ချီလီအာဏာပိုင်တွေဟာ ဇွန် ၂ ရက်မှာ ထရန်းဒေ အာရာဂွါ နိုင်ငံတကာရာဇဝတ်ဂိုဏ်းနဲ့ ဆက်စပ်နေတဲ့ ငွေကြေးခဝါချမှု ကွန်ရက်ကို ဖြိုခွင်းခဲ့ပြီး ဘဏ်ဝန်ထမ်းတယောက် အပါအဝင် သံသယရှိသူ ၁၉ ယောက်ကို ဖမ်းဆီးခဲ့ပါတယ်။

စစ်ဆင်ရေးဟာ ၂၀၂၄ ခုနှစ်မှာ စခဲ့တဲ့ စုံစမ်းစစ်ဆေးမှုရဲ့ ရလဒ်ဖြစ်ပြီး ချီလီ စုံစမ်းစစ်ဆေးရေးရဲတပ်ဖွဲ့ (PDI) နဲ့ ပူးပေါင်းဆောင်ရွက်ခဲ့ပါတယ်။

ရဲအရာရှိတွေက ဆန်တီယာဂိုမြို့တော်က အိမ်အများအပြားနဲ့ မြို့တော်က စန်တန်ဒါ ဘဏ်ခွဲတခုကို ဝင်ရောက်စီးနင်းခဲ့ပြီး ဘဏ်ဝန်ထမ်းတယောက်ကို ဖမ်းဆီးခဲ့ပါတယ်။

အဖမ်းခံရသူတွေဟာ ငွေညှစ်ခြင်း၊ မှောင်ခိုရောင်းဝယ်ခြင်း၊ ငွေကြေးခဝါချခြင်းနဲ့ ရာဇဝတ်မှုဆိုင်ရာ ဆက်စပ်မှု အပါအဝင် စွဲချက်တွေနဲ့ ရင်ဆိုင်ရမှာပါ။

ချီလီ စုံစမ်းစစ်ဆေးရေးရဲတပ်ဖွဲ့ ညွှန်ကြားရေးမှူးချုပ် အက်ဒွါဒို စာနာက ဖမ်းဆီးခံရသူ ၁၉ ယောက်စလုံးဟာ ဗင်နီဇွဲလားနိုင်ငံသားတွေဖြစ်ပြီး တယောက်သာ မူမမှန်တဲ့ လူဝင်မှုကြီးကြပ်ရေး အခြေအနေမှာ ရှိတယ်လို့ အတည်ပြုခဲ့ပါတယ်။

ဖမ်းဆီးခံထားရတဲ့ ဘဏ်ဝန်ထမ်းဟာ ထရန်းဒေ အာရာဂွါ ဂိုဏ်းကိုယ်စား ငွေကြေးလုပ်ငန်းတွေ ဆောင်ရွက်ဖို့ မတူတဲ့ဘဏ်တွေမှာ ငွေစာရင်းတွေ အများကြီး ဖွင့်ထားတယ်လို့ အာဏာပိုင်တွေက ပြောခဲ့ပါတယ်။

တောင်ပိုင်း မက်ထရိုပိုလစ်တန် ရှေ့နေရုံး အကြီးအကဲ ဟက်တာ ဘာရို့စ်က ဒီစစ်ဆင်ရေးမှာ ချီလီနိုင်ငံကနေ တခြားနိုင်ငံတွေဆီကို ခရစ်တိုငွေကြေး ကုမ္ပဏီတခုကနေ တဆင့် ပေးပို့ခဲ့တဲ့ အမေရိကန်ဒေါ်လာ ၈၄ သန်းနီးပါးကို ဖော်ထုတ်တွေ့ရှိခဲ့တယ်လို့ ပြောပါတယ်။

စုံစမ်းစစ်ဆေးမှုနဲ့ အပြည့်အဝ ပူးပေါင်းဆောင်ရွက်နေပြီး ဥပဒေချိုးဖောက်တဲ့ အပြုအမူတိုင်းကို လုံးဝသည်းခံမှာ မဟုတ်ဘူးလို့ စန်တန်ဒါဘဏ်က ကြေညာချက်တစောင် ထုတ်ပြန် ပြောဆိုပါတယ်။

ထရန်းဒေ အာရာဂွါဂိုဏ်းဟာ ဗင်နီဇွဲလားထောင်တွေမှာ စတင်ခဲ့တာပါ။ အဲဒီအချိန်ကစပြီး လက်တင်အမေရိကတလွှားမှာ အလျှင်အမြန် တိုးချဲ့လာခဲ့ပြီး ကိုလံဘီယာ၊ ပီရူး၊ ချီလီနဲ့ တခြားနိုင်ငံတွေမှာ လှုပ်ရှားနေပါတယ်။

အမေရိကန်ပြည်ထောင်စုက ပြီးခဲ့တဲ့နှစ်က အဲဒီဂိုဏ်းကို အကြမ်းဖက်အဖွဲ့အစည်းတခုအဖြစ် သတ်မှတ်ခဲ့ပါတယ်။

Source: Reuters