ကုလသမဂ္ဂဆိုင်ရာ မြန်မာ အမြဲတမ်း သံအမတ်ကြီး ဦးကျော်မိုးထွန်း ရာထူးတာဝန် ဆက်လက်ထမ်းဆောင်ခွင့်ရရေး ကမ်ပိန်းကာလအဖြစ် စက်တင်ဘာ ၁ လလုံးကို သတ်မှတ်ထားပြီး နိုင်ငံတကာရောက်မြန်မာတွေက သက်ဆိုင်ရာနိုင်ငံတွေကနေ ကမ်ပိန်းဖော်ဆောင်ဖို့ ပြင်ဆင်ထားတယ်လို့ အစီအစဉ်ဦးဆောင်သူတွေက ပြောပါတယ်။ 

ကမ်ပိန်းရဲ့အဓိက အစီအစဉ်အဖြစ် စက်တင်ဘာ ၁၉ ရက်နေ့မှာ သံအမတ်ကြီး ဦးကျော်မိုးထွန်းအတွက် ချီတက်ဆန္ဒဖော်ထုတ်ပွဲကို အမေရိကန်ပြည်ထောင်စု၊ နယူးယောက်မြို့၊ ကုလသမဂ္ဂရုံးချုပ်ရှေ့ ကျင်းပသွားမှာဖြစ်ပြီး အမေရိကန်နိုင်ငံတဝန်း မြန်မာတွေ ပူးပေါင်းပါဝင်ကြဖို့ အစီအစဉ်ဦးဆောင်တဲ့ NYCBC က ထုတ်ပြန်ထားပါတယ်။ 

အခုနှစ်ဟာ ဦးကျော်မိုးထွန်းအတွက် စိန်ခေါ်မှုတွေရှိနေတဲ့နှစ် ဖြစ်ပေမဲ့ နိုင်ငံတော်အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်ရဲ့ သားငယ် ကိုထိန်လင်းက ကမ်ပိန်းတွေမှာ ပူးပေါင်းဆောင်ရွက်သွားမှာဖြစ်တဲ့အတွက် လူထုထောက်ခံမှု ပိုရလာဖို့ရှိတယ်လို့ ကမ်ပိန်းဦးဆောင်သူတယောက်ဖြစ်တဲ့ မြန်မာ့ဒီမိုကရေစီအရေးမဟာမိတ်များအဖွဲ့မှ မခင်သီရိနန္ဒာစိုးက ပြောပါတယ်။

“လုပ်ငန်းပိုင်းဆိုင်ရာတွေက တော်တော်များများ ပြီးသင့်သလောက်ပြီးနေပြီပေါ့၊ အားလုံး ကမ်ပိန်းကို အရှိန်အဟုန်နဲ့ ဆက်ပြီးတော့ သွားဖို့ပဲရှိတယ်ပေါ့။ ကျမတို့လူထုခေါင်းဆောင် ဒေါ်အောင်ဆန်းစုကြည်ရဲ့သားဖြစ်တဲ့ ကိုထိန်လင်း(မစ္စတာ ကင်မ်အဲရစ်) ကနေပြီးတော့မှ​ ကျမတို့နဲ့အတူတူ သံအမတ်ကြီး ဆက်လက်ပြီးတော့ ပြည်သူကို ကိုယ်စားပြုနိုင်ရေး၊ ကမ္ဘာ့ကုလသမဂ္ဂမှာ တာဝန်တွေ ဆက်လက်ထမ်းဆောင်နိုင်ရေးအတွက်ကို အတတ်နိုင်ဆုံး ဝိုင်းဝန်းကူညီပြီးတော့မှ ကမ်ပိန်းမှာ သူတတ်အားသရွေ့ပါဝင်ပြီးတော့၊ ညှိနှိုင်းပြီးတော့မှ သူတောင်းဆိုသွားမယ်၊ ပါဝင်ကူညီပြီးတော့မှ လုပ်ဆောင်သွားမယ်ဆိုတာမျိုးတွေလည်း ကျမတို့တွေကြားသိရတဲ့အတွက် အင်မတန်မှ ဝမ်းသာမိတယ်။ အဘက်ဘက်ကနေပြီးတော့မှ လုပ်ဆောင်နိုင်တဲ့ ခေါင်းဆောင်တွေ ပညာတတ်တွေ စသဖြင့်ပေါ့နော်။ ပြည်သူလူထုအင်အားတွေနဲ့ ဒီကမ်ပိန်းကို အောင်မြင်အောင် ဆက်လက်ပြီးတော့ ချီတက်သွားကြမှာဖြစ်ပါတယ်။”

အဖွဲ့ဝင် ၉ နိုင်ငံပါဝင်တဲ့ ကုလသံတမန်အရည်အချင်းစိစစ်ရေးကော်မတီ (UN Credentials Committee) မှာ အမေရိကန်၊ တရုတ်နဲ့ ရုရှားနိုင်ငံတို့က အမြဲတမ်းအဖွဲ့ဝင်တွေဖြစ်ပြီး ကျန် ၆ နိုင်ငံ နေရာတွေကတော့ အလှည့်ကျစနစ်နဲ့ ပါဝင်ကြရတာဖြစ်ပါတယ်။ 

