ပဲခူးတိုင်း၊ ဖြူးမြို့နယ်၊ အောက်ခုံကျေးရွာကို မတ် ၇ ရက်နေ့ ညနေ ၆ နာရီကျော်လောက်မှာ စစ်ကောင်စီတပ်က လက်နက်ကြီးနဲ့ပစ်ခတ်ပြီး ဝင်ရောက်စီးနင်းခဲ့လို့ ကျောင်းထိုင်ဆရာတော် ပျံလွန်တော်မူပြီး ဒေသခံ ၂ ယောက်လည်း ထိခိုက်ဒဏ်ရာတွေရရှိခဲ့တယ်လို့ ဒေသခံတွေဆီက သိရပါတယ်။

အောက်ခုံကျေးရွာမှာ ဒေသခံတော်လှန်ရေးတပ်ဖွဲ့တွေနဲ့ စစ်ကောင်စီတပ်တို့ ထိတွေ့တိုက်ပွဲတွေ ဖြစ်ပွားနေပြီး စစ်ကောင်စီက အင်အားအလုံးအရင်းနဲ့ စစ်ကြောင်းထိုး ဝင်ရောက်နေတာပါ။

ထွက်ပြေးတိမ်းရှောင်နေရတဲ့ဒေသခံတယောက်က “အောက်ခုံ ဘုန်းကြီးကျောင်းက ကျောင်းထိုင်ဆရာတော်ကတော့ ညက လက်နက်ကြီးထိမှန်ပြီး ပျံလွန်တော်မူသွားတယ်။ ဆရာတော်နဲ့အတူ အသက် ၇၈ နှစ်ရှိပြီးဖြစ်တဲ့ ဦးညိုကြီးနဲ့ အသက် ၄၈ နှစ်ရှိတဲ့ မျိုးဇော်ထွန်းတို့ ဒဏ်ရာတွေရထားပြီး မပြေးနိုင်ဘဲ ကျန်နေခဲ့တယ်” လို့ DVB ကို ပြောပါတယ်။

စစ်ကောင်စီတပ်က လက်နက်ကြီးနဲ့ပစ်ခတ်ပြီး ကျေးရွာတွေကို ဝင်ရောက်စီးနင်းတာကြောင့် ဝဲကြီး၊ အောက်ခုံ၊ ဝဲဒေါင့်၊ လေးအိမ်စု၊ ရေဦး၊ လက်ပံခုန် ကျေးရွာတို့က ဒေသခံပြည်သူ ၇၀၀၀ ကျော်ဟာ ညတွင်းချင်း ဘေးလွတ်ရာကို ထွက်ပြေးနေရတယ်လို့လည်း ဆိုပါတယ်။

မတ်လ ၇ ရက်နေ့ မနက်ပိုင်းက လက်နက်ကြီးနဲ့ပစ်ခတ်ပြီး အောက်ခုံကျေးရွာကို ဝင်ရောက်စီးနင်းတာမှာ ဒေသခံတွေ ထိခိုက်သေဆုံးတာတွေရှိခဲ့ပေမယ့် ကျေးရွာအတွင်းမှာ စစ်ကောင်စီတပ်ကရှိနေတာကြောင့် ထိခိုက်သေဆုံးမှု အတိအကျကိုတော့ မသိရသေးဘူးလို့  ထွက်ပြေးတိမ်းရှောင်နေတဲ့ ဒေသခံတွေက ပြောပါတယ်။

မတ် ၈ ရက် ဒီကနေ့ မနက်ပိုင်းမှာတော့ ကျေးရွာတွေကို စစ်ကောင်စီတပ်တွေက စီးနင်းထားပြီး ဝင်လမ်းထွက်လမ်းတွေကိုပါ ပိတ်ဆို့ထားတဲ့အပြင် ညနေ ၄ နာရီလောက်မှာ လေကြောင်းကနေ စောင့်ကြည့်ပျံသန်းတာတွေ လုပ်နေတယ်လို့ သိရပါတယ်။