ရှမ်းပြည်နယ်မြောက်ပိုင်း မိုးမိတ်မြို့အနီးမှာ ကချင်လွတ်​လပ်​ရေးတပ်မ​တော် (KIA) ပူးပေါင်းတပ်​တွေနဲ့ စစ်တပ်တို့အကြား စက်တင်ဘာလကုန်ပိုင်းကတည်းက တိုက်ပွဲ​တွေ ပြန်လည်ပြင်းထန်လာပြီး အောက်တိုဘာ ၇ ရက်ကစလို့ မိုးမိတ်–မိုးကုတ် လမ်းပိုင်းအနီးမှာ တိုက်ပွဲ​တွေ ဆက်လက်ဖြစ်ပွားနေတယ်လို့ စစ်ရေးသတင်းရင်းမြစ်တီက သိရပါတယ်။

စက်တင်ဘာ ၂၈ ရက်ကစပြီး မိုးမိတ်မြို့အနီး ညောင်နီကျေးရွာဘက်မှာ တိုက်ပွဲ​တွေဖြစ်ပွားခဲ့ပြီး စက်တင်ဘာ ၂၉ ရက်မှာ ညောင်နီကျေးရွာအနီးက ရွှေသမင်ကုန်း စစ်တပ်စခန်းကို KIA ပူးပေါင်းတပ်တွေက တိုက်ခိုက်သိမ်းပိုက်ခဲ့တာက စတင်ပါတယ်။

စစ်​ရေးသတင်းအရင်းအမြစ်က “​လေ​ကြောင်းက​နေ တိုက်ခိုက်တာ​တွေ များတယ်။ တိုက်ပွဲဖြစ်တဲ့ ​နေရာ​တွေကို ကြဲတာ။ စစ်တပ်ဘက်က မိုးမိတ်မှာ စည်းရုံး​ရေးလည်း လုပ်​နေတယ်။ ​ဂျက်ဖိုက်တာ​ကော MI 35 နဲ့ပါ လာပစ်တယ်။ အရပ်သား​နေအိမ်​တွေ ဆုံးရှုံးတာ​တွေလည်း ရှိ​နေတယ်။ MI 35 က မနက်တကြိမ် ည​နေတကြိမ်​လောက်ကို လာပစ်​နေတာ” လို့ DVB ကို ​ပြောပါတယ်။

စစ်တပ်ဟာ မိုးမိတ်မြို့အတွင်း စစ်အင်အားဖြည့်တင်းထားပြီး မြို့အနီးတဝိုက်မှာလည်း စစ်ရေးလှုပ်ရှားမှု​တွေ ပိုမိုလုပ်​ဆောင်လာတာလို့ ဆိုပါတယ်။

အောက်တိုဘာ ၇ ရက် မနက်ပိုင်းကစလို့ မိုးမိတ်-မိုးကုတ်လမ်းပိုင်းက မိုးမိတ်မြို့နဲ့ ၇ မိုင်ခန့်အကွာမှာ တိုက်ပွဲ​တွေ ပြင်းထန်ခဲ့ပြီး မိုးမိတ်မြို့အတွင်းက​နေ လက်နက်ကြီးနဲ့ လှမ်းပစ်တာ​တွေ လုပ်လာတယ်လို့ ဆိုပါတယ်။

မိုးမိတ်မြို့ကို ၂၀၂၄ ခုနှစ်က တအာင်းအမျိုးသားလွတ်မြောက်ရေးတပ်မတော် (TNLA) ဦးဆောင်တဲ့ ပူးပေါင်းတပ်​တွေ သိမ်းပိုက် ထိန်းချုပ်ခဲ့​ပေမဲ့ ၂၀၂၅ ခုနှစ်မှာ တရုတ်နိုင်ငံရဲ့ ကြားဝင်ညှိနှိုင်းမှု​တွေ​ကြောင့် စစ်တပ်က ပြန်လည်ထိန်းချုပ်သွားတာပါ။

မိုးမိတ်မြို့နယ်ဟာ ကချင်ပြည်နယ်၊ ရှမ်းပြည်နယ်မြောက်ပိုင်းနဲ့ စစ်ကိုင်းတိုင်း​တွေကို ထိစပ်နေတဲ့ မဟာဗျူဟာမြောက် လမ်းဆုံလမ်းခွ ဖြစ်​ပါတယ်။