အမေရိကန်နိုင်ငံ၊ နယူးယောက်ပြည်နယ်မှာ ဝက်သက်ရောဂါဖြစ်ပွားမှု မြင့်တက်လာလို့ ပြည်နယ်တဝန်း ဘေးအန္တရာယ်ဆိုင်ရာ အရေးပေါ်အခြေအနေကို ပြည်နယ်အုပ်ချုပ်ရေးမှူး ကက်သီ ဟိုချူးလ်က အောက်တိုဘာလ ၅ ရက်မှာ  ကြေညာခဲ့ပါတယ်။

ဒါဟာ ၂၀၂၅ ခုနှစ်မှာ ရောဂါဖြစ်ပွားမှုတွေ စမြင့်တက်လာပြီးနောက်ပိုင်း အမေရိကန်ပြည်နယ်တခုက ပထမဆုံးအကြိမ်အဖြစ် ကြေညာချက်ထုတ်ပြန်ခဲ့တာပါ။

ကျေးလက်ဒေသတွေမှာ ရောဂါဖြစ်ပွားမှုတွေ မြင့်တက်လာနေလို့ ဝက်သက်-ပါရာတိုက်တစ်စ် (mumps)၊ ဂျာမန်ဝက်သက် (rubella) (MMR) ကာကွယ်ဆေး ထိုးနှံပေးခွင့်ရှိတဲ့ ကျန်းမာရေးပညာရှင် အရေအတွက်ကိုလည်း ပြည်နယ်အစိုးရက တိုးမြှင့်သတ်မှတ်ခဲ့ပါတယ်။

ရောဂါဖြစ်သူတွေထဲက ၇ ယောက်က  နယူးယောက်မြို့မှာရှိပြီး ၁၀၁ ယောက်က ပြည်နယ်ထဲက တခြားဒေသတွေမှာ ရှိနေတယ်လို့ ပြည်နယ်အုပ်ချုပ်ရေးမှူးရုံးက ပြောပါတယ်။

ဇူလိုင် ၁၅ ရက်ကစပြီး ကျေးလက်ဒေသတွေက ဒေသခံကျန်းမာရေးဌာနတွေက MMR ကာကွယ်ဆေးအလုံးရေ ၁,၀၀၀ ကျော်ကို ထိုးနှံပေးခဲ့ပြီးပါပြီ။

အိမ်နီးချင်း ပင်ဆယ်ဗေးနီးယားပြည်နယ်မှာလည်း ရောဂါကူးစက်မှု မြန်နေပြီး၊ အောက်တိုဘာ ၂ ရက်အထိ ရောဂါဖြစ်ပွားသူ ၉၇၇ ယောက်နဲ့ သေဆုံးသူ ၅ ယောက်ရှိခဲ့တာပါ။ 

သူတို့ထဲက အများစုဟာ နယူးယောက် ပြည်နယ်နဲ့ နယ်နိမိတ်ချင်းထိစပ်နေတဲ့ ကျေးလက်ခရိုင်တွေက ဖြစ်တယ်လို့ ညွှန်ကြားချက်ထဲမှာ ဖော်ပြထား ပါတယ်။

ပင်ဆယ်ဗေးနီးယားပြည်နယ်မှာတော့ စုစုပေါင်းရောဂါဖြစ်ပွားသူ အရေအတွက်က အယောက် ၁,၀၀၀ ကျော်သွားပြီး လွန်ခဲ့တဲ့ နှစ် ၃၀ ကျော် ကာလအတွင်း ပြည်နယ်တခုမှာ ဖြစ်ခဲ့တဲ့ အကြီးမားဆုံးသော ရောဂါဖြစ်ပွားမှုလို့ ပြည်နယ်ကျန်းမာရေးအရာရှိတွေက ပြောပါတယ်။

ရောဂါထိန်းချုပ်ရေးနဲ့ ကာကွယ်ရေးစင်တာ (CDC)ရဲ့ အချက်အလက်တွေအရ အမေရိကန်ပြည်ထောင်စုမှာ ဝက်သက်ရောဂါဖြစ်ပွားသူ ၃,၉၀၀ နီးပါးရှိခဲ့ပြီး ၁၉၉၁ ခုနှစ်နောက်ပိုင်း အဆိုးရွားဆုံးသော ဝက်သက်ရောဂါဖြစ်တဲ့ နှစ်အဖြစ် မှတ်တမ်းဝင်ခဲ့ပါတယ်။

Source: Reuters