ပေါ်တူဂီအသင်းခေါင်းဆောင် အသက် ၄၁ နှစ်အရွယ် စီရော်နယ်ဒိုက သူ့ရဲ့ အကောင်းဆုံးအချိန်ကို ကျော်သွားပြီဆိုပေမဲ့ ပွဲရလဒ်ကို ပြောင်းလဲပေးနိုင်တဲ့ ကစားသမားတယောက် ဖြစ်နေတုန်းပဲလို့ စပိန်ဂိုးသမား ယူနိုင်းဆီမွန်က ပြောပါတယ်။
စပိန်ဂိုးသမား ယူနိုင်းဆီမွန်က ပေါ်တူဂီနဲ့ ကမ္ဘာ့ဖလား ၁၆ သင်းအဆင့်ပွဲမတိုင်ခင် သတင်းစာ ရှင်းလင်းပွဲမှာ ပြောဆိုခဲ့တာပါ။
စပိန်နဲ့ ပေါ်တူဂီတို့ဟာ တနင်္လာနေ့မှာ တက္ကဆက်မှာ ထိပ်တိုက်တွေ့ဆုံကြမှာဖြစ်ပြီး ဒီပွဲက ပြီးခဲ့တဲ့နှစ် Nations League ဗိုလ်လုပွဲကို ပြန်လည်ယှဉ်ပြိုင်ရသလို၊ ရော်နယ်ဒိုနဲ့ လူငယ်ကြယ်ပွင့် လာမိန်းယာမဲလ်တို့ရဲ့ မျိုးဆက်ချင်း အားပြိုင်ပွဲလည်း ဖြစ်လာမှာပါ။
ပြီးခဲ့တဲ့ Nations League ဗိုလ်လုပွဲမှာ ဒီ ၂ သင်းက ( ၂-၂ ) ဂိုး သရေကျခဲ့ပြီး ပင်နယ်တီအဆုံးအဖြတ်မှာ ပေါ်တူဂီက အနိုင်ရခဲ့တာကြောင့် စပိန်အသင်းရဲ့ ချန်ပီယံဘွဲ့ကို ကာကွယ်နိုင်ရေးအိပ်မက် ပျက်သွားခဲ့ပါတယ်။
ဆီမွန်ကတော့ ရော်နယ်ဒိုကို ဂိုးဧရိယာထဲ မဝင်လာနိုင်အောင် အတတ်နိုင်ဆုံး ထိန်းချုပ်ရမယ်လို့ ပြောခဲ့ပြီး၊ ပေါ်တူဂီရဲ့ အားကောင်းတဲ့ ဘယ်တောင်ပံကို ကာကွယ်ရာမှာ လာမိန်းယာမဲလ်လည်း အသင်းအတွက် သူ့ရဲ့တာဝန်ကို ကောင်းကောင်းထမ်းဆောင်နိုင်မယ်လို့ ယုံကြည်ကြောင်း ဆိုပါတယ်။
စပိန်ဂိုးသမားဟာ ကမ္ဘာ့ဖလားမှာ ၄ ပွဲဆက်တိုက် ဂိုးမပေးဘဲ ကစားနိုင်ခဲ့ပြီး အီတလီဂိုးသမား ဝေါလ်တာ ဇင်ဂါရဲ့ စံချိန်ကို ကျော်ဖြတ်နိုင်ထားပါတယ်။
