တိုက်ပွဲတွေမဖော်ဖို့ တရုတ်က ပြောတာရှိကြောင်းနဲ့ ဗန်းမော်တိုက်ပွဲဟာ နိုင်ငံရေးသိက္ခာတိုက်ပွဲ ဖြစ်လို့ အရင်းမြစ်တွေ အများကြီးသုံးရသလို တိုင်းရင်းသားပေါင်းစုံက ပါဝင် တိုက်ခိုက်နေတဲ့အ ကြောင်း ကချင်လွတ်လပ်ရေးအဖွဲ့ (KIO) ဒုဥက္ကဋ္ဌ ဒုတိယဗိုလ်ချုပ်ကြီး ဂွန်မော်က ပြောပါတယ်။
ဒါ့အပြင် ၂၀၂၆ ခုနှစ်ဟာ အပြောင်းအလဲတွေများမဲ့နှစ် ဖြစ်လာမယ်လို့လည်း သူက မျှော်မှန်းထားပါတယ်။
စစ်အာဏာသိမ်းပြီးချိန်မှာ တိုက်ပွဲတွေ မဖော်ဆောင်ဖို့ တရုတ်က သတိပေးခဲ့ပေမဲ့ ရှောင်လွှဲမရတဲ့ အခြေအနေတွေကို “ထိုင်ဝမ်” ကို ဥပမာပေး ရှင်းပြခဲ့ကြောင်းနဲ့ လက်ရှိ ဗန်းမော်တိုက်ပွဲဟာ နိုင်ငံရေးသိက္ခာတိုက်ပွဲ ဖြစ်တဲ့အကြောင်း ဒုတိယဗိုလ်ချုပ်ကြီး ဂွန်မော်က ပြောပါတယ်။
အမေရိကန်ပြည်ထောင်စု၊ တက္ကဆက်ပြည်နယ်မှာ ဖေဖော်ဝါရီ ၈ ရက်က ပြုလုပ်တဲ့ ၆၅ နှစ်မြောက် ကချင်တော်လှန်ရေးနေ့ အခမ်းအနား မိန့်ခွန်းမှာ အွန်လိုင်းကတဆင့် ပြောလိုက်တာပါ။
ဖက်ဒရယ်ဦးဆောင်ကောင်စီ ပေါ်ပေါက်လာရေး NUG၊ K3C လို့ခေါ်တဲ့ (KIO၊ KNU၊ KNPP၊ CNF) တို့နဲ့ တွေ့ဆုံနေသလို လက်ရှိ ဗန်းမော်တိုက်ပွဲမှာလည်း တိုင်းရင်းသားပေါင်းစုံ ပါဝင်တိုက်ခိုက်နေတဲ့အကြောင်း ပြောပါတယ်။
ဒုတိယဗိုလ်ချုပ်ကြီး ဂွန်မော်က “အခု ကျနော်တို့ ဗန်းမော်တိုက်ပွဲဟာ နိုင်ငံရေးသိက္ခာတိုက်ပွဲ ဖြစ်ပါတယ်။ ခက်ခဲမယ်ဆိုတာ ကျနော်တို့ သိပါတယ်။ တနှစ်ကျော်သွားပြီ၊ ကျနော်တို့ ဗန်းမော်တိုက်နေတာ။ အဲဒီတော့ ဒီလို ကြာမယ်၊ အရင်းအမြစ်များမယ်ဆိုတာ ကျနော်တို့ သိလျက်နဲ့ပဲ လိုအပ်လို့တိုက်တဲ့ တိုက်ပွဲဖြစ်တယ်။ ခုနက ပြောသလိုပဲ ဒီမှာ ကျနော်တို့ တိုင်းရင်းသားပေါင်းစုံ ပါပါတယ်။ ကျနော်က တခါတလေမှာ ရယ်စရာပြောတာ။ KIA နဲ့ PDF က တိုက်ရင် တနှစ်ကျော်တာ ခင်ဗျားတို့ မပြောနဲ့လို့၊ ဗြိတိသျှအစိုးရ ဗန်းမော်သိမ်းတာ ၅ နှစ်ကျော်မှ ဗန်းမော်သိမ်းနိုင်တာ။ အဲဒီတော့ ကျနော်တို့မှာ ခုနကပြောသလိုပဲ လိုအပ်လို့တိုက်တဲ့ တိုက်ပွဲတွေမှာ ကျနော်တို့ အရင်းအမြစ်တွေ အများကြီးပေးရတယ်” လို့ ပြောပါတယ်။
