ရန်ကုန်မှာ ဒီဇင်ဘာလအတွင်း မြို့နယ်အလိုက် လူထုလမ်းလျှောက်ပွဲနဲ့ လွတ်လပ်ရေးအကြို ပျော်ပွဲရွှင်ပွဲတွေ လုပ်ဖို့ နိုဝင်ဘာ ၃၀ ရက်မှာ စစ်ခေါင်းဆောင်က ညွှန်ကြားထားတယ်လို့ အုပ်ချုပ်ရေးနဲ့နီးစပ်တဲ့ သတင်းအရင်းအမြစ်တွေဆီက သိရပါတယ်။
မနေ့က စစ်ခေါင်းဆောင်က ရန်ကုန်ရောက်ရှိချိန် စစ်ကောင်စီလက်အောက်ခံ တိုင်းအစိုးရအဖွဲ့ကို ပြောဆိုခဲ့တာဖြစ်ပြီး တိုင်းရုံးကတဆင့် ခရိုင်နဲ့ မြို့နယ်ကို ညွှန်ကြားတာလို့ အုပ်ချုပ်ရေးနဲ့ နီးစပ်သူတယောက်က ပြောပါတယ်။
“ဒီဇင်ဘာက နှစ်တိုင်းလုပ်နေကျ။ ဒါပေမဲ့ ဒီနှစ်က အရင်နှစ်နဲ့မတူဘူး၊ လွတ်လပ်ရေးအကြိုပွဲတွေ လူထုလမ်းလျှောက်ပွဲတွေ လုပ်ခိုင်းတာ။ ဦးဆောင်လုပ်မယ့်သူရှိရင်လည်း လုံခြုံရေးအပြည့်ပေးဖို့၊ လူစည်ကားတဲ့နေရာ ရွေးပေးဖို့၊ လုပ်သမျှ မှတ်တမ်းတင် ဓာတ်ပုံရိုက်ပို့ပြီး တိုင်းအစိုးရကို အချိန်နဲ့တပြေးညီ ပို့ဖို့ ညွှန်ကြားတာ။ ဓာတ်ပုံရိုက်ဖို့ အခက်အခဲရှိရင် ပြန်/ဆက်ကို အကူအညီ တောင်းဖို့ ညွှန်ကြားတာ။”
မြို့နယ်မှာပါဝင်တဲ့ အုပ်ချုပ်ရေးအဖွဲ့တွေက မိမိမြို့နယ်အတွင်း ဒီဇင်ဘာ လူထုလမ်းလျှောက်ပွဲ အပါအဝင် ပျော်ပွဲရွှင်ပွဲ ၃ ကြိမ် ပြုလုပ်ရမှာဖြစ်ပြီး မြို့နယ်နဲ့ မြို့ရှိတဲ့ အုပ်ချုပ်ရေးအဖွဲ့တွေက ၅ ကြိမ်နဲ့အထက် ပြုလုပ်ရမှာဖြစ်တယ်လို့ မြောက်ဒဂုံ ရပ်ကွက်တာဝန်ခံတယောက်က ပြောပါတယ်။
“မြို့နယ်ဆိုရင် ဒီဇင်ဘာ စုပေါင်းလမ်းလျှောက်ပွဲ တကြိမ်၊ လွတ်လပ်ရေးအကြိုက တကြိမ် တခြားခေါင်းစဥ်နဲ့က တကြိမ် လုပ်ပေးရမယ်။ ဥပမာ စျေးရောင်းပွဲတို့၊ နှစ်ကျိပ်ရှစ်ဆူတို့၊ လမ်းဖွင့်ပွဲတို့၊ မြို့တွေရှိတဲ့ မြို့နယ်ကျတော့ မြို့နယ်က ၃ ကြိမ်၊ မြို့က ၂ ကြိမ်၊ စုစုပေါင်း ၅ ကြိမ် လုပ်ရမှာ။ အရေးကြီးတာ လူစည်ကားနေဖို့ပဲ။”
အဆိုပါ ပျော်ပွဲရွှင်ပွဲတွေကို ဒီဇင်ဘာ ၂၈ ရက် မတိုင်ခင် ပြုလုပ်ရမှာဖြစ်ပြီး ထပ်မံပြုလုပ်မယ့် ပျော်ပွဲရွှင်ပွဲတွေကို ဒီဇင်ဘာ ၃၀ ရက်ကစပြီး ပြန်လည်ခွင့်ပြုပေးမှာလို့ သူက ရှင်းပြပါတယ်။
အခုလို ပျော်ပွဲရွှင်ပွဲတွေလုပ်တာဟာ နိုင်ငံတကာအမြင်မှာ မြန်မာနိုင်ငံအတွင်း တည်ငြိမ်အေးချမ်းနေတယ်လို့ ထင်မှတ်အောင် စစ်ကောင်စီရဲ့ ဝါဒဖြန့် လိမ်လည် ဆိုက်ဝါးထည့်မှု တခုသာ ဖြစ်တယ်လို့ နိုင်ငံရေးလေ့လာသူတယောက်က သုံးသပ် ပြောဆိုပါတယ်။
“ပျော်ပွဲရွှင်ပွဲတွေ ကြည့်ပြီး မြန်မာနိုင်ငံရဲ့အခြေအနေကို သုံးသပ်ရင် မှားသွားလိမ့်မယ်။ တောင်ကြီး မီးပုံးပျံပွဲ လုပ်နေတဲ့အချိန် ရခိုင်မှာ ဗုံးကြဲလို့ သေတဲ့ ဒေသခံတွေ မနည်းဘူး။ ပြည်သူ့ရင်ပြင်မှာ လူတွေ ကခုန်နေတဲ့အချိန် မတ္တရာ၊ စဥ့်ကူး၊ သပိတ်ကျင်းမှာ ဗုံးကြဲလို့ အသက်လုပြေးနေရတဲ့သူတွေ ရှိတယ်။”
နေ့စဥ် ဘာသာရေးဆိုင်ရာ အဆောက်အအုံတွေနဲ့ ပြည်သူတွေကို ဗုံးကြဲသတ်ဖြတ်နေတဲ့ အာဏာသိမ်း စစ်ခေါင်းဆောင် အနေနဲ့ နိုင်ငံတကာအမြင်မှာ တိုင်းပြည် တည်ငြိမ်အေးချမ်းတယ်လို့ ထင်အောင် ပျော်ပွဲရွှင်ပွဲလုပ်နေတာ ဖြစ်ပါတယ်။
