ချင်းပြည်နယ် ပလက်ဝမြို့နယ်ရှိ မရာနယ်မြေ အုပ်ချုပ်ရေးကောင်စီနဲ့ မရာလဲန်း ကာကွယ်ရေးတပ်ဖွဲ့ (MTC/MDF) ရဲ့ သင်တန်းကျောင်းကို စစ်အာဏာရှင်တပ်က ဗုံးကြဲတိုက်ခိုက်ခဲ့တာကြောင့် သင်တန်းသား ၄ ယောက် သေဆုံးပြီး ၇ ယောက်ထက်မနည်း ထိခိုက်ဒဏ်ရာ ရရှိသွားတယ်လို့ ချင်းပြည် စစ်ရေးသတင်းရင်းမြစ်တွေဆီက သိရပါတယ်။
ပလက်ဝနဲ့ ဆိုင်းဟာနယ်စပ်ဒေသ မရာနယ်မြေအတွင်းရှိ MTC/MDF သင်တန်းကျောင်းတခုကို ဩဂုတ် ၂၅ ရက် ညနေပိုင်းမှာ စစ်အာဏာရှင်တပ်က လေကြောင်းကနေ ဗုံးကြဲတိုက်ခိုက်ခဲ့တာလို့ စစ်ရေးသတင်းရင်းမြစ်တယောက်က ပြောပါတယ်။
“အိန္ဒိယနယ်စပ် မရာအုပ်ချုပ်ရေးနယ်မြေထဲမှာရှိတဲ့ MTC/MDF ရဲ့ စစ်သင်တန်းကျောင်းတခုကို မနေ့ည စစ်တပ်က ဗုံးကြဲတိုက်ခိုက်သွားတာရှိတယ်။ သင်တန်းသား ၄ ဦး သေဆုံးမှုရှိပြီးတော့ ထိခိုက်ဒဏ်ရာရရှိသူလည်း ၇ ဦးထက်မနည်း ရှိတယ်လို့ သိထားရတယ်။ လက်ရှိမှာတော့ ဒဏ်ရာရရှိသူတွေကို ဆေးကုသမှုခံယူဖို့ လုံခြုံတဲ့နေရာတွေကို ပို့ဆောင်ထားတယ်။”
MTC/MDF သင်တန်းကျောင်းကို စစ်အာဏာရှင်တပ်က မနေ့ည ၁၁ နာရီကျော်မှာ လေကြောင်းတိုက်ခိုက်ခဲ့တာဖြစ်ပြီး စစ်တပ်က ဂျက်တိုက်လေယာဉ် အနည်းဆုံး ၂ စင်းလောက်နဲ့ ဗုံးကြဲတိုက်ခိုက်သွားတယ်လို့ သိရပါတယ်။
မရာနယ်မြေ အုပ်ချုပ်ရေးကောင်စီနဲ့ မရာလဲန်း ကာကွယ်ရေးတပ်ဖွဲ့ (MTC/MDF) ဟာ ချင်းညီနောင် (CB) အဖွဲ့ဝင်ဖြစ်ပြီး အာရက္ခတပ်တော် (AA) နဲ့လည်း မဟာမိတ်ဆက်ဆံရေးရှိကာ ချင်းပြည်တောင်ပိုင်းက မြို့သိမ်းတိုက်ပွဲတွေမှာ မဟာမိတ်တွေနဲ့ ပူးပေါင်းတိုက်ပွဲဝင်ခဲ့တဲ့ တော်လှန်ရေးအင်အားစု ဖြစ်ပါတယ်။
လက်ရှိမှာ ချင်းညီနောင်အဖွဲ့ဝင်တွေ ထိန်းချုပ်ထားတဲ့ ချင်းပြည်တောင်ပိုင်းရှိ မင်းတပ်နဲ့ ကန်ပက်လက်မြို့နယ်တွေကို စစ်အာဏာရှင်တပ်က မေလကတည်းက ထိုးစစ်ဆင် တိုက်ခိုက်နေတာ ဖြစ်ပါတယ်။
ဩဂုတ်လအတွင်းမှာတင် စစ်အာဏာရှင်တပ်က ပလက်ဝမြို့နယ်ကို လေကြောင်းတိုက်ခိုက်မှု ၄ ကြိမ်ထက်မနည်း ပြုလုပ်ခဲ့ပြီး အရပ်သား ထိခိုက်သေဆုံးသူ ၆ ယောက်နဲ့ ထိခိုက်ဒဏ်ရာရရှိသူ ၂၈ ယောက်အထိ ရှိလာနေတာလည်း ဖြစ်ပါတယ်။
