ရန်ကုန်၊ လှည်းကူးမြို့နယ်အတွင်းက ရပ်ကွက်နဲ့ ရွာတွေမှာ ငမိုးရိပ်တမံ ရေပိုလွှဲက ထုတ်လွှတ်တဲ့ရေ ၆ ပေ ၁၀ လက်မအထိ ဖြစ်လာတာကြောင့် အောက်တိုဘာ ၉ ရက်မှာ ရေကြီးမှုတွေ ထပ်တိုးလာတယ်လို့ မြို့ခံတွေက ပြောပါတယ်။

ငမိုးရိပ်တမံ ရေပြည့်အမှတ်ဟာ ၁၀၇ ပေအထိဖြစ်ပြီး အောက်တိုဘာ ၉ ရက် မနက်ပိုင်းက ငမိုးရိပ်ရေလှောင်တမံအဖွဲ့ရဲ့ တိုင်းထွာချက်အရ တမံရေအမှတ်ဟာ ၁၁၃ ဒသမ ၁၀ ပေအထိ ရောက်ရှိလာတာကြောင့် ရေပိုလွှဲကနေ ၆ ပေ ၁၀ လက်မအထိ ရေကျော်ခဲ့တာဖြစ်ပြီး အောက်တိုဘာ ၈ ရက်က တမံရေအမှတ်ဟာ ၁၁၁ ပေရှိတာကြောင့် တမံရေပိုလွှဲမှ ရေ ၂ ပေ ၁၀ လက်မအထိ ထပ်တက်လာတာ ဖြစ်ပါတယ်။

အောက်တိုဘာ ၈ ရက် မနက်ပိုင်းမှာ လှည်းကူးမြို့နယ်အတွင်းက မြို့ပေါ်ရပ်ကွက်တွေဖြစ်တဲ့ ရိပ်သာ၊ အောင်မင်္ဂလာ၊ မြို့မ၊ ပြည်တော်သာ၊ ဈေးကြီးရပ်ကွက်တွေနဲ့ ဖောင်ကြီးဘက်ရှိ ရွာတွေမှာ ၃ ပေခန့်အထိ ရေတက်လာခဲ့ရာမှ ရေဘေးကယ်ဆယ်ရေးစခန်း ၂ ခုရှိခဲ့ပြီး အောက်တိုဘာ ၉ ရက်မှာ ရေအနက် ၃ ပေကျော်လာခဲ့တာကြောင့် ရေဘေးကယ်ဆယ်ရေးစခန်း ၄ ခုအထိ တိုးလာခဲ့ပါတယ်။

မြို့ခံကယ်ဆယ်ရေးအသင်းဝင်တဦးက “ဒီနေ့ ရေကြီးတာက ရေက ပိုတက်လာတယ်။ မိုးထပ်ရွာတယ်၊ ဆည်ကလည်း လွှတ်တယ်၊ အောက်ရေကလည်း ထောက်တယ်။ ဒီနေ့က တမြို့လုံးပါပဲ။ ‌စင်တာတွေမှာ ရေဘေးရှောင်ဦးရေက ၂၀၀ ကျော်သွားပြီ။ အိမ်ထဲပိတ်နေတဲ့ မိသားစု‌ ၁ စု ဒီနေ့ လွတ်တဲ့နေရာကို ကယ်ထုတ်ပေးခဲ့ပါတယ်။ စင်တာက လောလောဆယ် ၄ နေရာရှိပါတယ်” လို့ ပြောပါတယ်။

ရေဘေး စိုးရိမ်ရတဲ့ အိမ်ထောင်စုတွေကို လှည်းကူးမြို့နယ် ငါးထပ်ကြီးဘုရားဝင်း၊ သီတာအေး ဘောလုံးကွင်း အားကစားရုံနဲ့ ခရစ်ယာန်အဆောက်အဦ၊ အောင်မင်္ဂလာဓမ္မာရုံ၊ အောင်စကြာဘုန်းကြီးကျောင်းတွေမှာ ရေဘေးရှောင်စင်တာအဖြစ် မီးသတ်နဲ့ ကြက်ခြေနီအဖွဲ့က နေရာချပေးထားပြီး လူဦးရေ ၂၀၀ ကျော်အတွက် ရေသန့်၊ ဆေးဝါး၊ အစားအသောက်နဲ့ ထောက်ပံ့ရေးပစ္စည်းတွေ လိုအပ်နေတယ်လို့ သိရပါတယ်။

လှည်းကူးမြို့နယ်ထဲက မဲဇလီကုန်းကျေးရွာ၊ ရတနာအောင်မြေဘုန်းတော်ကြီးကျောင်းမှာ အောက်တိုဘာ ၉ ရက်က ရေဝင်ရောက်မှုကြောင့် သာသနာ့ဝန်ထမ်းတွေကို မီးသတ်နဲ့ သက်ဆိုင်ရာအဖွဲ့တွေက အင်းစိန်မြို့နယ်၊ အောင်ဆန်းရပ်ကွက်၊ ကံဦးကျောင်းတိုက်ကို ရွှေ့ပြောင်းပေးခဲ့ရပါတယ်။

ပြီးခဲ့တဲ့ စက်တင်ဘာ ၁၇ ရက်ကလည်း လှည်းကူးမြို့နယ်မှာ ရေကြီးမှုတွေ ဖြစ်ပေါ်ခဲ့ပြီး ရေဘေးသင့်အိမ်ထောင်စုတွေကို မီးသတ်တပ်ဖွဲ့၊ ကြက်ခြေနီနဲ့ သက်ဆိုင်ရာအဖွဲ့တွေက ရေဘေးလွတ်ကင်းရာကို ရွှေ့ပြောင်းပေးခဲ့ရပါတယ်။