ရန်ကုန်ရှိ လူစည်ကားရာ ဗိုလ်ချုပ်အောင်ဆန်းစျေးမှာ လူထုခေါင်းဆောင် ဒေါ်အောင်ဆန်းစုကြည်နဲ့ နိုင်ငံရေးအကျဉ်းသား အားလုံး ခြွင်းချက်မရှိ လွတ်မြောက်ရေးအတွက် FREE HER, FREE THEM ALL စာတန်းကိုင်ဆောင်ပြီး လှုပ်ရှားမှုလုပ်ခဲ့တယ်လို့ ရေဘဝဲ (ပြည်သူ့အကျိုးပြု လူငယ်အဖွဲ့အစည်း) က နိုဝင်ဘာ ၂ ရက်မှာ ထုတ်ပြန်ပါတယ်။

ဒေါ်အောင်ဆန်းစုကြည်ရဲ့ သားငယ် ကင်မ်အဲရစ် (ခ) ကိုထိန်လင်းနဲ့အတူရပ်တည်ပြီး အကြမ်းမဖက် နိုင်ငံရေးနည်းလမ်းတွေနဲ့ စစ်အာဏာရှင်ဆန့်ကျင်ရေး လှုပ်ရှားမှုတွေကို ရန်ကုန်မြို့မှာ ဆက်လက် ဆောင်ရွက်သွားမယ်လို့လည်း ဆိုပါတယ်။

ရေဘဝဲဟာ လူငယ်တွေဦးဆောင်တဲ့ ရန်ကုန်မြို့အခြေစိုက် လျှို့ဝှက်တော်လှန်ရေး အဖွဲ့အစည်း ဖြစ်ပြီး စစ်အာဏာရှင်စနစ်အဆုံးသတ်ဖို့၊ လူ့အခွင့်အရေးနဲ့ ဒီမိုကရေစီရေးကို ဗျူဟာမြောက် အကြမ်းမဖက် နိုင်ငံရေးနည်းလမ်းတွေနဲ့ရယူဖို့ လှုပ်ရှားနေတဲ့ အဖွဲ့အစည်းဖြစ်ပါတယ်။