ဗန်းမော်တိုက်ပွဲမှာ KIA နဲ့အတူ PDF အပါအဝင် ရှမ်း၊ ချင်း၊ နာဂ၊ ဂေါ်ရခါးနဲ့ ဗမာ အစရှိတဲ့ တိုင်းရင်းသားလူမျိုးပေါင်းစုံ စုပေါင်းတိုက်ပွဲဝင်နေကြတာဖြစ်ပြီး ပြီးခဲ့တဲ့ ၂ လအတွင်းမှာပဲ စစ်တပ်ရဲ့ တင့်ကား ၇ စီးအထိ ဖျက်ဆီးနိုင်ခဲ့သလို မြစ်ကြီးနားက ရေဒါစခန်းကိုလည်း တိုက်ခိုက်နိုင်ခဲ့တယ်လို့ ဆိုပါတယ်။
အာဏာသိမ်းစစ်တပ်က စစ်သူကြီး ဗလမင်းထင်ကို အသုံးချပြီး စိတ်ဓာတ်စစ်ဆင်ရေး လုပ်လေ့ရှိတဲ့ ဗန်းမော်ဟာ ကချင်ပြည်နယ်ထဲမှာတော့ မပခ ကလွဲရင် ဒုတိယအကြီးဆုံး ခံစစ်ဖြစ်တဲ့အကြောင်း စစ်ရေးလေ့လာသူ CDM ဗိုလ်ကြီးဇင်ယော်ကလည်း ပြောပါတယ်။
“ပြီးရင် ကျနော်တို့ ဗန်းမော်က ပြောရမယ်ဆိုရင် ဟိုဘက်မှာ တရုတ်နိုင်ငံ၊ အောက်ဘက်မှာက ရှမ်းမြောက်၊ ရှမ်းမြောက်ပြီးရင် မန္တလေးတိုင်းမြောက်ပိုင်းအပြင် ဒီ စစ်ကိုင်းတိုင်းနဲ့ပါ ချိတ်ဆက်ထားတဲ့ ကချင်ပြည်နယ်ရဲ့ အရေးပါတဲ့ သွေးကြောတခုပဲ။ စစ်တပ်ဘက်ကရော KIA နဲ့ ပူးပေါင်းတပ်တွေပေါ့နော်။ တော်လှန်ရေးတပ်တွေအတွက်က အသက်တမျှကို အရေးကြီးတဲ့ မြေနေရာလို့ ပြောလို့ရမယ်။ စစ်သဘောဆိုရင်တော့ တိုက်သူ၊ ခံသူ နှစ်ဦးစလုံးပေါ့နော်၊ အသက်တမျှ အရေးကြီးတဲ့ အချက်အခြာ မြေအနေအထားမျိုးပေါ့။ ဒါကြောင့်မို့လို့ ဒီနေရာကို သူတို့ နိုင်ငံရေးအရရော၊ စစ်ရေးအရရော၊ သိက္ခာအရ တိုက်ရတဲ့ အနေအထား။”
ဒါ့အတူ ကချင်၊ ချင်း၊ နာဂဒေသတွေနဲ့ ကချင်ရဲ့ဝင်ပေါက်ဖြစ်တဲ့ စစ်ကိုင်းတိုင်းထဲက “က” သုံးလုံးလို့ခေါ်တဲ့ (ကန့်ဘလူ၊ ကောလင်း၊ ကသာ) အပါအဝင် မြောက်ပိုင်းဒေသတွေကို တည်ငြိမ်ဖို့ ကြိုးစားနေကြောင်းလည်း KIO က ပြောပါတယ်။
ဒီကိစ္စတွေဟာ ဖြစ်လည်းဖြစ်နိုင်ကြောင်းနဲ့ ဒီဒေသတွေ တည်ငြိမ်ပြီဆိုရင် မြန်မာပြည်ကို ရည်ညွှန်းပြီး အောက်ပိုင်းကို အလွယ်တကူ ထိန်းသိမ်းနိုင်မှာဖြစ်တယ်လို့ ဆိုပါတယ်။
ဒီလို တိုက်ပွဲဖော်ဆောင်ရမဲ့ ကာလကို ၆ နှစ်အထိ ကြာနိုင်မယ်လို့ ခန့်မှန်းထားပြီး ၂၀၂၆ ခုနှစ်ဟာ အပြောင်းအလဲတွေ များမဲ့နှစ် ဖြစ်လာမယ်လို့ မျှော်မှန်းထားတဲ့အကြောင်းလည်း ဒုတိယဗိုလ်ချုပ်ကြီး ဂွန်မော်က ပြောပါတယ်။
စိုးသူအောင်
