ဆန့်ကျင်ကန့်ကွက်ကြောင်း ထုတ်ဖော်ရှုတ်ချတဲ့ တိုကျိုရှိ မြန်မာသံရုံးက သံတမန် ၂ ဦးကို ရာထူးကနေ ထုတ်ပယ်ခဲ့ပါသေးတယ်။ 

ဂျပန်အစိုးရက အဲ့ဒီလို အရည်အချင်းမြင့် ကျွမ်းကျင်ပညာတတ်တွေလို သံတမန်တွေကို ဗီဇာပေးဖို့ ရည်ရွယ်ထားပါတယ်။

၂၀၂၀ ပြည်နှစ်အကုန်မှာ ဂျပန်မှာနေထိုင်တဲ့ မြန်မာနိုင်ငံသား ၃၅၀၄၉ ဦး ရှိတယ်လို့ လူဝင်မှုကြီးကြပ်ရေးဌာနက ထုတ်ပြန်ထားတဲ့ အချက်အလက်တွေအရ သိရပါတယ်။ မတ်လကုန်မှာ နိုင်ငံရေးခိုလှုံခွင့် တောင်းခံသူ စုစုပေါင်း ၂,၉၄၄ ဦး ရှိပါတယ်။ 

3 weeks Ago

NUG မြန်မာ အစိုးရအဖွဲ့နှင့် ဂျပန်လွှတ်တော်အမတ်များ ပထမဆုံးအကြိမ်ဆွေးနွေး

အမျိုးသားညီညွတ်ရေးအစိုးရ (NUG)နဲ့ ဂျပန်လွှတ်တော်အမတ်တွေရဲ့ ပထမဆုံးအကြိမ် အွန်လိုင်းမှဆွေးနွေးပွဲကို တိုကျိုမြို့ချီယိုဒရှိ ဂျပန်လွှတ်တော်အမတ်များ အဆောက်အအုံမှာ မေ ၂၆ ရက် ညနေ ၅ နာရီက ကျင်းပခဲ့ပါတယ်။

အစည်းအဝေးကို ဒုသမ္မတ ဒူဝါလရှီးလ၊ ပြည်ထောင်စုဝန်ကြီးချုပ် မန်းဝင်းခိုင်သန်း၊ နိုင်ငံခြားရေးဝန်ကြီးဒေါ်ဇင်မာအောင်၊ လူသားချင်းစာနာထောက်ထားရေးနှင့် ဘေးအန္တရာယ်ဆိုင်ရာ စီမံခန့်ခွဲရေးဝန်ကြီးဒေါက်တာဝင်းမြတ်အေး၊ လူ့အခွင့်အရေး ဆိုင်ရာဝန်ကြီး ဦးအောင်မျိုးမင်းနဲ့ ဒုတိယဝန်ကြီးတွေ တက်ရောက်ကာ ၂ နာရီလောက် ဆွေးနွေးခဲ့ကြပြီး ပူးတွဲထုတ်ပြန်ချက် မူကြမ်း ၉ ချက်ကို သဘောတူခဲ့ကြပါတယ်။

လက်ရှိမြန်မာနိုင်ငံအခြေအနေ၊ NUG အစိုးရရဲ့ ရည်ရွယ်ချက်နဲ့ လက်ရှိလှုပ်ရှားမှုတွေ၊ PDF ဖွဲ့စည်းခြင်း ရည်ရွယ်ချက်၊ ဂျပန်အစိုးရအပေါ် တောင်းဆိုချက်များ၊ မြန်မာဒီမိုကရေစီ ပြန်လည်ရရှိရေးအတွက် နှစ်နိုင်ငံပူးပေါင်းပြီး လုပ်ဆောင်နိုင်မယ့် အရာတွေကို အလေးထား ဆွေးနွေးခဲ့ကြပါတယ်။

ဂျပန်အစိုးရအနေနဲ့ NUG အစိုးရကို တရားဝင်အစိုးရအဖြစ် အသိအမှတ်ပြုပေးရေးအတွက် လွှတ်တော်ထည်းကတဆင့် အစွမ်းကုန် ကြိုးစားသွားမယ်လို့လည်း မြန်မာနိုင်ငံ ဒီမိုကရေစီရရှိရေး ဂျပန်လွှတ်တော်အမတ်များအဖွဲ့ဥက္ကဋ္ဌ မစ္စတာ နခဂဝ မဆဟရုက DVB ကို ပြောပါတယ်။

အဖွဲ့အတွင်းရေးမှူး မစ္စတာ အီချိဘရှီကတော့ အခုဒီနေ့ဆွေးနွေးပွဲကတဆင့် နှစ်ဘက် သဘောထားတူညီချက် မူကြမ်း ၉ ချက်ကို ဂျပန်နိုင်ငံခြားရေးဝန်ကြီးဌာနကို တိုက်ရိုက်ပေးပို့သွားမယ်လို့လည်း ဆိုပါတယ်။

အစည်းအဝေးအတွင်း ဂျပန်လွှတ်တော်အမတ်တဦးက မြန်မာ့ပြည်သူတပ်မတော်လို့ မသုံးသင့်ဘဲ အကြမ်းဖက်စပ်တပ်လို့ ခေါ်ဝေါ်သုံးစွဲသင့်ကြောင်း ဆွေးနွေးခဲ့ပြီး မြန်မာနိုင်ငံခြားရေးဝန်ကြီး ဒေါ်ဇင်မာအောင်ကတော့ အခုထိ အာဏာမထိန်းသိမ်းနိုင်တဲ့ အကြမ်းဖက်စစ်ကောင်စီကို မဆက်ဆံသင့်ဘဲ မိမိတို့ ပြည်သူ့အစိုးရ NUG အစိုးရကိုသာ အခုချိန်မှစပြီး ဆက်ဆံဖို့ တိုက်တွန်းသွားခဲ့ပါတယ်။

ဆွေးနွေးပွဲမှာဂျပန်အာဏာရပါတီ LDP အပါအဝင် ပါတီအသီးသီးမှ ဂျပန်လွှတ်တော်အမတ် ၂၆ ဦး တက်ရောက်ခဲ့ပြီး မြန်မာနိုင်ငံမှ ပြန်လည်လွတ်မြောက်လာခဲ့တဲ့ ဂျပန်သတင်းထောက် မစ္စတာခိတဇူမိနဲ့ ဂျပန်ရောက် မြန်မာ့အရေးလှုပ်ရှားနေသူ ၃၀ ကျော်လည်း တက်ရောက်ခဲ့ကြပါတယ်။

သတင်း၊ ဓာတ်ပုံ - ဇော်ဇော်လှိုင်

3 weeks Ago

ဂျပန်‌ရောက် မြန်မာလူငယ်များ၏ စစ်အာဏာရှင် တော်လှန်ရေး လှုပ်ရှားမှု

ဂျပန်ရောက် မြန်မာလူငယ်တွေဟာ မေလ ၂၃ ရက်နေ့မှာ ဂျပန်နိုင်ငံ ယိုကိုဟားမားမြို့ရဲ့ လူစည်ကားရာ ဆာကူရာဂိချော ဘူတာရှေ့မှာ စစ်အာဏာရှင် တော်လှန်ရေးလှုပ်ရှားမှုတစ်ခု ပြုလုပ်ခဲ့ကြပါတယ်။

ဒီကနေ့ လှုပ်ရှားမှုဟာ မြန်မာနိုင်ငံမှာ ဖြစ်ပေါ်နေတဲ့ အကြမ်းဖက် သတ်ဖြတ်၊ နှိပ်စက်မှုတွေကို ဂျပန်ပြည်သူတွေ ပိုမိုသိရှိလာအောင် ဂျပန်ဘာသာနဲ့ လက်ကမ်းစာစောင်တွေ ဖြန့်ဝေခဲ့ပါတယ်။

‌ဒါအပြင် မြန်မာနိုင်ငံအတွက် အလှူငွေကောက်ခံခဲ့ကြပြီး အာဏာဖီဆန်ရေး CDM လုပ်ဆောင်ထားတဲ့ ဝန်ထမ်းတွေနဲ့ စစ်ဘေးရှောင်ပြည်သူကို ပြန်လည် လှူဒါန်းပေးသွားမယ်လို့ ဂျပန်ရောက် မြန်မာလူငယ်တွေက ပြောပါတယ်။

3 weeks Ago

စစ်ကောင်စီက ရာထူးမှဖယ်ရှားခဲ့သည့် တိုကျိုသံရုံးဝန်ထမ်း ၂ ဦး၏ဗီဇာ မရုပ်သိမ်းသေးဟု ဂျပန်ပြော

