Binance ပလက်ဖောင်းပေါ်က ဒေါ်လာ ၆ ဘီလီယံ တန်ကြေးရှိ ခရစ်ပတိုငွေကြေး ခိုးယူမှုရဲ့ နောက်ကွယ်မှာ မြောက်ကိုရီးယား ရှိနေတယ်ဆိုတဲ့ အမေရိကန်ရဲ့ စွပ်စွဲချက်ဟာ “လုံးဝ အဓိပ္ပာယ်မဲ့တဲ့စကား” ဖြစ်ပြီး ဒါဟာ ဝါရှင်တန်အနေနဲ့ သူတို့အပေါ် ရန်လိုနေဆဲဆိုတာကို သက်သေပြနေတာပဲလို့ မြောက်ကိုရီးယားက နိုဝင်ဘာ ၃ ရက်မှာ ပယ်ချလိုက်ကြောင်း နိုင်ငံပိုင် KCNA သတင်းဌာနက ဖော်ပြပါတယ်။
မြောက်ကိုရီးယားခေါင်းဆောင် ကင်မ်ဂျုံအန်းရဲ့ ဩဇာညောင်းတဲ့ ညီမဖြစ်သူ ကင်မ်ယိုးဂျုံ ထုတ်ပြန်လိုက်တဲ့ ဒီငြင်းဆိုချက်ဟာ ထရမ့်ပ်ရဲ့ ထိပ်သီးဆွေးနွေးပွဲတွေ ပြန်စဖို့ ကမ်းလှမ်းချက်အပေါ် ပြုံယမ်းဘက်က နှုတ်ဆိတ်နေချိန်မှာ ထွက်ပေါ်လာတာပါ။
FBI ဆီက အချက်အလက်ရတယ်ဆိုပြီး မြောက်ကိုရီးယားကို “ဆိုက်ဘာရာဇဝတ်နိုင်ငံ” တခုလို ပုံဖော်နေတာဟာ ကမ္ဘာပေါ်က ဆိုက်ဘာရာဇဝတ်မှုမှန်သမျှ သူတို့လက်ချက်လို့ စွပ်စွဲပြီး နိုင်ငံတကာကို မျက်စိမှိုင်းတိုက်နေတဲ့ ကြီးမားတဲ့ ရန်စမှုတခုပါပဲလို့ ကင်မ်ယိုးဂျုံက ပြောဆိုခဲ့ပြီး အမေရိကန်ရဲ့ ရန်လိုမှုတွေနဲ့ ပတ်သက်လို့ မြောက်ကိုရီးယားအနေနဲ့ “ပြန်သုံးသပ်ရလိမ့်မယ်” လို့လည်း ဆိုပါတယ်။
ကမ္ဘာ့အကြီးဆုံး ခရစ်ပတို ငွေလဲလှယ်ရေးပလက်ဖောင်း Binance ကနေ ဒေါ်လာ ၆ ဘီလီယံကျော်တန် ဒီဂျစ်တယ်ပိုင်ဆိုင်မှုတွေ ခိုးယူခံရတာနဲ့ ပတ်သက်ပြီး မြောက်ကိုရီးယားအစိုးရ နောက်ခံပြုထားတဲ့ TraderTraitor လို့ခေါ်တဲ့ ဟက်ကာအဖွဲ့လက်ချက်ဖြစ်ကြောင်း FBI က သီတင်းပတ်ကုန်ပိုင်းမှာ ထုတ်ပြန်ထားပါတယ်။
ဒီဟက်ကာတွေဟာ ခိုးထားတဲ့ပစ္စည်းတွေကို အီသာရီယမ် ခရစ်ပတိုဘက်ကို ပြောင်းလဲနေကြပြီး ငွေကြေးခဝါချဖို့ ဆက်လုပ်နေတယ်လို့လည်း ဆိုပါတယ်။
ဒီခိုးယူခံရမှုအတွက် မြောက်ကိုရီးယားမှာ တာဝန်ရှိကြောင်းနဲ့ ဒါဟာ သမိုင်းမှာ အကြီးမားဆုံး ဘဏ္ဍာရေးဆိုင်ရာ ခိုးယူမှု ဖြစ်နိုင်ကြောင်း FBI က သီတင်းပတ်ကုန်မှာ ထုတ်ပြန်ခဲ့ပါတယ်။
Binance ကတော့ ပလက်ဖောင်းကနေ ဆုံးရှုံးသွားတဲ့ ပိုင်ဆိုင်မှု အများစုကို သူတို့ကုမ္ပဏီပိုက်ဆံနဲ့ ပြန်ပြီး ဖြည့်ဆည်းကာမိအောင် လုပ်ထားပြီးပြီလို့ ပြောထားပါတယ်။
ဒါ့အပြင် ဘလော့ခ်ချိန်း သုတေသနကုမ္ပဏီတွေဖြစ်တဲ့ Elliptic ရဲ့ ခန့်မှန်းချက်အရ မြောက်ကိုရီးယားဟာ ဒီတနှစ်တည်းတင် တန်ဖိုးအားဖြင့် ဒေါ်လာ ၇ ဒသမ ၆ ဘီလီယံရှိတဲ့ ခရစ်ပတိုတွေကို ခိုးယူခဲ့ပြီး အရင်နှစ်တွေထက် အများကြီး ပိုများလာပါတယ်။
နောက်ပြီး Chainalysis ရဲ့ စာရင်းတွေအရဆိုရင် ၂၀၂၆ ခုနှစ်အတွင်း ခရစ်ပတို ဟက်ခ်ခံရလို့ ဆုံးရှုံးသမျှရဲ့ ၈၉ ရာခိုင်နှုန်းဟာ မြောက်ကိုရီးယားနဲ့ တိုက်ရိုက်ပတ်သက်နေတယ်လို့ ဆိုပါတယ်။ ၂၀၂၁ တုန်းက ၁၅ ရာခိုင်နှုန်းပဲ ရှိခဲ့တာကနေ အခုလို အများကြီး ခုန်တက်သွားတာပါ။
ဟက်ကင်းတကြိမ်လုပ်ရင် ဆုံးရှုံးမှုပမာဏကလည်း အရင်က ဒေါ်လာ သန်း ၅၀ ကျော်ကနေ အခုဆိုရင် ဒေါ်လာ ၁၈၅ သန်းကျော်အထိ ပိုကြီးလာပြီး အချိန်ပိုပေးရပေမဲ့ အကျိုးအမြတ် အများကြီးထွက်မဲ့ လဲလှယ်ရေးစခန်းကြီးတွေကိုပဲ ဦးတည်ပြီး ဟက်ကာတွေက လက်စွမ်းပြလာကြတယ်လို့ သိရပါတယ်။
Source: Reuters
