တရုတ်သမ္မတ ရှီကျင့်ဖျင်ရဲ့ ကိုင်ရိုခရီးစဉ်အတွင်း စက်တင်ဘာ ၂ ရက်က အီဂျစ်နဲ့ တရုတ် အစိုးရတို့ဟာ  စီးပွားရေး ပူးပေါင်းဆောင်ရွက်မှုနဲ့ နည်းပညာအပါအဝင် ကဏ္ဍအမြောက်အမြားမှာ သဘောတူညီချက်တွေနဲ့ နားလည်မှုစာချွန်လွှာတွေ အများအပြားကို လက်မှတ်ရေးထိုးခဲ့ပါတယ်။

ရှီရဲ့ သမ္မတသက်တမ်း ၄ နှစ်အတွင်း အရှေ့အလယ်ပိုင်းဆီ ပထမဆုံးခရီးစဉ်လည်း ဖြစ်ပါတယ်။

ကုန်သွယ်ရေးကို အနှောင့်အယှက်ဖြစ်စေခဲ့ပြီး စီးပွားရေးတွေကို တုန်လှုပ်စေခဲ့တဲ့ အမေရိကန် အစိုးရရဲ့ ရေရှည်အခန်းကဏ္ဍနဲ့ ပတ်သက်ပြီး မေးခွန်းထုတ်စရာတွေ ပေါ်ခဲ့တဲ့ လပေါင်းများစွာ ကြာနေတဲ့ ပဋိပက္ခတွေ ပြီးသွားတဲ့နောက် ဒေသတွင်းက အမေရိကန်မိတ်ဖက်တွေဟာ သူတို့ရဲ့ မဟာဗျူဟာမြောက် ဆက်ဆံရေးကို ပြန်အကဲဖြတ်နေချိန်မှာ ရှီရဲ့ခရီးစဉ် ပေါ်လာတာလည်း ဖြစ်ပါတယ်။

အမေရိကန်ရဲ့ အဓိကကာကွယ်ရေးမိတ်ဖက်နိုင်ငံတခုဖြစ်တဲ့ အီဂျစ်နိုင်ငံဟာ အမေရိကန် အစိုးရဆီကနေ နှစ်စဉ် စစ်ရေးအကူအညီ ဒေါ်လာ ၁ ဒသမ ၃ ဘီလီယံလောက်ကို ရနေပြီး မကြာသေးမီနှစ်တွေအတွင်း တရုတ်နိုင်ငံနဲ့အတူ စီးပွားရေးနဲ့ စစ်ရေး ပူးပေါင်းဆောင်ရွက်မှုကို တိုးမြှင့်နေပါတယ်။

ခေါင်းဆောင်တွေဟာ လုံခြုံရေး ပူးပေါင်းဆောင်ရွက်မှုနဲ့ အကြမ်းဖက်မှုတိုက်ဖျက်ရေး ညှိနှိုင်း ဆောင်ရွက်မှုကို နက်ရှိုင်းစေဖို့ သဘောတူခဲ့ကြတယ်လို့ ဆင်ဟွာ သတင်းဌာနက ပြောပါတယ်။

ပူးတွဲကြေညာချက်တခုအရ ဒေတာစင်တာတွေ၊ တပိုင်းလျှပ်ကူးပစ္စည်းတွေနဲ့ အရေးကြီးတဲ့ သတ္တုထောက်ပံ့ရေးကွင်းဆက်တွေမှာ ပူးပေါင်းဆောင်ရွက်မှုကို တိုးချဲ့ဖို့၊ ကုန်သွယ်ရေးနဲ့ ရင်းနှီးမြှုပ်နှံမှုမှာ အပြန်အလှန် ငွေကြေးအသုံးပြုမှုကို အားကောင်းစေဖို့ နှစ်ဖက်စလုံးက သဘောတူခဲ့ကြပါတယ်။

Source: Reuters