မြန်မာအာဏာသိမ်းစစ်ကောင်စီ ရာထူးကဖယ်ရှားလိုက်တဲ့ တိုကျိုရှိ မြန်မာသံရုံးက သံတမန်ဝန်ထမ်း ၂ ယောက်ရဲ့ဗီဇာကို မရုပ်သိမ်းသေးဘူးလို့ ဂျပန်နိုင်ငံခြားရေးဝန်ကြီး တိုရှိမစ်ဆုမိုတဲငိက မေ ၂၁ ရက်နေ့  သတင်းစာရှင်းလင်းပွဲမှာ ပြောကြားလိုက်ပါတယ်။

မြန်မာသံရုံးပထမအတွင်းဝန် ဦးအောင်စိုးမိုးနဲ့ဒုတိယအတွင်းဝန်တို့ရဲ့ လက်ရှိနေထိုင်မှု အခြေအနေနဲ့ ရာထူးဖယ်ရှားခံလိုက်ရတဲ့ သူတို့နှစ်ယောက်ကို ဂျပန်အစိုးရက ဘယ်လို ကိုင်တွယ်ဖြေရှင်းမလဲလို့ မေးမြန်းရာမှာ ဂျပန်နိုင်ငံခြားရေးဝန်ကြီးက  ဖြေကြားလိုက်တာပါ။

“ဖေဖော်ဝါရီ ၁ ရက် မြန်မာစစ်တပ် အာဏာသိမ်းမှုနဲ့ ငြိမ်းချမ်းစွာ ဆန္ဒပြနေကြသူတွေကို အကြမ်းဖက်နှိမ်နင်းမှုတွေအပေါ် ဆန့်ကျင်ကန့်ကွက်မှုတွေဟာ ဂျပန်အစိုးရအနေနဲ့ မသင့်တော်ဘူးလို့ မမှတ်ယူတဲ့အတွက် သူတို့ရဲ့ဗီဇာအဆင့်အတန်းကိုလည်း မဖျက်သိမ်းပါဘူး။” 

ပထမအတွင်းဝန် ဦးအောင်စိုးမိုးနဲ့ ဒုတိယအတွင်းဝန်တို့ဟာ မတ်လ ၆ ရက်က  သူတို့ရဲ့ သံရုံးတာဝန်တွေကို စတင်သပိတ်မှောက်ပြီး လူထုအာခံဖီဆန်ရေးလှုပ်ရှားမှု စီဒီအမ်မှာ ပူးပေါင်းပါဝင်ကြောင်း  ဖေ့စ်ဘွတ်မှာ ကြေညာခဲ့ပါတယ်။ 

သိပ်မကြာခင်မှာပဲ သူတို့ ၂ ယောက်ကို သံရုံးဝင်းထဲက အိမ်ခန်းတွေဆီ ဝင်ရောက်ခွင့်မ‌ပေးတော့တဲ့အတွက် မတ် ၁၁ ရက်မှာ သံရုံးဝင်းထဲကနေ ထွက်ခွာပြီး တိုကျိုမှာရှိတဲ့ မြန်မာအလုပ်သမားတွေရဲ့အကူအညီနဲ့ သီးခြားနေထိုင်ခဲ့ရပါတယ်။ 

မတ်လထဲမှာပဲ သူတို့ ၂ ယောက်ရဲ့ သံတမန်အဆင့်အတန်းနဲ့ နိုင်ငံကူးလက်မှတ်တွေကို ပြန်လည်ရုပ်သိမ်းလိုက်ကြောင်း မြန်မာသံရုံးကနေ ဂျပန်နိုင်ငံခြားရေးဝန်ကြီးဌာနကို အကြောင်းကြားလာတယ်လို့ မိုတဲငိက ပြောပါတယ်။ 

ဂျပန်နိုင်ငံခြားရေးဝန်ကြီးဌာနအနေနဲ့ မြန်မာနိုင်ငံက အခြေအနေတွေ ပြောင်းလဲ ဖြစ်ပေါ်တာတွေကို စောင့်ကြည့်ပြီးတော့ သူတို့အခြေအနေကို ဆုံးဖြတ်ပေးမယ်လို့ ဖြည့်စွက်ပြောကြားပါတယ်။ 

အတွင်းဝန် ၂ ယောက်တို့က သူတို့ဟာ အင်အားသုံး ဖယ်ရှားခံရတဲ့ ပြည်သူ့ခေါင်းဆောင် ဒေါ်အောင်ဆန်းစုကြည် ဦးဆောင်တဲ့ ဒီမိုကရေစီနည်းကျ ရွေးကောက်တင်မြှောက်ထားတဲ့ အစိုးရကနေ တာဝန်အပ်နှင်းခံထားရတဲ့ တရားဝင်မှု အခြေအနေကို အခိုင်အမာ ဆုပ်ကိုင်ပြီးတော့

ဂျပန်အစိုးရကို သူတို့ရဲ့ သံတမန်ဗီဇာတွေနဲ့ အထောက်အထားတွေကို ထိန်းသိမ်း‌ပေးထားဖို့ ပန်ကြားခဲ့ပါတယ်။

3 weeks Ago

မြန်မာ့လက်ရွေးစင်ဘောလုံးအသင်း ဂျပန်လေဆိပ်ရောက်ရှိ

ကမ္ဘာ့ဖလားခြေစစ်ပွဲတွေ ကစားမယ့် မြန်မာဘောလုံးအသင်းဟာ ဒီကနေ့ ဒေသစံတော်ချိန် မနက် ၈ နာရီမှာ စင်ကာပူကနေတစ်ဆင့် ဂျပန်နိုင်ငံ ချီဘားမြို့ နာရီတာလေဆိပ်ကို ရောက်ရှိလာပါတယ်။ 

ပရိသတ်တွေရဲ့ဝေဖန်မူခံထားရတဲ့ မြန်မာအသင်းလူစာရင်းကို ဘောလုံးအဖွဲ့ချုပ်က လက်ရှိအချိန်အထိ ထုတ်ပြန်ကြေညာတာ မရှိသေးပါဘူး။ 

လေဆိပ်မှာတွေ့ရတဲ့ မြန်မာကစားသမားတွေထဲမှာတော့ နောက်ခံလူ ရဲမင်းသူ၊ ဒေးဗစ်ထန်းနဲ့ တိုက်စစ်မှူး ဝင်းနိုင်ထွန်းတို့ကို တွေ့ရပါတယ်။ 

မြန်မာအသင်းဟာ မေ ၂၈ရက်မှာ ဂျပန်အသင်းနဲ့ ကမ္ဘာ့ဖလားခြေစစ်ပွဲ ကစားရမှာဖြစ်ပါတယ်။ အဲဒီနောက် ကာဂျစ္စတန်၊ တာဂျစ်ကစ္စတန်အသင်းတွေနဲ့ ဂျပန်မှာပဲဆက်ပြီး ယှဉ်ပြိုင်ကစားရမှာဖြစ်ပါတယ်။

မြန်မာအသင်းဟာ လေဆိပ်မှာ ၃ နာရီကြာ စောင့်ဆိုင်းခဲ့ရပြီး ဒေသစံတော်ချိန် ၁၁ နာရီမှာ လေဆိပ်ကနေ တည်းခိုမယ့်ဟိုတယ်ကို သွားရောက်ခဲ့ပါတယ်။

3 weeks Ago

မြန်မာပြည်သူများကို မသတ်ရန် ဂျပန်ပြည်သူများ လဲလျောင်းဆန္ဒပြ

ဂျပန်ပြည်သူတွေရဲ့အခွန်ငွေတွေနဲ့ မြန်မာပြည်သူတွေကိုမသတ်ဖို့ တောင်းဆိုတဲ့ ဆိုင်းဘုတ်တွေကိုင်ပြီး တိုကျိုမြို့ ဂျပန်နိုင်ငံခြားရေးရုံး​ရှေ့မှာ ရာနဲ့ချီတဲ့ ဂျပန်ပြည်သူတွေက ဒီကနေ့ မေလ ၂၁ ရက်ညပိုင်းမှာဆန္ဒပြခဲ့ကြပါတယ်။

လမ်းမပေါ်မှာဆန္ဒပြတဲ့ မြန်မာပြည်သူတွေ အသတ်ခံရပုံစံနဲ့ လဲလျောင်း ဆန္ဒပြခဲ့ကြတာဖြစ်ပြီး ဆန္ဒပြပွဲမှာ ဂျပန်ဘုန်းတော်ကြီးတွေအပါအဝင် ဂျပန်အန်ဂျီအို ၃၀ ကျော်က ပူးပေါင်းပါဝင်ခဲ့ကြ ပါတယ်။  

