အမေရိကန်သမ္မတ ဒေါ်နယ်ထရမ့်ပ်ရဲ့ ဖိတ်ကြားချက်ကို လက်ခံဖို့ ဆုံးဖြတ်ချက်မချမီ အမေရိကန်က ပိတ်ဆို့ထားတဲ့ ရုရှားရဲ့ ပိုင်ဆိုင်မှုတွေထဲက ဒေါ်လာ ၁ ဘီလီယံကို ငြိမ်းချမ်းရေးဘုတ်အဖွဲ့ဆီပေးနိုင်တယ်လို့ ရုရှားသမ္မတ ဗလာဒီမာပူတင်က ဇန်နဝါရီ ၂၁ရက်မှာ ပြောပါတယ်။

ပူတင်က ရုရှားလုံခြုံရေးကောင်စီ အစည်းအဝေးအတွင်း အမေရိကန်ရဲ့ အဆိုပြုချက်အပေါ် မှတ်ချက်ပေးခဲ့တာပါ။

ရုရှားရဲ့ ပါလက်စတိုင်းပြည်သူတွေနဲ့ အထူးဆက်ဆံရေးကို ထည့်သွင်းစဉ်းစားရင်း ငြိမ်းချမ်းရေးကောင်စီရဲ့ ဖွဲ့စည်းပုံနဲ့ လုပ်ငန်းဆောင်တာတွေမှာ ပါဝင်ခြင်းဆိုင်ရာ ပြဿနာကို ကျနော်တို့ မဆုံးဖြတ်မီ အရင်အမေရိကန်အစိုးရလက်ထက်က ပိတ်ဆို့ထားတဲ့ ရုရှားပိုင်ဆိုင်မှုတွေထဲက ဒေါ်လာ ၁ ဘီလီယံကို 'ငြိမ်းချမ်းရေးဘုတ်အဖွဲ့အတွက် ပေးပို့နိုင်တယ် ထင်တယ်လို့ ပူတင်က ပြောပါတယ်။

ရုရှားသမ္မတက ဂရင်းလန်းဆိုင်ရာ ထရမ့်ပ်ရဲ့ နောက်ဆုံး ကြေညာချက်အကြောင်းလည်း ပြောခဲ့ပြီး ဂရင်းလန်းကျွန်းရဲ့ ဈေးနှုန်းကို ဒေါ်လာ သန်း ၂၀၀-၂၅၀ လောက်လို့ ခန့်မှန်းခဲ့တာပါ။

၁၈၆၇ ခုနှစ်မှာ ရုရှားအင်ပါယာက အမေရိကန်ဆီ အလက်စကာကျွန်းကို ရောင်းချမှုဈေးနှုန်းကို နှိုင်းယှဉ်တွက်ချက်ပြခဲ့ပါတယ်။

အဲဒီအချိန်က ရွှေဈေးနှုန်းနဲ့ နှိုင်းယှဉ်ရင် ကိန်းဂဏန်းက ပိုမြင့်မှာဖြစ်ပြီး တစ်ဘီလီယံနီးပါး ဖြစ်နိုင်ခြေရှိတယ်၊ ဒါပေမဲ့ အမေရိကန်ပြည်ထောင်စုကလည်း ဒီကိန်းဂဏန်းကို ကိုင်တွယ်နိုင်တယ်လို့ ကျနော်ထင်ပါတယ်လို့ ပူတင်က ထပ်ပြောပါတယ်။ 

Source: Reuters