မွန်ပြည်နယ် မုဒုံမြို့ရှိ မီတာ ၄၀၀ အားကစားကွင်းမှာ ကျင်းပ​နေတဲ့ မုဒုံမြို့နယ် အမျိုးသား အလွတ်တန်းဘောလုံးပြိုင်ပွဲမှာ ကစားသမားတယောက် မိုးကြိုးပစ်ခံရပြီး ​သေဆုံးသွားတယ်လို့ အသင်းဆီက သိရပါတယ်။

စက်တင်ဘာ ၂၂ ရက် မနေ့ည​နေပိုင်းမှာ ဆီမီးဖိုင်နယ်ပွဲစဥ်အ​ဖြစ် Lion City (မလမ) နဲ့ တောင်ပေါ်သား (မုဒုံ) အသင်းတို့ ယှဥ်ပြိုင်ကစားချိန် ပွဲချိန်မိနစ် ၉၀ ပြည့်ပြီး အချိန်ပို ၆ မိနစ်နဲ့ စက္ကန့်  ၃၀ အချိန်မှာ ကွင်းအတွင်း မိုးရွာသွန်းပြီး မိုးကြိုးပစ်ခဲ့တာပါ။

​​ဒေသခံတ​ယောက်က “မိုးကြိုးပစ်​တော့ အားလုံး​မှောက်​နေကြတာ​ပေါ့။ ပြန်ထလာ​တော့ Lion City က ကစားသမားတ​ယောက် ပြန်ထမလာ​တော့ ကြက်​ခြေနီအသင်းက သွားကူ​သေးတယ်။ ဆုံးသွားတယ်” လို့ ပြောပါတယ်။

​သေဆုံးသူဟာ Lion City (မော်လမြိုင်) အသင်းက ရှေတန်းကစားသမား ကိုသန်းတိုးအောင် (ခ) Sa Sa ဖြစ်ပြီး ကြက်​ခြေနီအသင်းက နှလုံးနှိုးဆွခဲ့​လို့ အသိပြန်ဝင်လာပေမဲ့ ပြန်လည်ငြိမ်ကျသွားလို့ မြို့နယ်ဆေးရုံကို အရေးပေါ်  ပို့ဆောင်ခဲ့ကြရပါတယ်။

မြို့နယ်ဆေးရုံကို ရောက်ပြီး အောက်ဆီဂျင်ပေး နှလုံးနှိုးဆွခဲ့​ပေမဲ့ သတိပြန်လည်လာခြင်းမရှိဘဲ အသက်ဆုံးရှုံးသွားခဲ့တာပါ။

သေဆုံးသူဟာ အသက် ၂၉ နှစ်အရွယ်ဖြစ်ပြီး ​မော်လမြိုင်မြို့ စံပြအေးရပ်ကွက်မှာ နေထိုင်သူ ဖြစ်ပါတယ်။