ဦးဆောင်သူတဦးဖြစ်တဲ့ မစ္စတာ ကိုဂျီဆူဂိဟာရက “အာဏာသိမ်းမြန်မာစစ်ကောင်စီက ဆန္ဒပြ  မြန်မာပြည်သူတွေကို နေ့စဉ် အကြမ်းဖက်သတ်ဖြတ်နေတာ ၈၀၀ ကျော်သေဆုံးခဲ့ရသလို မတရားဖမ်းဆီး နှိပ်စက်တာတွေ ဆက်လက်ကျူးလွန်နေတာမို့ အခုလိုလာရောက် ဆန္ဒပြတာ”လို့  ပြောပါတယ်။

ဂျပန်အစိုးရအနေနဲ့ အာဏာသိမ်းစစ်ကောင်စီကို အထောက်အပံ့ဖြစ်စေမယ့်  ODA အပါအဝင် တခြားအထောက်အကူတွေပေးတာ ရပ်တန်းကရပ်ဖို့ ဂျပန်ပပြည်သူတွေရဲ့ တောင်းဆိုစာကိုလည်း ဂျပန်နိုင်ငံခြားဝန်ကြီးထံ  ရုံးတွင်းတာဝန်ကျအရာရှိမှတဆင့်ပေးပို့ ဆွေးနွေးခဲ့ပါသေးတယ်။ 

မြန်မာ့အရေးလှုပ်ရှားသူ ဦးမြင့်ဆွေကလည်း ဂျပန်အစိုးရအနေနဲ့ ပိုမိုပွင့်လင်းမြင်သာမှုတွေ မြန်မာပြည်သူတွေကိုပြသစေချင်တယ်လို့ဆွေးနွေးခဲ့ကြောင်း ပြောပါတယ်။

မြန်မာနိုင်ငံကအခြေအနေတွေ တိုးတက်ကောင်းမွန်လာတာမျိုး မရှိဘူးဆိုရင် ဂျပန်ကလက်ရှိပေးနေတဲ့ ODA ကိုသာမက အကူအညီအားလုံးကို ဖြတ်တောက်ဖို့ စဉ်းစားသွာမှာဖြစ်တယ်လို့  ဂျပန်နိုင်ငံခြားရေးဝန်ကြီး မိုတဲဂိ တိုရှိမိဆုက Nikkei သတင်းစာမှာ ပြောထားပါတယ်။

3 weeks Ago

မြန်မာအခြေအနေမတိုးတက်ပါက ဖွံဖြိုးရေးအကူညီ ပြန်စဉ်းစားမည်ဟု ဂျပန်အစိုးရ ပြော

မြန်မာနိုင်ငံရဲ့အခြေအနေ တိုးတက်မှုမရှိရင် ဂျပန်နိုင်ငံအနေနဲ့ မြန်မာနိုင်ငံ ဖွံ့ဖြိုး တိုးတက်ရေး အကူအညီပေးမှု AODA တွေကို ပြန်စဉ်းစားဖို့ကလွဲလို့ ရွေးချယ်စရာ မရှိဘူးလို့ ဂျပန်နိုင်ငံခြားရေးဝန်ကြီး မိုတဲဂိ တိုရှိမိဆုက မေ ၂၁ ရက်မှာ ပြောပါတယ်။

ဂျပန်ပုဂ္ဂလိကကုမ္ပဏီတွေလည်း မြန်မာပြည်မှာ ရင်းနှီးမြှုပ်နှံနိုင်မှာ မဟုတ်ဘူးလို့လည်း ဆိုပါတယ်။ 

ဂျပန်ဟာ မြန်မာနိုင်ငံအတွက် အဓိကအလှူရှင်ဖြစ်ပြီး လတ်တလောနှစ်တွေမှာလည်း ဂျပန်ကုမ္ပဏီကြီးတွေဟာ မြန်မာကို အာရှဒေသရဲ့ နောက်ဆုံး အဓိကဈေးကွက် အဖြစ် သုံးသပ်ပြီး စီးပွားရေးလုပ်ငန်းတွေကို တက်ကြွစွာ တိုးချဲ့ခဲ့ကြပါတယ်။ 

မြန်မာနိုင်ငံရဲ့ ဒီမိုကရေစီအသွင်ကူးပြောင်းရေးအတွက် အထောက်အပံ့ အမျိုးမျိုးပေးခဲ့တဲ့ နိုင်ငံတနိုင်ငံအနေနဲ့ရော၊ မြန်မာနိုင်ငံရဲ့ မိတ်ဆွေနိုင်ငံအနေနဲ့ပါ ဒီအချက်တွေကို ရှင်းရှင်းလင်းလင်း သတင်းစကားပါးဖို့ လိုအပ်နေပြီလို့လည်း မိုတဲဂိကဆိုပါတယ်။ 

နောက်ထပ် အသေးစိပ် ပြောဆိုခြင်း မရှိပေမဲ့ ဂျပန်အစိုးရအနေနဲ့ မြန်မာနိုင်ငံကို ပေးထားတဲ့ အကူအညီတွေအားလုံးကို လက်ရှိ ပေးထားပြီးသား စီမံကိန်းတွေကိုတောင်  ဖြတ်တောက်လိုက်ဖို့ ဆန္ဒရှိတယ်လို့  မိုတဲဂိ ရဲ့ ပြောကြားချက်ကို နစ်ကေးသတင်းစာမှာ ဖော်ပြထားပါတယ်။

 အကူအညီအသစ်တွေနဲ့ပတ်သက်တဲ့ ဆွေးနွေးညှိနှိုင်းမှုတွေကိုလည်း ဂျပန်ဘက်က ရပ်ထားပါတယ်။  

3 weeks Ago

စစ်ကောင်စီကိုအရေးယူရန်နှင့် ဖွံ့ဖြိုးရေးအကူအညီ ပြန်သုံးသပ်ရန် ဂျပန်သတင်းထောက် တိုက်တွန်း

မြန်မာနိုင်ငံကိုပေးနေတဲ့ ဖွံ့ဖြိုးရေးအကူအညီတွေကို ပြန်လည်သုံးသပ်ခြင်း အပါအဝင် မြန်မာစစ်ကောင်စီကို အရေးယူဖို့  မြန်မာအကျဉ်းထောင်ထဲကနေ ပြန်လွတ်လာတဲ့ ဂျပန်သတင်းထောက် ယုကိ ခိတဇုမိက  မေ ၂၁ ရက်မှာ  ဂျပန်အစိုးရကို တိုက်တွန်းလိုက်ပါတယ်။ 

သူဟာ ဂျပန်လူမျိုးဖြစ်တာကြောင့် ဂျပန်အစိုးရရဲ့ ကျောထောက်နောက်ခံနဲ့ ပြန်လွတ်လာခဲ့ ပေမဲ့ မြန်မာနိုင်ငံက ပြဿနာကိုတော့ မဖြေရှင်းနိုင်သေးပါဘူးလို့ တိုကျိုမှာ နိုင်ငံခြား သတင်းထောက်တွေနဲ့လုပ်တဲ့ သတင်းစာရှင်းလင်းပွဲမှာ ခိတဇုမိက ပြောကြားလိုက်တာပါ။

အာဏာသိမ်းစစ်အစိုးရက ခုထိ နေရာယူထားဆဲဖြစ်ပြီး လူပေါင်း ၈၀၀ကျော်အထိ သေဆုံးခဲ့ရတာ တကယ့်အခြေအနေပါ။ 

ဒါကြောင့် မြန်မာနိုင်ငံက ပြဿနာတွေကို ကူညီဖြေရှင်းနိုင်ဖို့ ဂျပန်အစိုးရရဲ့ ဩဇာအာဏာ ကို သုံးပြီး ဖြေရှင်းပေးဖို့လည်း တောင်းဆိုပါကြောင်း ပြောဆိုပါတယ်။ 

မြန်မာနိုင်ငံအတွက် ဖွံ့ဖြိုးမှုအကူအညီအားလုံးကို ဖြတ်တောက်လိုက်ခြင်းကလည်း ဒီပြဿနာကို ဖြေရှင်းနိုင်မယ်လို့ မထင်ကြောင်းလည်း သတင်းထောက်တွေရဲ့မေးမြန်းမှုကို ဖြေကြားပါတယ်။ 

ဂျပန်နိုင်ငံဟာ မြန်မာနိုင်ငံမှာ ဒီမိုကရေစီမြှင့်တင်ရေးအတွက် ပြည်ပဖွံ့ဖြိုးတိုးတက်မှုဆိုင်ရာ အကူအညီ ODA အမြောက်အမြားကို ရင်းနှီးမြှုပ်နှံခဲ့တာမို့ ဒီလို ဒီမိုကရေစီဖြစ်စဉ်ကို ထင်ထင်ရှားရှား မတွေ့ရရင် မြန်မာမှာ ဂျပန်ရဲ့ ရင်းနှီးမြှပ်နှံမှုကို သုံးသပ်ဖို့ ပြန်စဉ်းစားတာဟာ သဘာဝကျပါတယ်လို့လည်း ဆိုပါတယ်။ 

