နီပေါနဲ့ တရုတ်ရဲ့ တိဘက် နယ်စပ် ဟိမဝန္တာတောင်တန်းမှာ ဩဂုတ် ၂၆ ရက်က အပြင်းအထန် ရေကြီးမြေပြိုမှုကြီး ဖြစ်ပွားခဲ့ပြီး နီပေါနဲ့ တရုတ် နှစ်ဖက်စလုံးမှာ သေဆုံးသူ အနည်းဆုံး  ၁၆၅ ယောက်ရှိ လာပြီး ၁,၀၀၀ ကျော် ပျောက်ဆုံးနေပါတယ်။

နီပေါနိုင်ငံမှာ ပျောက်ဆုံးနေသူ ၈၂၆ ယောက်ရှိပြီး ဒီအထဲမှာ နိုင်ငံခြားသား ၆၀၀ လောက် ပါဝင်တာမှာ အိန္ဒိယ ၁၇၇ ယောက်၊ အမေရိကန်က ၆၃ ယောက်၊ ဩစတြေးလျ ၃၄ ယောက်၊ ဗြိတိသျှ ၃၃ ယောက်နဲ့ ကနေဒါ ၂၅ ယောက်တို့ ဖြစ်တယ်လို့ နီပေါရဲတပ်ဖွဲ့နဲ့ ခရီးသွားအရာရှိတွေက ပြောပါတယ်။

တိဘက်နယ်စပ်ဒေသဘက်မှာတော့ နိုင်ငံခြားသား ၂၆၀ အပါအဝင် အနည်းဆုံး ၅၅၈ ယောက် ပျောက်ဆုံးနေတယ်လို့  တရုတ်နိုင်ငံပိုင် မီဒီယာတွေက ဖော်ပြပါတယ်။

ရှာဖွေကယ်ဆယ်ရေးလုပ်ငန်းတွေ ဆက်လုပ်နေပြီး သေဆုံး ပျောက်ဆုံးသူ အရေအတွက် အချိန်နဲ့အမျှ ထပ်ပြီး မြင့်တက်လာဖွယ် ရှိနေပါတယ်။

နီပေါ-တိဘက် နယ်စပ် ဟိမဝန္တာဒေသမှာ အခုလို ကပ်ဘေးမျိုး ဖြစ်ပွားရတာဟာ တခုတည်းသော အကြောင်းရင်းကြောင့် မဟုတ်ဘဲ သဘာဝပတ်ဝန်းကျင်ဆိုင်ရာ အချက်အလက်များစွာ ပေါင်းစပ်သွားလို့ ဖြစ်တယ်လို့ ယူဆထားပါတယ်။

နီပေါတာဝန်ရှိသူတွေရဲ့ ပဏာမ ထုတ်ပြန်ချက်အရ ငလျင်လှုပ်လို့ ရေခဲမြစ် အောက်ခြေပိုင်း ပြိုကျတာလို့ ယူဆရတဲ့ ဧရာမ ရွှံ့နွံနဲ့ ကျောက်တုံးကြီးတွေ မြစ်ထဲ ပြိုကျခဲ့ရာကနေ ခုလိုဖြစ်တာလို့ ဆိုပါတယ်။

ဒီကပ်ဘေးကြောင့် အိမ်တွေ၊ လမ်းတွေနဲ့ ရေအားလျှပ်စစ် အခြေခံအဆောက်အအုံတွေ ရေထဲပါသွားခဲ့ပြီး နီပေါနိုင်ငံ ရာဆူဝါ ခရိုင်ထဲက ရှာဘရူဘေစီနဲ့ တီးမူးရ်ဒေသတွေ အပြင်းအထန် ထိခိုက်ခဲ့ပါတယ်။

ဂြိုဟ်တုဓာတ်ပုံနဲ့ မက်ထာဒေတာတွေအရ အတည်ပြုထားတဲ့ ဗီဒီယိုတခုမှာ ဥတာဂါယာ စည်ပင်နယ်နိမိတ်ထဲက ဘေထရာဝတီဈေးအနီး တောင်ပေါ်ကနေ ရွှံ့နွံနဲ့ အမှိုက်သရိုက်တွေ ပါတဲ့ ရေစီးကြောင်းကြီး ထိုးဆင်းလာပြီး လူနေအိမ်တွေကို ဖုံးလွှမ်းသွားတာ တွေ့ရသလို နူဝါကုတ် ခရိုင် တရီးရှူးလီ မြစ်ကမ်းဘေးမှာလည်း အဆောက်အအုံတွေ ပျက်စီးပြီး ရွှံ့နွံတွေ ဖုံးလွှမ်းနေတာကို ဒရုန်းရိုက်ချက်တွေမှာ မြင်တွေ့ရပါတယ်။

ဒါကြောင့် တာဝန်ရှိသူတွေက ဘိုတေကိုရှီမြစ်အနီး နေထိုင်သူတွေကို ဘေးလွတ်ရာ ကုန်းမြင့်ပိုင်း ရွှေ့ပြောင်းကြဖို့ သတိပေးထားပါတယ်။

တဆက်တည်းမှာပဲ တရုတ်အစိုးရပိုင် CCTV သတင်းအရ တိဘက် အခြမ်း ကျီးရုံးခရိုင် မြေပြိုမှုမှာ အနည်းဆုံး ၃ ယောက် သေဆုံးပြီး ၂၆၅ ယောက် ပျောက်ဆုံးနေတယ်လို့ ပဏာမ စာရင်းထုတ်ပြန်ထားရာ ဒါဟာ တရုတ်ဘက်ခြမ်းအတွက် ပထမဆုံး ထုတ်ပြန်ချက်လည်း ဖြစ်ပါတယ်။

တိဘက် ဘက်ခြမ်းမှာလည်း ကျီးရုံးနယ်စပ်ဂိတ် မြေပြိုမှုကြောင့် ထိခိုက်ဒဏ်ရာရသူတွေ ရှိနိုင်ကြောင်း သတိပေးထားပြီး CCTV ရိုက်ကူးချက်တွေမှာ ရွှံ့နွံဖုံးနေတဲ့ တောင်ကြားတွေနဲ့ ပျက်စီးနေတဲ့ လမ်းတွေကို တွေ့ရကာ တရုတ် စစ်ဘက်၊ ရဲတပ်ဖွဲ့နဲ့ ကယ်ဆယ်ရေးအဖွဲ့တွေဟာ ရေစုပ်စက်တွေ၊ ယန္တရားကြီးတွေနဲ့ ရှင်းလင်း ဆောင်ရွက်နေကြပါတယ်။