တောင်ကိုရီးယားသင်္ဘောလုပ်ငန်း HMM ရဲ့ သင်္ဘောတစင်းဟာ ဟော်မုဇ်ရေလက်ကြားမှာ မေ ၄ ရက်က မီးလောင် ပေါက်ကွဲခဲ့တယ်လို့ တောင်ကိုရီးယား နိုင်ငံခြားရေးဝန်ကြီးဌာနက ပြောပါတယ်။ 

HMM နာမူ သင်္ဘောဟာ တိုက်ခိုက်ခံရတာဖြစ်နိုင်ပြီး အစိုးရက ထောက်လှမ်းရေးသတင်းတွေကို စစ်ဆေးနေတယ်လို့ အစိုးရအရာရှိတွေကို ကိုးကားပြီး ယုံဟပ်သတင်းဌာနက ဖော်ပြခဲ့ပါတယ်။ 

ထိခိုက်ဒဏ်ရာရရှိသူ မရှိဘဲ ပနားမားအလံ လွှင့်ထားတဲ့ ကုန်တင်သင်္ဘောရဲ့ အင်ဂျင်ခန်းမှာ မီးလောင်ရတဲ့ အကြောင်းရင်းကို အာဏာပိုင်တွေက စုံစမ်းစစ်ဆေးနေတယ်လို့ HMM က ပြောပါတယ်။ 

သင်္ဘောပေါ်မှာ တောင်ကိုရီးယားနိုင်ငံသား ၆ ယောက်အပါအဝင် သင်္ဘောသား ၂၄ ယောက် ပါတယ်လို့ ကုမ္ပဏီက ရိုက်တာသတင်းဌာနကို ပြောပါတယ်။ 

တောင်ကိုရီးယား အစိုးရက ဒီကိစ္စနဲ့ပတ်သက်ပြီး သက်ဆိုင်ရာနိုင်ငံတွေနဲ့ နီးနီးကပ်ကပ် ဆက်သွယ်ဆောင်ရွက်သွားမှာဖြစ်ပြီး ဟော်မုဇ်ရေလက်ကြားထဲက သင်္ဘောတွေနဲ့ သင်္ဘောသားတွေရဲ့ ဘေးကင်းရေးကို သေချာစေဖို့ လိုအပ်တဲ့ အစီအမံတွေ လုပ်သွားမယ်လို့ တောင်ကိုရီးယားနိုင်ငံခြားရေးဝန်ကြီးဌာနက ကြေညာချက် ထုတ်ပြန်ပြောဆိုခဲ့ပါတယ်။ 

တောင်ကိုရီးယားအလံ လွှင့်ထားတဲ့ သင်္ဘော ၂၆ စီး ဟော်မုဇ်ရေလက်ကြားထဲမှာ ပိတ်မိနေတယ်လို့ တောင်ကိုရီးယား အစိုးရက ပြောခဲ့ပါတယ်။ 

အီရန်နားက သင်္ဘောတွေ ရွေ့လျားမှုကို ကာကွယ်ရေးအတွက် တောင်ကိုရီးယားက အမေရိကန်ရဲ့ ကြိုးပမ်းချက်တွေကို ပူးပေါင်းသင့်တယ်လို့ အမေရိကန် သမ္မတ ဒေါ်နယ်ထရမ့်ပ်က မေ ၄ ရက်မှာ ပြောခဲ့ပါတယ်။ 

အီရန်ဟာ သင်္ဘောလှုပ်ရှားမှု၊ Project Freedom စစ်ဆင်ရေးတို့နဲ့ ပတ်သက်ပြီး တောင်ကိုရီးယား ကုန်တင်သင်္ဘောတစင်း အပါအဝင် မသက်ဆိုင်တဲ့ နိုင်ငံတွေကို ပစ်ခတ်မှုတချို့ လုပ်ခဲ့တယ်။ 

တောင်ကိုရီးယားအနေနဲ့ စစ်ဆင်ရေးမှာပါဖို့ အချိန်တန်တာ ဖြစ်ကောင်းဖြစ်နိုင်တယ်လို့ ထရမ့်ပ်က ပြောပါတယ်။ အမေရိကန် ကာကွယ်ရေးဝန်ကြီး ပိထ် ဟက်ဆက်သ်ကလည်း မေ ၅ ရက်မှာ ပူးတွဲစစ်ဦးစီးချုပ်များဥက္ကဋ္ဌ ဒန်ကိန်းနဲ့အတူ သတင်းစာရှင်းလင်းပွဲတခု ကျင်းပမယ်လို့ ထပ်လောင်းပြောခဲ့ပါတယ်။ 

Source: Reuters