အနောက်မြောက်တိုင်းစစ်ဒေသမှာ လမ်းပန်းဆက်သွယ်ရေး အဓိကကျတဲ့နေရာတခုဖြစ်တဲ့ အိန္ဒိယနယ်စပ်ရှိ တမူးမြို့ အသိမ်းမခံရအောင် စစ်ကောင်စီက မြို့ပေါ်လုံခြုံရေးတင်းကျပ်ထားပြီး ဘန်ကာတွေ အခိုင်အမာဆောက်လုပ်နေတယ်လို့ ဒေသခံတွေထံက သိရပါတယ်။
ဘန်ကာတွေ ဆောက်လုပ်ဖို့ကိုတော့ မြို့ထဲမှာ ကျန်နေတဲ့ ပျူစောထီးတွေကို အတင်းအကျပ်ဆက်လက်စေခိုင်းတာလို့လို့ တမူးမြို့နယ် ပအဖ အမျိုးသမီးခေါင်းဆောင်တဦးက ပြောပါတယ်။
“မြို့လယ်ကောင်ဘက်မှာ PDF တွေဝင်လာမှာစိုးလို့ဆိုပြီးတော့ ဘန်ကာ ကတုတ်ကျင်းတွေကို ကောင်းကောင်းတူးပြီးတော့ လုပ်ထားတာရှိတယ်။ တမူးမြို့ဝင်ဝင်ချင်း လမ်းမကြီးညာဘက်ခြမ်း အဲဒီက မြေနီကုန်းဘုန်းကြီးကျောင်းဆိုလို့ရှိရင်လည်း သူတို့က လုံးဝကို ခိုင်ခိုင်မာမာနဲ့ ဘန်ကာကို စစ်တပ်ရဲ့ ခံစစ်ကုန်းနီးပါးလောက် သေချာပြင်ထားတာလို့ သိရတယ်။ ပျူစောထီးအဓိကထွက်တဲ့ စစ်သင်တန်းတွေပေးတဲ့ ဟဲဇင်းရွာမှာတော့ တိုက်ပွဲပြီး ၃၊ ၄ ရက်လောက်မှာ သူတို့က ရဟတ်ယာဉ်နဲ့လာချတာ လက်နက် အလက် ၃၀ လောက်နဲ့ လူလည်း ၁၂ ယောက်လောက် ပါတယ်။ အဲဒီတွေ လာချပြီးတော့ သူတို့စစ်ရေးလေ့ကျင့်မှုတွေ လုပ်တယ်ပေါ့နော်။”
မကွေးတိုင်း၊ ဂန့်ဂေါဘက်ကနေ ကလေး-တမူးအထိ လမ်းပိုင်းတလျှောက်မှာ တိုက်ပွဲတွေ ဆက်တိုက်ဖြစ်နေတာကြောင့် ကုန်စည်စီးဆင်းမှုတွေ ရပ်တန့်နေပါတယ်။ စစ်ကောင်စီဘက်က ထပ်တိုးအင်အားတွေ၊ လေကြောင်းပစ်ကူတွေ ထပ်မရောက်လာတော့တာကြောင့် PDF တွေဘက်က ပိုပြီးနယ်မြေစိုးမိုးလာနိုင်တဲ့အခြေအနေ ဖြစ်ပါတယ်။
အိန္ဒိယနယ်စပ် စစ်ကိုင်း- ချင်းနယ်စပ်မြို့နယ်တွေမှာ ကချင်လွတ်မြောက်ရေးတပ်မတော် KIA၊ ဒေသခံပြည်သူ့ကာကွယ်ရေးအဖွဲ့တွေ၊ စစ်ကောင်စီနဲ့ လက်အောက်ခံ ရှမ်းနီတပ် SNA၊ ကူကီးလက်နက်ကိုင်အဖွဲ့တွေနဲ့ ကသည်းသူပုန်အဖွဲ့တွေရှိနေပြီး နယ်မြေရှုပ်ထွေးတဲ့ ဒေသဖြစ်ပါတယ်။
ကလေး PDF ခေါင်းဆောင်တဦးက “နောက်ထပ်တွေ ဆက်ပြီးလုပ်ဖို့ကြတော့ အဓိကကတော့ ကျနော်တို့ကျည်အင်အားပေါ့နော်။ စခန်းတခုခုသိမ်းဖို့ ကျည်အင်အား သောင်းချီပြီးမှကုန်တာ။ နောက်ထပ်တွေ နောက်ထပ်တွေ ထပ်ထပ်ပြီးတော့ သိမ်းဖို့ကြတော့ ကျနော်တို့ ကျည်အင်အားတော့ တော်တော်လေးလိုအပ်နေပြီ။ ရှေ့ဆက်ပြီးတော့မှလည်း လုပ်ဆောင်ဖို့တွေရှိတာပေါ့။ တနေရာပြီး တနေရာပေါ့။ တလှိုင်းပြီး တလှိုင်းတော့ လာမှာပေါ့။ သိမ်းတုန်း သိမ်းဆည်းစခန်းတွေလည်း ရှိတယ်။ လုပ်မယ့် အစီအစဉ်တွေလည်း အများကြီးရှိတာပေါ့နော်။ အနောက်ကနေပြီးတော့ များများကူညီပေးကြနိုင်ဖို့ပေါ့။ အဲဒါလေးပဲ ပြောချင်ပါတယ်” လို့ ပြောပါတယ်။
အောက်တိုဘာ ၂၇ ရက် ၁၀၂၇ စစ်ဆင်ရေးစတင်ချိန်ကစပြီး လက်ရှိအချိန်အထိ ရက်သတ္တပတ် ၃ပတ်အတွင်း ရှမ်းပြည်နယ်မှာ ချင်းရွှေဟော်၊ ပန်ဆိုင်း၊ မုန်းကိုး၊ နမ်ခမ်း၊ သိန္ဒီနဲ့ ကွမ်းလုံမြို့တွေကို မြောက်ပိုင်းမဟာမိတ် ၃ ဖွဲ့က သိမ်းယူထားပြီး၊ စစ်ကိုင်းတိုင်းမှာ ကောလင်းမြို့နဲ့ ခါမ်းပါတ်မြို့၊ ချင်းပြည်နယ်မှာ ရိခေါဒါရ်မြို့တွေကို ဒေသကာကွယ်ရေးပူးပေါင်းအဖွဲ့တွေက သိမ်းယူခဲ့တာကြောင့် စစ်ကောင်စီ လက်လွှတ်ခဲ့ရတဲ့မြို့ ၉ မြို့အထိ ရှိလာခဲ့ပါတယ်။
အဲဒါအပြင် ပဲခူးတိုင်း၊ တနင်္သာရီတိုင်း၊ ရခိုင်၊ ကရင်နီ၊ ကရင်နဲ့ မွန်ပြည်နယ်တွေမှာလည်း တိုက်ပွဲတွေ ဆက်တိုက်ဖြစ်ပွားနေပါတယ်။
သုတချမ်းသာ
