ရခိုင်ပြည်နယ်၊ စစ်တွေမြို့မှာ စစ်ကောင်စီရဲ့ ဒဏ်ရာရ စစ်သည်တွေကို စစ်ဆေးရုံမှာ ကုသဖို့ မနိုင်တော့တာကြောင့် စစ်တွေမြို့ ပြည်သူ့ဆေးရုံမှာ ကုသနေကြရတယ်လို့ စစ်တွေမြို့ခံတွေက ပြောပါတယ်။

စစ်တွေမြို့ ဒကစ ဌာနချုပ်က ဒဏ်ရာရ စစ်သားတွေကို ခုတင် ၁၀၀ စစ်ဆေးရုံမှာ ကုနေပေမဲ့ လူပြည့်သွားလို့ စစ်တွေမြို့ ခုတင် ၅၀၀ ပြည်သူဆေးရုံကြီး၊ လေးထပ်ဆောင်ကို အထူးကြပ်မတ်ဆောင်အဖြစ်ပြုလုပ်ပြီး ကုသနေကြရတယ်လို့ စစ်တွေမြို့က စစ်ကောင်စီနဲ့ နီးစပ်သူတွေဆီက သိရပါတယ်။

“စစ်တွေ ဒကစ ဌာနချုပ်မှာ AA ဘက်က ပစ်ခတ်တဲ့ လက်နက်ကြီးကျည်တွေ ကျရောက်ပေါက်ကွဲတာကြောင့် ဒီရက်ပိုင်းမှာ ဒဏ်ရာရစစ်သည်တွေ အတော်လေးကို များလာတယ်။ တပ်ဆေးရုံ ခုတင် ၁၀၀ မှာလည်း မဆံ့တော့တာကြောင့် စစ်တွေပြည်သူ့ဆေးရုံကြီးမှာ ကုသနေကြတာတွေလည်းရှိတယ်။ လူကြီးတွေဆိုရင်တော့ ရန်ကုန်ကို လေကြောင်းကနေတဆင့် ယူဆောင်ပေမယ့် အရာရှိမဟုတ်သူတွေကိုတော့ ဒီမှာပဲ ကုသတာများတယ်” လို့ပြောပါတယ်။

ပြည်သူ့ဆေးရုံကြီးမှာ စစ်ကောင်စီတပ်သားတွေ ဆေးကုနေကြတာကြောင့် ဆေးရုံဝန်းမှာ စစ်ကောင်စီက လုံခြုံရေး တင်းကျပ်ထားတယ်လို့ မြို့ခံတွေက ပြောပါတယ်။

အာရက္ခတပ်တော် AA က ပစ်ခတ်တဲ့ လက်နက်ကြီးကျည်တွေဟာ ဒကစ ဌာနချုပ်၊ ခုတင် ၁၀၀ စစ်ဆေးရုံနဲ့ တပ်ရင်းဌာနချုပ်တွေမှာ ကျရောက်ပေါက်ကွဲတာကြောင့် စစ်ကောင်စီတပ်သား အများအပြားသေဆုံးပြီး ထိခိုက်ဒဏ်ရာရရှိသူတွေလည်း ရာနဲ့ချီရှိတယ်လို့ နောက်ထပ် စစ်ရေးသတင်းရင်းမြစ်တယောက်က ပြောပါတယ်။

“စစ်ကောင်စီက အာရက္ခတပ်တော် သိမ်းပိုက်ထားတဲ့ မြို့နယ်တွေကို လက်နက်ကြီးနဲ့ ပစ်ခတ်ရင် အာရက္ခတပ်တော်ဘက်လည်း စစ်ကောင်စီရဲ့ ဒကစ ဌာနချုပ်နဲ့ တပ်ရင်းဌာနချုပ်တွေကို ပစ်ခတ်တာတွေရှိတယ်။ စစ်ကောင်စီဘက်က ရမ်းသန်းပစ်ခတ်တာတွေ များပေမယ့် အာရက္ခတပ်တော်ဘက်က တလုံးပစ်ရင် တလုံးထိတယ်။ အဲဒီလို ပစ်ခတ်မှုတွေကြောင့် စစ်ကောင်စီဘက်က အထိနာပြီးတော့ ရှုံးမဲမဲနေတာ။ အသေအပျောက်တွေ၊ ဒဏ်ရာရရှိသူတွေ ရာနဲ့ချီရှိတယ်လို့ သိထားရတယ်” လို့ပြောပါတယ်။

AA ဟာ စစ်တွေမြို့နယ်နဲ့ နယ်နိမိတ်ချင်းထိစပ်နေတဲ့ ပုဏ္ဏားကျွန်း၊ ပေါက်တောနဲ့ ရသေ့တောင်မြို့နယ်တို့ကို ထိန်းချုပ်ထားပြီး စစ်ကောင်စီက အဲဒီမြို့နယ်တွေကို လက်နက်ကြီး၊ ဒရုန်းနဲ့ လေကြောင်းတိုက်ခိုက်မှုတွေ မကြာခဏပြုလုပ်နေတာကြောင့် AA ဘက်လည်း လက်နက်ကြီးတွေနဲ့ ပြန်လည်ပစ်ခတ်နေတာဖြစ်ပါတယ်။

စစ်ကောင်စီဟာ နိုဝင်ဘာလနဲ့ ဒီဇင်ဘာလအတွင်းမှာ ပုဏ္ဏားကျွန်း၊ ပေါက်တောနဲ့ ရသေ့တောင်မြို့နယ်တို့က စစ်တွေမြို့နယ်နဲ့ ထိစပ်နေတဲ့ ကျေးရွာတွေကို လက်နက်ကြီး၊ ဒရုန်းနဲ့ လေကြောင်းတိုက်ခိုက်မှုတွေပြုလုပ်နေတာကြောင့် ထောင်နဲ့ချီတဲ့ ဒေသခံတွေဟာ ဘေးလွတ်ရာ ကျေးရွာတွေကို တိမ်းရှောင်နေကြရတယ်လို့ ဒေသခံတွေဆီကသိရပါတယ်။

ရခိုင်ပြည်မှာ AA က မြို့နယ် ၁၄ အထိ သိမ်းပိုက်ထားပြီး စစ်ကောင်စီ ထိန်းချုပ်ထားဆဲဖြစ်တဲ့ စစ်တွေနဲ့ ကျောက်ဖြူမြို့နယ်တို့မှာလည်း နှစ်ဖက်တိုက်ပွဲတွေ ပြင်းထန်နေပါတယ်။