ဒီနှစ်မှာ စစ်ခေါင်းဆောင်ကို တရုတ်နဲ့ ရုရှားနိုင်ငံတို့ရဲ့ ပေါ်ပေါ်ထင်ထင် အသိအမှတ်ပြုဆက်ဆံမှုတွေဟာ သံအမတ်ကြီးအတွက် ဖိအားဖြစ်လာတာပါ။ 

စစ်အာဏာရှင်ကို အသိအမှတ်ပြုဆက်ဆံတာတွေနဲ့ပတ်သက်ပြီး အမေရိကန်အစိုးရ၊ နိုင်ငံတကာအစိုးရတွေနဲ့ ဒေသတွင်းအာဆီယံနိုင်ငံတွေ၊ အထူးသဖြင့် ထိုင်းနိုင်ငံကို မေးခွန်းထုတ်ဖိအားပေးနိုင်ဖို့ သံအမတ်ကြီးအတွက် ကမ်ပိန်းနဲ့အတူ မြန်မာ့အရေးဆောင်ရွက်သူတွေက ပြင်ဆင်နေကြပါတယ်။

 ဝါရှင်တန်ဒီစီအခြေစိုက် မြန်မာ့အရေးဆောင်ရွက်သူ ကိုရင်အေး က “ထိုင်းနိုင်ငံပေါ့နော်၊ သူက အလွန်အကျွံပေါ့ လိုက်တွေ့နေတယ်။ တခြားနိုင်ငံတွေပါလိုက်တွေ့ပြီးတော့ မင်းအောင်လှိုင်ကို လော်ဘီလိုက်လုပ်ပေးနေတယ်ဆိုတဲ့ အနေအထားရှိတဲ့အတွက်ကြောင့် ထိုင်းကို ကျနော်တို့ Global ဆိုပြီး ဖိအားပေးဖို့ လုပ်ထားတာ၊ အားလုံးသဘောတူထားတာလေးက လာမဲ့ စက်တင်ဘာ ၂ ရက်ကနေ ၇ ရက်နေ့အထိပေါ့နော်၊ ကိုယ့်ဒေသ ကိုယ့်အသီးသီးမှာလည်း အဲ့ဒါလေးတွေ လှုပ်ရှားမှုလေးလုပ်ပြီးတော့ မီဒီယာကိုချိတ်ဆက်ပြီးတော့ တင်မယ်ဆိုလည်း တင်ပေးကြပါ။ အဓိက ၂ ရက်နေ့ကနေ ၇ ရက်နေ့က ဂလိုဘယ်လ်ထိုင်းလှုပ်ရှားမှုပေါ့နော်။ ထိုင်းနိုင်ငံကို ကျွနော်တို့အားလုံး ဝိုင်းတောင်းဆိုကြမယ်။ ဝါရှင်တန်မှာလည်း ကျနော်တို့တောက်လျှောက် လုပ်နေတာ ၂ ခေါက်ရှိပြီ။ ခုလာမဲ့ ၃ ရက်နေ့မှာလည်း ကျနော်တို့သွားကြမယ်၊ သွားပြီးတော့ ကျနော်တို့ ထိုင်းနိုင်ငံကို ထပ်ပြီးတော့ ဖိအားပေးမယ်” လို့ ပြောပါတယ်။

စက်တင်ဘာလမှာ ကျင်းပမဲ့ ၈၁ ကြိမ်မြောက် ကုလသမဂ္ဂအထွေထွေညီလာခံမှာ နှစ်စဉ်ဆောင်ရွက်နေကြ လုပ်ငန်းစဉ်အတိုင်း သံတမန်အရည်အချင်း စိစစ်ရေးကော်မတီ (Credentials Committee) က နိုင်ငံအသီးသီးကို ကိုယ်စားပြုတဲ့ သံတမန်တွေဟာ ကုလရဲ့သတ်မှတ်ချက်တွေနဲ့ ကိုက်ညီမှု ရှိမရှိ ပြန်သုံးသပ်တော့မှာပါ။

သံအမတ်ကြီးဦးကျော်မိုးထွန်း ရာထူးတာဝန်ဆက်ထိန်းထားနိုင်ရေးအတွက် အမေရိကန်ပြည်ထောင်စု၊ နယူးယောက်မြို့၊ ကုလသမဂ္ဂဌာနချုပ်နေရာအနီးမှာ အဓိက ကမ်ပိန်းပြုလုပ်မှာဖြစ်ပြီး ဥရောပ၊ အာရှ၊ ဩစတြေးလျနဲ့ နိုင်ငံတကာရောက်မြန်မာတွေက ကမ်ပိန်းတွေ ဆက်တိုက်ဖော်ဆောင်သွားမှာဖြစ်ပါတယ်။

စစ်အာဏာရှင်ဘက်ကလည်း သံအမတ်ကြီးဦးကျော်မိုးထွန်း တာဝန်ထမ်းဆောင်တာ၊ အလုပ်လုပ်ကိုင်တာတွေကို အနှောင့်အယှက်ပေးတာတွေ ဆက်တိုက်ပြုလုပ်နေပြီး သူတို့ရဲ့ ကိုယ်စားလှယ်ကို အစားထိုးတင်သွင်းနိုင်ဖို့ ကြိုးစားနေပါတယ်။