လူထုခေါင်းဆောင် နိုင်ငံတော်အတိုင်ပင်ခံပုဂ္ဂိုလ် ဒေါ်အောင်ဆန်းစုကြည် အသက်ရှင်နေ သေးကြောင်း သက်သေပြဖို့ တောင်းဆိုတဲ့ “Proof of Life“ လှုပ်ရှားမှုကို ကနေဒါနိုင်ငံ၊ ဗန်ကူးဗားမြို့၊ Beaconsfield ပန်းခြံမှာ ဒေသအချိန် ဧပြီ ၂၅ ရက် မွန်းလွဲပိုင်းမှာ မြန်မာ့အရေးလှုပ်ရှားသူတွေက ပြုလုပ်ခဲ့ကြပါတယ်။

ဒီလှုပ်ရှားမှုမှာ သမ္မတကြီး ဦးဝင်းမြင့်ကို မြန်မာနိုင်ငံရဲ့ လက်ရှိနိုင်ငံတော်သမ္မတအဖြစ် ထောက်ခံကြောင်း၊ ဒေါ်အောင်ဆန်းစုကြည်အပါအဝင် မတရားဖမ်းဆီးခံထားရတဲ့ နိုင်ငံရေး အကျဉ်းသားတွေ လွတ်မြောက်ရေး တောင်းဆိုခဲ့ကြကာ၊ အာဏာသိမ်းစစ်အုပ်စုနဲ့ စစ်အာဏာရှင် မင်းအောင်လှိုင်ကို ကန့်ကွက်ရှုတ်ချခဲ့ကြပါတယ်။

ဒီလှုပ်ရှားမှုနဲ့အတူ မြန်မာနွေဦးတော်လှန်ရေးအတွက် ရန်ပုံငွေရှာ ဈေးရောင်းပွဲနဲ့ မြန်မာ့နှစ်သစ်ကူး သင်္ကြန်အထိမ်းအမှတ် မြန်မာ့ရိုးရာအစားအစာတွေနဲ့ စတုဒိသာ ကျွေးမွေးလှူဒါန်းတာ၊ တေးသီချင်းတွေနဲ့ သီဆိုဖျော်ဖြေတာတွေလည်း ပြုလုပ်ခဲ့ကြပါတယ်။ 

Proof of Life ကမ်ပိန်းကို ဒေါ်အောင်ဆန်းစုကြည်ရဲ့သား ကင်မ်အဲရစ် ဦးဆောင်ပြီး  ပြုလုပ်နေတာမှာ ထင်ရှားတဲ့ အနုပညာရှင်တွေအပါအဝင် ပြည်တွင်းနဲ့ ပြည်ပက မြန်မာ ပြည်သူများစွာ ပါဝင်လှုပ်ရှားနေကြပါတယ်။