ဖာပွန်ခရိုင်ထဲမှာ စစ်တပ်ကဗုံးကြဲလို့ လူ ၄ ယောက်သေဆုံးပြီး ကျောက်ကြီးမြို့နယ်မှာလည်း ဗုံးကြဲနေတာကြောင့် ရွာ ၄ ရွာက ဒေသခံတွေ ထွက်ပြေးတိမ်းရှောင်နေရပါတယ်။
ဧပြီ ၁၅ ရက်နဲ့ ၁၆ ရက်က ဖာပွန်ခရိုင်၊ လူသောမြို့နယ်က ခင်ပါရွာကို စစ်တပ်က လေကြောင်း ကနေ အပြင်းအထန်တိုက်ခိုက်ခဲ့သလို ဗုံးပါကြဲခဲ့တာကြောင့် စာသင်ကျောင်းနဲ့ နေအိမ်တွေ ပျက်စီးခဲ့တယ်လို့ ကရင်ပညာရေးနဲ့ ယဉ်ကျေးမှုဌာနက ဧပြီ ၁၇ ရက် မှာ ထုတ်ပြန်ပါတယ်။
တိုက်လေယာဉ် ၂ စင်း၊ Y-12 လေယာဉ် ၂ စင်းတို့နဲ့ ရွာပေါ်ကို ဗုံးအလုံး ၅၀ ကျော် ကြဲချခဲ့တာပါ။
စစ်တပ်ရဲ့ တိုက်ခိုက်မှုကြောင့် ရွာက အလယ်တန်းကျောင်း လုံးဝ ပျက်စီးသွားသလို နေအိမ်တွေ လည်း မီးလောင်ပျက်စီးခဲ့ပါတယ်။
ပြီးတော့ ဒေသခံ ၄ ယောက် သေဆုံးပြီး ၁၀ ယောက်ကျော်ဒဏ်ရာရခဲ့တယ်လို့လည်း ဒေသခံ တွေဆီက သိရပါတယ်။
ကရင်အမျိုးသားအစည်းအရုံး KNU အုပ်ချုပ်နယ်မြေဖြစ်တဲ့ ညောင်လေးပင်ခရိုင်၊ ကျောက်ကြီးမြို့နယ်မှာ စစ်တပ်က လေကြောင်းကနေ တိုက်ခိုက်နေတာကြောင့် ရွာ ၄ ရွာက ဒေသခံ ၆၀၀ ကျော် ထွက်ပြေးတိမ်းရှောင်နေရတယ်လို့ KNU ဗဟိုက ဧပြီ ၁၇ ရက်မှာ ထုတ်ပြန်ပါတယ်။
ဝါကေဒဲရွာနဲ့ လယ်ဆူခိုရွာအနီးကို ဗုံးကြဲတိုက်ခိုက်ခဲ့တာကြောင့် အဲဒီရွာတွေအပါအဝင် အနီးက ကိုထာရွာနဲ့ ကဒူးမူဒဲရွာတွေက အိမ်ထောင်စု ၈၄ စု၊ လူ ၆၀၂ ယောက်လောက် ဘေးလွတ်ရာကို ထွက်ပြေးနေကြရပါတယ်။
စစ်ဘေးရှောင်တွေဟာ စိုးရိမ်နေကြရပြီး အရေးပေါ် စားနပ်ရိက္ခာနဲ့ ဆေးဝါးအကူအညီတွေ လိုအပ်နေတယ်လို့ KNU ထုတ်ပြန်ချက်မှာ ဖော်ပြထားပါတယ်။