ဂျပန်အစိုးရမှာက မြန်မာအစိုးရအပေါ် သြဇာလွှမ်းမိုးမှုကို သုံးပြီး ဒီကိစ္စ အောင်မြင်အောင် လုပ်ဆောင်နိုင်မယ့် သံတမန်နည်းလမ်းတွေ အများကြီး ရှိရမှာပါ။  ဂျပန်အစိုးရအနေနဲ့ ရဲရင့်တဲ့ ဆုံးဖြတ်ချက်တွေ ချဖို့နဲ့ သင့်တော်တဲ့အချိန်မှာ နည်းလမ်း ကောင်းတွေကို လုပ်ဆောင်ဖို့ လိုအပ်ပါတယ်လို့လည်း ဂျပန်သတင်းထောက် ယုကိ ခိတဇုမိက ပြောသွားပါတယ်။

  မြန်မာနိုင်ငံမှာ ဖေဖော်ဝါရီ ၁ ရက် စစ်တပ်အာဏာသိမ်းပြီးနောက် ဖြစ်ပေါ်ခဲ့တဲ့ လူထုဆန္ဒပြပွဲတွေကို သတင်းဖော်ပြခဲ့တဲ့ ဂျပန်အလွတ်သတင်းထောက် ယုကိခိတဇုမိကို မြန်မာစစ်တပ်က  ဖမ်းဆီးခဲ့ပြီး သတင်းမှား ဖြန့်ဝေမှုနဲ့ တရားစွဲခဲ့ပါတယ်။ 

မြန်မာနိုင်ငံမှာ နှစ်ပေါင်းများစွာ နေထိုင်ခဲ့ပြီး ရန်ကုန်မှာ မီဒီယာကုမ္ပဏီ ဖွင့်ခဲ့တဲ့ ခိတဇုမိဟာ ဂျပန်သံအမတ်ကြီး ဦးဆောင်တဲ့ စေ့စပ်ညှိနှိုင်းမှုတွေအပြီးမှာ ပြန်လွတ်မြောက်လာပြီး ဂျပန်နိုင်ငံကို ပြန်လည်ရောက်ရှိနေပါပြီ။  

3 weeks Ago

ကိုဗစ်-၁၉ အန္တရာယ်ကြောင့် ထိုင်းအပါအဝင် နိုင်ငံ ၇ နိုင်ငံကို ဂျပန်က ပြည်ဝင်ခွင့်ပိတ်

လတ်တလော ကိုဗစ်-၁၉ တတိယလှိုင်းအနေနဲ့ ကူးစက်မှုတွေ မြင့်တက်နေတဲ့ ထိုင်းနိုင်ငံအပါအဝင် နိုင်ငံ ၇ နိုင်ငံကို ဂျပန်နိုင်ငံက ပြည်ဝင်ခွင့်ယာယီပိတ်ပင်လိုက်ကြောင်း ဂျပန်နိုင်ငံခြားရေးဝန်ကြီးဌာနက သတင်းထုတ်ပြန်ပါတယ်။

ပြီးခဲ့တဲ့ ၁၄ ရက်အတွင်း ထိုင်းနဲ့ ကမ္ဘောဒီးယား၊ အရှေ့တီမော၊ မွန်ဂိုလီးယား၊ ဆေးရှဲ၊ သီရိလင်္ကာနဲ့ စိန့်လူစီယာစတဲ့ နိုင်ငံတွေကို သွားရောက်ခဲ့ပြီး ဂျပန်နိုင်ငံကို ဝင် ရောက်လာသူတွေကို ဝင်ရောက်ခွင့်ယာယီပိတ်ပင်လိုက်တာဖြစ်ပြီး လက်ရှိအချိန်ထိ နိုင်ငံတွင်းဝင်ရောက်ခွင့် ကန့်သတ်ဒေသနဲ့ နိုင်ငံပေါင်း ၁၅၉ နိုင်ငံထိ ရှိလာခဲ့ပြီ ဖြစ်ပါတယ်။

ခုလို ကန့်သတ်ပိတ်ပင်မှုမှာ ဂျပန်နိုင်ငံသားတွေ၊ အထူးဝင်ရောက်ခွင့်နဲ့ လာရောက်သူတွေ၊ ဂျပန်နိုင်ငံမှာ အမြဲတမ်းနေထိုင်ခွင့်ရရှိသူတွေနဲ့ မိသားစုဝင်တွေတော့ မပါဝင်ဘူးလို့ ဆိုပါတယ်။

သီရိလင်္ကာနိုင်ငံကိုတော့ လတ်တလော ကူးစက်ပြန့်ပွားမှု မြင့်တက်နေတဲ့ အိန္ဒိယ မျိုးကွဲဗိုင်းရပ်စ် ကူးစက်ပျံ့နှံ့မှုမှာ တံခါးပေါက်ဖြစ်လာနိုင်တဲ့ အန္တရာယ်ကြောင့် ဂျပန်အစိုးရက ဒီစာရင်းထဲမှာ ထည့်သွင်းခဲ့တာလို့ ဆိုပါတယ်။

 လက်ရှိမှာတော့ ယာယီပြည်ဝင်ခွင့်ပိတ်ပင်ထားတဲ့ နိုင်ငံတွေကနေ ပြန်လည် ရောက်ရှိလာတဲ့ ဂျပန်နိုင်ငံသားတွေအနေနဲ့ သတ်မှတ်ထားတဲ့ နေရာတွေမှာ ကွာရန်တင်း ၆ ရက်ဝင်ရမှာဖြစ်ပြီး ကိုဗစ်-၁၉ ရောဂါကူးစက်မှုရှိမရှိ စစ်ဆေးမှုတွေ ပြုလုပ်ရမယ်လို့ ဆိုပါတယ်။

3 weeks Ago

စစ်အာဏာသိမ်းမှုကြောင့် ဂျပန် Aeon ဈေးဝယ်စင်တာ တည်ဆောက်မည့် လုပ်ငန်း ရွှေ့ဆိုင်း

မြန်မာနိုင်ငံမှာ စစ်တပ်ကအာဏာသိမ်းထားတာကြောင့် ဂျပန်နိုင်ငံအခြေစိုက် Aeon Mall ကုမ္ပဏီက ရန်ကုန်မြို့မှာ စတင်ဖို့ ရှိနေတဲ့ ဈေးဝယ်စင်တာဆောက်လုပ်ရေးလုပ်ငန်းတွေကို ရွှေ့ဆိုင်းလိုက်ပြီဖြစ်တယ်လို့ သိရပါတယ်။

အစပိုင်းကတော့ ဒီဈေးဝယ်စင်တာဆောက်လုပ်ရေးလုပ်ငန်းတွေကို အခုနှစ်နွေရာ သီမှာ စတင်ဖို့ ရည်ရွယ်ခဲ့ပေမယ့် ပြီးခဲ့တဲ့ ဖေဖော်ဝါရီ ၁ ရက်နေ့က အကြမ်းဖက်စစ်အုပ်စုရဲ့ အာဏာ သိမ်းမှု နောက်ပိုင်းမှာတော့ မသေချာမရေရာမှုတွေ မြင့်တက်လာခဲ့တယ်လို့ စီမံကိန်းနဲ့ နီးစပ်တဲ့ ရင်းမြစ်တခုကို ကိုးကားပြီး ကျိုဒိုသတင်းမှာ ဖော်ပြပါတယ်။

လတ်တလောမှာတော့ ဂျပန်ကုမ္ပဏီအနေနဲ့ ဒီစီမံကိန်းက နုတ်ထွက်ဖို့ ဆုံးဖြတ် ထားတာမျိုး မရှိသေးပေမယ့် (မြန်မာ)နိုင်ငံရဲ့ စီးပွားရေးအခြေအနေနဲ့စားသုံးသူတွေရဲ့ ခေတ်ရေစီးကြောင်း အလိုက် လိုက်လျောညီထွေဖြစ်စေဖို့ ပြန်လည်ပြင်ဆင်မှုတွေ လုပ်ဆောင်သွားဖို့တော့ လိုအပ်တယ် လို့ အဆိုပါ ရင်းမြစ်က ဆိုပါတယ်။

Aeon Mall Myanmar ကုမ္ပဏီအမည်နဲ့လုပ်ဆောင်မယ့် ဒီလုပ်ငန်းကိုတော့ မြန်မာ နိုင်ငံဘက်က ရွှေတောင်အုပ်စုရဲ့ Shwe Taung Real Estate ကုမ္ပဏီက ဂျပန်နိုင်ငံအခြေစိုက် Aeon ကုမ္ပဏီရဲ့လက်အောက်မှာရှိတဲ့ Aeon Mall ကုမ္ပဏီနဲ့ အကျိုးတူပူးပေါင်းပြီး တည်ဆောက်လုပ်ကိုင်သွားဖို့ သဘောတူညီခဲ့ကြတာပါ။

