မီရှီဂန်ပြည်နယ်ကိုယ်စားပြု အမေရိကန် ဆီးနိတ် အထက်လွှတ်တော် အမတ်နေရာအတွက် ဒီမိုကရက်တစ်ပါတီ အကြိုရွေးကောက်ပွဲမှာ လက်ဝဲယိမ်း ကိုယ်စားလှယ်လောင်း အဗ္ဗဒူလ် အယ်လ်ဆေယက် အနိုင်ရသွားပါတယ်။
ပြည်သူ့ကျန်းမာရေးအရာရှိဟောင်း အယ်လ်ဆေယက်က သဘောထား အလယ်အလတ်ရှိတဲ့ အောက်လွှတ်တော်အမတ် ဟေလီ စတီဗင်စ်ကို မဲအနည်းငယ်နဲ့ အနိုင်ရခဲ့တာပါ။
ဒီရလဒ်ဟာ ဒီမိုကရက်တစ်ပါတီရဲ့ အနာဂတ်ဦးတည်ချက်နဲ့ ပတ်သက်ပြီး လက်ဝဲယိမ်းနဲ့ အလယ်အလတ်အုပ်စုကြား သဘောထားကွဲမှုကို ထင်ရှားစေပါတယ်။
အယ်လ်ဆေယက်က လူတိုင်းအတွက် ကျန်းမာရေးစောင့်ရှောက်မှု၊ ဆေးဝါးဈေးလျှော့ချရေးနဲ့ နိုင်ငံရေးမှာ ငွေကြေးသြဇာ လျှော့ချရေးနဲ့ မဲဆွယ်ခဲ့ပါတယ်။
အစ္စရေးကို အမေရိကန် စစ်ရေးအကူအညီ ခြွင်းချက်မရှိ ပေးနေတာကိုလည်း ရပ်တန့်ဖို့ သူက ထောက်ခံပါတယ်။
စတီဗင်စ်ကတော့ ဒီမိုကရက်တစ်ပါတီ ခေါင်းဆောင်ပိုင်းနဲ့ အစ္စရေး လိုလားတဲ့ အဖွဲ့တွေရဲ့ ထောက်ခံမှု ရရှိခဲ့ပါတယ်။
အယ်လ်ဆေယက်ဟာ နိုဝင်ဘာ ကြားဖြတ်ရွေးကောက်ပွဲမှာ ရီပတ်ဘလီကန်အမတ်လောင်း မိုက်ခ် ရော်ဂျာစ်နဲ့ ယှဉ်ပြိုင်ရမှာပါ။
ဒီအမတ်နေရာဟာ အထက်လွှတ်တော်ကို ဘယ်ပါတီ ထိန်းချုပ်မလဲဆိုတာ အဆုံးအဖြတ်ပေးနိုင်တဲ့ အရေးပါတဲ့နေရာတခု ဖြစ်ပါတယ်။
အယ်လ်ဆေယက် အနိုင်ရရင် အထက်လွှတ်တော်ရဲ့ ပထမဆုံး မွတ်စလင်အမတ် ဖြစ်လာမှာပါ။
မီရှီဂန်ဟာ ၂၀၂၀ ရွေးကောက်ပွဲမှာ ဂျိုးဘိုင်ဒင်ကို ရွေးချယ်ခဲ့ပေမဲ့ ၂၀၂၄ မှာ ဒေါ်နယ်ထရမ့်ပ်ကို မဲပေးခဲ့တဲ့ အဓိက အပြောင်းအလဲရှိ ပြည်နယ်တခု ဖြစ်ပါတယ်။
