ကရင်အမျိုးသားတပ်မတော် (KNA) ရဲ့ တပ်စခန်းကို စစ်တပ်က လေကြောင်းက တိုက်ခိုက်အပြီး ဘားအံမြို့မှာ စစ်တပ်က စစ်ရေးပြင်ဆင်နေကာ ပိုမိုတင်းကျပ် စစ်ဆေးလာတာကြောင့် မြို့ခံတွေကြားမှာ စိုးရိမ်ထိတ်လန့်နေပါတယ်။

ဇန်နဝါရီ ၁၂ ရက် မွန်းလွဲ ၃ နာရီကျော်လောက်က ကရင်ပြည်နယ်၊ လှိုင်းဘွဲမြို့နယ်နဲ့ ဘားအံမြို့နယ် အစပ်က သိုက်တောကျေးရွာ သံလွင်မြစ်ကမ်းဘေးက ကရင်အမျိုးသားတပ်မတော် (KNA) ရဲ့ တပ်စခန်းကို လေကြောင်းအပြင် ဒရုန်းတွေနဲ့ ဗုံးကြဲတိုက်ခိုက်ခဲ့ပါတယ်။

အဲဒီနောက် ဇန်နဝါရီ ၁၂ ရက် မွန်းလွဲ ၃ နာရီလောက်က  ဘားအံမြို့မှာ စစ်ရေးပြင်ဆင်ပြီး မြို့တွင်းနဲ့ မြို့ဝင်မြို့ထွက် သွားလာသူတွေကို စစ်ဆေးတာတွေ ပိုမိုတင်းကျပ်လာပါတယ်။

ဒေသခံတယောက်က “ဘားအံရဲ့ အခြေအနေက စစ်ကား ၃ စီးက သူတို့ စစ်သားတွေ လူအပြည့်ပဲ။ ဘယ်ကိုသွားမယ်တော့ မသိဘူး။ သွားဖို့လာဖို့ ယောက်ယက်ခတ်နေတာပဲ။ မော်တော်ပီကယ်တွေကော ရှုပ်ယှက်ခတ်နေတာပဲ။ အခုက ဗိုလ်ချစ်သူအဖွဲ့က KNA အဖွဲ့က သူတို့ ခွဲထွက်တော့ စိတ်ထင်တာ ဗိုလ်ချစ်သူအဖွဲ့ကို စိတ်မချဘူး အဲလိုမျိုး။ တပ်ထဲမှာလည်း သူတို့ သတိအနေနဲ့ အသင့်ပြင်ထားတယ်။ အဲဒီမှာလည်း လုံခြုံရေးတွေ အများကြီးပဲ။ လမ်းကြောင်းမှာလည်း ပြည်သူတွေ လမ်းသွားရတာ စစ်ဆေးကြမ်းတယ်။ ပြည်သူတွေလည်း မဖြစ်မနေ သွားနေရတာ။ ပြည်သူတွေ ကြောက်လန့်တကြား လုပ်စားနေရတယ်” လို့ ပြောပါတယ်။

လက်ရှိမှာလည်း လှိုင်းဘွဲလမ်း၊ မြိုင်ကြီးငူလမ်း၊ ထီလုံ-နဘူး-ထို့ကော်ကိုး လမ်းပိုင်းတလျှောက် စစ်ကောင်စီတပ်နဲ့ နယ်ခြားစောင့် (BGF) ပူးပေါင်းတပ်တွေက နေရာယူထားပါတယ်။

ဒါကြောင့် စစ်ရေးတင်းမာနေတဲ့ လှိုင်းဘွဲမြို့နယ်အတွင်းက ဒေသခံပြည်သူတချို့ဟာ ဘားအံမြို့က ဆွေမျိုးတွေဆီ လာရောက် တိမ်းရှောင်နေသူတွေ ရှိတယ်လို့ မြို့ခံတွေက ပြောပါတယ်။

ဒါ့အပြင် စစ်ကောင်စီတပ်တွေရဲ့ စစ်ရေးလှုပ်ရှားမှုတွေကို ပြည်သူတွေ မမြင်အောင် ညဘက် တမြို့လုံး မီးဖြတ်ပြီး အမှောင်ချတာတွေ ရှိတယ်လို့ မြို့မိမြို့ဖတွေက ပြောပါတယ်။

မြို့မိမြို့ဖတယောက်က “သူတို့ ကြောက်လို့ဖြစ်မယ်။ နဂိုထက်ကို လုံခြုံရေးက ပိုတင်းကျပ်လာတယ်။ သူတို့လှုပ်ရှားမှုတွေက ည ၉ နာရီကျော်လောက်မှပဲ ထွက်တယ်။ ၉ နာရီလောက် ၄၊ ၅၊ ၁၀ စီး အဲလိုမျိုး။ လက်နက်အပြည့်အစုံနဲ့ပေါ့။ ဘယ်ကိုဦးတည်လဲတော့ မသိဘူး။ အဓိက ၂၂ (တပ်မ) ထဲမှာ ဝင်လာပြီး ဥတာပေါ့၊ စုရပ်ပေါ့။ တခါတလေကျတော့ ညဘက်(တမြို့လုံး) မီးပိတ်လိုက်တာတွေ ရှိတယ်။ သူတို့လှုပ်ရှားမှု မမြင်ရဘူးပေါ့။ သူတို့က ညဘက်မှ ဝင်တာတွေ ထွက်တာတွေ ရှိတယ်။ သူတို့ ထူးခြားတာတွေရှိရင် မီးဖြတ်ချလိုက်တာ။ ၉ နာရီ ၁၀ နာရီလောက်မှ မီးပြန်လာတယ်။ ရိုးရိုးတန်းတန်း စစ်ကြောင်းထိုးတာကတော့ သူတို့ ဒီအတိုင်းသွားတယ်” လို့ ပြောပါတယ်။

ဇန်နဝါရီ ၁ ရက်က စစ်တပ်ဆီက ရိက္ခာနဲ့လစာ ပံ့ပိုးမှုတွေ မယူချင်တော့တဲ့ နယ်ခြားစောင့်တပ် (BGF) တပ်နယ် ၂ နဲ့ တပ်နယ် ၃ လက်အောက်ခံ တပ်ရင်းတပ်ဖွဲ့တွေက ကရင်အမျိုးသားတပ်မတော် (KNA) အနေနဲ့ သီးခြားရပ်တည်ခဲ့ပါတယ်။

ဒါ့အပြင် စစ်ဩဇာခံပြီး ကိုယ်ကျိုးစီးပွားအတွက် ကရင်အမျိုးသားတပ်မတော် (KNA) အနေနဲ့ မပြောင်းလဲဘဲ နယ်ခြားစောင့်တပ် (BGF) အနေနဲ့ ဆက်လက်ရပ်တည်နေတဲ့ တပ်နယ် ၁ တပ်နယ်မှူး ဗိုလ်မှူးစောစိုးနိုင်နဲ့ တပ်နယ် ၄ တပ်နယ်မှူး ဗိုလ်မှူးစောမုတ်သုန် လက်အောက်ခံ တပ်ရင်း တပ်ဖွဲ့တွေက စစ်ကောင်စီနဲ့ ဆက်လက်ပူးပေါင်းပြီး စစ်ရေးလှုပ်ရှားနေပါတယ်။

အောင်ခန့်