ရွှေတောင်က ရှယ်ယာ ၃၀ ရာခိုင်နှုန်းနဲ့ Aeon Mall က ၇၀ ရာခိုင်နှုန်း ပါဝင် ဆောင်ရွက်သွားမယ့် ဒီစီမံကိန်းမှာ အမေရိကန်ဒေါ်လာ သန်း ၁၈၀ ရင်းနှီးမြှုပ်နှံမှာဖြစ်ပြီး မြန်မာ နိုင်ငံရင်းနှီးမြှုပ်နှံမှု ကော်မရှင်က ပြီးခဲ့တဲ့ ၂၀၂၀ ပြည့်နှစ် ဇူလိုင်လတုန်းက အတည်ပြုပေးခဲ့တာ ဖြစ်ပါတယ်။

4 weeks Ago

“သေလောက်အောင်အထိ နှိပ်စက်စစ်ကြောတဲ့ ပုံစံလို့ထင်ပါတယ်” ဂျပန်သတင်းထောက် ယူကီ ခိတဇုမီ

အကြမ်းဖက်စစ်တပ်ရဲ့ စစ်ကြောရေးစခန်းမှာ ဖမ်းဆီးထိန်းသိမ်းခံနေရတဲ့ နိုင်ငံရေးလှုပ်ရှားသူတွေဟာ သေလောက်အောင် စစ်ကြောမေးမြန်း ညှဉ်းပန်းနှိပ်စက်ခံနေကြရတယ်လို့  ဂျပန်နိုင်ငံသား အလွတ်သတင်းထောက် မစ္စတာ ယူကီ ခိတဇုမီက ဒီဗွီဘီနဲ့ သီးသန့်အင်တာဗျူးမှာ ပြောပါတယ်။

ဂျပန်သတင်းထောက်   ယူကီ ခိတဇုမီဟာ နွေဦးတော်လှန်ရေးကာလအတွင်း အကြမ်းဖက် စစ်အုပ်စုရဲ့ ၂ ကြိမ်တိုင်ဖမ်းဆီးခံခဲ့ရသူဖြစ်ပြီး ပြီးခဲ့တဲ့မေလ ၁၄ ရက်နေ့ကမှ အင်စိန်ထောင်မှ ပြန်လွတ်  ပြည်နှင်ဒဏ်ပေးခံခဲ့ရလို့ ဂျပန်နိုင်ငံကို ပြန်လည်ရောက်ရှိနေတာပါ။

ဖမ်းဆီးခံခဲ့ရတဲ့ ဖြစ်စဉ်နဲ့ အင်းစိန်ထောင်အတွင်း ကြုံတွေ့ခဲ့ရတာတဲ့ အတွေ့အကြုံတွေနဲ့ ပတ်သက်လို့  မစ္စတာ ယူကီ ခိတဇုမီကို ဒီဗွီဘီက ဆက်သွယ်မေးမြန်းထားပါတယ်။ 

မေး- ခိတဇူမီစံ ပြီးခဲ့တဲ့ ဧပြီလ ၁၈ ရက်နေ့က  အဖမ်းခံခဲ့ရတယ်နော်။ အဲဒီနေ့က အဖြစ်အပျက်လေး ပြန်ပြီး ပြောပြပေးပါလား။  

ဖြေ- “ အဲဒီ ည ၇ နာရီခွဲလောက်က ကျနော် အွန်လိုင်းဆယ်မီနာ ကြည့်နေတုန်း ဘဲလ်တီးပြီး တံခါးလာခေါက်ပါတယ်။ ညအချိန်တံခါးလာခေါက်တာ ထူးဆန်းနေပြီး စိတ်က မသန့်လို့ မိတ်ဆွေတယောက်ဆီ ဖုံးလှမ်းဆက်ပေမယ့် သူ့ ဆီအဆက်အသွယ်မရခဲ့ပါဘူး။ မတတ်နိုင်ပါဘူးဆိုပြီး တံခါးသွားဖွင့်ချိန်မှာ  ရဲလို့စာတန်းကို ပြပြီး အရပ်ဝတ်တွေ၊ ရဲတွေ ၊ စစ်ဝတ်စုံဝတ်ထားသူတွေကို တွေ့ရပါတယ်။  ဒီဟာက တကယ့်ကို မလွယ်ပါလားဆိုပြီး ထင်လိုက်ပါတယ်။ သူတို့ရဲ့ အကြမ်းဖက်ခံရမှာ စိုးရိမ်လို့ ငါအဖမ်းခံပါမယ်။  တစ်ယောက်တည်း ဝင်ပါဆိုတော့ သူတို့က ထိုင်​နေပါလို့ အော်ပြီး လူ ၇ ယောက်၊ ၈ ယောက်လောက် အခန်းထဲ အတင်းဝင်လာပြီး စစ်ဆေးကြပါတယ်။” 

မေး- အိမ်ထဲကို ဝင်လာပြီး ဖုန်းတို့ ကွန်ပြူတာတို့ကို တန်းစစ်ဆေးတာလား။ 

ဖြေ- “ ဟုတ်ပါတယ်။ ကျနော့်ရဲ့ လက်ကိုင်ဖုန်းက အချက်အလက်တွေ ကြည့်ကြပြီး  သူတို့ရှာချင်တဲ့ အထောက်အထားတွေ့ပြီး ကျေနပ်သွားပုံကို သတိထားမိပါတယ်။ နောက်သူတို့က ကျနော် ဘောင်းဘီတိုနဲ့ နေချိန်ကို ဘာပစ္စည်းမှပေးမယူပဲ သွားမယ်ဆိုပြီး ခေါ်ပါတယ်။ ဘယ်သူမှမသိဘဲ ခေါ်ဆောင်သွားမှာကို ကြောက်ရွံ့စိုးရိမ်ပြီး ဘေးလူတွေသိအောင် အခန်းထဲက ခေါ်ဆောင်သွားစဉ်မှာ လက်နှစ်ဘက်ကို မြှောက်ပြီး ခြေလှမ်းဖြေးဖြေးနဲ့လျှောက်သွားခဲ့ပါတယ်။ အဲအချိန်မှာ ကျနော်မသိကျွမ်းခဲ့ပေမဲ့ အိမ်နီးနားချင်းတချို့က တွေ့မြင်သွားကြပြီး အံအားသင့် ထိတ်လန့်နေကြတဲ့ မျက်နှာတွေကို အခုပြန်သတိရနေပါသေးတယ်။ နောက် အဲဒီအတိုင်း ရဲကား နဲ့အင်းစိန်ထောင်ကို တန်းခေါ်ဆောင်သွားကြတာဖြစ်ပါတယ်”။

မေး- အင်းစိန်ထောင်မှာ နိုင်ငံရေးလှုပ်ရှားသူ အကျဉ်းသားတွေနဲ့ တွေ့ခဲ့တယ်ဆိုတဲ့ အကြောင်းလည်း ကြားသိပါရစေ။ 

ဖြေ- “ ဟုတ်ပါတယ်။ ကျနော်က အင်းစိန်ထောင်က VIP အဆောင်က အခန်းမှာနေခဲ့ရပေမယ့်  သူတို့နဲ့တွေ့ခဲ့ရပါတယ်။ အပြင်ထွက်ရချိန်မှာ နိုင်ငံရေးအကျဉ်းသားတွေထားတဲ့ အဆောင်နား လမ်းလျှောက်သွားရင် သူတို့လည်း အပြင်ရောက်နေချိန် သူတို့က ကျနော့်အနား ရုတ်တရက်လာပြီး အခြေအနေတွေ ပြောပြကြပါတယ်။ သူတို့က ဘယ်လို အနှိပ်စက်ခံခဲ့ရတယ်။ ခံနေရတယ် ဆိုတာတွေနဲ့  ဒီမိုကရေစီကို သူတို့လိုချင်ကြောင်းတွေ လာပြောပြကြတာဖြစ်ပါတယ်။” 

မေး- ခိတဇူမီစံကတော့ အကြမ်းဖက်နှိပ်စက်တာ မခံရဘူးပေါ့နော်။ 

ဖြေ- “ ကျနော်က အနှိပ်စက်မခံရပေမဲ့  နိုင်ငံရေးလှုပ်ရှားသူ အကျဉ်းသားတွေကတော့ သူတို့

ဘယ်လို နှိပ်စက်ခံခဲ့ရတာတွေ လာပြောပြခဲ့ကြပါတယ်။ နိုင်ငံရေးလှုပ်ရှားသူတော်တော်များများက

