ကမ္ဘာ့ရေနံစိမ်းဈေးနှုန်း တစည်ကို ဒေါ်လာ ၁၀၀ ကျော်အထိ မြင့်တက်လာချိန် ပြည်တွင်းစက်သုံးဆီဈေးနှုန်းတွေဟာလည်း တလီတာကို ကျပ် ၆၀၀ ကျော်ကနေ ၇၀၀ ကျော်အထိ ခုန်တက်လာပါတယ်။
ရန်ကုန်မြို့ရဲ့ စက်တင်ဘာ ၂၅ ရက် စက်သုံးဆီဈေးနှုန်းတွေအရ 92 ဓာတ်ဆီ တလီတာကို ၄,၄၅၀ ကျပ်၊ 95 ဓာတ်ဆီ ၄,၆၀၀ ကျပ်၊ ဒီဇယ် ၄,၇၉၀ ကျပ်နဲ့ ပရီမီယံဒီဇယ် ၅,၇၉၅ ကျပ်အထိ ရောက်ရှိလာပါတယ်။
စက်တင်ဘာ ၁၈ ရက် ပြီးခဲ့တဲ့ သီတင်းပတ်ဈေးနှုန်းနဲ့ နှိုင်းယှဉ်ရင် 92 ဓာတ်ဆီက ၆၂၅ ကျပ်၊ 95 ဓာတ်ဆီက ၆၅၀ ကျပ်၊ ဒီဇယ်က ၆၄၀ ကျပ်နဲ့ ပရီမီယံဒီဇယ်က ၇၄၅ ကျပ် အသီးသီး မြင့်တက်လာတာဖြစ်ပါတယ်။
ရာခိုင်နှုန်းအရဆိုရင်လည်း တပတ်အတွင်း 92 ဓာတ်ဆီနဲ့ 95 ဓာတ်ဆီဈေးဟာ ၁၆ ရာခိုင်နှုန်းကျော်စီ မြင့်တက်ခဲ့ပြီး ဒီဇယ်နဲ့ ပရီမီယံဒီဇယ်ဈေးတွေကတော့ ၁၄ ရာခိုင်နှုန်းကျော်စီ မြင့်တက်လာတာဖြစ်ပါတယ်။
တဘက်မှာလည်း ကမ္ဘာ့ရေနံစိမ်းဈေးနှုန်းဟာ အရှေ့အလယ်ပိုင်းဒေသ စစ်ရေးတင်းမာမှုတွေကြောင့် မြင့်တက်လာနေပြီး Brent ရေနံစိမ်းဈေးဟာ တစည်ကို ဒေါ်လာ ၁၀၅ ဝန်းကျင်အထိ ရောက်ရှိလာလို့ တလအတွင်းမှာ ၂၁ ရာခိုင်နှုန်းလောက် မြင့်တက်ထားပါတယ်။
မြန်မာနိုင်ငံမှာ စက်သုံးဆီကို ပြည်ပကနေ တင်သွင်းနေရတာကြောင့် ကမ္ဘာ့ရေနံဈေး မြင့်တက်မှုနဲ့အတူ ကျပ်ငွေတန်ဖိုးအပြောင်းအလဲနဲ့ သယ်ယူစရိတ်တွေကလည်း ပြည်တွင်း စက်သုံးဆီဈေးနှုန်းအပေါ် သက်ရောက်နိုင်ပါတယ်။
အခုလို စက်သုံးဆီဈေးနှုန်းတွေ မြင့်တက်လာတာဟာ မော်တော်ယာဉ် အသုံးပြုသူတွေအပေါ်သာမက ကုန်စည်သယ်ယူပို့ဆောင်ရေး၊ စိုက်ပျိုးရေးနဲ့ ကုန်ထုတ်လုပ်မှုကဏ္ဍတွေအပေါ်ပါ ရိုက်ခတ်နိုင်ပါတယ်။
အထူးသဖြင့် သယ်ယူပို့ဆောင်ရေးစရိတ် မြင့်တက်လာတာကနေတဆင့် အခြေခံစားသောက်ကုန်တွေနဲ့ အထွေထွေကုန်ဈေးနှုန်းတွေအပေါ်မှာ ထပ်မံဖိအားဖြစ်လာနိုင်ပါတယ်။
