အိန္ဒိယ-မြန်မာနယ်စပ်၊ စစ်ကိုင်းတိုင်း၊ တမူးမြို့အထက်ပိုင်းရှိ အောင်ဇေယျ စစ်ကောင်စီတပ်စခန်းကို ဒေသခံကာကွယ်ရေးပူးပေါင်းတပ်ဘက်က ဒီဇင်ဘာ ၁၀ ရက် မနက်ပိုင်းက သိမ်းပိုက်နိုင်ခဲ့တယ်လို့ တော်လှန်ရေးအင်အားစုတွေဘက်က ပြောပါတယ်။
အဆိုပါစခန်းသိမ်းတိုက်ပွဲမှာ စစ်ကောင်စီဘက်က ထိခိုက်သေဆုံးတာ၊ ဖမ်းဆီးရမိတာနဲ့ လက်နက်ခဲယမ်းတွေလည်း သိမ်းဆည်းရမိထားတယ်လို့ ဒေသခံ တော်လှန်ရေးတပ်ဖွဲ့ Kuki National Army ကပြောပါတယ်။
စစ်ကောင်စီတပ်ကလည်း လေကြောင်းပစ်ကူ အသုံးပြုတိုက်ခိုက်ခဲ့တာမှာ တော်လှန်ရေး ပူးပေါင်းတပ်တွေဘက်ကလည်း တပ်သား ၂ ယောက် ကျဆုံးကာ ၁၂ ယောက် ဒဏ်ရာရရှိတယ်လို့ ဒေသခံကာကွယ်ရေးတပ်ဘက်က ဆိုပါတယ်။
Kuki National Armyတာဝန်ခံက “ကျနော်တို့ပူးပေါင်းတပ်က ၇ ရက်နေ့စပြီး ၃ ရက်ဆက်တိုက် တိုက်ခဲ့ရတယ်။ ၁၀ ရက်နေ့ မနက်ပိုင်း ၈ နာရီခွဲမှာ စခန်းကိုရခဲ့တာ။ စစ်တပ်ဘက်က ၆ ဦး ဖမ်းဆီးရမိထားတယ်”လို့ ပြောပါတယ်။
အောင်ဇေယျတပ်စခန်းမှာ စစ်ကောင်စီတပ်သား အနည်းငယ်သာရှိပြီး စစ်ကောင်စီ လက်အောက်ခံ SNA ရှမ်းနီတပ်ဖွဲ့၊ ကသည်းတပ်ဖွဲ့နဲ့ ပျူစောထီးအဖွဲ့ဝင်တွေစုစုပေါင်း ၂၀၀ ကျော် နေထိုင်တယ်လို့ Kuki National Army က ပြောပါတယ်။
တမူး-အောင်ဇေယျလမ်းမပေါ်က အောင်ဇေယျစစ်ကောင်စီစခန်း သိမ်းပိုက်ခံရမှုနဲ့ပတ်သက်ပြီး စစ်ကောင်စီဘက်ကတော့ တစုံတရာထုတ်ပြန်ထားတာ မရှိသေးပါဘူး။
ဒီဇင်ဘာ ၈ ရက်က မူး-အောင်ဇေယျကားလမ်းမပေါ်က ကူကီးလူမျိုးတွေ အများဆုံးနေထိုင်တဲ့ တုံးကျော်ရွာက ဒေသခံနေအိမ် ၁၇ လုံးကို စစ်ကောင်စီတပ်က မီးရှို့ဖျက်ဆီးခဲ့ပါတယ်။
ဓာတ်ပုံ - Kuki National Army
