ရွှေပြည်သာမြို့နယ်၊ ဝါးတရာစက်မူဇုန်ရှိ M-Brother အထည်ချုပ်စက်ရုံ မီးလောင်မှုဖြစ်စဥ်မှာ အလုပ်သမား ၂ ယောက် သေဆုံးခဲ့တယ်လို့ သတင်းထွက်နေပြီး ၄ နာရီနီးပါးကြာတဲ့အထိ မီးလောင်ခဲ့တာကြောင့် စစ်တပ်နဲ့ ရဲအင်အား အလုံးအရင်းရောက်ရှိကာ လုံခြုံရေး ယူထားတယ်လို့ အဲဒီမြို့နယ်အခြေစိုက် အလုပ်သမားသမဂ္ဂအဖွဲ့ဆီက သိရပါတယ်။
ရွှေပြည်သာမြို့နယ်က အလုပ်သမားသမဂ္ဂခေါင်းဆောင်တယောက်က "မြေပြင်သတင်းတွေအရ အလုပ်သမား ၂ ယောက် သေဆုံးတယ်လို့ သိရတယ်။ သက်ဆိုင်ရာက သေဆုံးတဲ့ သတင်းကို ဖုံးဖိထားတဲ့ အနေအထားမှာရှိလို့ သမဂ္ဂအဖွဲ့ဝင်တွေ သွားရောက်ပြီး စောင့်ကြည့်အတည်ပြုချက် ယူနေတယ်။ စစ်တပ်နဲ့ရဲက စက်ရုံပတ်ချာလည်မှာ ဝိုင်းထားတယ်။ အပြင်လူပေးမဝင်လို့ သတင်းအချက်အလက်ရဖို့ ခက်နေတယ်" လို့ ပြောပါတယ်။
မီးလောင်မှုဖြစ်တဲ့စက်ရုံမှာ ၂ ထပ်အဆောက်အဦဖြစ်ကာ အောက်ထပ်က စလောင်တဲ့အတွက် အပေါ်ထပ်က အလုပ်သမားတွေ ပိတ်မိတာမျိုးရှိနိုင်တယ်လို့ မြေပြင်သွားရောက် စောင့်ကြည့်ခဲ့သူတွေက ဆိုပါတယ်။
မီးလောင်မှုပြင်းတဲ့အတွက် အလုပ်သမားတွေရဲ့ မိသားစုဝင်တွေလည်း စိုးရိမ်တကြီးနဲ့ ရောက်ရှိနေကြသလို မီးသတ်တပ်ဖွဲ့နဲ့ လူမှုကူညီရေးအဖွဲ့တွေက ရှာဖွေကယ်ဆယ်ရေးတွေ အသည်းအသန်လုပ်နေတယ်လို့ သမဂ္ဂခေါင်းဆောင်က ပြောပါတယ်။
မြေပြင်ကနေ နောက်ဆုံးရရှိတဲ့ သတင်းအရ M-Brother စက်ရုံရဲ့ ဘေးနားကပ်လျက်က နေရွှေဝန်း အထည်ချုပ်စက်ရုံကိုပါ ကူးစက်လောင်ကျွမ်းနိုင်တဲ့ အနေအထားရှိနေတယ်လို့လည်း သူက ပြောပါတယ်။
အဲဒီစက်ရုံမီးလောင်မူနဲ့ပတ်သက်ပြီး မီးသတ်တပ်ဖွဲ့က Level-2 အဆင့်သတ်မှတ်ခဲ့ကာ နေ့လယ် ၁ နာရီ ၃၈ မိနစ်မှာ မီးထိန်းထားနိုင်တယ်လို့ ထုတ်ပြန်ထားပါတယ်။
