စစ်ကိုင်းတိုင်း၊ ချောင်းဦးမြို့နယ်မှာ မတ် ၆ ရက်နေ့ ညနေ ၄ နာရီဝန်းကျင်က စစ်ကောင်စီတပ်က လက်နက်ကြီးနဲ့ပစ်ခတ်တိုက်ခိုက်ခဲ့လို့ ဘုန်းကြီးကျောင်းပျက်စီးပြီး ကိုရင် ၁ ပါး ဒဏ်ရာရသွားတယ်လို့ ဒေသခံတွေဆီကနေ သိရပါတယ်။

ဒေသပြည်သူ့ကာကွယ်ရေးတပ်ဖွဲ့ဝင်တယောက်က “အဲဒီနေ့ညနေပိုင်းမှာ မြပုလဲဂိတ် အထိုင်စခန်းက ကောင်တွေက လက်နက်ကြီးတွေနဲ့ရမ်းပစ်တာတွေလုပ်ခဲ့တယ်။ သူတို့ပစ်လိုက်တဲ့ လက်နက်ကြီးကျည်တလုံးက ကျီကုန်းရွာထဲကျခဲ့တာ” လို့ ပြောပါတယ်။

လက်နက်ကြီးကျည် ကျရောက်ပေါက်ကွဲခဲ့တာကြောင့် ကျီကုန်းကျေးရွာ ဘုန်းကြီးကျောင်းဆောင်တွေ ပျက်စီးသွားခဲ့သလို အသက် ၁၀ နှစ်ဝန်းကျင်ကိုရင် ၁ ပါးလည်း ဦးခေါင်းမှာ ဒဏ်ရာရခဲ့တယ်လို့ဆိုပါတယ်။

ချောင်းဦးမြို့နယ် ပကဖ တာဝန်ခံ ကိုဖီးနစ် က “အရင်ရက်ပိုင်းက မုံရွာ-မန္တလေးလမ်းပိုင်းပေါ်က ငါးယှန်ရွာနားမှာဖြစ်ခဲ့တဲ့ဖြစ်စဉ်မှာ သူတို့ဘက်က ဒုဗိုလ် ၁ ယောက်နဲ့ အခြားအဆင့် ၁၇ ယောက်သေတယ်။ သူတို့ရဲ့လက်နက်ခဲယမ်းတွေလည်း ကျနော်တို့ရလိုက်တာများတယ်။ ကား ၂ စီးလည်း မီးရှို့ဖျက်ဆီးခံရတာဆိုတော့ဆုံးရှုံးမှုတွေများခဲ့လို့ ရှက်ရမ်းရမ်းပြီး လက်နက်ကြီးတွေနဲ့ ရမ်းပစ်နေတယ်လို့ယူဆတယ်။ သူတို့ဘက်က လက်နက်ကြီးတွေ၊ စက်တပ်လေထီးတွေနဲ့ ပြည်သူကိုပစ်မှတ်ထားပြီး တိုက်ခိုက်နေတာဖြစ်လို့ ပြည်သူတွေအနေနဲ့ အထူးသတိထားကြပါလို့ ပြောချင်ပါတယ်” လို့ DVB ကို ပြောပါတယ်။

မတ် ၇ ရက်နေ့ နေ့လယ်ပိုင်းကလည်း စစ်ကောင်စီတပ်ဘက်က စက်တပ်လေထီးတွေနဲ့ ကင်းထောက်သွားသေးသလို လေကြောင်းကနေတိုက်ခိုက်သွားသေးပြီး ထိခိုက်ပျက်စီး ဒဏ်ရာရတာတော့ မရှိဘူးလို့ သူက ဆက်ပြောပါတယ်။

စစ်ကောင်စီတပ်ဟာ စစ်ကိုင်းတိုင်းအတွင်းကကျေးရွာတွေကို မြေပြင်စစ်ကြောင်းအပါအဝင် လေကြောင်းနဲ့လက်နက်ကြီးတွေနဲ့အကြောင်းမဲ့ပစ်ခတ်တာတွေ မကြာခဏပြုလုပ်နေတာကြောင့်  ဒေသခံပြည်သူတွေအနေနဲ့ စစ်တပ်ရဲ့မြေပြင်ဝေဟင်အန္တရာယ်တွေကို သတိထားနေထိုင်ကြဖို့ တိုက်တွန်းထားတယ်လို့လည်း စစ်ကိုင်းတိုင်းအခြေစိုက်ပြည်သူ့ကာကွယ်ရေးတပ်ဖွဲ့တွေက တိုက်တွန်းထားတယ်လို့လည်း သိရပါတယ်။