ရုရှားနဲ့ ဗီယက်နမ်တို့ဟာ ဗီယက်နမ်နိုင်ငံမှာ နင်သွမ်ဝမ်း နျူကလီးယားဓာတ်အားပေးစက်ရုံ တည်ဆောက်မှု ပူးပေါင်းဆောင်ရွက်ရေးဆိုင်ရာ အစိုးရအချင်းချင်း သဘောတူညီချက်ကို လက်မှတ်ရေးထိုးခဲ့တယ်လို့ ရုရှားရဲ့ နိုင်ငံတော်နျူကလီးယားစွမ်းအင်ကော်ပိုရေးရှင်း ရိုဆာတွမ်က မတ် ၂၃ ရက်မှာ ပြောပါတယ်။
ဗီယက်နမ်နိုင်ငံဟာ ကြီးမားတဲ့ စက်မှုကဏ္ဍနဲ့ တိုးချဲ့လာတဲ့ အလယ်လတ်တန်းစား လူတန်းစားက မိုးခေါင်ရေရှားမှု၊ တိုင်ဖွန်းမုန်တိုင်းတွေ အပါအဝင် ပိုပြီး မကြာမကြာ ဖြစ်လာနေတဲ့ ပြင်းထန်တဲ့ ရာသီဥတုကြောင့် လျှပ်စစ်စွမ်းအင်က ထောက်ပံ့နိုင်စွမ်းထက် လိုအပ်ချက်က ကျော်လွန်လေ့ ရှိနေတာပါ။
ဒီအခြေအနေအရ အဓိက လျှပ်စစ်ဓာတ်အားပြတ်တောက်မှုတွေနဲ့ ရင်ဆိုင်နေရလို့ လျှပ်စစ်ဓာတ်အား ပိုရဖို့ လိုအပ်နေပါတယ်။
ဒီစီမံကိန်းဟာ ဗီယက်နမ်နိုင်ငံရဲ့ လျှပ်စစ်ဓာတ်အား ထုတ်လုပ်မှုစွမ်းရည်ကို မြှင့်တင်ရေး မဟာဗျူဟာရဲ့ တစိတ်တပိုင်း ဖြစ်ပါတယ်။
ကွန်မြူနစ်အုပ်ချုပ်တဲ့ ဗီယက်နမ်နိုင်ငံဟာ ရုရှားနဲ့ ရိုးရာအစဉ်အလာအရ ရင်းနှီးတဲ့ ဆက်ဆံရေးကို ထိန်းသိမ်းထားပါတယ်။
ကမ္ဘာ့ဦးဆောင် နျူကလီးယား ဓာတ်အားပေးစက်ရုံ တည်ဆောက်သူ ရိုဆာတွမ်က သဘောတူညီချက်မှာ ဆောက်လုပ်ရေးစီမံကိန်းကို အကောင်အထည်ဖော်ရာမှာ နှစ်ဖက်အကြား စည်းကမ်းချက်တွေနဲ့ အဓိက ပူးပေါင်းဆောင်ရွက်မှု နယ်ပယ်တွေကို ဖော်ပြထားတယ်လို့ ပြောပါတယ်။
ရုရှားက ဒီဇိုင်းထုတ်ထားတဲ့ ပေါင်းစပ်စွမ်းရည် ၂,၄၀၀ မဂ္ဂါဝပ် (MW) ရှိတဲ့ ဓာတ်အားပေးစက်ရုံ ၂ ခု တည်ဆောက်ဖို့ ဗီယက်နမ်က မျှော်မှန်းထားတာဖြစ်ပြီး ကုန်ကျစရိတ် အသေးစိတ်ကို မဖော်ပြထားပါဘူး။
ဗီယက်နမ်အလယ်ပိုင်းက နျူကလီးယားစက်ရုံတွေမှာ လုပ်ငန်းတွေကို ၂၀၁၀ ခုနှစ် အစောပိုင်းမှာ စတင်ခဲ့ပေမဲ့ ဘေးကင်းရေးနဲ့ ဘတ်ဂျက်ဆိုင်ရာ စိုးရိမ်မှုတွေကြောင့် ဗီယက်နမ်အစိုးရက နျူကလီးယားစွမ်းအင် အစီအစဉ်ကို ရပ်ဆိုင်းလိုက်လို့ ၂၀၁၆ ခုနှစ်မှာ ရပ်တန့်သွားခဲ့ပါတယ်။
၂၀၂၄ ခုနှစ်မှာ နျူကလီးယားစွမ်းအင် အစီအစဉ်ကို ပြန်စပြီးတဲ့နောက် စီမံကိန်းတွေကို အကောင်အထည်ဖော်ဖို့ ဗီယက်နမ်နိုင်ငံက ဂျပန်နဲ့ ရုရှားတို့ကို တောင်းဆိုခဲ့ပါတယ်။
ဒီဇင်ဘာလမှာ ဂျပန်အစိုးရက ဗီယက်နမ်နိုင်ငံအတွင်း နျူကလီးယားဓာတ်အားပေးစက်ရုံတခု တည်ဆောက်ရေး အစီအစဉ်တွေကနေ နုတ်ထွက်ဖို့ ဆုံးဖြတ်ခဲ့ပါတယ်။
Source: Reuters
