နီပေါနဲ့ တိဘက်နယ်စပ်မှာ အခုသီတင်းပတ်အတွင်း ရေကြီးရေလျှံမှုကြောင့် နီပေါဘက်မှာ သေဆုံးသူဦးရေ အနည်းဆုံး ၇၃၄ ယောက်ရှိလာပြီး  ၂,၄၀၀ ကျော် ပျောက်ဆုံးနေဆဲပဲလို့  နီပေါရဲတပ်ဖွဲ့နဲ့ သဘာဝဘေးစီမံခန့်ခွဲရေးအဖွဲ့က ပြောပါတယ်။ 

သဘာဝဘေးသင့်တဲ့ လူပေါင်း ၈,၁၈၆ ယောက်ကို ကယ်ဆယ်နိုင်ခဲ့ပြီး လုံခြုံရေးတပ်ဖွဲ့က ကူညီကယ်ဆယ်ရေးအတွက် အင်အား ၂၀,၀၀၀ လောက်ချထားတယ်လို့လည်း ပြောပါတယ်။

တရုတ်နိုင်ငံ တိဘက်ဒေသဘက်မှာတော့ သေဆုံးသူ ၁၆ ယောက်ရှိပြီး ၅၄၆ ယောက် ပျောက်ဆုံးနေဆဲလို့ တရုတ်နိုင်ငံပိုင် မီဒီယာက ဖော်ပြပါတယ်။

လုံခြုံရေးဝန်ထမ်းတွေနဲ့ ကယ်ဆယ်ရေးလုပ်သား ထောင်ပေါင်းများစွာဟာလည်း တရုတ်နယ်စပ်နားက ရေဘေးသင့်နေရာတွေကို ဆက်ပြီး ရှာနေကြပါတယ်။ 

သြဂုတ် ၂၆ ရက်မှာ ရေခဲမြစ်ပြိုကျလို့ ကျောက်တုံးတွေ၊ ရေခဲတွေ၊ ရွှံ့တွေနဲ့ အပျက်အစီးတွေက တောင်ပေါ်က မြစ်ချောင်းစနစ်တွေကို ဖြတ်သန်းစီးဆင်းခဲ့တာပါ။

နီပေါနိုင်ငံထဲမှာ ပျောက်ဆုံးနေသူအရေအတွက်က နိုင်ငံခြားသား ၅၁၇ ယောက်အပါအဝင် ၂၄၂၆ ယောက်ရှိတယ်လို့ သဘာဝဘေးအန္တရာယ် အာဏာပိုင်တွေက ပြောပါတယ်။

ဒီစာရင်းထဲမှာ မြစ်ရေကြီးမှုကြောင့် ထိခိုက်ခဲ့ရတဲ့ မြစ်ကြောင်းတလျှောက်က ရေအားလျှပ်စစ်စီမံကိန်းတွေမှာ လုပ်နေတဲ့ အလုပ်သမား ၉၃၃ ယောက်လည်း ပါဝင်ခဲ့ပါတယ်။

တိဘက်ဒေသမှာ ပျောက်ဆုံးနေသူ အများစုက အိန္ဒိယနိုင်ငံကလာတဲ့ ဟိန္ဒူဘုရားဖူးတွေပါ။ အိန္ဒိယအရာရှိတွေက မြစ်အောက်ပိုင်းကို မျောပါသွားတဲ့ သေဆုံးသူတွေရဲ့ ရုပ်အလောင်းတွေကို ပြန်ရှာတွေ့ခဲ့ပါတယ်။

ရုပ်အလောင်း ၃ လောင်းကို ပြန်ရှာတွေ့တယ်လို့ ဒေသခံ ကုရှီနာဂါခရိုင်တရားသူကြီး ဗေ့ဗ်ဗ် မီရှရာက ပြောပါတယ်။

ရာသီဥတုဆိုးနေလို့ နောက်ထပ် ပြိုကျနိုင်ခြေရှိခဲ့တဲ့အတွက် ကယ်ဆယ်ရေးလုပ်ငန်းတွေကို ခဏရပ်ဆိုင်းထားခဲ့ရပြီး သြဂုတ် ၂၉ ရက်မှာ ရှာဖွေရေးလုပ်ငန်းတွေကို ပြန်စခဲ့ပါတယ်။ 

စနေနေ့အထိ နီပေါနိုင်ငံသား ၄၁၈ ယောက်၊ တရုတ် ၄၂ ယောက်နဲ့ အိန္ဒိယနိုင်ငံသား ၈ ယောက် အပါအဝင် လူ ၄၆၈ ယောက်ကို နီပေါစစ်တပ်က ကယ်တင်နိုင်ခဲ့တယ်လို့ တပ်မတော်အရာရှိက ပြောပါတယ်။

ကယ်ဆယ်ရေးသမားတွေက အကူအညီပေးရေးနဲ့ အသက်ရှင်ကျန်ရစ်သူတွေကိုရှာဖို့ ကယ်ဆယ်ရေးလုပ်ငန်းတွေကို ရဟတ်ယာဉ်နဲ့ ၂၇၄ ခေါက် ဆောင်ရွက်ခဲ့တယ်လို့ သူက ထပ်ပြောပါတယ်။

နီပေါအစိုးရက အထူးကျွမ်းကျင်သူတွေရဲ့ အကူအညီကို တောင်းဆိုခဲ့ပြီး အစိုးရရဲ့ ကနဦးခန့်မှန်းချက်အရ ပြန်လည်တည်ဆောက်ရေးက ဒေါ်လာ ၄ ဘီလီယံကနေ ၅ ဘီလီယံအထိ ကုန်ကျမယ်လို့ ဘဏ္ဍာရေးဝန်ကြီးက မီဒီယာတွေကို ပြောပါတယ်။ 

အိန္ဒိယအစိုးရက ကယ်ဆယ်ရေးပစ္စည်း တန်ချိန် ၆၀ သယ်လာတဲ့ လေယာဉ်သုံးစင်း စေလွှတ်ခဲ့ပြီး တရုတ်အစိုးရက ကယ်ဆယ်ရေးလုပ်ငန်းတွေကိုပံ့ပိုးဖို့ ဥမင်လိုဏ်ခေါင်းကျွမ်းကျင်သူတွေကို စေလွှတ်ခဲ့ပါတယ်။

ကမ္ဘာ့ကျန်းမာရေးအဖွဲ့ (WHO) နဲ့ မိတ်ဖက်တွေက နီပေါစစ်တပ်နဲ့အတူ ရေဘေးသင့် အလယ်ပိုင်းဒေသတွေဆီ မရှိမဖြစ်လိုအပ်တဲ့ ထောက်ပံ့ရေးပစ္စည်းတွေကို အမြန်ပို့ဖို့ ဆောင်ရွက်ခဲ့ကြပါတယ်။ 

Source: Reuters/BBC