ကိုပြည့်စုံအောင်ဟာ ထောင်ထဲမှာလုပ်တဲ့ အာဇာနည်နေ့အလေးပြုအပြီးမှာ အကြောကပ် လဲကျရာကနေ မွန်းလွဲပိုင်းမှာ ကျဆုံးကွယ်လွန်သွားခဲ့တာပါ။
PPNM ရဲ့ တာဝန်ရှိသူ ကိုသိုက်ထွန်းဦးက “ထောင်ထဲမှာ အကြောကပ်ပြီးလဲသွားတယ်။ အရေးပေါ် အောက်စီဂျင်ပေးဖို့ ကြိုးစားတဲ့အခါမှာလည်း အောက်စီဂျင်မရှိတာ၊ ပြင်ပကိုလည်း ချက်ချင်း ထွက်လို့မရတာ၊ ဒီအခြေအနေတွေကြောင့်မို့လို့ နေ့ခင်း ၁ နာရီဝန်းကျင်မှာ ဆုံးသွားရတယ် ဆိုတာကိုတော့ ကျနော်တို့ တိတိကျကျ ပြောလို့ရပါတယ်ခင်ဗျ” လို့ ပြောပါတယ်။
ကိုပြည့်စုံအောင်ဟာ နဂိုကပဲ သွေးတိုး၊ ဆီးချိုနဲ့ နှလုံးသွေးကြောကျဉ်းရောဂါတွေ ခံစားနေရတာလို့လည်း သူက ဆိုပါတယ်။
အသက် ၄၄ နှစ်အရွယ် နိုင်ငံရေးအကျဉ်းသား ကိုပြည့်စုံအောင် ကို အကြမ်းဖက်စစ်တပ်နဲ့ ရဲတပ်ဖွဲ့က ၂၀၂၂ ခုနှစ် ဇန်နဝါရီ ၁ ရက်နေ့မှာ ဖမ်းဆီးခဲ့ပြီး ပုဒ်မ ၅၂(က)၊ ၅၀၅(က)တို့နဲ့ ဘီးလင်းအထူးတရားရုံးမှာ အမှုဖွင့်ခဲ့ပြီး ၂၀၂၂ ခုနှစ် ဧပြီ ၅ ရက်နေ့မှာ ထောင်ဒဏ် ၆ နှစ် ချမှတ်ခဲ့တာပါ။
PPNM ရဲ့ စာရင်းအရ ၂၀၂၅ ခုနှစ်မှာ ကျန်းမာရေးကြောင့် ကျဆုံးသူနိုင်ငံရေးအကျဉ်းသား အနည်းဆုံး ၁၃ ယောက်ရှိပြီး စစ်ကောင်စီက ဖမ်းဆီးပြီးနောက် စစ်ကြောရေးအတွင်း နှိပ်စက်ဒဏ်ရာတွေကြောင့် ဒဂုံတက္ကသိုလ်ကျောင်းသားသမဂ္ဂ ဗဟိုအလုပ်အမှုဆောင် မဝတ်ရည်အောင်ဟာ ဇူလိုင် ၂၀ ရက် ဒီနေ့မှာ ကျဆုံးကွယ်လွန်သွားခဲ့ပါတယ်။
Photo : PPNM
