ဂျပန်နိုင်ငံတောင်ပိုင်း၊ ကူမာမိုတိုမြို့အနီးမှာ ပြင်းအား ရစ်ချ်တာစကေး ၇ ဒသမ ၁ ရှိတဲ့ အင်အားပြင်း ငလျင်တခု လှုပ်ခတ်ခဲ့တာကြောင့် အနည်းဆုံး လူ ၁၃ ယောက် သေဆုံးခဲ့ပြီး အပျက်အစီးတွေအောက်မှာ ပိတ်မိနေတဲ့ အသက်ရှင် ကျန်ရစ်သူတွေကို ကယ်ဆယ်ဖို့အတွက် ကယ်ဆယ်ရေးအဖွဲ့တွေ ရှာဖွေနေကြောင်း ဝန်ကြီးချုပ် ဆာနာအဲ တာကာအိချိက ဇူလိုင် ၂၉ ရက်မှာ ပြောပါတယ်။

“အခုချိန်ထိ ကယ်ဆယ်ရေးကို စောင့်ဆိုင်းနေရသူတွေ ရှိနေတုန်းပဲ။ ဒါဟာ အချိန်နဲ့အပြိုင် လုနေရတာပါ။ ရှိသမျှ အရင်းအမြစ်အားလုံးကို ပုံအောသုံးပြီး လူအမြောက်အမြားကို တတ်နိုင်သမျှ ကယ်ထုတ်သွားမှာပါ” လို့ ဝန်ကြီးချုပ်တာကာအိချိက သတင်းထောက်တွေကို ပြောပါတယ်။

ဂျပန်နိုင်ငံတောင်ပိုင်း၊ ကူမာမိုတိုခရိုင်မှာ ပြင်းအား ၇ ဒသမ ၁ ရှိတဲ့ ငလျင်လှုပ်ခတ်ပြီးနောက် အိမ်ခြေအများအပြား ပျက်စီးပြိုကျသွားခဲ့ပုံတွေကို နိပွန်ရုပ်သံရဲ့ ဝေဟင်ရိုက်ကူးချက်တွေမှာ တွေ့မြင်ရပါတယ်။

ငလျင်ရဲ့ ဗဟိုချက်ဟာ လူဦးရေ ၇ သိန်းနီးပါးရှိတဲ့ ကျူရှူးကျွန်း အလယ်ပိုင်းရဲ့ အကြီးဆုံး ကူမာမိုတိုမြို့ရဲ့ တောင်ဘက် ကီလိုမီတာ ၂၀ (၁၂ မိုင်) ခန့် အကွာမှာ ဖြစ်ပါတယ်။

အင်္ဂါနေ့က လှုပ်ခတ်ခဲ့တဲ့ ဒီငလျင်ကြောင့် ဒေသတခုလုံးမှာ အိမ်ခြေထောင်ပေါင်းများစွာ လျှပ်စစ်ဓာတ်အား ပြတ်တောက်သွားခဲ့သလို ဒေသတွင်း လမ်းတွေလည်း အက်ကွဲ ပျက်စီးသွားခဲ့ပါတယ်။

ဗုဒ္ဓဟူးနေ့ မနက်ပိုင်းမှာ ကယ်ဆယ်ရေးသမားတွေဟာ တဝက်တပျက် ပြိုကျသွားတဲ့ ဈေးဝယ်စင်တာ အပျက်အစီးတွေထဲကနေ လူ ၈ ယောက်ကို ကယ်ထုတ်နိုင်ခဲ့ပါတယ်။

ငလျင်လှုပ်ပြီး ၁ နာရီလောက်အကြာမှာ အဲဒီဈေးဝယ်စင်တာအတွင်း အကြောင်းရင်း မသိရသေးတဲ့ ပေါက်ကွဲမှုတခု ဖြစ်ပွားခဲ့တာကြောင့် အသက် ၂၀ အရွယ် အမျိုးသမီး ၂ ယောက် သေဆုံးခဲ့ပါတယ်။

ဂျပန် မိုးလေဝသအေဂျင်စီ တာဝန်ရှိသူတယောက်က ငလျင်ပြင်းပြင်းထန်ထန် ခံစားခဲ့ရတဲ့ ဒေသခံတွေအနေနဲ့ ပြင်းထန်တဲ့ နောက်ဆက်တွဲငလျင်တွေ သို့မဟုတ် မြေပြိုမှုအန္တရာယ်တွေကို လာမယ့်တပတ်လောက်အထိ သတိထားကြဖို့ သတိပေးထားပါတယ်။

လွန်ခဲ့တဲ့ ၁၀ နှစ်က ကူမာမိုတိုမှာ ဖြစ်ပွားခဲ့တဲ့ ငလျင်ကြီးတုန်းက လူ ၂၇၅ ယောက် သေဆုံးပြီး ၂,၇၃၉ ယောက် ဒဏ်ရာရရှိခဲ့ကာ ထင်ရှားတဲ့ ခရီးသွားနေရာတခုဖြစ်တဲ့ ကူမာမိုတို ရဲတိုက်နံရံတွေ အပါအဝင် အဆောက်အအုံ ထောင်ပေါင်းများစွာ ပျက်စီးခဲ့ပါတယ်။

Source: Reuters