ပဲခူးတိုင်း၊ ပဲခူးမြို့နယ်မှာ စက်သုံးဆီဝယ်ယူလိုပါက စက်သုံးဆီ ထုတ်ယူခွင့်စာအုပ် လုပ်ရမှာဖြစ်ပြီး အဆိုပါစာအုပ်နဲ့သာ ဝယ်ယူခွင့်ရမှာ ဖြစ်တယ်လို့ စစ်ကောင်စီလက်အောက်ခံ မြို့နယ်အထွေထွေအုပ်ချုပ်ရေးဦးစီးဌာနက မတ် ၂၁ ရက်မှာ ကြေညာထားတယ်လို့ မြို့ခံတွေဆီက သိရပါတယ်။
မတ် ၂၁ ရက်က မြို့နယ်ထွေအုပ်ရဲ့ ညွှန်ကြားချက်အရ ပဲခူးမြို့နယ်အတွင်းရှိ ရပ်ကွက်နဲ့ ကျေးရွာတွေမှာ ယာဥ်စာရင်း လိုက်လံကောက်ယူနေပြီး ပေးရတဲ့အချက်အလက်တွေ ကွဲပြားမှုတွေ ရှိတယ်လို့ မဇင်းရပ်ကွက်နေသူတယောက်က DVB ကို ပြောပါတယ်။
“မနေ့ကတည်းက စက်သုံးဆီဝယ်ယူခွင့်စာအုပ် လုပ်ရမယ်ဆိုပြီး ကြေညာတာ၊ စာအုပ်အတွက် အုပ်ချုပ်ရေးမှူးရုံးမှာ စာရင်းသွားပေးရတယ်။ ယာဉ်လိုင်စင်မိတ္တူ၊ မှတ်ပုံတင်မိတ္တူ ပေးရတယ်။ ကုန်ကျစရိတ်က ကျပ် ၈,၀၀၀ ကနေ ၁၀,၀၀၀ ကြား ကုန်တယ်။”
ပဲခူးမြို့ပေါ်ရပ်ကွက်တွေမှာ ယာဥ်လိုင်စင်မိတ္တူနဲ့ မှတ်ပုံတင်ပဲ ပေးရပေမဲ့ ကျေးရွာဘက်တွေမှာတော့ အိမ်ထောင်စုစာရင်းနဲ့ ယာဥ်ပိုင်ရှင်ဖြစ်ကြောင်း ထောက်ခံစာတွေပါ ပေးရတယ်လို့ ကလိကျေးရွာနေသူတယောက်က DVB ကို ပြောပါတယ်။
“တနေရာနဲ့ တနေရာ မတူဘူး။ ရပ်ကွက်တွေမှာ Wheel Tax နဲ့ မှတ်ပုံတင်မိတ္တူပဲ ပေးရတယ်။ ရွာဘက်တွေမှာဆို Wheel Tax၊ မှတ်ပုံတင်မိတ္တူအပြင် အိမ်ထောင်စာရင်းနဲ့ ယာဥ်ပိုင်ဆိုင်ကြောင်း အုပ်ချုပ်ရေးက ထောက်ခံစာပါပေးရတယ်။”
စက်သုံးဆီထုတ်ယူခွင့်စာအုပ်ကို ရပ်ကျေးအုပ်ချုပ်ရေးနဲ့ မြို့နယ်ထွေအုပ်က ပြုလုပ်ပေးတာ မဟုတ်ဘဲ စွမ်းအင်ဝန်ကြီးဌာနက ထုတ်ပေးတာဖြစ်တယ်လို့ ပဲခူးမြို့နယ် ထွေအုပ်နဲ့ နီးစပ်တဲ့ သတင်းအရင်းအမြစ်က DVB ကို ပြောပါတယ်။
“ရပ်ကွက်နဲ့ ကျေးရွာ အုပ်ချုပ်ရေးက အချက်အလက်တွေ စုပြီး မြို့နယ်ထွေအုပ်ကို ပို့ပေးတယ်။ မြို့နယ်ထွေအုပ်က စွမ်းအင်ဝန်ကြီးဌာနကို တင်ပေးရတာ။ သူတို့ကနေ စာအုပ်လုပ်ပေးပြီး ထွေအုပ်ကိုပေး၊ ထွေအုပ်ကတဆင့် ရပ်ကွက်နဲ့ ကျေးရွာကို ပြန်ပေးမှာ။ ပြောရရင် ကျနော်တို့က ကြားခံသဘောမျိုး။”
စက်သုံးဆီပြတ်လပ်မှု ပြဿနာနဲ့ ရင်ဆိုင်လာရတဲ့ စစ်ကောင်စီတပ် အနေနဲ့လည်း မနေ့ညက Non CDM ဝန်ထမ်းတွေကို မတ် ၂၅ ရက်ကစပြီး အပတ်စဥ် ဗုဒ္ဓဟူးနေ့တိုင်း ရုံးမတက်ဘဲ နေအိမ်ကနေ အလုပ်လုပ်ဖို့ အမိန်ထုတ်ခဲ့သလို စက်စွမ်းအားပေါ်မူတည်ပြီး ယာဥ်တွေကို တပတ်ကိုတကြိမ် ဒါမှမဟုတ် ၂ ကြိမ်သာ ရောင်းချပေးသွားတော့မယ်လို့ ကြေညာထားပါတယ်။
အရှေ့အလယ်ပိုင်းမှာ ဖြစ်နေတဲ့ စစ်ရေးပဋိပက္ခတွေကြောင့် မတ် ၃ ရက်မှာ စစ်ကောင်စီက စုံနဲ့ မ စနစ်ကို သတ်မှတ်ခဲ့ပြီး စက်သုံးဆီခွဲတမ်းကို QR နဲ့ စကန်ဖတ်ပြီး ရောင်းချဖို့ ညွှန်ကြားခဲ့ပေမဲ့ ဆီဆိုင်တွေမှာ Wheel Tax QR ကုတ်ကို စကန်ဖတ်မရလို့ ဆီမထုတ်ရတဲ့ ပြဿနာတွေကို အခုချိန်ထိ ရင်ဆိုင်နေရပါတယ်။
