ရန်ကုန်ဆေးရုံကြီးမှာ ဝမ်းပျက်ဝမ်းလျှောလူနာတွေ များလာတာကြောင့် ပြင်ပလူနာဌာနကို သြဂုတ် ၁၃ ရက်ကစပြီး ယာယီပိတ်သွားမယ်လို့ ဆရာဝန်တွေရဲ့ ပြောပြချက်အရ သိရပါတယ်။
တာဝန်ကျဆရာဝန်တယောက်က “ဒီနေ့ကိုပဲ ဝမ်းရောဂါနဲ့ပတ်သက်ပြီး လူနာတွေလာကြတယ်။ ပရဟိတအသင်းတွေရဲ့ လူနာတင်ယာဥ်ကားတွေဆိုရင် ခေါက်တုံ့ခေါက်ပြန်သွားနေရတယ်။ လက်ရှိ သီးသန့်ဆောင်မှာလည်းပြည့်နေပြီ။ နောက်လူတွေထပ်ပြီးကူးစက်မှုမရှိအောင်လို့ ပြင်ပလူနာဌာနကို ပိတ်လိုက်တာ။ လူနာတော်တော်များတယ်" လို့ ပြောပါတယ်။
ဒါ့အပြင် ဝမ်းပျက်ဝမ်းလျှောစတင်ဖြစ်ပွားတဲ့ လသာမြို့နယ်အပါအဝင် မြို့တွင်း ၆ မြို့နယ်ရှိ လမ်းဘေးစျေးဆိုင်တွေအကုန်ပိတ်ရမယ်လို့ စည်ပင်ကညွှန်ကြားထားတယ်လို့ သိရပါတယ်။
အစားအသောက်ကနေတဆင့် ဝမ်းပျက်ဝမ်းလျှောဖြစ်တာကြောင့် ထပ်မံကူးစက်မှုမရှိစေဖို့ ရန်ကုန်ဆေးရုံကြီးမှာ ပြင်ပအစားအသောက်လှူဒါန်းတာကိုလည်း ပိတ်လိုက်ရပါတယ်။
ရန်ကုန်မှာ ဝမ်းပျက်ဝမ်းလျှောရောဂါဖြစ်ပွားသူ ၁၀၀ နီးပါးအထိရှိနေပြီး ရန်ကုန်ဆေးရုံကြီးအပြင်၊ စံပြဆေးရုံ၊ မြောက်ဥက္ကလာဆေးရုံတို့မှာလည်း သီးသန့်ကုသပေးနေရပြီး ပုဂ္ဂလိကဆေးရုံတွေမှာလည်း ဝမ်းပျက်ဝမ်းလျှောလူနာတွေရှိတယ်လို့ သိရပါတယ်။
ဝမ်းပျက်ဝမ်းလျှောရောဂါနဲ့ လက်ရှိအချိန်ထိ ကျန်းမာရေးဝန်ကြီးဌာနက တစုံတရာထုတ်ပြန်ခြင်းမ ရှိသေးပါဘူး။
လက်ရှိဝမ်းပျက်ဝမ်းလျှောဖြစ်ပွားနေသူများထဲမှ ကာလဝမ်းရောဂါပိုး ၁၀ ယောက်ထက်မနည်းမှာ စစ်ဆေးတွေ့ရှိရတယ်လို့ သိရပါတယ်။
