မိုးကုတ်မြို့ကနေ ထွက်ခွာမယ့်ရက်တွေမှာ ဒေသတော်လှန်ရေးအင်အားစုတွေအနေနဲ့ လုံးဝကျည် မဖောက်ဖို့ တအာင်းအမျိုးသားလွတ်မြောက်ရေးတပ်မတော် (TNLA)က တားမြစ်ထားတယ်လို့ မိုးကုတ်သပိတ်ခေါင်းဆောင်က ပြောပါတယ်။
မန္တလေးတိုင်း၊ မိုးကုတ်မြို့ကို လက်လွှတ်ဖို့ စစ်ကောင်စီနဲ့သဘောတူထားတဲ့ TNLA က နိုဝင်ဘာ ၂၉နဲ့ ၃၀ ရက်တွေမှာ နောက်ဆုံးထားပြီး မြို့ကနေ ထွက်ခွာသွားဖို့ရှိနေတယ်လို့ မိုးကုတ်သပိတ်ခေါင်းဆောင်က ပြောပါတယ်။
အဲ့ဒီရက်တွေမှာ စစ်ကောင်စီတပ်တွေလည်း တခါတည်းဝင်လာတာမျိုးဖြစ်လာနိုင်ပြီး ဘယ်လိုပုံစံ၊ ဘယ်လိုလမ်းကြောင်းကနေ ဝင်လာမယ်ဆိုတာကိုတော့ အတိအကျမသိနိုင်သေးဘူးလို့ ဆိုပါတယ်။
မိုးကုတ်မြို့ကို လက်လွှတ်မယ်လို့ TNLA က အောက်တိုဘာ ၂၉ ရက်က ကြေညာခဲ့ပြီးနောက်ပိုင်း ဒေသကာကွယ်ရေးအဖွဲ့တွေကို သူတို့သတ်မှတ်ထားတဲ့ စခန်းကုန်းတွေမှာသာ အခြေချခွင့် ပြုထားတယ်လို့လည်း သိရပါတယ်။
လတ်တလောဖြစ်ပေါ်နေတဲ့ မတ္တရာ၊ ဖော့တော့လမ်းဆုံဘက်ကနေ အင်အားအလုံးအရင်းနဲ့ ဝင်လာမယ်၊ TNLA ဝတ်စုံတွေဝတ်ပြီး မိုးကုတ်မြို့ထဲ စစ်ကောင်စီတပ်သားတွေ စိမ့်ဝင်နေပြီဆိုတဲ့ သတင်းတွေကတော့ စစ်ကောင်စီကဘက်က တော်လှန်ရေးအင်အားစုတွေရဲ့ တုံ့ပြန်မှုနဲ့ မြို့ပေါ်က အခြေအနေတွေကို ထောက်ကြည့်ဖို့ သတင်းကစားတာမျိုး ဖြစ်တယ်လို့ မိုးကုတ်သပိတ်ခေါင်းဆောင် ကိုစိုးဌေးက မှတ်ချက်ပေးပါတယ်။
“ထောက်ကြည့်သလောက်တော့ အဲဒီလိုလှုပ်ရှားမှုတော့မရှိဘူး၊ စုဖွဲ့နေတာတော့ ရှိတာပေါ့။ ဖော့တောလမ်းဆုံဘက်ကဆိုတာ ဖြစ်နိုင်ခြေ တော်တော်နည်းတဲ့ သဘောရှိပါတယ်။ တကယ်တမ်း သူတို့ဝင်လာရင် မြိုရဲ့အရှေ့ဘက်ခြမ်း ရှမ်းလမ်းဆုံ အဲဒီဘက်တကြောကနေ ဝင်လာဖို့များတယ်။ TNLA ဝတ်စုံဝတ်ပြီး အထဲကို စိမ့်ဝင်နေတယ်ဆိုတာတော့ ကျနော်တို့ သေချာတော့ မသိနိုင်ပေမဲ့ ဖြစ်နိုင်ခြေ တော်တော်နည်းတဲ့ကိစ္စလို့ ကျနော်တော့ မြင်တယ်လေ။ မြို့ထဲမှာလည်း ကျနော်တို့ ထောက်ကြည့်သလောက်တော့ အဲဒီအခြေအနေတွေတော့ မတွေ့ရသေးဘူး။ မြို့ထဲမှာတော့ အစောပိုင်းရက်တွေကတည်းက နေရာချထားပေးတော့ စိုးမိုးကုန်းတွေပေါ့နော် အဲဒီနေရာတွေမှာတော့ သွားနေနေကြတယ်။ မြို့ထဲမှာတော့ အဲဒီလိုမရှိတော့ပါဘူး အစောပိုင်း ရက်ကတည်းကပေါ့နော်။ ကျနော်တို့ရှိတဲ့နားတဝိုက်ကို လာပြီးတော့ တပ်ဖြန့်ထားတာရှိတယ် TNLA က ပေါ့နော်။ ၂၉ လောက်ဆို သူတို့ဆုတ်မယ်လို့တော့ ပြောတယ်။ လကုန် ၃၀ ရက်နေ့လောက်၊ ကျနော်တို့ကို ပြောတာတော့ အဲဒီရက်တွေမှာ ကျည်ပေါက်လို့ မရဘူးပေါ့နော်။ အဲ့ဒီနောက် သူတို့ထွက်သွားပြီးရင်တော့ ဘယ်လိုဖြစ်ဖြစ်ဆိုတဲ့ အနေအထားမျိုးပေါ့လေ၊ ပြောဖို့ နည်းနည်းတော့ စောသေးတယ်။ ဘာလို့ဆို ဒီထဲမှာ အလှည့်အပြောင်း အချိုးအကွေ့တွေ အများကြီးရှိနိုင်သေးတယ်။ TNLA က တပ်တွေကို ဆုတ်ထားပေါ့နော်၊ ဘယ်နားမှာအထိ နေထား ကျည်မပေါက်ရဘူးလို့ ဆိုထားပေမဲ့လို့ အထဲမှာ ဘယ်သူတွေရှိမယ် မရှိဘူးဆိုတာ သူတို့လည်း စဉ်းစားမှာပဲလေနော်။”
မိုးကုတ်မြို့ကနေ TNLA ထွက်ခွာသွားတဲ့အချိန်မှာ ဒေသကာကွယ်ရေးအဖွဲ့တွေက ဘယ်လိုတုံ့ပြန် ရှေ့ဆက်မယ်ဆိုတဲ့ ကိစ္စရပ်ကိုတော့ ဆွေးနွေးတိုင်ပင်ဆဲဖြစ်ပြီး ဆုံးဖြတ်ချက်မကျသေးဘူးလို့ ဒေသတော်လှန်ရေးအင်အားစုတွေက ပြောပါတယ်။
မိုးကုတ်မြို့နဲ့နယ်မြေချင်းထိစပ်နေတဲ့ မတ္တရာနယ်တခုလုံးနီးပါးကို စစ်ကောင်စီက စိုးမိုးထားပြီး လက်ရှိမှာ စဉ့်ကူးနယ်ကို စစ်ကြောင်းထိုးမယ့် အခြေအနေဖြစ်နေပြီလို့ မတ္တရာပြည်သူ့ကာကွယ်ရေးအဖွဲ့မှ ကိုဒေါင်းက ပြောပါတယ်။
“တနယ်လုံးဆိုပါတော့ဗျာ၊ မတ္တရာအနောက်မြောက်ခြမ်း မြစ်ကမ်းဘေးက ရွာလေးအနည်းငယ်လောက်ပဲ ရှိတော့တယ်၊ ကျန်တဲ့နေရာတွေက အကုန်လုံး စကစ စိုးမိုးသွားပါပြီဗျ။ သတ်ဖြတ်မှုတော့ရှိတဲ့အခါရှိတယ်၊ အရင်ထက်စာရင်တော့နည်းတယ်။ ခု သူတို့ ချော့ပြီးတော့ ပြည်သူကို စည်းရုံးခေါ်နေတယ်။ အဓိကက သူတို့မဲအတွက်ပဲလို့ ကျနော် သုံးသပ်မိတယ်ဗျ။ လက်ရှိမှာတော့ ကျနော်တို့ မတ္တရာနယ်မှာ စစ်ကြောင်းက ၄ ကြောင်း ထိုးနေတယ်ဗျ။ အရှေ့ဘက်ဆုံးဖျားကြောင်းကတော့ စဉ့်ကူးမြို့နယ် အရှေ့တောင်ခြမ်း ကတက်ချဉ်ရွာကို ရောက်ရှိနေပြီလို့ သတင်းရထားပါတယ်ဗျ။”
မိုးကုတ်မြို့နဲ့ မိုးမိတ်မြို့တွေကို ၂၀၂၄ ခု ဇူလိုင်လအတွင်းမှာ TNLA နဲ့ မဟာမိတ်တွေက သိမ်းယူခဲ့တာဖြစ်ပြီး တနှစ်ကျော်အကြာမှာ တရုတ်အစိုးရရဲ့ ကြားဝင်ဖိအားပေးမှုကြောင့် ပြန်လည်လက်လွှတ်ရမယ့် အခြေအနေဖြစ်လာခဲ့တာပါ။
ဒီအခြေအနေတွေနဲ့ပတ်သက်ပြီး TNLA ပြောရေးဆိုခွင့်ရှိသူကို DVB က အကြိမ်ကြိမ်ဆက်သွယ်မေးမြန်းဖို့ ကြိုးစားပေမဲ့ လက်ရှိအချိန်အထိ ပြန်လည်ဖြေဆိုတာ မရှိသေးပါဘူး။
သုတချမ်းသာ