အင်းစိန်ထောင်မရောက်ခင် စစ်တပ်ရဲ့ စစ်ကြောရေးစခန်းတွေမှာ အရင် အစစ်ဆေးခံကြရပါတယ်။ အဲဒီမှာ မတရားနှိပ်စက်  စစ်ဆေးခံခဲ့ရတယ်လို့ အများစုဆီက ကြားခဲ့ရပါတယ်”။ 

“ဥပမာဗျာ မျက်နှာဖုံးစွပ် လက်နှစ်ဘက်ကို နောက်ပြန်လက်ထိပ်ခတ် ဒူးထောက်ခိုင်းပြီး အဲဒီပုံနဲ့နေခိုင်းပြီး စစ်ဆေးနှိပ်စက်တာတွေခံခဲ့ကြရတယ်လို့ ပြောပြကြပါတယ်။ သူတို့မလိုချင်တဲ့အဖြေတွေဖြေရင် နောက်ကျောတို့ အောက်ပိုင်းတို့ကို ခြေထောက်နဲ့ ကန်ကြောက်တာတွေ  အချိန်အကြာကြီး ညှဉ်းပန်းနှိပ်စက်ကြတယ်လို့ ဆိုပါတယ်။ အချိန်အကြာကြီး ဆိုတာ ၂ ရက် ၃ ရက်လောက် ၄၈ နာရီ ၇၂ နာရီလောက်တောင် အိပ်ချိန်မပေးဘဲ ညှဉ်းပန်းနှိပ်စက်မေးမြန်းကြတာလို့ပြောတာမို့ တကယ့်ကို ကြမ်းတမ်းခက်ခဲစွာ နှိပ်စက်ခံရတာတွေ ကြားသိခဲ့ရပါတယ်။ တကယ်ကို သူတို့က သေဆုံးတဲ့အထိအောင် ရည်ရွယ်ချက်ရှိမရှိ မသိပေမယ့် စစ်ကြောမေးမြန်းရင်း သေသွားလည်း ကိစ္စမရှိဘူးလို့ဆိုပြီး သေလောက်အောင်အထိ နှိပ်စက် စစ်ကြောတဲ့ ပုံစံလို့ထင်မြင်မိပါတယ်”။ 

မေး- အခု မြန်မာပြည်မှာ လုပ်ချင်တာတွေ မလုပ်ရဘဲ ဂျပန်ကိုပြန်လာရတယ်ဆိုတော့ သတင်းသမားတယောက်အနေနဲ့ မခံချိမခံသာ ဖြစ်နေမယ်ထင်ပါတယ်။ အခု ၂ ပတ် ကိုရိုနာ စည်းကမ်းအရ ကွာရန်တင်းဝင်ပြီးရင်ရှေ့ဆက်ဘာလုပ်မလဲ။ 

ဖြေ။ “ကျနော် ထောင်ထဲရှိနေစဉ်မှာ နိုင်ငံရေးလှုပ်ရှားမှုနဲ့ ထောင်ကျနေသူတွေက ခင်ဗျားက နိုင်ငံခြားသားမို့ မကြာခင်တော့ပြန်လွတ်မှာပါ။ ဂျပန်ကိုပြန်ရောက်ခဲ့ရင် ကျနော်တို့ကိုယ်စား ကျနော်တို့ရဲ့ ယုံကြည်ချက်တွေကို ဖြန့်ဝေပေးပါလို့ တောင်းဆိုခဲ့ကြလို့  ကျနော်က သူတို့ကိုယ်စားသေချာပေါက် လုပ်ဆောင်ပေးပါမယ်လို့ ကတိပြုခဲ့ပါတယ်။”

“သူတို့တွေက တကယ်လို့ ပြန်လွတ်ခဲ့လို့ စစ်ကောင်စီ အောက်မှာပဲ ရှိ​နေချိန်ဆို လှုပ်ရှားမှုတွေလုပ်ရင်ပြန်အဖမ်းခံရမှာပါတဲ့။ ဒါကြောင့် သူတို့ကိုယ်စား  သူတို့ပြောခွင့်မရတာတွေကို အားနာစွာနဲ့ စိတ်မကောင်းစွာနဲ့ ဂျပန်မှာကတော့ သတင်းလွတ်လပ်ခွင့်ရှိလို့ မြန်မာနိုင်ငံက သူတို့တွေ မပြောနိုင်တာတွေ မဖြန့်ဝေနိုင်တာတွေကို ဖြန့်ချိပေးဖို့ တောင်းဆိုတာတွေကို ကျနော့်အနေနဲ့ ကတိအတိုင်း နိုင်ငံတကာကို မြန်မာနိုင်ငံမှာ ဖြစ်ပျက်နေတဲ့အကြောင်းအရာတွေ၊  မြန်မာပြည်သူတွေ စဉ်းစားနေကြတာတွေကို တတ်နိုင်သလောက် ကျယ်ကျယ်ပြန့်ပြန့် ဆက်လက်ဖြန့်ဝေသွားဖို့ ဆုံးဖြတ်ချက်ချထားပါတယ်။”

မေး- ပြည်သူတွေကို အကြမ်းဖက်သတ်ဖြတ်မှုတွေ လုပ်ဆောင်နေတဲ့ စစ်ကောင်စီကို အညံ့မခံ ဆက်လက်တိုက်ပွဲဝင်နေတဲ့ ပြည်သူတွေကိုရော ဘာသတင်းစကားများ ပေးချင်ပါသလဲ။

ဖြေ- “ ဟုတ်ကဲ့ပါ။ တကယ့်ကို အခုက မြန်မာပြည်သူတွေအရေးတကြီး ခက်ခက်ခဲခဲ ကြိုးစားနေကြရတဲ့အချိန်ပါ။ ကျနော်မြန်မာပြည်မှာရှိနေချိန်ကတည်းက  မြင်နေရတာတော့  ပြည်သူတွေက ဘယ်လောက်ခက်ခဲချိန်ဖြစ်ပါစေ အရှုံးမပေးဘူး။ အခုအချိန်မှာ အသတ်ခံရရင်လည်း ခံရမယ်၊ အဖမ်းခံရရင်လည်းခံရမယ်၊ အဲဒီလို အခြေအနေမျိုးမှာတောင် ယုံကြည်ချက်ကို ကိုင်စွဲပြီး မကြောက်ရွံ့ဘဲ  မြို့ထဲထွက် ဆန္ဒပြထွက်ကြတာတွေ၊ အမျိုးမျိုးတောင်းဆိုမှုတွေကို အဖမ်းမခံရအောင်စဉ်းစားတွက်ချက်နိုင်သူတွေ၊ လိုချင်တာ မရရအောင်ယူမယ့် ဆန္ဒပြင်းပြမှုတွေနဲ့ စွမ်းပကားရှိသူတွေ ဖြစ်ကြပါတယ်။ ဒါတွေက ကျနော်ကိုလည်း ခွန်အားတွေရစေပါတယ်။ ဒီလိုမဆုတ်သော ဇွဲလုံလရှိတဲ့ ဆန္ဒပြင်းပြနေတဲ့ မြန်မာပြည်သူတွေ ကိုယ့်ကိုယ်ကိုယ်ယုံကြည်မှုရှိကြစေချင်တယ်။ ကျနော်အနေနဲ့ မြန်မာပြည်သူ တွေရဲ့ ဆန္ဒပြင်းပြစွာ ကြိုးစားမှုတွေက ကိုယ်လိုချင်တဲ့ပန်းတိုင်ကို ရယူနိုင်မယ်လို့ ယုံကြည်လို့ ဆက်လက်အတူ ကြိုးစားကြအောင်လို့ ပြောချင်ပါတယ်။"

"အရေးတော်ပုံအောင်ရမည်" ။

4 weeks Ago

နာမည်ကြီးကစားသမားတချို့ မပူးပေါင်းသဖြင့် မြန်မာဘောလုံးအသင်း ဂျပန်သို့ မထွက်ခွာနိုင်သေး

မြန်မာ့လက်ရွေးစင်ဘောလုံးအသင်းဟာ ကမ္ဘာ့ဖလားခြေစစ်ပွဲတွေ ကစားမယ့် ဂျပန်နိုင်ငံကို လူမစုံသေးတဲ့ အခြေအနေကြောင့် ထွက်ခွာနိုင်ခြင်းမရှိသေးဘူးလို့ သိရပါတယ်။

မြန်မာဘောလုံးအသင်းဟာ မေ ၁၅ ရက်မှာ ထွက်ခွာဖို့ စီစဉ်ထားပေမဲ့ ပြည်ပကလပ်တွေက ကစားသမားတွေကို စည်းရုံးနေရပြီး ပြိုင်ပွဲကစားဖို့ လူမစုံသေးတာကြောင့် မေလ ၂၁ ရက် ဒါမှမဟုတ် ၂၃ ရက်မှ ထွက်ခွာနိုင်မယ်လို့ သိရပါတယ်။

