၂၀၂၆ ဖီဖာကမ္ဘာ့ဖလားဘောလုံးပြိုင်ပွဲ ၃၂ သင်းအဆင့်ရှုံးထွက်ပွဲစဉ်မှာ ဘယ်လ်ဂျီယံအသင်းက ဆီနီဂေါအသင်းကို (၃-၂) ဂိုးနဲ့ အနိုင်ရပြီး နောက်တဆင့်ကို တက်ရောက်သွားပါတယ်။
ဆီနီဂေါအသင်းကတော့ ပွဲပြီးဖို့ ၅ မိနစ်အလိုအထိ ၂ ဂိုးအသာနဲ့ ဦးဆောင်နေရာကနေ ဂိုးတွေပြန်ပေးလိုက်ရပြီး အရှုံးပေးလိုက်ရကာ ပြိုင်ပွဲကနေ ထွက်သွားရပြီဖြစ်ပါတယ်။
အမေရိကန်ပြည်ထောင်စု၊ ဝါရှင်တန်ပြည်နယ်၊ ဆီရယ်တဲလ်မြို့ အားကစားကွင်းမှာ ဇူလိုင် ၁ ရက်က ယှဉ်ပြိုင်ကစားခဲ့ကြတာမှာ ပထမပိုင်း ပွဲစပြီး ၂၅ မိနစ်မှာ ဒီယာရာက အဖွင့်ဂိုးသွင်းယူခဲ့ပြီး ဆီနီဂေါအသင်း ဦးဆောင်နိုင်ခဲ့ပါတယ်။
ဒီနောက် ဒုတိယပိုင်း ၅၁ မိနစ်မှာ အီစမာအီလာဆားက လှပတဲ့ ကန်ချက်နဲ့ ဆီနီဂေါအတွက် ဒုတိယမြောက် ဦးဆောင်ဂိုးကို ထပ်မံသွင်းယူပေးခဲ့လို့ ဒုတိယပိုင်းပွဲပြီးခါနီးအထိ ဆီနီဂေါအသင်းက အနိုင်ရဖို့ နီးစပ်လာခဲ့ပါတယ်။
ဘယ်လ်ဂျီယံအသင်းဟာ (၂-၀) ဂိုးနဲ့ အရေးနိမ့်နေချိန်မှာပဲ ကီဗင်ဒီဘရိုင်းနားနဲ့ ဂျေရမီဒိုကူတို့ လူစားလဲခံခဲ့ရကာ လူစားဝင်လာတဲ့ လူကာကူက ပွဲပြီးခါနီး ၈၆ မိနစ်မှာ ဘယ်လ်ဂျီယံအတွက် ချေပဂိုးတဂိုး ပြန်လည်သွင်းယူခဲ့ပါတယ်။
ဒီနောက် ၃ မိနစ်အကြာ ပွဲချိန် ၈၉ မိနစ်မှာ တီလမန်းစ်က ဘယ်လ်ဂျီယံ အသင်းအတွက် ဒုတိယချေပဂိုးသွင်းယူကာ ပွဲကို သရေဖြစ်စေခဲ့ပါတယ်။
ဒါကြောင့် အချိန်ပို ဆက်ကစားကြရာမှာ ဒုတိယပိုင်း နာကျင်အချိန်ပိုမှာ ဘယ်လ်ဂျီယံအသင်း ပင်နယ်တီရပြီး တီလမန်းစ်က အမှားအယွင်းမရှိ ကန်သွင်းခဲ့လို့ ဘယ်လ်ဂျီယံတို့ (၃-၂)ဂိုးနဲ့ အောင်ပွဲခံသွားတာ ဖြစ်ပါတယ်။
ပယ်နယ်တီပေးဖို့ ကွင်းလယ်ဒိုင်ကလည်း VAR စခရင်ကို ကြည့်ဖို့ အချိန်အကြာကြီး ယူကာ ပင်နယ်တီအဖြစ်ဆုံးဖြတ်ခဲ့ပါတယ်။
ဒီပွဲအနိုင်ရသွားလို့ ဘယ်လ်ဂျီယံအသင်းဟာ နောက်တဆင့် ၁၆ သင်းရှုံးထွက် အဆင့်မှာ ပူးတွဲအိမ်ရှင် အမေရိကန်နဲ့ ဘော့စနီးယားတို့ ပွဲစဉ်ကနေ နိုင်မဲ့အသင်းနဲ့ ဇူလိုင် ၇ ရက် နေ့ ရင်ဆိုင်ရမှာဖြစ်ပါတယ်။
Source: SkySports/ BBC
