ရန်ကုန်မြို့မှာ လူငယ်တွေကို အုပ်စုဖွဲ့ ခိုးယူတာ၊ လုယက်တာနဲ့ ဓားပြတိုက်သလို အတင်းအကျပ် ခေါ်ဆောင်သွားတာတွေကြောင့် လူငယ်တွေမှာ မလုံခြုံမှုတွေ၊ စိုးရိမ်ပူပန်တာတွေကို ခံစားနေကြရပါတယ်။

ရန်ကုန်က လူငယ်တွေဟာ အာဏာသိမ်းပြီးနောက်မှာ စစ်အာဏာရှင်ကို ဆန့်ကျင်လို့ အချိန်မရွေး ဖမ်းဆီးသတ်ဖြတ်ခံရနိုင်တဲ့အတွက် မလုံခြုံမှုကို ခံစားခဲ့ရသလိုပဲ စစ်မှုထမ်းဥပဒေကြောင့် လည်း အတင်းအဓမ္မ ဖမ်းဆီးခံရမှာကို စိတ်ပူပန်နေကြရပါတယ်။

စစ်တပ်က အတင်းအကျပ် စစ်မှုထမ်းဖို့ လူငယ်တွေကို ခေါ်ယူနေတဲ့အချိန်မှာပဲ တဖက်မှာလည်း အုပ်စုဖွဲ့ထားတဲ့သူတွေက လူငယ်တွေကို ပြန်ပေးဆွဲတာ၊ မိသားစုဆီက ငွေညှစ်တောင်းတာနဲ့ စစ်မှုထမ်းအဖွဲ့ဆီ ရောင်းစားတာတွေ ပြုလုပ်နေတဲ့အတွက် ရန်ကုန်က လူငယ်တွေဟာ စိုးရိမ်ပူပန်နေကြရတယ်လို့ သိရပါတယ်။

ပြီးခဲ့တဲ့ နိုဝင်ဘာလထဲမှာ လှိုင်သာယာမြို့နယ်ထဲက ဆယ်ကျော်လူငယ်တယောက်ကို အတင်းအဓမ္မ ဖမ်းဆီးခေါ်ဆောင်သွားပြီး စစ်မှုထမ်းအဖွဲ့ကို ရောင်းစားခံလိုက်ရပေမဲ့ အခုချိန်ထိ အဆက်အသွယ် မရသလို တိုင်ကြားထားတဲ့အမှုကလည်း ရပ်တန့်နေတယ်လို့ ဖြစ်စဉ်ကိုသိရှိထားတဲ့ မိသားစုနဲ့ နီးစပ်သူက ပြောပါတယ်။

“လှိုင်သာယာမှာ အသိတယောက်ရဲ့ ကလေးပေါ့၊ အိမ်ရှေ့မှာ ဂိမ်းကစားနေတဲ့ အချိန်မှာပဲ လူ ၂ ယောက်က ဓားထောက်ပြီးတော့ သူ့ကို ခေါ်သွားတာ။ ဘယ်ခေါ်သွားလို့ ခေါ်သွားမှန်း မသိဘဲ ပျောက်သွားတော့ အိမ်က လိုက်စုံစမ်းတယ်၊ ရဲစခန်းမှာလည်း တိုင်ချက်တွေဖွင့်တယ်၊ လူပျောက်တွေလည်း ကြေညာတယ်။ စစ်မှုထမ်းကို ရောင်းလိုက်တာလို့ ပြောတယ်။ ဘယ်အဖွဲ့ကို ရောင်းလိုက်တယ်၊ ဘယ်လိုရောင်းလိုက်တယ်ဆိုတာ မပါဘူး။ ဒါပေမဲ့ အဲဒီကောင်တွေကို အခု ရဲစခန်းမှာ ဖမ်းထားတယ်။ သူနဲ့ ဆက်စပ်တရားခံတွေကိုလည်း ဖမ်းဆီးဖို့ လုပ်နေတယ်။ အဲဒါမျိုးတွေက အများကြီးပဲ ဖြစ်နေတာ။ အခုလို လူပျောက်တာတွေ၊ ဓားပြတိုက်တဲ့ ပုံစံမျိုးတွေ ဖြစ်နေတာတွေ၊ လူကုန်ကူးတဲ့ ပုံစံမျိုးတွေ ဖြစ်နေတာသည် တကယ်ပျောက်တယ်၊ တကယ် ပြန်ပေးဆွဲတာမျိုး ဖြစ်တယ်ဆို ရဲနဲ့ စစ်တပ်က ရအောင်လိုက်တယ်။ ဘာလို့လိုက်လဲဆိုတော့ သူတို့လူတွေ မဟုတ်လို့။”