ပြည်ပထွက်ကစားနေတဲ့သူတွေထဲမှာ အသင်းရဲ့ အမာခံ ကစားသမားတွေဖြစ်တဲ့ ကျော်ကိုကို၊ ဇော်မင်းထွန်း၊ အောင်သူ၊ ဆွမ်လမ်မန် အစရှိတဲ့ ကစားသမားတွေရှိပါတယ်။ 

ဒီထဲကမှ ဆွမ်လမ်မန် တစ်ဦးသာ အသင်းနဲ့ပူးပေါင်းနေတာ ဖြစ်ပါတယ်။ နောက်ခံလူ ဇော်မင်းထွန်းနဲ့ တိုက်စစ်မှူး ကျော်ကိုကိုတို့က လူစာရင်းကနေ နုတ်ထွက်ထားပြီး တိုက်စစ်မှူး အောင်သူကလည်း ကစားဖို့ မသေချာဘူးလို့ ကစားသမားတွေနဲ့ နီးစပ်သူတစ်ဦးက ပြောပါတယ်။

အလားတူ အသင်းခေါင်းဆောင် ကျော်ဇင်ထက်၊ နောက်ခံလူ ထိုက်ထိုက်အောင်နဲ့ အခြားကစားသမား ၂ ဦးကလည်း အသင်းလူစာရင်းကနေ နုတ်ထွက်ထားတယ်လို့ သိရပါတယ်။

မြန်မာနည်းပြ အန်တိုနီဟေး အနေနဲ့ ကစားသမား ၂၃ ဦးလောက် အပြီးသတ် ရွေးချယ်မှာပါ။ 

ကမ္ဘာ့ဖလားခြေစစ်ပွဲတွေအနေနဲ့ မေလ ၂၈ ရက်မှာ ဂျပန်၊ ဇွန်လ ၁၁ ရက်မှာ ကာဂျစ္စတန်၊ ဇွန်လ ၁၅ ရက်မှာ တာဂျစ်ကစ္စတန် အသင်းတွေနဲ့ ဂျပန်နိုင်ငံ ချီဘားမြို့မှာကစားရမှာဖြစ်ပါတယ်။

4 weeks Ago

ဂျပန်ရောက်မြန်မာလူငယ်များ စစ်ဘေးရှောင်များအတွက် တိုကျိုမြို့တွင် ကမ်ပိန်းပြုလုပ်

ဂျပန်ရောက် မြန်မာလူငယ်တွေက မြန်မာနိုင်ငံက စစ်ဘေးရှောင်ပြည်သူတွေအတွက် လက်ကမ်းစာစောင်ဝေတဲ့ ကမ်ပိန်းတစ်ခုကို မေလ ၁၅ ရက်နေ့က တိုကျိုမြို့မှာ ပြုလုပ်ခဲ့ပါတယ်။

ကီချီဂျိုဂျီဘူတာ၊ မြောက်ဘက်ဝင်ပေါက်နဲ့  ခိတဆန်းဂျူဘူတာ အနောက်ဘက်ဝင်ပေါက်တွေမှာ အချိန်ခွဲပြီး စစ်အာဏာရှင်ကြောင့် မြန်မာပြည်သူတွေ ကြုံတွေ့နေရတဲ့ အခက်အခဲတွေကို ဂျပန်နိုင်ငံနဲ့ တကမ္ဘာလုံးက ပိုပြီးသိနိုင်အောင် လူငယ်တွေက ကြိုးစားခဲ့တာပါ။

မြန်မာနိုင်ငံက CDM ဝန်ထမ်းတွေနဲ့ စစ်ဘေးရှောင်ပြည်သူတွေအတွက် အလှူငွေကောက်ခံတာတွေလည်း ပြုလုပ်ခဲ့ပြီး ခိုင်မာတဲ့ရင်းမြစ်တွေကို ဆက်သွယ်လှူဒါန်းမယ်လို့ လူငယ်တွေက ပြောပါတယ်။

ဂျပန်နိုင်ငံ တိုကျိုမြို့ရဲ့ လူစည်ကားတဲ့နေရာတွေမှာ မြန်မာ့အရေး လက်ကမ်းစာစောင်တွေကို လူငယ်တွေက အပတ်စဉ် စနေနေ့တိုင်း ဝေငှပေးနေတာ ဖြစ်ပါတယ်။

4 weeks Ago

ဂျပန်ရောက် မြန်မာများ၏ စစ်အာဏာရှင်တော်လှန်ရေး လှုပ်ရှားမှု

ဂျပန်ရောက် မြန်မာလူငယ်တွေဟာ မေ ၁၅ ရက်ဖြစ်တဲ့ ဂျပန်အစိုးရ ရုံးပိတ်ရက်မှာ ယိုကိုဟားမားရဲ့အထင်ကရ လူစည်ကားရာ ဆာကူရာဂိချောဘူတာရှေ့မှာ စစ်အာဏာရှင် တော်လှန်ရေး လှုပ်ရှားမှု လုပ်ခဲ့ကြပါတယ်။

ဒီကနေ့ လှုပ်ရှားမှုဟာ မြန်မာနိုင်ငံမှာ ဖြစ်ပေါ်နေတဲ့ အကြမ်းဖက် သတ်ဖြတ်၊ နှိပ်စက်မှုတွေ ကို ဂျပန်ပြည်သူတွေ ပိုမိုသိရှိလာအောင် ဂျပန်ဘာသာနဲ့ လက်ကမ်းစာစောင်တွေ ဖြန့်ဝေခဲ့ ပါတယ်။‌ ဒီလှုပ်ရှားမှုမှာ‌တော့ ဂျပန်ရောက် မြန်မာလူငယ်တွေဟာ မြန်မာနိုင်ငံအတွက် အလှူငွေ ကောက်ခံခဲ့ကြပြီး ရင်ထိုး‌တွေကို လက်ဆောင်အဖြစ် ပြန်လည် ပေးအပ်ခဲ့ပါတယ်။

1 month Ago

ဂျပန်သတင်းထောက် တိုကျိုပြန်ရောက်၊ မြန်မာပြည်ကသတင်းစကား ကမ္ဘာကို ဖြန့်မည်

မြန်မာစစ်ကောင်စီအကြမ်းဖက်အဖွဲ့ရဲ့ ဖမ်းဆီးခံခဲ့ရပြီး  ပြည်နှင်ဒဏ်ပေးခံခဲ့ရတဲ့ ဂျပန်နိုင်ငံသား အလွတ်သတင်းထောက် မစ္စတာ ယူကီ ခိတဇုမိကိုဟာ ဒီနေ့  မေလ ၁၄ ရက် ဒေသစံတော်ချိန် ည ၁၀ နာရီခွဲမှာ  ဂျပန်နိုင်ငံ ချီးဘာခရိုင် နာရီတာ လေဆိပ်ကိုပြန်လည်ရောက်ရှိလာပါတယ်။ 

အလွတ်သတင်းထောက် မစ္စတာ ယူကီကို ဒီနေ့မနက်က အင်းစိန်ထောင်ကနေ ပြန်လွှတ်ပေးခဲ့ပြီး ရန်ကုန်လေဆိပ်ကနေတဆင့် လေကြောင်းခရီးနဲ့  ဂျပန်ကိုပြန်လည်ရောက်ရှိလာတာပါ။

ဂျပန်ကို ပြန်ရောက်ရောက်ချင်း လေဆိပ်မှာပြုလုပ်တဲ့ သတင်းစာရှင်းလင်းပွဲမှာ မစ္စတာ ယူကီက သူ့လွတ်မြောက်ရေးအတွက်  ကြိုးပမ်းဆောင်ရွက်ခဲ့သူတွေအားလုံးကို ကျေးဇူးအထူးတင်ကြောင်းနဲ့ လက်ရှိသူ့အနေနဲ့ သတင်းသမားတဦးဖြစ်တဲ့အတွက် မြန်မာနိုင်ငံသားတွေ ပေးချင်တဲ့ သတင်းစကားတွေကို ဂျပန်အပါအဝင်တကမ္ဘာလုံးကသိအောင်လုပ်ဆောင်ပါမယ်လို့ ပြောကြားခဲ့ပါတယ်။

မစ္စတာ ယူကီ ပြန်လွတ်ရေးအတွက် ဂျပန်နိုင်ငံက နည်းလမ်းပေါင်းစုံနဲ့ချည်းကပ်ပြီး ခက်ခက်ခဲခဲ လုပ်ကိုင်ခဲ့ရတယ်လို့လည်း ယနေ့ပြုလုပ်ခဲ့တဲ့သတင်းစာရှင်းလင်းပွဲမှာ နိုင်ငံခြားရေးဝန်ကြီး မစ္စတာ Motegi က ပြောဆိုခဲ့ပါသေးတယ်။

