ရှမ်းပြည်နယ်တောင်ပိုင်းမှာ ကျားဖြန့် အွန်လိုင်းလိမ်လည်လောင်းကစားလုပ်ငန်းတွေကနေ ၅ ရက်အတွင်း တရုတ်နိုင်ငံသား ၈၆ ယောက်နဲ့ မြန်မာနိုင်ငံသား ၉ ယောက် ဖမ်းဆီးရမိထားတယ်လို့ စစ်အာဏာရှင်ရဲ့ ထုတ်ပြန်ချက်တွေအရ သိရပါတယ်။
မေ ၈ ရက် မနက်ပိုင်းမှာ လဲချားမြို့နယ်၊ ဆီးဆောကျေးရွာ အရှေ့တောင်ဘက်အနီးမှာ အွန်လိုင်းလိမ်လည်လောင်းကစားလုပ်ငန်း လုပ်ကိုင်နေတဲ့ တရုတ်နိုင်ငံသား ၁၃ ယောက်နဲ့ မြန်မာအမျိုးသမီး ၅ ယောက်ကို ဖမ်းဆီးရမိခဲ့တယ်လို့ ဆိုပါတယ်။
အဲဒီနေရာကနေ လူနေတဲ ၂ လုံး၊ လုပ်ငန်းသုံးတဲ ၁ လုံး၊ မီးဖိုဆောင် ၁ လုံး၊ All In One ကွန်ပျူတာ ၂ လုံး၊ မီးစက် ၁ လုံး၊ ပါဝါစတေရှင် ၂ လုံးနဲ့ ဖျက်ဆီးထားတဲ့ ဖုန်းအလုံး ၉၀ ကိုလည်း သိမ်းဆည်းရမိခဲ့တယ်လို့ သိရပါတယ်။
အဲဒီနောက် ဆီးဆောကျေးရွာ အရှေ့တောင်ဘက် မီတာ ၆,၀၀၀ လောက်အကွာမှာ တရုတ်နိုင်ငံသား ၁၂ ယောက်ကို ထပ်မံဖမ်းဆီးရမိခဲ့ပြီး၊ မိုင်းပန်မြို့နယ်၊ ကျိုင်းတောင်းမြို့တောင်ဘက် မီတာ ၁၂,၀၀၀ လောက်အကွာ မိုင်းပန်-ကျိုင်းတောင်း ကားလမ်းအနီးမှာလည်း တရုတ်နိုင်ငံသား ၆ ယောက်ကို ထပ်မံဖမ်းဆီးရမိခဲ့တယ်လို့ ထုတ်ပြန်ထားပါတယ်။
အခု ၃၆ ယောက် ဖမ်းဆီးမှုမတိုင်ခင်ကလည်း ရှမ်းတောင်ဒေသအတွင်း ကျားဖြန့်လုပ်ငန်းတွေနဲ့ ဆက်စပ်ပြီး တရုတ်နိုင်ငံသား ၅၀ ကျော်ကို သီးခြားဖမ်းဆီးရမိထားပြီးဖြစ်လို့ မေ ၄ ရက်ကနေ မေ ၉ ရက်အထိ စုစုပေါင်း တရုတ်နိုင်ငံသား ၈၆ ယောက် မြန်မာနိုင်ငံသား ၉ ယောက် ဖမ်းဆီးရမိထားတာ ဖြစ်ပါတယ်။
ဒေသခံတယောက်က “၅ ရက်အတွင်း ဖမ်းဆီးရမိမှုတွေ ဆက်တိုက်ရှိလာတာက ရှမ်းတောင်ဒေသအတွင်း ကျားဖြန့်ကွန်ရက်တွေ ကျယ်ပြန့်နေသေးတယ် ဆိုတာကို ထင်ဟပ်စေပါတယ်” လို့ ပြောပါတယ်။
ဖမ်းဆီးရမိသူတွေကို လက်ရှိမှာ စစ်ဆေးနေပြီး တည်ဆဲဥပဒေအရ အရေးယူသွားမယ်လို့ စစ်အာဏာရှင်ရဲ့ ထုတ်ပြန်ချက်မှာ ဆိုထားပါတယ်။
