ပဲခူးတိုင်း၊ သဲကုန်းမြို့ပေါ်မှာရှိတဲ့ စစ်တပ်အထိုင်ဂိတ်ကို ဇူလိုင် ၂ ရက်မှာ သွားရောက် တိုက်ခိုက်ခဲ့တဲ့ တိုက်ပွဲအတွင်း စစ်တပ်ဘက်က ၅ ယောက် သေဆုံးကာ ဒဏ်ရာရသူတွေလည်း ရှိခဲ့သလို တော်လှန်ရေးတပ်ဖွဲ့ဘက်က တပ်စုမှူး ၁ ယောက်လည်း ကျဆုံးခဲ့တယ်လို့ ပေါင်းတည်မြို့နယ်၊ ပြည်သူ့ကာကွယ်ရေးတပ်ဖွဲ့ (P-PDF ၃၆၀၁ တပ်ရင်း) ဆီကနေ သိရပါတယ်။

စစ်ထောက်လှမ်းရေးနဲ့သတင်းပြန်ကြားတာဝန်ခံ ရဲဘော် Shadow က “အဲဒီနေ့က ညနေ ၄ နာရီ ကျော်လောက်မှာ သဲကုန်းမြို့အထွက် ဆရာအတတ်သင် ၁ လမ်းမှာ အင်အား ၃၀ ဝန်းကျင် လောက်ထိုင်နေတဲ့ဂိတ်ကို သွား​ရောက်တိုက်ခိုက်ခဲ့တာပါ။ သူတို့ဘက်က ၅ ယောက် သေတာနဲ့ ဒဏ်ရာရပြီး လဲကျသွားတာကို မျက်မြင်တွေ့ခဲ့ရပါတယ်” လို့ ပြောပါတယ်။

တိုက်ပွဲဖြစ်ပွားနေချိန် သဲကုန်းမြို့ထဲမှာ အထိုင်ချနေကြတဲ့ စစ်တပ်လက်အောက်ခံတွေ စစ်ကူရောက်လာပြီး လက်နက်ကြီးတွေနဲ့ပါ ပစ်ကူပေးခဲ့တာကြောင့် ဆုတ်ခွာလာရင်း တပ်ခွဲ ၁ က တပ်စုမှူး ရဲဘော်ရန်ကြီးအောင် ကျဆုံးခဲ့ရတာလို့ သူက ဆက်ပြောပါတယ်။

တိုက်ပွဲအတွင်း ၃၆၀၁ တပ်ရင်းက ရဲဘော် ၁ ယောက်လည်း မစိုးရိမ်ရတဲ့ ဒဏ်ရာရရှိခဲ့သေးတယ်လို့ ဆိုပါတယ်။

PPDF ၃၆၀၁ တပ်ရင်း ရဲ့ တာဝန်ရှိသူက  “ဟိုဘက်က အင်အား ၄၀ ကျော်လောက် ထပ်ဖြည့်ပြီး လက်နက်ကြီး၊ လက်နက်ငယ်တွေနဲ့ ပစ်ကူပေးတော့ အင်အားမမျှတော့တာကြောင့်မို့ တပ်စုမှူး ရဲဘော်ရန်ကြီးအောင်က ရှေ့ဆုံးကနေ ခံ​ပစ်ပေးပြီးတော့ တခြားရဲဘော်တွေကို ပြန်ဆုတ်ခိုင်းတဲ့အချိန် ရန်သူ့ ကျည်မှန်ပြီး ကျဆုံးခဲ့ရတာပါ” လို့ DVB ကို ပြောပါတယ်။ 

အဲဒီတိုက်ခိုက်မှုကို ပြည်သူ့ကာကွယ်ရေးတပ်မတော် ဗျူဟာ ၂  ကွပ်ကဲမှုအောက်မှာ ရှိကြတဲ့ ပြည်ခရိုင်တပ်ရင်း ၁၊ တပ်ရင်းရုံး တပ်ခွဲ ၁၊ တပ်ခွဲ ၄၊ တပ်ခွဲ ၅၊ ပြည်ခရိုင် ပကဖ အထူးတိုက်ခိုက်ရေးအဖွဲ့နဲ့ ပြည်ခရိုင်တပ်ရင်း ၂၊ တပ်ခွဲ ၄ တို့ ပူးပေါင်းတိုက်ခိုက်ခဲ့ကြတာလို့ ဆိုပါတယ်။

တိုက်ခိုက်မှုဖြစ်ပွားပြီးနောက်ပိုင်း ဇူလိုင် ၆ ရက် ညနေပိုင်းအထိ အဆိုပါစစ်တပ် အထိုင်ဂိတ်စခန်းမှာ လူအင်အားနဲ့ လက်နက်အင်အားတွေ အလုံးအရင်း ဖြည့်တင်းထားသလို မြို့အဝင်၊ အထွက် ပြည်သူတွေကိုလည်း အတင်းအကျပ် တားဆီးစစ်ဆေးနေတယ်လို့လည်း ဒေသခံတွေဆီကနေ သိရပါတယ်။