လက်ရှိမှာ ကျူးလွန်သူတွေကို ဖမ်းဆီးရမိထားပြီး သူတို့နဲ့ ဆက်စပ်တဲ့သူတွေ အများအပြား ရှိနေသလို ဖမ်းဆီးခံရတဲ့ လူငယ်တွေကလည်း ရာနဲ့ချီရှိနေကြောင်း ကျူးလွန်သူတွေက ထွက်ဆိုထားတယ်လို့ သိရပေမဲ့ DVB ကတော့ သီးခြားအတည်ပြုနိုင်တာမျိုး မရှိသေးပါဘူး။

ဒီလိုအခြေအနေတွေကြောင့် ရန်ကုန်လူငယ်တွေဟာ တယောက်တည်းသွားလာဖို့ စိုးရိမ်နေကြရပါတယ်။

ရန်ကုန်မြို့မှ လူငယ်တယောက်က “အဓိက မြို့ဆင်ခြေဖုံးတွေမှာ တခါတလေ စစ်မှုထမ်းကိစ္စနဲ့ရော ပေါ်တာဆွဲပြီး ရောင်းစားတာလား အဲဒီလိုအသံတွေက ကြားနေရတော့ အမှန်တိုင်းပြောရရင် လူပြတ်တဲ့နေရာဆို တယောက်တည်းတော့ မသွားချင်ဘူး၊ မသွားဘူး။ အရင်လို လွတ်လွတ်လပ်လပ် သွားလို့မရတော့ဘူး။ ညဘက်ဆိုလည်း ညမိုးချုပ်တဲ့အထိ မနေဘူးပေါ့။ တကယ်လို့ အရေးပေါ်ကိစ္စရှိရင်တောင် တက္ကစီနဲ့ပဲ သွားနေရတဲ့ အခြေအနေမျိုးမှာ ရှိတယ်။ လူငယ်တယောက် အနေနဲ့ကတော့ စိုးရိမ်စိတ်က အမြဲတမ်းရှိတယ်။ သတိထားပြီးတော့ နေနေရတာပေါ့” လို့ ပြောပါတယ်။

လူငယ်တွေ ဖမ်းဆီးခံရတဲ့ ဖြစ်စဉ်တွေမှာ မိသားစုဝင်တွေဆီက ငွေညှစ်တောင်းခံလို့ရရင် ပြန်ပို့ပေးတာမျိုး ရှိသလို တချို့ကိုတော့ ဖမ်းဆီးရမိတာနဲ့ ချက်ချင်း စစ်မှုထမ်းအဖွဲ့ဆီ ငွေကြေးနဲ့ ရောင်းစားတာမျိုးလည်း ရှိကြောင်း သိရပါတယ်။ တရားဥပဒေစိုးမိုးမှုမရှိတဲ့ အခြေအနေမှာ လူငယ်တွေရဲ့ စိုးရိမ်ပူပန်မှုက ပိုဆိုးလာနေပါတယ်။

ရန်ကုန်မြို့နေ ပြည်သူတယောက်က “လက်ရှိ ခုဖြစ်နေတဲ့ ခိုးဆိုးလုယက်တာတွေ၊ အုပ်စုဖွဲ့ ဓားပြတိုက်တာမျိုးတွေ ကျနော်ကတော့ မကြုံဖူးဘူး ဆိုပေမဲ့ အသိတွေထဲမှာတော့ ကြုံတာတွေ့ဖူးတယ်။ ကျနော်တို့မှာက ကြောက်ရမဲ့ကိစ္စတွေက တော်တော်များနေတယ်။ ယူနီဖောင်းဝတ်တဲ့သူတွေရော မဝတ်ထားတဲ့သူတွေရော၊ ဒီ ခိုးဆိုးလုနှိုက် ကိစ္စတွေပေါ့၊ ဒါတွေ ရှိတယ်၊ ပြဿနာက ဘာလဲဆိုတော့ တခုခုဆို ကျနော်တို့မှာ ဘယ်မှလည်း တိုင်လို့မရဘူး၊ လက်သည်မပေါ်ဘူး။ အဲဒီလိုဖြစ်နေတာဆိုတော့ ဒီမှာတော့ ကျီးလန့်စာစားနေရတဲ့ သဘောတော့ ဖြစ်နေတာပေါ့” လို့ ပြောပါတယ်။

မြန်မာ့စစ်ဘက်ရေးရာနဲ့ လုံခြုံရေးဆိုင်ရာ လေ့လာရေးအဖွဲ့ (MDSI) ရဲ့ ထုတ်ပြန်ထားချက်အရ စစ်ကောင်စီဟာ စစ်မှုထမ်းတပ်သားသစ်တွေကို အပတ်စဉ် ၁၇ ကနေ ၂၀ ထိကို တပြိုင်တည်း လက်ခံသင်တန်းပေးနေပြီး သင်တန်းကာလတွေကို တိုးမြှင့်လေ့ကျင့်ပေးနေကာ စစ်သင်တန်းကျောင်း နေရာတွေကိုလည်း တိုးချဲ့ ပြင်ဆင် လုပ်ဆောင်နေတယ်လို့ သိရပါတယ်။

ဝေဝေ