မန်ယူနည်းပြဟောင်း မော်ရင်ဟိုဟာ ၂၀၁၃ ခုနှစ်တုန်းက ဂန္ထဝင်နည်းပြကြီး ဆာအဲလက်စ် ဖာဂူဆန် နေရာမှာ အစားထိုးဖို့ သဘောတူခဲ့ဖူးကြောင်း အခုမှ ဖွင့်ဟ ပြောကြားလိုက်ပါတယ်။
ဒါပေမဲ့ သူဟာ နောက်ပိုင်းမှာ စိတ်ပြောင်းပြီး ချဲလ်ဆီးအသင်းကို ပြန်လည်ကိုင်တွယ်ခဲ့တာပါ။
ဖာဂူဆန် ကိုယ်တိုင်ကလည်း မော်ရင်ဟိုကို အလုပ်ကမ်းလှမ်းခဲ့ကြောင်းနဲ့ သူလက်ခံခဲ့ကြောင်း အတည်ပြုခဲ့ပါတယ်။ ဒါပေမဲ့ နာရီပိုင်းအတွင်းမှာပဲ မော်ရင်ဟိုရဲ့ ဆုံးဖြတ်ချက် ပြောင်းလဲသွားခဲ့တာပါ။
မော်ရင်ဟိုဟာ ဖာဂူဆန်ကို ဖုန်းဆက်ပြီး ချဲလ်ဆီးကို ကတိပေးထားတာကြောင့် မန်ယူကို မကိုင်တွယ်နိုင်ကြောင်း ငိုကြွေးပြီး ပြောခဲ့တယ်လို့ ဖာဂူဆန်က ဆိုပါတယ်။
မော်ရင်ဟိုကတော့ ရီးရဲလ်မက်ဒရစ်က ထွက်လာပြီးနောက် ချစ်ခြင်းမေတ္တာကို ခံစားချင်ခဲ့တာကြောင့် နှလုံးသားနဲ့ ဆုံးဖြတ်ခဲ့တာပါလို့ ရှင်းပြပါတယ်။
မန်ယူနည်းပြနေရာကို လက်လွှတ်ခဲ့ရတာဟာ သူ့အတွက် ခက်ခဲခဲ့ပေမဲ့ နောင်တမရဘူးလို့လည်း ပြောပါတယ်။ သူဟာ ၂၀၁၆ ခုနှစ်မှာတော့ မန်ယူကို ကိုင်တွယ်ခွင့်ရခဲ့ပါတယ်။
