အာဏာသိမ်း စစ်အုပ်စုက သယ်ယူပို့ဆောင်ရေး လေယာဉ်အုပ်စုတစုတည်းအတွက် ၃ လအတွင်း လေယာဉ်ဆီဂါလန် ၂ သန်းနီးပါး သုံးစွဲခဲ့တဲ့အကြောင်း Blood Money သွေးစွန်းငွေအဖွဲ့က မတ် ၂၃ ရက်မှာ ထုတ်ပြန်ထားပါတယ်။

၂၀၂၅ ခုနှစ်၊ ဇွန် ၁၆ ရက်ကနေ စက်တင်ဘာ ၁၆ ရက်အထိ လေ့လာတွေ့ရှိချက်အရ ၃ လအတွင်းမှာ စစ်အုပ်စုက လေယာဉ်ဆီ IG ၁ ဒသမ ၈ သန်းကျော် သုံးစွဲခဲ့ပြီး ကုန်ကျငွေပမာဏ အမေရိကန်ဒေါ်လာ ၃ ဒသမ ၉ သန်း ကျော် ရှိခဲ့တာလို့ ဆိုပါတယ်။

သယ်ယူပို့ဆောင်ရေးလေယာဉ်တွေ ဆိုပေမဲ့ စစ်အုပ်စုကတော့ ပေါင် ၃၀၀၊ ပေါင် ၅၀၀ ဗုံးတွေ ကြဲချဖို့ရော လေ့ကျင့်ရေးအတွက်ရော အသုံးပြုတာဖြစ်သလို စစ်အုပ်စုမှာ သယ်ယူပို့ဆောင်ဖို့နဲ့ ဗုံးကြဲချနိုင်ဖို့ Y-8, Y-12, ATR-42, ATR-72, Fokker-70 တို့ရှိကြပြီး လေ့ကျင့်ဖို့အတွက် Beechcraft 1900, Grob G-120, Let L-410 တို့ရှိကြပါတယ်။ 

ဒီလေယာဉ်တွေဟာလည်း Jet A-1 လို့ခေါ်တဲ့ လေယာဉ်ဆီကို အသုံးပြုကြရတာဖြစ်တယ်လို့ Blood Money - သွေးစွန်းငွေအဖွဲ့က ပြောထားပါတယ်။

သယ်ယူပို့ဆောင်ရေးနဲ့ ဗုံးကြဲချနိုင်တဲ့ အုပ်စုမှာတော့ လေယာဉ်ဆီအသုံးအများဆုံးက Y-8 ဖြစ်ပြီး တနာရီကို ပျမ်းမျှ ၈၀၀ IG သုံးစွဲရပါတယ်။ Fokker-70 က ၇၀၀ IG, ATR 42/72 အမျိုးအစား လေယာဉ်တွေကတော့ ၂၂၀ IG သုံးစွဲရပြီး Y-12 တို့ကတော့ ၁၉၀ IG သုံးစွဲရတယ်လို့ ဆိုပါတယ်။

သယ်ယူပို့ဆောင်ရေးရော လေ့ကျင့်ရေးမှာပါ အသုံးပြုနိုင်တဲ့ Beechcraft-1900 နဲ့ Let L-410 တို့ကတော့ တနာရီကို ၁၈၅ IG သုံးစွဲရပြီး Grob G-120 ကတော့ တနာရီကို ၉၀ IG သုံးစွဲရတယ်လို့ ဆိုပါတယ်။

ဒါကြောင့် လေကြောင်းဗုံးကြဲတိုက်ခိုက်မှုတခုကို မြင်တဲ့အခါ ဗုံးကြဲတဲ့လေယာဉ်ကိုသာ မြင်ရပေမဲ့ နောက်ကွယ်မှာတော့ ဒီလို သယ်ယူပို့ဆောင်ရေးလေယာဉ်တွေ၊ လောင်စာဆီနဲ့ ထောက်ပံ့ရေးစနစ် တခုလုံးက အတူတကွ လည်ပတ်နေကြတာလို့ Blood Money - သွေးစွန်းငွေအဖွဲ့က ပြောပါတယ်။

သယ်ယူပို့ဆောင်ရေးလေယာဉ်အုပ်စုဟာ တနာရီကို အနည်းဆုံး ဆီဂါလန် ၉၀ IG ကနေ အများဆုံး ၈၀၀ IG ထိ သုံးစွဲရတာကြောင့် အမေရိကန်ဒေါ်လာ ၂၀၀ ကနေ ၁၈၀၀ ကြား ကုန်ကျနေတာ ဖြစ်ပါတယ်။

လေယာဉ်တမျိုးချင်း ပြန်ကြည့်ရမယ်ဆိုရင် တနာရီ ပျံသန်းနိုင်ဖို့အတွက် Y-8 က ဒေါ်လာ ၁,၇၂၀၊ Fokker-70 က ဒေါ်လာ ၁,၅၀၀၊ ATR တွေက ဒေါ်လာ ၅၀၀၊ Y-12 က ဒေါ်လာ ၄၁၀၊ Beechcraft နဲ့ L-410 က ၃၉၇ ဒေါ်လာနဲ့ G-120 က ၁၉၄ ဒေါ်လာ စီ အနည်းဆုံး ကုန်ကျတယ်လို့ ဆိုပါတယ်။

ဒီပမာဏဟာ မြန်မာငွေအားဖြင့် ပျမ်းမျှ သိန်း ဆယ်ဂဏန်းကနေ ရာဂဏန်းထိ ကုန်ကျနေတာ ဖြစ်ပါတယ်။

ဒီကုန်ကျမှုဟာ လေယာဉ်ဆီတမျိုးတည်းအတွက်သာဖြစ်ပြီး လေယာဉ်မှာတပ်တဲ့ ဗုံးတွေ၊ လက်နက်တွေ၊ လေယာဉ်ပြုပြင်တာတွေအတွက် အပိုပစ္စည်းတွေ စတဲ့ ကုန်ကျစရိတ်တွေ မပါဝင်သေးဘူးလို့ Blood Money - သွေးစွန်းငွေအဖွဲ့က ပြောပါတယ်။

အခုထုတ်ပြန်ချက်ဟာ အကြမ်းဖက် လေကြောင်း စစ်ဆင်ရေးအတွက် မြန်မာစစ်အုပ်စု အသုံးပြုတဲ့ စစ်လေယာဉ် အုပ်စု ၃ စုက အုပ်စု ၁ စု (သယ်ယူပို့ဆောင်ရေး လေယာဉ်အုပ်စု) အတွက် သုံးစွဲမှုရဲ့ အနည်းဆုံးပျမ်းမျှအပေါ် အခြေခံထားပြီး အရှေ့အလယ်ပိုင်းစစ်မဖြစ်မီ လေယာဉ်ဆီဈေး 1 IG ကို ၂ ဒသမ ၁၅ ဒေါ်လာနှုန်းနဲ့ တွက်ချက်ထားတယ်လို့ ဆိုပါတယ်။

လက်ရှိအချိန်မှာလည်း မြန်မာပြည်တွင်းမှာ အများပြည်သူတွေ လောင်စာဆီ အကျပ်အတည်းနဲ့ ကြုံတွေ့နေကြရပေမဲ့ စစ်ကောင်စီကတော့ ပြည်သူတွေကို ပစ်မှတ်ထားတဲ့ လေကြောင်းတိုက်ခိုက်မှုတွေကို နေ့စဉ်ရက်ဆက်ပြုလုပ်နေပါတယ်။