ဂျပန်သတင်းထောက် မစ္စတာ ယူကီခိတဇုမိ ကို မြန်မာ-ဂျပန်နှစ်နိုင်ငံဆက်ဆံရေးကို ရှေးရှုပြီး အမှုပိတ်သိမ်းကာ ပြန်လွှတ်ပေးမယ်လို့ စစ်ကောင်စီ သတင်းထုတ်ပြန်ရေးအဖွဲ့က   မေလ ၁၃ ရက်မှာ ကြေညာပြီးနောက် ပြန်လွှတ်ပေးလိုက်တာဖြစ်ပါတယ်။ 

သတင်းထောက် မစ္စတာ ယူကီ ခိတဇုမိကို ဧပြီ ၁၈ ရက်ညပိုင်းမှာ  ရန်ကုန် ပုဇွန်တောင်မြို့နယ်  ရေကျော်လမ်းရှိ သူ့ရဲ့ နေအိမ်မှာ ရဲနဲ့စစ်တပ်က လာရောက် ဖမ်းဆီးသွားခဲ့တာဖြစ်ပါတယ်။

ပြီးခဲ့တဲ့ ဖေဖော်ဝါရီ ၂၆ ရက်ကလည်း  ရန်ကုန် မြေနီကုန်းမှာ  စစ်အာဏာရှင်ဆန့်ကျင်‌ဆန္ဒပြတဲ့ ပြည်သူတွေကို သတင်းယူနေတဲ့  သူ့ကို ရဲတပ်ဖွဲ့က မနက်ပိုင်းမှာ  အဓမ္မ ဖမ်းဆီးသွားပြီး ညနေပိုင်းမှာ ပြန်လွှတ်ပေးခဲ့ တာဖြစ်ပါတယ်။

လက်ရှိမှာတော့ အာဏာသိမ်းစစ်ကောင်စီက မြန်မာသတင်းမီဒီယာသမား ၄၀ ကျော်ကို ဖမ်းဆီးထားပြီး  အများစုကို ပုဒ်မ ၅၀၅ (က) နဲ့ တရားစွဲဆိုထားကာ ပြည်မြို့အခြေစိုက် ဒီဗွီဘီ သတင်းထောက် ကိုမင်းညိုကိုတော့ ပုဒ်မ ၅၀၅ (က) နဲ့ မေလ ၁၂ ရက်နေ့က ထောင်ဒဏ် ၃ နှစ် ချမှတ်ခဲ့ပါတယ်။

1 month Ago

ဂျပန်သတင်းထောက် ယူကီခိတဇုမိကို ထောင်မှပြန်လွှတ်ပေးပြီး ဂျပန်ပြန်ပို့

ဖမ်းဆီးတရားစွဲခံထားရတဲ့ ဂျပန်သတင်းထောက် မစ္စတာ ယူကီခိတဇုမိ ကို ဒီကနေ့ မေလ ၁၄ ရက်မနက်မှာ  အင်းစိန်ထောင်ကနေ ပြန်လွှတ်ပေးလိုက်ပြီး  ရန်ကုန်အပြည်ပြည်ဆိုင်ရာလေဆိပ်ကနေ ဂျပန်နိုင်ငံကို ပြန်ပို့လိုက်ပါတယ်။

အလွတ်သတင်းထောက် ယူကီခိတဇုမိဟာ ဒီနေ့ပြန်လွတ်လာမှာဖြစ်ပြီး အစောဆုံး  ဒီသောကြာနေ့ညပိုင်းမှာ ဂျပန်ကိုပြန်လာမှာဖြစ်တယ်လို့  ဂျပန်နိုင်ငံခြားရေးဝန်ကြီး တိုရှီမိစဆုမိုတဲဂီက  ဒီနေ့မနက်ပြောတဲ့ အကြောင်း Nikkie Asia ဂျပန်သတင်းမှာ ဖော်ပြပါတယ်။

အခုလို ဂျပန်သတင်းထောက် အမြန်ဆုံး ပြန်လွတ်လာတာဟာ မြန်မာနိုင်ငံဆိုင်ရာ ဂျပန်သံအမတ်ကြီး အီချီယိုမာရုယာမနဲ့ တခြားသူတွေရဲ့ နည်းလမ်းပေါင်းစုံနဲ့ အားထုတ်ကြိုးပမ်းမှုကြောင့်ဖြစ်တယ်လို့ လည်း ဂျပန်နိုင်ငံခြားရေးဝန်ကြီးက ဒီနေ့ကျင်းပတဲ့ အောက်လွှတ်တော် နိုင်ငံခြားရေးရာကော်မတီ အစည်းအဝေးမှာ ပြောပါတယ်။ 

ဂျပန်သတင်းထောက် မစ္စတာ ယူကီခိတဇုမိ ကို မြန်မာ-ဂျပန်နှစ်နိုင်ငံဆက်ဆံရေးကို ရှေးရှုပြီး အမှုပိတ်သိမ်းကာ ပြန်လွှတ်ပေးမယ်လို့ စစ်ကောင်စီ သတင်းထုတ်ပြန်ရေးအဖွဲ့က   မေလ ၁၃ ရက်မှာ ကြေညာခဲ့တာပါ။ 

ဂျပန်သတင်းထောက်ဟာ CDM လှုပ်ရှားမှုနဲ့ စစ်အာဏာရှင်ဆန့်ကျင်တဲ့ လူထုဆန္ဒပြမှုတွေ ဆက်လက်ပြုလုပ်နိုင်ဖို့ ထောက်ပံ့ပေးခဲ့တာ စစ်ဆေးတွေ့ရှိရလို့ ဧပြီ ၁၈ ရက်နေ့မှာ ရာဇသတ်ကြီး ပုဒ်မ ၅၀၅ (က) အပြင် ဗီဇာစည်းကမ်းဖောက်ဖျက်မှုနဲ့ပါ  အမှုဖွင့် တရားစွဲထားတာလို့ဆိုပါတယ်။

ဥပဒေချိုးဖောက်ထားသူဖြစ်ပေမဲ့ မြန်မာနိုင်ငံနဲ့ ဂျပန်နိုင်ငံတို့ရဲ့ အခုအချိန်အထိ ရင်းနှီးတဲ့ ဆက်ဆံမှုနဲ့ အနာဂတ်ဆက်ဆံရေးကို ရှေးရှုပြီး မြန်မာနိုင်ငံအမျိုးသား ပြန်လည်သင့်မြတ်ရေးဆိုင်ရာ ဂျပန်အစိုးရအထူးကိုယ်စားလှယ်ရဲ့ မေတ္တာရပ်ခံ ချက်ကို အလေးထားပြီး သူ့ကို စွဲဆိုထားတဲ့အမှုတွေကို ရုပ်သိမ်းကာ ပြန်လည် စေလွှတ်ပေးတာလို့လည်း ဖော်ပြပါတယ်။

ပြီးခဲ့တဲ့ ဧပြီ ၁၈ ရက်ညပိုင်းမှာ  ဂျပန်နိုင်ငံသား အလွတ်သတင်းထောက် မစ္စတာ ယူကီခိတဇုမိကို ရန်ကုန် ပုဇွန်တောင်မြို့နယ်  ရေကျော်လမ်းရှိ သူ့ရဲ့ နေအိမ်မှာဖမ်းဆီးသွားတာဖြစ်ပါတယ်။

ပြီးခဲ့တဲ့ ဖေဖော်ဝါရီ ၂၆ ရက်ကလည်း  ရန်ကုန် မြေနီကုန်းမှာ  စစ်အာဏာရှင်ဆန့်ကျင်‌ဆန္ဒပြတဲ့ ပြည်သူတွေကို သတင်းယူနေတဲ့  သတင်းထောက် ယူကီခိတဇုမိကို ရဲတပ်ဖွဲ့က မနက်ပိုင်းမှာ  အဓမ္မ ဖမ်းဆီးသွားပြီး ညနေပိုင်းမှာ ပြန်လွှတ်ပေးခဲ့ ပါတယ်။

မစ္စတာခိတဇုမိ ဟာ  ၂၀၀၁ ခုနှစ်ကနေ ၂၀၁၂ ခုနှစ်အထိ နစ်ကေး သတင်းဌာနမှာ အလုပ်လုပ်ကိုင်ခဲ့ပြီး ရန်ကုန်မှာ နေထိုင်နေကာ  Yangon Henshu Production  မီဒီယာလုပ်ငန်းကို လုပ်ကိုင်နေတာ ဖြစ်ပါတယ်။

Photo Credit- Nikkie Asia

1 month Ago
More News
Up