ရှမ်းပြည်နယ်တောင်ပိုင်း၊ တောင်ကြီးမြို့နယ် နမ့်ဆီးကျေးရွာအုပ်စုဘက်က တောင်ကြီး-ပင်ငိုလမ်းပေါ်မှာ လျှပ်စစ်မီးကြိုးတချောင်း ကျလာတဲ့အတွက် အသက် ၁၈ နှစ်ပဲ ရှိသေးတဲ့ G12 ကျောင်းသား ၂ ယောက် ဓာတ်လိုက်ပြီး သေဆုံးသွားခဲ့တယ်လို့ ဒေသခံတွေက ပြောပါတယ်။

မတ် ၂၂ ရက် ညနေ ၃ နာရီမှာ ဖြစ်ပွားခဲ့ပြီး လေတိုက်လို့ ဗို့အား ၁၁,၀၀၀ ရှိတဲ့ မီးကြိုးတချောင်း မြေကြီးနားနီးနီးထိ နိမ့်ကျလာပြီး အဲဒီလမ်းကို ဆိုင်ကယ်နဲ့ ဖြတ်လာတဲ့သူတွေ မမြင်မိဘဲ ဝင်ချိတ်မိရာကနေ ဓာတ်လိုက်ခဲ့တာလို့ သိရပါတယ်။

ဆိုင်ကယ်မောင်းလာသူက ပင်ငိုရွာက ခွန်ကျော်ထူးဖြစ်ပြီး သူနဲ့အတူ ခွန်ဖြိုးအောင် လိုက်ပါလာတာပါ။ ၂ ယောက်လုံး မီးကြိုးနဲ့ ထိမိတဲ့အချိန်မှာပဲ နေရာတင် ဓာတ်လိုက်ပြီး သေဆုံးသွားခဲ့တယ်လို့ ဆိုပါတယ်။

ဒေသခံတယောက်က “မီးကြိုးက အောက်ကျပြီး အန္တရာယ်ဖြစ်နေတယ်ဆိုတာ မသိဘဲ ဆိုင်ကယ်နဲ့ ဝင်သွားတာပါ။ လေတိုက်တော့ မီးကြိုးလျော့ကျလာတာ မြေကြီးနဲ့ ၃ ပေလောက်ပဲ ကွာတယ်။ လူသွား ဆိုင်ကယ်သွားတဲ့ လမ်းမှာ သူတို့ဆိုင်ကယ်နဲ့ဆိုတော့ မမြင်လို့ နေမယ်။ ဆိုင်ကယ်နဲ့ ချိတ်မိပြီး ဓာတ်လိုက် သေသွားရော”လို့ ပြောပါတယ်။

ဖြစ်ချိန်မှာ မီးအားမဖြတ်သေးတာကြောင့် အနီးနားက လူတွေက ကူညီချင်လည်း အနီးမကပ်ရဲဘဲ နောက်မှ ကယ်ဆယ်ရေးအဖွဲ့တွေ လာပြီး ဆောင်ရွက်ခဲ့ရတယ်လို့လည်း သိရပါတယ်။

သေဆုံးသွားတဲ့ ၂ ယောက်မှာ ဦးခေါင်း၊ မျက်နှာ၊ ရင်ဘတ်နဲ့ ခြေထောက်တွေမှာ ဒဏ်ရာတွေ ရရှိထားပြီး ရုပ်အလောင်းတွေကို တောင်ကြီးမြို့ရှိ စဝ်စံထွန်းဆေးရုံကို ပို့ထားပါတယ်။

သေဆုံးသွားသူ ၂ ယောက်ဟာ ကျောင်းတက်နေဆဲ G12 ကျောင်းသားတွေဖြစ်လို့ အခုလို မထင်မှတ်ဘဲ ဆုံးရှုံးသွားတာက အရမ်းဝမ်းနည်းစရာ ဖြစ်တယ်လို့ ဒေသခံတွေက  ပြောပါတယ်။

ဒေသခံတယောက်က “အနာဂတ်ရှိတဲ့ ကလေးတွေကို ဒီလိုဆုံးရှုံးရတာ စိတ်မကောင်းဘူး” လို့ ပြောပါတယ်။

သေဆုံးသွားတဲ့ ကျောင်းသား ၂ ယောက်ကို မတ် ၂၄ ရက်နေ့ သင်္ဂြိုဟ်မယ်လို့ သိရပါတယ်။