ချင်းပြည်နယ်၊ ပလက်ဝမြို့နယ် ဆမီးမြို့ကို ဩဂုတ် ၁၂ ရက် ညမှာ စစ်အာဏာရှင်တပ်က လေကြောင်းဗုံးကြဲတိုက်ခိုက်ခဲ့တာကြောင့် အမျိုးသမီးငယ်တယောက် သေဆုံးခဲ့ပြီး ကလေးငယ် ၅ ယောက် အပါအဝင် အရပ်သား ၈ ယောက် ထိခိုက်ဒဏ်ရာရရှိခဲ့တယ်လို့ ဒေသခံတွေဆီက သိရပါတယ်။

ဆမီးမြို့ အမှတ် ၂ ရပ်ကွက်ကို ဩဂုတ် ၁၂ ရက် ည ၁၁ နာရီ ၄၀ မိနစ်ဝန်းကျင်မှာ ဂျက်ဖိုက်တာ ၂ စီးနဲ့ ဗုံး ၄ ကြိမ် လာရောက်ကြဲချတိုက်ခိုက်ခဲ့တာလို့ ဆမီးဒေသခံ အမျိုးသားတယောက်က ပြောပါတယ်။

“မနေ့က လူတွေ အိပ်နေချိန်မှာ ဆမီးမြို့ အမှတ် ၂ ရပ်ကွက်ကို ဂျက်ဖိုက်တာနဲ့ ဗုံး ၄ ကြိမ် လာကြဲသွားတာရှိတယ်။ ၁၆ နှစ်အရွယ် မိန်းကလေးငယ်‌တဦး သေတယ်။ နောက်ထပ်လည်း ကလေး ၅ ဦးနဲ့ လူကြီးပိုင်း ၃ ဦး ထိခိုက်ဒဏ်ရာရရှိခဲ့တာရှိတယ်။ လူတွေ အိပ်နေချိန်ကို အငိုက်ဖမ်းပြီးတော့ အရပ်ဘက်ပစ်မှတ်တွေကို တိုက်ခိုက်သွားတာ။ ဒဲ့ပြောရရင် စစ်သားမဆန်ဘူးပေါ့ဗျာ၊ သူရဲဘောကြောင်ကြောင် ပြည်သူတွေကို ပစ်မှတ်ထား သတ်ဖြတ်နေတာ။” 

ထိခိုက်ဒဏ်ရာရရှိသွားသူတွေထဲမှာလည်း အသက် ၈ နှစ်နဲ့ ၁၈ နှစ်ကြား ကလေးငယ် ၅ ယောက်အထိ ပါဝင်ကြပြီး လက်ရှိမှာ ထိခိုက်ဒဏ်ရာရရှိသူတွေ အရေးပေါ်ဆေးကုမှု ခံယူနေကြရတယ်လို့ ဒေသခံတွေက ပြောပါတယ်။

လက်ရှိမှာ စစ်အာဏာရှင်တပ်ရဲ့ လေကြောင်းတိုက်ခိုက်မှုကြောင့် ဆမီးမြို့က သေဆုံးသွားသူတွေနဲ့ ထိခိုက်ဒဏ်ရာရရှိသွားသူတွေရဲ့ အသေးစိတ် အချက်အလက်တွေကို DVB က စုံးစမ်းမေးမြန်းနေဆဲ ဖြစ်ပါတယ်။

ဆမီးမြို့ကို ၂၀၂၄ ခုနှစ်မှာ အာရက္ခတပ်တော်က သိမ်းပိုက်ထိန်းချုပ်ထားတာဖြစ်ပြီး စစ်အာဏာရှင်တပ်က ၂၀၂၆ ခုနှစ် အစောပိုင်းကလည်း လေကြောင်းတိုက်ခိုက်မှု ပြုလုပ်ခဲ့တာကြောင့် အရပ်သားအချို့ ထိခိုက်သေဆုံးမှုတွေလည်း ရှိခဲ့ပါတယ်။

ဩဂုတ် ၁၁ ရက် မနက်ကလည်း ပလက်ဝမြို့ကို စစ်အာဏာရှင်တပ်က လေကြောင်းကနေ ဗုံးကြဲတိုက်ခိုက်ခဲ့တာကြောင့် မိန်းကလေးငယ် ၂ ယောက် ဒဏ်ရာရရှိခဲ့ပါတယ်။

စစ်အာဏာရှင်တပ်ဟာ အာရက္ခတပ်တော် ထိန်းချုပ်ထားတဲ့ မြို့နယ်တွေကို နေ့တိုင်းဆိုသလို လေကြောင်းကနေ ဗုံးကြဲတိုက်ခိုက်နေတာကြောင့် ဩဂုတ်လ ပထမ ၁၁ ရက်အတွင်းမှာတင် အရပ်သား သေဆုံးသူ ၁၉ ယောက်နဲ့ ထိခိုက်ဒဏ်ရာရရှိသူ ၂၆ ယောက်အထိ ရှိလာနေတယ်လို့ HDCO က ပြောထားပါတယ်။

ဩဂုတ်လ ပထမ လဝက်အတွင်းမှာတင် စစ်အာဏာရှင်တပ်က သံတွဲ၊ ငပလီ၊ အမ်း၊ မြောက်ဦး၊ ပလက်ဝနဲ့ ဆမီးမြို့ စတဲ့ မြို့ ၆ မြို့ကို လေကြောင်းကနေ လေယာဉ်အုပ်စုလိုက်သုံးပြီး အပြင်းအထန် တိုက်ခိုက်ခဲ့တာလည်း ဖြစ်ပါတယ်။