ဟော်မုဇ်ရေလက်ကြားကို ဖြတ်သန်းမောင်းနှင်နေတဲ့ ကုန်တင်သင်္ဘောတွေကို ပစ်မှတ်ထား တိုက်ခိုက်ဖို့  အီရန်ဘက်က အဝေးထိန်း အသေခံဒရုန်း အများအပြား လွှတ်တင်ခဲ့တယ်လို့ အမေရိကန် စစ်တပ်က ဇွန် ၁၂ ရက်မှာ ပြောပါတယ်။

အမေရိကန်တပ်ဖွဲ့တွေက အဲဒီဒရုန်းတွေကို ကြားဖြတ်ဟန့်တားပြီး “အားလုံးကို ပစ်ချနိုင်ခဲ့တယ်” လို့ အမေရိကန် ဗဟိုစစ်ဌာနချုပ် (CENTCOM) က X လူမှုကွန်ရက်ပေါ်မှာ ပို့စ်တင်ခဲ့ပါတယ်။

ဒါ့အပြင် ရေလက်ကြားထဲမှာ သင်္ဘောတွေဟာ အနှောင့်အယှက်မရှိ ပုံမှန်အတိုင်း ဖြတ်သန်းသွားလာနေကြပြီး အရေးပါတဲ့ နိုင်ငံတကာကုန်သွယ်ရေး လမ်းကြောင်းကြီးလည်း ဆက်ပွင့်နေတယ်လို့လည်း ဆိုပါတယ်။

ဒီဖြစ်စဉ်ဟာ အမေရိကန်နဲ့ အီရန်တို့ကြား ဖြစ်ပွားနေတဲ့ စစ်ပွဲကို အဆုံးသတ်ဖို့ သဘောတူညီချက် ရခါနီးပြီလို့ နှစ်ဖက်စလုံးက အရိပ်အယောင်ပြနေပြီး၊ ဖြစ်နိုင်ခြေရှိတဲ့ သဘောတူညီချက် မူကြမ်းကိုပါ နှစ်ဖက်စလုံး သဘောတူညီထားပြီးတဲ့ အချိန်မှာ ပေါ်ပေါက်လာတာ ဖြစ်ပါတယ်။

ဒီပဋိပက္ခဟာ ပြီးခဲ့တဲ့ ဖေဖော်ဝါရီ ၂၈ ရက်နေ့ကတည်းက စတင်ခဲ့တာဖြစ်ပြီး၊ စစ်မဖြစ်ခင်တုန်းက ကမ္ဘာ့ရေနံနဲ့ သဘာဝဓာတ်ငွေ့  ၂၀ ရာခိုင်နှုန်းအထိ ဖြတ်သန်းသယ်ဆောင်ခဲ့တဲ့ အီရန်နဲ့ အိုမန်ကြားက ကျဉ်းမြောင်းတဲ့ ဟော်မုဇ်ရေလက်ကြားရဲ့ သင်္ဘောသွားလာရေးလမ်းကြောင်းကို အကြီးအကျယ် ထိခိုက်ပျက်ပြားစေခဲ့ပါတယ်။ 

Source: Reuters