လူမှုကွန်ရက်စာမျက်နှာမှာ အာဏာရှင်စစ်တပ်ရဲ့ စစ်လက်နက်ပစွည်းတွေကို ဓာတ်ပုံရိုက်ကူးတင်ခဲ့တဲ့ မွန်ပြည်နယ် ရေးမြို့နယ် အာယုတောင်ကျေးရွာအခြေစိုက် အမှတ် ၅၈၇ ခြေမြန်တပ်ရင်းက တပ်ကြပ်ကြီးအပါအဝင် ၃ ယောက်ကို ဖမ်းဆီးထားတယ်လို့ စစ်ဘက်သတင်းအရင်းအမြစ်တွေဆီက သိရပါတယ်။
ဇွန် ၉ ရက်က လူမှုကွန်ရက်စာမျက်နှာမှာ Phoesi အကောင့်ကနေ စစ်လက်နက်ပစွည်းဓာတ်ပုံတွေတင်ခဲ့ရာ အဆိုပါစစ်လက်နက်တွေဟာ ရေးမြို့နယ် အာယုတောင်ကျေးရွာအခြေစိုက် ခမရ ၅၈၇ လက်နက်တိုက်မှ သေနတ်တွေဖြစ်တာကြောင့် တပ်တွင်းစစ်ဆေးမှုလုပ်ပြီး ဖမ်းဆီးခဲ့တာလို့ စစ်ဘက်သတင်းအရင်းအမြစ်က DVB ကို ပြောပါတယ်။
“စစ်တပ်က သေနတ်ပုံတွေတင်တော့ ဒီသေနတ်တွေက ခမရ ၅၈၇ က သေနတ်တွေ၊ ခမရ ၅၈၈ က သေနတ်တွေဆိုပြီး ငြင်းခုံကြရင်း တိုင်းစစ်ဌာနချုပ်က သိပြီး အဖမ်းခံရတာ။ ရေးမြို့နယ်က တပ်ရင်းတွေ အကုန်ခေါ်စစ်တော့ အဲ့ပုံတွေက ခမရ ၅၈၇ က ပုံတွေဖြစ်တယ်။ အဲ့ဒီဓာတ်ပုံကိစ္စနဲ့ တပ်ကြပ်ကြီးနဲ့ တပ်သား ၂ ယောက်ကို ဖမ်းထားတယ်။”
စစ်လက်နက်ပစ္စည်းတွေ ဓာတ်ပုံရိုက်တင်ခဲ့သူက လူမှုကွန်ရက်မှာ တင်ထားတဲ့ပို့စ်ကို ဖျက်သွားပေမဲ့ ဓာတ်ပုံသိမ်းထားသူတွေက ခေါင်းစဥ်အမျိုးမျိုနဲ့ ပြန်တင်ခဲ့တာကြောင့် ဖမ်းဆီးခံရတာလို့ သိရပါတယ်။
လတ်တလောမှာ ဖမ်းဆီးထားတဲ့ တပ်ကြပ်ကြီး မျိုးအောင်နဲ့ တပ်သား ၂ ယောက်ကို အမှတ် (၁၉) စစ်ဆင်ရေးကွပ်ကဲမှုဌာနချုပ်မှာ စစ်ဆေးနေတယ်လို့ သတင်းအရင်းအမြစ်တွေက ပြောပါတယ်။
ပြီးခဲ့တဲ့ ၂၀၂၄ ခုနှစ် သြဂုတ် ၃ ရက်ကလည်း တပ်တွင်းစစ်ရေးသတင်း.အပြင်ကိုပေါက်ကြားတဲ့ ကိစ္စနဲ့ ရေးမြို့နယ် မော့ကနင်ကျေးရွာအခြစိုက် အမှတ် ၁၀၆ ခြေလျင်တပ်ရင်းက ဒုတပ်ကြပ်နဲ့ တပ်သားတယောက်ကို စစ်အာဏာရှင်တပ်က ဖမ်းဆီးခဲ့ပါတယ်။
