ဥရောပတဝန်း စံချိန်တင်မြင့်မားတဲ့ အပူချိန်တွေနဲ့အတူ အပူလှိုင်းတွေ ရိုက်ခတ်နေလို့ သေဆုံးသူ အယောက် ၄,၀၀၀ ကျော် ရှိလာပြီး ပြင်သစ်၊ စပိန်၊ ဘယ်လ်ဂျီယံ၊ နယ်သာလန်နဲ့ တခြားနိုင်ငံတွေ သက်ရောက်ခံနေရတယ်လို့ ဒေသခံမီဒီယာတွေက ဖော်ပြပါတယ်။

ပြင်သစ်နိုင်ငံဟာ ပြီးခဲ့တဲ့ သီတင်းပတ်က နှစ်ပေါင်း ၈၀ နီးပါးအတွင်း အမြင့်ဆုံးအပူချိန်ကို ကြုံတွေ့ခဲ့ရပြီး ၂၄ နာရီအတွင်း ပြည်လုံးကျွတ် ပျမ်းမျှအပူချိန်က ၂ ရက်ဆက်တိုက် စံချိန်တင်ခဲ့တာပါ။

ပါရီမြို့တော်နဲ့ တခြားဒေသ အများအပြားမှာ အမြင့်ဆုံးအပူချိန်က ၄၀ ဒီဂရီစင်တီဂရိတ်ထက် ကျော်လွန်ခဲ့ပါတယ်။ 

အပူလှိုင်းကာလအတွင်း သေဆုံးမှု ၂,၀၂၅ ယောက်ကို မှတ်တမ်းတင်ခဲ့တယ်လို့ ပြင်သစ်ကျန်းမာရေးဝန်ကြီး စတက်ဖနီရစ်စ်က ဇူလိုင် ၃ ရက်မှာကြေညာခဲ့ပါတယ်။ 

စပိန်နိုင်ငံမှာလည်း အပူချိန်တွေက သီတင်းပတ်ကုန်ရက်မှာ ဆက်မြင့်တက်နေမယ်လို့ ပြည်နယ်မိုးလေဝသအေဂျင်စီက ခန့်မှန်းထားပါတယ်။

ကုန်းတွင်းပိုင်းဒေသအများစုမှာ အမြင့်ဆုံးအပူချိန်က ၄၀ ကနေ ၄၄ ဒီဂရီစင်တီဂရိတ်အထိ ရောက်ဖို့ မျှော်လင့်ထားပါတယ်။

ဇွန်လမှာ စပိန်နိုင်ငံအတွင်း အပူဒဏ်နဲ့ ဆက်စပ် သေဆုံးမှု ၁,၀၂၈ယောက်ထက် မနည်း ရှိခဲ့ပြီး ၂၀၂၅ ခုနှစ် ဇွန်လမှာ မှတ်တမ်းတင်ထားတဲ့ အရေအတွက်ထက် ၂ ဆကျော် ပိုများတယ်လို့ စပိန်နိုင်ငံ Carlos III ကျန်းမာရေးအင်စတီကျုက အစီရင်ခံစာ ထုတ်ပြန်ခဲ့ပါတယ်။

နယ်သာလန်နဲ့ ဘယ်လ်ဂျီယံနိုင်ငံတို့မှာလည်း အပူချိန်မြင့်မားမှုကြောင့် သေဆုံးမှု ပိုများလာတဲ့ သတင်းတွေ ထွက်ပေါ်ခဲ့ပါတယ်။ 

ဇွန် ၂၂ ရက် ကနေ ၂၈ ရက်အတွင်း နယ်သာလန်မှာ သေဆုံးသူ အယောက် ၄၈၀ ရှိပြီး အဲဒီသီတင်းပတ်မှာ အပူချိန် ၄၀ ဒီဂရီ စင်တီဂရိတ်ထိ နီးကပ်လာလို့ အသက် ၈၀ နဲ့အထက် သက်ကြီးရွယ်အိုတွေ အဆိုးရွားဆုံး ထိခိုက်ခံခဲ့ရတယ်လို့ သတင်း အချက်အလက်တွေက ဆိုထားပါတယ်။ 

ဘယ်လ်ဂျီယံမှာ ဇွန် ၁၈ ရက်ကနေ ၂၉ ရက်အတွင်း သေဆုံးသူ ၁,၂၂၂ ယောက်ကို မှတ်တမ်းတင်ခဲ့ပြီး မျှော်မှန်းထားတဲ့ အခြေခံထက် ၃၀ ရာခိုင်နှုန်းနီးပါး ပိုများခဲ့ပါတယ်။ သေဆုံးသူတွေထဲမှာ အသက် ၈၅ နှစ်နဲ့ အထက်ရှိသူ ၅၃၀ ယောက် ပါဝင်ခဲ့ပါတယ်။ Source: Reuters