ပုဒ်မ ၅၀၅-က နဲ့ ဖမ်းဆီးတရားစွဲခံထားရတဲ့ အမျိုးသားစာပေဆုရှင် စာရေးဆရာ တင်ညွန့်နဲ့ သားဖြစ်သူတို့ကို စစ်အာဏာရှင်ရဲ့ အထူးတရားရုံးကနေ  ဇွန် ၁၈ ရက်မှာ ထောင်ဒဏ် ၃ နှစ်စီ ချမှတ်လိုက်တယ်လို့ နီးစပ်သူတွေဆီကနေ သိရပါတယ်။

နိုင်ငံရေးစာပေတွေအပြင် သုတနဲ့ ရသစာပေတွေ ရေးသားပြီး လူသိများထင်းရှားတဲ့ ဆရာတင်ညွန့်ကို ပြီးခဲ့တဲ့ ဧပြီ ၂၃ ရက်က သန်လျင်မြို့နယ်ရှိ နေအိမ်မှာ ဖမ်းဆီးခဲ့တာဖြစ်ပြီး နိုင်ငံတော် အကြည်ညိုပျက်စေမှု ပုဒ်မ ၅၀၅- က နဲ့ အမှုဆင်တရားစွဲဆိုခဲ့တာပါ။

ဆရာတင်ညွန့်နဲ့ နီးစပ်တဲ့ စာရေး ဆရာ/ကဗျာဆရာတယောက်က  "အင်းစိန်ထောင် အထူးတရားရုံးက ဒီနေ့ (ဇွန် ၁၈ ) အမိန့်ချတယ်လို့ ကြားရပါတယ်။ အယူခံဝင်မဝင်တော့ ဆရာတို့လည်း အသေအချာမသိဘူး" လို့ ပြောပါတယ်။

ဆရာတင်ညွန့်နဲ့အတူ သားဖြစ်သူ ကိုနေထွန်းလည်း အလားတူပုဒ်မနဲ့ တရားစွဲဆိုထားတာဖြစ်ပြီး ထောင်ဒဏ် ၃ နှစ် ချမှတ်ခဲ့တယ်လို့ သိရပါတယ်။

ဆရာတင်ညွန့်ဟာ "ရိုးမပေါ်ကျတဲ့မျက်ရည်" စာအုပ်နဲ့ ၂၀၁၇ ခုနှစ်အတွက် အမျိုးသားစာပေဆု ရရှိခဲ့တာ ဖြစ်ပြီး အဲဒီစာအုပ်ကို ရုပ်ရှင်ပြန်ရိုက်တဲ့အခါမှာလည်း အောင်မြင်ခဲ့တာကိုတွေ့ရပါတယ်။

ဦးသိန်းစိန် အစိုးရလက်ထက်နဲ့ NLD အစိုးရလက်ထက်က ရေးသားထုတ်ဝေခဲ့တဲ့ "ဗိုလ်ချုပ်တွေကို ကျွန်တော်ညာခဲ့သည်" ၊ "ခွေးထိန်းငတာ" ၊ "ဦးသန်းရွှေ၏ ယတြာများ" စတဲ့ စာအုပ်တွေကို အကြောင်းပြပြီး ဖမ်းဆီးခဲ့တာလို့ နီးစပ်သူတွေက ထင်ကြေးပေးကြပေမဲ့ ဖမ်းဆီးခံရတဲ့ အကြောင်းအရင်း အသေးစိတ်ကိုတော့ ထုတ်ဖော်ပြောဆိုတာ မရှိပါဘူး။

ဆရာတင်ညွန့်နဲ့ သားဖြစ်သူတို့ အဖမ်းမခံရမီ ရက်ပိုင်းအလိုမှာ အမျိုးသမီးတယောက်က အဲဒီ စာအုပ် ၃ အုပ်ကို အွန်လိုင်းမှာ ရောင်းချခဲ့တာရှိပြီး စစ်တပ်ထောက်ခံသူတစုက ဆရာတင်ညွန့်ကို ဖမ်းဆီးဖို့ လှုံ့ဆော်တာတွေ ရှိခဲ့ပါသေးတယ်။

အဲဒီလို လှုံ့ဆော်မှုတွေလုပ်ပြီးနောက် ဧပြီ ၂၃ ရက် ရက်မှာ သန်လျင်က နေအိမ်မှာ ဆရာတင်ညွန့်နဲ့ သားဖြစ်သူ မောက္ခစာအုပ်တိုက်ပိုင်ရှင် ကိုနေထွန်းတို့ကို သွားရောက်ဖမ်းဆီးခဲ့ပြီး အင်းစိန်ထောင် အထူးတရားရုံးမှာ နိုင်ငံတော်အကြည်ညိုပျက်စေမှု ပုဒ်မ ၅၀၅-ကနဲ့ အမှုဖွင့်ခဲ့ကာ  ၂ လနီးပါးအကြာမှာ အခုလို အမိန့် ချမှတ်ခဲ့တာ ဖြစ်ပါတယ်။ 

Photo: Tin  Nyunt