စစ်ကောင်စီက KIA နဲ့ KPDF တွေအလင်းဝင်တယ်ဆိုတဲ့ သတင်းတွေ ထုတ်ပြန်တာဟာ လုပ်ဇာတ်တွေ ဖြစ်တယ်လို့ ကချင်လွတ်လပ်ရေးတပ်မတော် (KIA) က တုံ့ပြန်ပါတယ်။
ဖားကန့်မှာ တိုက်ပွဲတွေဖြစ်ပွားနေတဲ့ ကာလအတွင်းမှာပဲ စစ်ကောင်စီဘက်ကနေ KIA နဲ့ KPDF အဖွဲ့ဝင်တွေ အလင်းဝင်လာတယ်ဆိုပြီး ဧပြီ ၅ ရက်နေ့ထုတ် စစ်တပ်ပိုင်သတင်းစာတွေမှာ ဖော်ပြလာပါတယ်။
ဒီသတင်းတွေနဲ့ပတ်သက်ပြီး ဗိုလ်မှူးကြီးနော်ဘူက “KPDF တို့၊ ကျနော်တို့ ကချင်လွတ်လပ်ရေးတပ်မတော် တပ်သားတွေအားလုံးလည်း အလင်းဝင်တာမရှိပါဘူး။ သူတို့ရဲ့လူတွေကို သူတို့အဲလိုလုပ်တာမျိုးပဲ ပိုပြီးမှဖြစ်နိုင်ပါတယ်။ ဒါကတမင်တကာ လုပ်ဇာတ်ပဲ ဖြစ်မှာပါ” လို့ ပြောပါတယ်။
ကချင်ပြည်နယ်၊ ဖားကန့်ဒေသမှာ စစ်ကောင်စီက နယ်မြေစိုးမိုးရေးအတွက် စစ်ကြောင်းထိုး နေတာကြောင့် တိုက်ပွဲတွေဆက်ဖြစ်နိုင်ပြီး လမ်းပိုင်းတချို့ကိုလည်း ပိတ်ပင်ထားပါတယ်။
ဖားကန့်မြို့နယ်အတွင်းမှာ ဧပြီ ၆ ရက်၊ နေ့လယ်ပိုင်းကစပြီး တိုက်ပွဲသံတွေ ပြန်ကြားနေရသလို၊ ဖားကန့်နဲ့ လုံးခင်းကို ဆက်သွယ်ထားတဲ့ လမ်းပိုင်းအပါအဝင် လမ်းကြောင်းတချို့ကို စစ်တပ်က ပိတ်ပင်ထားပါတယ်။
လမ်းပိုင်းပိတ်ဆို့မှုနဲ့ ဒေသတွင်းစိုးရိမ်ရတဲ့အခြေအနေတွေကို ဖားကန့်ဒေသခံ အမျိုးသားတယောက်က “ဖားကန့်ဘက်ပွဲကနေပြီထင်တယ်။ ဒီနေ့ခင်း လုံးခင်းကနေ အသံကြားရတယ်။ နောက်ပြီး လုံးခင်း-ဖားကန့်လမ်းကို ပိတ်ထားတယ်ဆိုတော့ အခြေအနေ ခန့်မှန်းရခက်နေတယ်။ လုံးခင်းရပ်ကွက် ၄ လမ်းဆုံကနေ ပိတ်ထားတာ။ မနေ့က ဖားကန့်-မြစ်ကြီးနားလမ်းပိုင်းတနေရာကို ပိတ်ထားပြီး ဒီနေ့မနက်တော့ပြန်ဖွင့်တယ်။ နေ့လယ်ကျတော့ ပြန်ပိတ်တယ်လို့ ပြောနေကြတယ်။ အဲဒီမှာ စစ်ကြောင်းတွေ ကြားညှပ်လိုက်လာတယ်လို့လည်း သတင်းကြားရတယ်။ ဟုတ်၊ မဟုတ်တော့ သေချာမသိရသေးဘူး” လို့ ပြောပါတယ်။
အခုလို လမ်းပိုင်းတွေပိတ်ပြီး စစ်ကြောင်းထိုးနေတာဟာ ဧပြီ ၂ ရက်နေ့က လက်လွှတ်ခဲ့ရတဲ့ ကာကင်းတွေကို ပြန်လိုချင်တာကြောင့်ဖြစ်ပြီး ဆိုင်းတောင်ဘက်ကို နယ်မြေစိုးမိုးလိုတာ ကြောင့်လည်း ပါနိုင်တယ်လို့ တခြားဒေသခံကလည်း ပြောပါတယ်။
ကချင်လွတ်လပ်ရေးတပ်မတော် (KIA) ဘက်ကတော့ ဧပြီ ၆ ရက်နေ့၊ မနက်ပိုင်းထိ မြေပြင်တိုက်ပွဲသတင်းမကြားရပေမဲ့ လက်နက်ကြီး၊ ဒရုန်းပစ်ခတ်မှုတွေ ဆက်ရှိနိုင်သလို စစ်တပ်က ထိုးစစ်ဆင်လာရင် တိုက်ပွဲဆက်ဖြစ်နိုင်တဲ့အကြောင်း ပြောပါတယ်။
KIO/KIA သတင်းပြန်ကြားရေးတာဝန်ခံ ဗိုလ်မှူးကြီးနော်ဘူ “တိုက်ပွဲကတော့ ဆက်ဖြစ်ဖို့ရှိပါတယ်။ ကျနော်ပြောတာ မရှီကထောင်တို့၊ ဆိုင်းတောင်တို့ဘက်ကို စစ်ကောင်မရှင်က အားလုံးနေရာယူချင်လို့ ထိုးစစ်ဆင်တဲ့ စစ်ကြောင်းတွေပေါ့။ သူတို့ရဲ့ဗျူဟာတွေကို ဆက်ပြီးမှသုံးမယ်လို့ ကျနော်သုံးသပ်ပါတယ်။ အဓိကတော့ သူတို့စစ်ကြောင်းထိုးလို့ဖြစ်တဲ့ တိုက်ပွဲတွေပါ” လို့ ပြောပါတယ်။
လက်ရှိမှာတော့ ဖားကန့်ဒေသအတွင်း စစ်ရေးတင်းမာမှုတွေကြောင့် လမ်းပန်းဆက်သွယ်ရေး ခက်ခဲနေသလို၊ စစ်ကောင်စီဘက်က စစ်ကြောင်းထိုးနေတာကြောင့် ဧပြီ ၅ ရက် ညပိုင်းမှာပဲ မရှီကထောင်နဲ့ ယူမာဝန်းကျင်မှာ ထိတွေ့မှုတွေ ဖြစ်ခဲ့ပါသေးတယ်။
အလားတူ စစ်ရေးတင်းမာမှုတွေကြောင့် တိုက်ပွဲဧရိယာ ပိုကျယ်လာမှာကို ဒေသခံတွေက စိုးရိမ်နေကြပါတယ်။
